Kasin Mapeget a Tuloy so Biblia?

“BILANG sakey ya ugaw, anggapo so nibangat ed siak ya estandarte na Biblia. Ag-anggan asalambit a balot so Dios,” so insalaysay na kalangweran a lakin taga-Finland. Kaslakan la natan so ontan ya impamabaleg. Dakel la, nagkalautla iray kalangweran, so mangipapasen ed Biblia a dagdaan la tan saray simbawa na satan et mapegpeget. Saramay malabay a manumbok ed Biblia so ipapasen na arum bilang napapairap a totoo, a nabebelatan so bilay da lapud saray panameget tan ganggan. Kanian, moriaen na dakel a magmaong no agla babasaen so Biblia tan paigiya la ed sananey a lapuan.

Say manunan sengegan na ontan a panmoria nipaakar ed Biblia et say andukey lan awaran na pamapairap na saray relihyon na Kakristianoan. Alimbawa, legan na peryodo a tinawag na pigaran historyador a Mauddiem a Panaon, kinontrol lawari na Iglesia Katolika ed Europa so amin ya aspekto na bilay na totoo. Siopaman a makpel ya onsumlang ed simbaan so napairap odino napapatey ni ingen. Saray iglesia na Protestanti, a linmesa ed saginonor, so ameget met ed personal a kawayangan. Natan, saray termino a singa say “Calvinist” odino “Puritan” so mangipanonot ed sakey ya aliwa lambengat iratan a grupo a manutumbok ed pigaran sisisiaen noagta sikaray maruksan managdusa met. Bilang resulta et lingon iisipen la na totoo a makapairap iray bangat na Biblia, lapud saray relihyon et managpairap.

Diad agano niran siglo, naandian la na impluensya iray relihyon ed bilay na totoo, diad pigaran daldalin. Kayari impangipulisay ed saray abangonan a relihyoson doktrina, panisiaan na dakel a kanepegan da so mandesidi a bukor no anto so duga tan aliwa. Balet, anto so resulta? Oniay insalaysay nen Ahti Laitinen, sakey a propesor na criminology tan judicial sociology: “Naaandi la so panagrespeto ed autoridad, tan lalon ombuburagas so pakatebek na totoo ed no anto so matukoy tan andi.” Diad kasunian, anggan saray lider na relihyon so miabobon la ed ontan a kaisipan. Inkuan na sakey a prominentin obispo na Lutheran: “Agak kompormi ed ideyan naresolbe iray problema ed moral diad itupleg ed Biblia odino ed saramay walaan na autoridad ed relihyon.”

Kasin Maabig so Ag-ageteran a Kawayangan?

Say ideya na ag-ageteran a kawayangan so nayarin makapasagyat, nagkalautla ed saray kalangweran. Pigpigara so malabay ya ompasen ya abebbeba odino kaukolan a manbilay unong ed sakey a listaan na saray manepeg tan agmanepeg. Balet, kasin amin et bulos lan manggawa na antokaman a kaliktan ton gawaen? Pian naebatan iyan tepet, konsideraen pa so sakey ya ilustrasyon. Isipen pa so sakey a syudad ya andian na saray ley ed trapiko. Agkakaukolanen so lisensiay drayber odino eksamin ed panagmaneho. Makapanmaneho so totoo ed antokaman a paraan a labay da, anggan sano abuek tan agkaukolan a pampagaan iray nigetar a peles, saray sinyal  ya ontunda, saray silew ed trapiko, saray karsada ya agnayari man-abetan, odino saray beltangan na saray manaakar. Kasin maabig so ontan a “kawayangan”? Maseguron andi! Manresulta itan ed gulo, pakawetwet, tan disgrasya. Anggaman pupugeran na saray ley ed trapiko so kawayangan na totoo, namoria tayo a sarayan ley so manasalimbeng ed saray drayber ontan met ed saray manaakar.

Mipadpara, si Jehova so mangiwawanwan no panon so nepeg tayon pambilay. Saya so mangunggona ed sikatayo. No anggapo so ontan a giya, kaukolan tayon aralen iray bengatla panamegley na panali tan lingo, tan diad panggawa ed satan, nasakitan tayo so inkasikatayo ontan met iray arum. Say ontan ya atmospera na sigpot a kawayangan ed moral et aliwan maabig tan makapadesyang ni ingen a singa itan panagmaneho ed syudad ya anggapo iray ley na trapiko. Say katuaan et nakaukolan tayo iray totontonen tan ganggan—katuaan a mabulos ya aawaten na karaklan a totoo.

“Anlemew so Awit Ko”

Nayarin lalanoren na saray ley ed trapiko so andukerukey tan detalyadon listaan na saray regulasyon—a diad arum a lugar et agaylay kinarakel na totontonen nipaakar ed panagparada labat. Diad pidumaan, agmangipaparungtal so Biblia na andukey a listaan na saray totontonen. Imbes, idadatak na satan iray manunan prinsipyo, tan saraya so agmakapabelat odino makapairap. Makapasagyat so imbitasyon nen Jesu-Kristo ed saray kapanaonan to: “Dago kayo’d siak, amin yon nasasagpotan tan nabebelatan, et ikdan ta kayo’y pampainawa. Ta say pakok mainomay, tan anlemew so awit ko.” (Mateo 11:28, 30) Oniay inkuan nen apostol Pablo diad sakey a sulat to ed kongregasyon na saray Kristiano ed Corinto: “No iner so kawalaan na espiritu na Katawan, diman so kawalaan na kawayangan.”—2 Corinto 3:17.

Balet, satan a kawayangan so ageteran. Malinlinew ya impabitar nen Jesus a lalaktipen na saray kakaukolanen na Dios so pigaran simplin ganggan. Alimbawa, inkuan nen Jesus ed saray babangatan to: “Saya so ganggan ko, a manaaroan so sakey tan sakey ed sikayo, salanti singa impangarok ed sikayo.” (Juan 15:12) Isipen pa no antoy pagmaliwan na bilay no amin so mangiyaplika ed satan a ganggan! Kanian say kawayangan a panggagayagaan na saray Kristiano et walaan na saray limitasyon. Insulat nen apostol Pedro: “Unong ed bulos kayo, ya aliwa a say aagamilen yo ya inkablos sikato so sakbong na kaugsan, noag ingen lapu ed aripen kayo’y Dios.”—1 Pedro 2:16.

Kanian, anggano saray Kristiano so agkokontrolen na detalyadon listaan na saray ganggan, ag-ira onkikiwas unong ed saray dilin ideya ra no anto so duga tan aliwa. Nakaukolan na totoo so giya a say Dios lambengat so makapangiter ed sikara. Malinew so ibabaga na Biblia: “Aliwa a wala ed too a manakar a mangitonton ed saray kurang to.” (Jeremias 10:23) No ontulok tayo ed panangiwanwan na Dios, nagunggonaan itayon maong.—Salmo 19:11.

Sakey ed saray gunggona et say liket. Alimbawa, say asaglawi ed gapo a malangwer a laki so datin matakew tan matila. Mabanday so kabibilay to. Sanen naaralan to iray atagey ya estandarte na Biblia, pinasimbalo to so kabibilay to pian nitunos ed saratan. Oniay inkuan to: “Anggaman  agko atumbok a tampol so amin ya estandarte na Biblia, talagan atalosan ko iray kablian na saratan. Say datin kabibilay ko so ag-amawala na liket a panggagayagaan ko la natan. Say pambilay unong ed saray estandarte na Biblia so mamasimpli ed bilay mo. Amtam so arapen mo tan amtam no anto so duga tan aliwa.”

Ontan met so naeeksperiensya na minilyon a totoo. Sakey ed saray gunggona et say giya a naromog ed Biblia so ontutulong ed sikara a nawalaan na maaligwas a relasyon ed kaparan too, nabayuboan so asimbang a panmoria ed trabaho, napaliisan iray ugalin makaderal, tan sirin et manbilay a mas maliket. Si Markus, * sakey a kalangweran a lakin asali toy nambilay a parehon walaan tan andian na saray estandarte na Biblia, so angikuan nipaakar ed mismon bilay to: “Diad pambibilay ko unong ed Biblia, apaaralem ko so dilin-respetok.” *

Anto so Pilien Mo?

Kanian, kasin mapeget so Biblia? Say ebat et on—parad pakagunggonaan tayon amin. Balet kasin mapeget a tuloy so Biblia? Say ebat et andi. Say ag-agetaran a kawayangan so mangitonton labat ed saray problema. Saray estandarte na Biblia so asimbang, tan lalo iratan a mangunggona tan mamaliket ed sikatayo. Inkuan nen Markus: “Diad inlabas na panaon et amoriak a makabat so pangiyaplika na Salitay Dios ed bilay. Anggaman diad dakel a paraan et midumaan so bilay ko ed karaklan a totoo, agkon balot inisip a walay bengatlan nasasaew kon maabig ed bilay ko.”

Onaralem so panamablim ed Salita na Dios sano naeksperiensyam la iray bendisyon diad pambibilay mon mitunosan ed saray estandarte na Biblia. Saya so mangitonton ed babaleg nin bendisyon—naarom so madibinon Lapuan na satan, si Jehova a Dios. “Saya so aro na Dios, a sumpalen tayo so saray ganggan to: tan saray ganggan to aliwa ran ambelat.”—1 Juan 5:3.

Si Jehova so namparan Manamalsa tan mangatatawen ya Ama tayo. Amta to no antoy sankaabigan parad sikatayo. Imbes a pegetan to itayo, sikatoy maaron mangiwawanwan ed sikatayo parad pankaabigan tayo. Diad maanlong a balikas et papasesegen itayo nen Jehova: “O no komon ta dinengel mo so saray bilin ko! Dia ed ontan say deen mo singa komon sakey ya ilog, tan say inkatunong mo singa komon daluyon na dayat.”—Isaias 48:18.

[Saray paimano ed leksab]

[Litrato ed pahina 9]

Inkuan nen Jesus a makaparepresko iray kakaukolanen na Dios

[Litrato ed pahina 10]

Say itulok ed panangiwanwan na Dios so mangitarok na liket tan dilin-respeto