Lalon Ombiskeg so Panagpakpel Lapud Aro
Lalon Ombiskeg so Panagpakpel Lapud Aro
“Ag-itayo inikdan na Dios na espiritu na katakotan; noag say pakayari tan say aro tan say maong a linawa.”—2 TIMOTEO 1:7.
1, 2. (a) Anto so nagawaan na sakey a too no sikatoy pakiwasen na aro? (b) Akin a nikadkaduma so impanpakpel nen Jesus?
WALAY balon kasal a nan-scuba diving diad asingger ed sakey a baley ed bukig a baybay na Australia. Sanen onimwas la ra, walay baleg a pating a nitan lan manuklos ed samay bii. Diad agnalingwanan a ginawa na asawan laki, intulak to so asawa to tan sikato so kinulab na samay pating. “Insakripisyo to so mismon bilay to parad siak,” so inkuan na samay abalon bii diad ponpon na asawa to.
2 On, say aro so mamakiwas ed totoo pian ipatnag da so alay abig a panagpakpel. Oniay imbagan mismo nen Jesu-Kristo: “Andian so too na babaleg ya aro nen saya, a sakey a too italaga to so bilay to nipaakar ed saray kakaaro to.” (Juan 15:13) Anggapo ni 24 ya oras kayarin imbaga nen Jesus irayan salita, inter to so dilin bilay to, aliwa labat a parad sakey a too, noagta parad katooan. (Mateo 20:28) Niarum ni, say makpel ya impangisakripisyo nen Jesus ed bilay to et aliwa a biglaan. Amta to la a sikato so nabalaw tan maltratoen, agmakatunongan a nasentensiaan, tan pateyen diad panamairapan a kiew. Imparaan to ni ingen iray babangatan to ed sayan pansumpalan, a kuan to: “Nia, ontatdang itayo ed Jerusalem; et say Anak na too niyawat ed saray manunaan a saserdote tan saray eskribas; tan sikatoy dusaen da naani na ipapatey, tan sikatoy ‘yawat da naani ed saray Gentiles. Tan sikatoy ludlureyen da naani, tan sikatoy lutdaan da, tan sikatoy bakbaken da naani, tan sikatoy pateyen da.”—Marcos 10:33, 34.
3. Anto so makasengeg ed matalonggaring ya impanpakpel nen Jesus?
3 Anto so makasengeg ed nikabkabiig ya impanpakpel nen Jesus? Baleg so agawaan na pananisia tan maridios a takot. (Hebreos 5:7; 12:2) Balet, mas importante ed amin, say inkakpel nen Jesus so makasengeg ed panangaro to ed Dios tan ed totoo. (1 Juan 3:16) No bayuboan tayo so ontan ya aro nilikud ed pananisia tan maridios a takot, nipatnag tayo met so singa-Kriston inkakpel. (Efeso 5:2) Panon tayon nabayuboan so ontan ya aro? Nakaukolan tayon ibiig so Lapuan na satan.
“Say Aro Kien na Dios”
4. Akin a nibaga a si Jehova so Lapuan na aro?
4 Si Jehova so personipikasyon na aro tan say Lapuan na satan. “Inararok ira,” so insulat nen apostol Juan, “manaaroan so sakey tan sakey ed sikatayo; ta say aro kien na Dios; anggan siopa a mangaro nianak ed Dios, tan kaba’to so Dios. Say agmangaro agto kabat so Dios; ta say Dios sikato so aro.” (1 Juan 4:7, 8) Sirin, say aro ya impatnag na Dios so nabayuboan labat na sakey a too no sikatoy onapit ed si Jehova diad panamegley na suston pikakabat tan onkiwas unong ed satan a pikakabat tekep na impapuson katutulok.—Filipos 1:9; Santiago 4:8; 1 Juan 5:3.
5, 6. Anto so akatulong ed akadkauna iran patumbok nen Jesus pian nabayuboan da so singa-Kriston aro?
5 Diad sampot lan pikakasi to a kaiba so 11 a matoor ya apostoles to, impatnag nen Jesus so pansiglaotan na pikabat ed Dios tan ibulaslas ed aro, a kuan to: “Impakabat ko ed sikara so ngaran mo, tan ipakabat kon siansia pian say aro ya impangarom ed siak wala ed sikara tan siak ed sikara.” (Juan 17:26) Tinulongan nen Jesus iray babangatan to a bayuboan so klase na aro a niwala ed baetan dan san-Ama, ya impatnag to diad salita tan alimbawa no antoy irerepresenta na ngaran na Dios—saray alay abig a kalidad na Dios. Kanian, oniay nibaga nen Jesus: “Say akanengneng ed siak anengneng to so Ama.”—Juan 14:9, 10; 17:8.
6 Say singa-Kriston aro so bunga na masanton espiritu na Dios. (Galacia 5:22) Sanen naawat na saray akadkaunan Kristiano so insipan a masanton espiritu nen Pentecostes 33 C.E., agda lambengat anonotan so dakel ya imbangat ed sikara nen Jesus noagta lalon atalosan da so kabaliksan na saray Kasulatan. Sayan mas aralem a pakatalos so mapatnag ya amabiskeg ed panangaro ra ed Dios. (Juan 14:26; 15:26) Anto so resulta? Anggaman niiyan ed peligro so mismon bilay da, sikara so makpel tan maseseg ya angipulong ed maong a balita.—Gawa 5:28, 29.
Inkakpel tan Panangaro a Nipapatnag ed Gawa
7. Anto so kinaukolan a sungdoan di Pablo tan Bernabe diad impan-misionaryo ra?
7 Oniay insulat nen apostol Pablo: “Ag-itayo inikdan na Dios na espiritu na katakotan; noag say pakayari tan say aro tan say maong a linawa.” (2 Timoteo 1:7) Si Pablo so mansasalita unong ed dilin eksperiensya to. Konsideraen no anto so sinagmak dan dua nen Bernabe diad impan-misionaryo ra. Nampulong ira ed dakel a syudad, a singa say Antioquia, Iconio, tan Listra. Diad kada syudad, arum a totoo so nagmaliw a mananisia, balet arum so nagmaliw a maruksan sumusumpa. (Gawa 13:2, 14, 45, 50; 14:1, 5) Diad Listra et wala ni ingen so sinmanok a grupo na totoo ya anupak ed si Pablo, a sikatoy intilak dan patey-pateyan! “Balet nen sikato so niliktob na saray binangatan, inmalagey et linmoob ed syudad; et dia ed kaimbuasan, linma, pati si Bernabe, diman ed Derbe.”—Gawa 14:6, 19, 20.
8. Panon ya impatnag nen Pablo tan Bernabe so aralem a panangaro ra ed totoo?
8 Kasin sayan impangigagaem a pamatey ed si Pablo so anaktakot ed sikato tan si Bernabe pian ontunda lan manpulong? Andin balot! Kayari ran ‘aparakel iray babangatan’ diad Derbe, sikaran dua so ‘pinmawil ed Listra, tan Iconio, tan Antioquia.’ Akin? Ta pian napaseseg iray balo ni pian mansiansia iran mabiskeg ed pananisia. “Dia ed dakel ya irap nakaukolan ya onloob itayo ed panariay Dios,” so imbaga nen Pablo tan Bernabe. Malinew, sikaray akapampakpel lapud aralem a panangaro ra ed saray ‘angkelag a karnero’ nen Kristo. (Gawa 14:21-23; Juan 21:15-17) Kayari na impanuro ra ed saray mamatatken ed kada balon kongregasyon, sayan duaran agagi so angiyapay na pikakasi tan “inmatalek da ra ed Katawan, a sikato so sinisia ra.”
9. Diad anton paraan so inkiwas na saray mamatatken ed Efeso ed panangaro nen Pablo ed sikara?
9 Si Pablo et maasikaso tan makpel a too kanian dakel a Kristiano so angaron maong ed sikato. Nodnonoten pa so agawa sanen akilimog si Pablo ed saray mamatatken ed Efeso, a nanayaman to ed loob na taloy taon tan akaeksperiensyaan to na pirmin isusumpa. (Gawa 20:17-31) Kayari na impamaseseg to ed sikara a pastolan da so pulok na Dios a nimatalek ed sikara, si Pablo so tinmalimukor tan nampikasi a kaiba ira. Insan, “sikara ya amin nannangis ira na baleg, et nilakap da ed beklew si Pablo, tan sikato so inangoban da. A nanermen ira ya amin na mapalalo lapu ed salita ya imbaga to ya agda la nanengneng naani so lupa to.” Agayla so panamabli na sarayan agagi ed si Pablo! On, sanen sinmabi lay oras na pansisian da, kinaukolan a si Pablo tan saray kaiba ton manbabaroy et ‘isian day inkasikara,’ lapud ngalngalin ag-ira paalisen na saray lokal a mamatatken.—Gawa 20:36–21:1.
10. Panon ya ipapatnag na saray modernon Tasi nen Jehova so aro ra ed balang sakey?
10 Natan, saray ombiabiahen manangasikaso, mamatatken ed kongregasyon, tan dakel ni ra so aaroen a maong lapud inkakpel ya ipapatnag da parad saray karnero nen Jehova. Alimbawa, diad saray bansan atabek lay guerra sibil odino sebel so panagpulong a kimey, saray ombiabiahen manangasikaso tan saray kaasawaan da so angirisga ed bilay tan kawayangan da ta pian nabisita iray kongregasyon. Ontan met, dakel a Tasi so anagmak na irap ed saray masumpan manuley tan saray patumbok da lapud agda intapat iray kapara ran Tasi odino impaamta so panlalapuan na espiritual a tagano ra. Nilibo ni so napapasegsegang, napapairap, tan papateyen ni ingen lapud ag-ira ontunda ed panangipulong ed maong a balita odino ed pililimog ed saray kapananisiaan diad Makristiano iran pantitipon. (Gawa 5:28, 29; Hebreos 10:24, 25) Komon ta aligen tayo so pananisia tan aro na saratan a makpel ya agagi!—1 Tesalonica 1:6.
Agyo Aabuloyan ya Ombetel so Aro Yo
11. Diad antoran paraan a mibabakal ed espiritual si Satanas sumpad saray lingkor nen Jehova, tan anto so nakaukolan dan gawaen?
11 Sanen nibasileng si Satanas diad dalin, sikato so determinadon mangipangget ed sanok to ed saray lingkor nen Jehova lapud ‘panguunor da ed ganggan na Dios, tan pantatasi ra ed si Jesus.’ (Apocalipsis 12:9, 17) Sakey ed saray taktika nen Satanas et say panamasegsegang. Balet, satan a taktika et mabetbet ya ombuelta ed sikato lapud lalo la ingen ya onaapit so totoo na Dios ed balang sakey diad bedber na Makristianon aro tan napapakiwas so dakel ed sikara a lalon onseseg. Say sakey nin taktika nen Satanas et say pananagyat to ed makasalanan iran tendensia na too. Pian naresistian iyan taktika to, nakaukolan so sakey a klase na inkakpel lapud say pibabarangkaan et akindalem, sumpad saray agmanepeg a pilalek diad loob na dilin ‘manamalingo tan mapalalo a mauges’ a puso tayo.—Jeremias 17:9; Santiago 1:14, 15.
12. Panon ya uusaren nen Satanas so “espiritu na mundo” pian napakapuy to so panangaro tayo ed Dios?
12 Say sananey nin mabiskeg ya ayura nen Satanas et say “espiritu na mundo,” salanti, say mabiskeg ya inklinasyon odino motibasyon, a direktan onsusumpa ed masanton espiritu na Dios. (1 Corinto 2:12) Iyaalibansa na espiritu na mundo so agum tan materyalismo—say “kilalawan na mata.” (1 Juan 2:16; 1 Timoteo 6:9, 10) Anggaman saray materyal a bengatla tan kuarta et aliwan mauges, manbiktorya si Satanas no mas inaro tayo iratan nen say Dios. Say “pakayari,” odino autoridad na espiritu na mundo et wala ed pananagyat na satan ed makabos a laman, say kasiliban na satan, say agmanundan pangiimpluensya na satan, tan say kikakayat na satan ed amin a pasen a singa dagem. Agyo aabuloyan so espiritu na mundo a mangimpluensya ed puso yo!—Efeso 2:2, 3; Uliran 4:23.
13. Panon a nasubok so inkakpel tayon pansiansiaen so inkalinis ed moral?
13 Balet, pian naresistian tan nipulisay so mauges ya espiritu na mundo, nakaukolan tayo so inkakpel pian napansiansia tayo so inkalinis ed moral. Alimbawa, nakaukolan so inkakpel pian onalagey tan ompaway ed sinean odino erepen so kompyuter odino TV sano nipapalabas iray imoral iran litrato. Nakaukolan met so inkakpel pian ontalindeg sumpad pananesdes na saray kalimog tan paliisan iray mauges a kaulop. Ontan met, nakaukolan so inkakpel pian itandoro iray ganggan tan prinsipyo na Dios anggaman ed panagbalaw na saray kaeskuela, katrabaho, kakaabay, odino kakanayon.—1 Corinto 15:33; 1 Juan 5:19.
14. Anto so nepeg tayon gawaen sano naimpluensyaan itayo na espiritu na mundo?
14 Agaylan kaimportante sirin a pabiskegen tayo so aro tayo ed Dios tan ed espiritual ya agagi tayo! Ipanaon so pangusisa ed saray kalat tan paraan na kabibilay yo pian nausisa yo no kasin naapektoan kayo lay espiritu na mundo diad antokaman a paraan. No naimpluensyaan kayo la—anggan daiset labat—manpikasi ed si Jehova pian makapanpakpel a mangiwaklit tan ompaliis ed satan. Ag-ibaliwala nen Jehova iratan a masimoon a kerew. (Salmo 51:17) Niarum ni, say espiritu to so mas mabiskeg ni nen say espiritu na mundo.—1 Juan 4:4.
Makpel ya Arapen Iray Mismon Subok ed Sikatayo
15, 16. Panon tayon natulongan na singa-Kriston aro pian natalonaan iray mismon subok ed sikatayo? Mangiter na sakey ya alimbawa.
15 Arum ed saray angat a nakaukolan a pipuligesgesan na saray lingkor nen Jehova et saray epekto na ag-inkayadyari tan inkatakken, a mabetbet a manreresulta ed sakit, pakawalaan na depekto ed laman, depresyon, tan dakel niran problema. (Roma 8:22) Say singa-Kriston aro so ontulong ed sikatayo pian natalonaan irayan subok. Konsideraen pa so alimbawa nen Namangolwa, a binmaleg ed sakey a Kristianon pamilya diad Zambia. Sanen duay taon to, sikato so awalaay depekto ed laman. “Pinonot koy itsurak,” so inkuan to, “lapud iisipen kon nabigla so totoo no nanengneng day kipapasen ko. Balet ta tinulongan ak na saray espiritual ya agagik a moriaen iray bengatla diad duman paraan. Bilang resulta, atalonaan kon siansia so negatibon liknaan ko, tan sinmabi so panaon a siak so abautismoan.”
16 Anggaman walay wheelchair nen Namangolwa, sikato so mabetbet a manaakar panamegley na saray lima tan pueg to diad mabuer tan marutak a karsada. Ingen, sikato so mibibiang ed ministeryo bilang auxiliary payunir manga duaran bulan ed kada taon. Akanangis so sakey ya unabung sanen sikato so apulongan nen Namangolwa. Akin? Lapud sikato so atenyeg a maong ed pananisia tan inkakpel na sayan agi tayo. Bilang ebidensya na mayaman a panamendisyon nen Jehova ed si Namangolwa, limara ed saray iyaaralan toy Biblia so abautismoan, tan sakey so manlilingkor la bilang matatken ed kongregasyon. “Naynay a manot-ot iray salik,” so inkuan to, “balet agko itan aabuloyan a mangamper ed siak.” Sayan agin bii so sakey labat ed dakel iran Tasi ed sankamundoan a walaan na maletey a laman balet ta mabiskeg ed espiritu lapud panangaro ra ed Dios tan ed kapara ran too. Agaylan makaroyroyo iratan ya amin ed imaton nen Jehova!—Aggeo 2:7.
17, 18. Anto so makakatulong ed dakel pian nasungdoan da so sakit tan arum niran subok? Mangiter na arum niran alimbawa.
17 Say graben sakit so makapadismaya met, tan makapagonigon ni ingen. Oniay inkuan na sakey a matatken ed kongregasyon: “Diad CBS ya aatendian ko, sakey ya agin bii so walaay diabetes tan sakit ed bato, sakey so walaay kanser, duara so walaan na graben arthritis, tan sakey so walaan na lupus tan fibromyalgia. No maminsan et nadidismaya ira. Ingen, agda nasasaew iray pantitipon nilikud labat sano mansasakit ira a maong odino wala ra ed ospital. Amin da so regular ed lawak na serbisyo. Ipapanonot da ed siak so nipaakar ed si Pablo, a kuan to: ‘Sano siak so makapuy, dia ed satan mabiskeg ak.’ Pandinayewan ko so aro tan inkakpel da. Nayarin say kipapasen da et angiter ed sikara na mas malinew a panmoria ed bilay tan no anto so talagan importante.”—2 Corinto 12:10.
18 No mipupuligesgesan kayo ed graben depekto ed laman, sakit, odino arum niran problema, “mikasi kayo ya andi-tunda” parad tulong ta pian agkayo magmaliw a biktima na pakadismaya. (1 Tesalonica 5:14, 17) Siempre, nayarin naeeksperiensya yo so tubat-tubat a pakadismaya, balet panggunaetan yon iteen so nonot yo ed saray makapaseseg tan maespiritual a bengatla, nagkalalo la ed mablin ilalo tayo ed Panarian. “Parad siak, sakey a tambal so pibiang ed lawak na ministeryo,” so inkuan na sakey ya agin bii. Say panginanabang to na maong a balita ed arum so makakatulong pian napansiansia to so positibon panmoria.
Say Aro so Makatulong ed Saray Nankasalanan Pian Ompawil ed si Jehova
19, 20. (a) Anto so makatulong ed saramay akapankasalanan pian makapanpakpel ira ya ompawil ed si Jehova? (b) Anto so konsideraen ed ontumbok ya artikulo?
19 Dakel a linmetey ed espiritual odino akapankasalanan so naiirapan ya ompawil ed si Jehova. Balet nagamoran da so nakaukolan ya inkakpel sano sikara so peteg a magbabawi tan pabilayen da lamet so panangaro ra ed Dios. Konsideraen pa si Mario, a manaayam ed Estados Unidos. Tinmaynan ed kongregasyon si Mario, * nagmaliw a mainum na alak tan adik ed druga tan, kayari na 20 a taon et sikato so apriso. “Inisip kon maong so walad arapen ko tan binasak lamet so Biblia,” so inkuan nen Mario. “Sinmabi panaon, naapresyak iray kalidad nen Jehova, nagkalalo la ed panangasi to, a mabetbet kon ipipikasi. Sanen nibulos ak ed prisoan, pinaliisan ko laray datin kaulop ko, inmatendi ak ed saray Makristianon pantitipon, tan diad saginonor et akapawil ak. Aanien ko natan iray pisikal ya epekto na ginawak nensaman, balet natan et wala lay alay abig ya ilalok. Misalsalamat ak a maong ed si Jehova lapud panangabagey tan panamerdona to.—Salmo 103:9-13; 130:3, 4; Galacia 6:7, 8.
20 Siempre, saramay walad kipapasen a singa ed si Mario et kaukolan a manporsigi ya ompawil ed si Jehova. Balet say apabilay lamet a panangaro ra—bilang resulta na panagaral na Biblia, pikakasi, tan panagdalepdep—so mangiter ed sikara na nakaukolan ya inkakpel tan determinasyon. Si Mario so apabiskeg met ed ilalo ed Panarian. On, katekep na aro, pananisia, tan maridios a takot, say ilalo so walaan na mapuersan epekto pian nagunggonaan so bilay tayo. Diad ontumbok ya artikulo, imanoen tayon maong iyan mablin espiritual a langkap.
[Paimano ed leksab]
^ par. 19 Sinalatan so ngaran.
Kasin Naebatan Yo?
• Panon ya akatulong so aro pian nipatnag nen Jesus so matalonggaring a panagpakpel?
• Panon a say panangaro ra ed agagi so akatulong ed si Pablo tan Bernabe pian makapanpakpel ed nikaduman paraan?
• Diad anton paraan a panggugunaetan nen Satanas a pabetelen so Makristianon aro?
• Say aro ed si Jehova so mangiter ed sikatayo na inkakpel pian nasungdoan so antoran subok?
[Tepetepet Parad Panagaral]
[Litrato ed pahina 23]
Say panangaro nen Pablo ed totoo so angiter ed sikato na pakpel pian mantultuloy
[Litrato ed pahina 24]
Nakaukolan so inkakpel pian itandoro iray estandarte na Dios
[Litrato ed pahina 24]
Namangolwa Sututu