Nayarian Mo so Manbilay ya Andi-Anggaan

KARAKLAN ed saray mananisia ed saray relihyon ed mundo so mamapabli ed ilalon magnayon a bilay ed nanduruman nengneng. Nayarin mandudumaan so panangipaliwawa na kada relihyon, balet parpareho so ilaloan da—manbilay a maliket diad alay abig iran kipapasen ya anggapo lay ipapatey. Agta ontan met so pirawat mo? Panon a nipaliwawa so pirmin ikakayat na ontan a sisisiaen? Tan kasin ontua so iilaloan a magnayon a bilay?

Ipapabitar na Kasulatan ya insipor la na Manamalsa so pilalek a manbilay ya andi-anggaan diad akindalem a liknaan na too manlapu la’d gapo, sanen pinalsa to so inmunan sanasawan too. “Impasen [na Dios] so kaandoan ed puso ra,” so kuan na Biblia.—Eclesiastes 3:11.

Balet, pian nagamoran na inmunan paris a too so pilalek dan manbilay ya andi-anggaan, kaukolan dan awaten so autoridad na Dios a mandesidi no anto so duga tan aliwa. No inawat da itan, denesidi komon nen Jehova a makanepegan ira a manbilay “lawas” diad ayaman ya imparaan to ed sikara, say hardin na Eden.—Genesis 2:8; 3:22.

Abalang so Bilay ya Andi-anggaan

Ipapabitar na rekord na Biblia a pinatubo na Dios diad hardin so sakey a “kiew a pakaamtaan na maong tan mauges,” a say bunga na satan et insebel ton kanen di Adan tan Eva, ta no andi et ompatey ira. (Genesis 2:9, 17) Nipatnag nen Adan tan Eva ed Dios ya aawaten da so autoridad to no agda kanen itan a bunga. Diad biek a dapag, ipapatnag da ya ipupulisay da so autoridad na Dios no mangan ira ed satan. Ag-inunor nen Adan tan Eva iray bilin nen Jehova tan dinmapag ira ed si Satanas, sakey ya espiritun pinalsa a nanrebelde ed autoridad na Dios. Bilang resulta, makatunongan a denesidi na Dios ya agmakanepegan si Adan tan Eva a manbilay ya andi-angga.—Genesis 3:1-6.

Say inyopresi na Dios et bilay odino patey, kiwawala odino pakaandi. Say intunganga ra et nanresulta ed ipapatey tan sigpot ya impangangga na kiwawala ra. Si Adan tan Eva odino siopaman ed ilalak da so imposible a mantultuloy a manbilay panamegley na misteryoson iinumen odino imortal a kamarerwa. *

Amin ya ilalak nen Adan so maniirap lapud impanrebelde to. Insalaysay nen apostol Pablo iray epekto na satan. Insulat to: “Unong a say kasalanan linmoob ed mundo lapu ed sakey a too, tan say patey lapu ed kasalanan; et say patey ed satan linma ed amin a too, ta amin nankasalanan.”—Roma 5:12.

Agamoran Lamet so Bilay ya Andi-anggaan

Inyilustra nen Pablo so kipapasen na saray ilalak nen Adan diad impangipara to ed kipapasen na sakey ya aripen nen inmunan  siglo. Lapu ed atawir a kasalanan, agnapaliisan na saray ilalak nen Adan tan Eva so kianak bilang ‘aripen na kasalanan,’ a nitalagan ompatey. (Roma 5:12; 6:16, 17) Talagan agda napaliisan itan no ag-angitarya si Jehova na legal a remedyo ta pian saliwen so kawayangan na saratan ya aripen na kasalanan. Impaliwawa nen Pablo: “Lapu ed sakey a kasalanan [samay kasalanan nen Adan] dinmateng so pangukom ed amin a too ya onkana ed panusa; ontan met lapu ed sakey a gawa na katunongan dinmateng so langkap ed amin a too ya onkana ed pamatunong na bilay.” Satan a “gawa na katunongan” so angitonton ed impangibagat nen Jesus ed mismon ayadyarin bilay to bilang “kasimbangan a dondon parad amin.” Binidbir nen Jehova so legal a pakayari na dondon a mangibulos ed katooan manlapud “pangukom” ya onkana ed “panusa.”—Roma 5:16, 18, 19; 1 Timoteo 2:5, 6, NW.

Satan so rason no akin ya agbalot naromog na saray sientista ed genetic code na too so solusyon parad agmanampot a bilay. Aliwan ditan so pakaromogan ed solusyon. Unong ed Biblia, say manunan sengegan na ipapatey na katooan et nisiglaot ed moral tan legal ya isyu, aliwan diad pisikal. Diad ontan et kaukolan a legal met so paraan a pangipawil ed bilay ya andi-anggaan—say dondon bagat nen Jesus. Diad panamegley na dondon, napatnagan met so inkatunong tan maaron-kaabigan na Dios. Siopa sirin iray nagunggonaan ed dondon tan mangawat na andi-anggaan a bilay?

Say Langkap ya Imortalidad

Si Jehova a Dios so “manlapu ed andi-anggaan ya angga ed andi-anggaan.” Sikato so imortal. (Salmo 90:2) Si Jesu-Kristo so sankaunaan a persona a pinalangkapan nen Jehova na imortalidad. Impalinew itan nen apostol Pablo: “Si Kristo, binmangon ed saray inatey, agla ompatey; say patey agla makapanuley ed sikato.” (Roma 6:9) On, pinandumaan nen Pablo so kipapasen nen apaolin Jesus tan saray manuley a totoo diad impaneskribe to ed si Jesus bilang say alenleneg ed sikara a walaan na imortal a bilay. Si Jesus so “mansiansia ed andi-anggaan.” Say bilay to so “agnaderal.”—Hebreos 7:15-17, 23-25; 1 Timoteo 6:15, 16.

Aliwan si Jesus labat so makaawat na ontan a langkap. Saray nilanaan na espiritu a Kristiano ya apilin manuley bilang arari ed  mangatatawen a gloria so napaoli a singa ed impamaoli ed si Jesus. (Roma 6:5) Impabitar nen apostol Juan a sayan pribilehyo et nipagamor ed 144,000 ya indibidual. (Apocalipsis 14:1) Sikaray makaawat met na imortalidad. Nipaakar ed kioli ra, oniay inkuan nen Pablo: “Say laman tan dala agda nayarian a tawiren so nanarian na Dios . . . Say trumpeta ontanol, tan saray inatey onoli ra ed bilay ya agnaderal, tan nauman itayo. Ta saya a naderal kaukolan a kawesan na agnaderal, tan sayan ompatey kaukolan a kawesan na ag-ompatey.” Anggapo so pakayari na patey ed saramay mangawat na ontan a kikioli.—1 Corinto 15:50-53; Apocalipsis 20:6.

Talagan makatantanda iyan panangiparungtal na Dios. Anggaman saray anghel et espiritu, ag-ira pinalsa ya imortal. Paneknekan iya na katuaan a saramay espiritun pinalsa ya akiulop ed impanrebelde nen Satanas so naderal. (Mateo 25:41) Diad biek a dapag, saray manuley a kaiba nen Jesus so makaawat na langkap ya imortalidad, a satan so paneknek ed mabiskeg a kompiyansa nen Jehova ed katooran da.

Kasin kabaliksan na saya a saray 144,000 ya indibidual labat so manbilay ya andi-anggaan, a no isipen et dagdaiset ira sano ikompara ed binilyon a totoon nambilay la? Andi. Imanoen tayo no akin.

Bilay ya Andi-anggaan Diad Paraison Dalin

Say libro na Biblia ya Apocalipsis so marakdakep ya aneskribe ed agnabilang ya ulop na totoo a naikdan na bilay ya andi-anggan diad paraison dalin. Kabiangan ed sikara iramay inaatey balet ta pinaoli tan inikdan lamet na mabunigas tan maksil ya impanlaman. (Apocalipsis 7:9; 20:12, 13; 21:3, 4) Sikaray ipaarap ed “ilog na danum na bilay a manesiab a singa kristal, ya ompapaway ed trono na Dios.” Diad saray pangdel na satan et ‘walaray kiew na bilay tan saray bulong na saratan et onkana ed pakatambal na saray nasyones.’ Oniay mapangasin imbitasyon nen Jehova a Dios: “Say napgaan, ondago; et say malabay, mangala ed danum na bilay ya andi-bayar.”—Apocalipsis 22:1, 2, 17.

Sarayan kiew tan danum et aliwan pamparukey na bilay odino subol na inkalangwer, a singa saramay inanap na saray alchemist tan eksplorador. Imbes, irerepresenta na saratan iray probisyon na Dios panamegley nen Jesu-Kristo pian nipawil so katooan ed datin ayadyarin kipapasen.

Agni anguman so gagala na Dios ya ipagamor ed matulok a katooan so magnayon a bilay diad dalin. Nasumpal itan a gagala, lapud matoor si Jehova. Oniay ibabaga na Salmo 37:29: “Say matunong tawiren to so dalin tan manayam diman lawas.” Sayan sipan so mamakiwas ed sikatayo, tan ed saramay apagamoran na imortal a bilay ed tawen, pian iyabawag ya: “Angkakabaleg tan makapakelaw so saray gawam, O [Jehova] a Dios, a Makapanyarin-amin; maptek tan tua so saray dalan mo, Ari na saray tinaon. Siopa so ag-ontakot ed sika, O [Jehova], tan agmangigalang ed ngaran mo? Ta sika lambengat so Santo.”—Apocalipsis 15:3, 4.

Kasin pipirawaten mo so mablin langkap a magnayon a bilay? No ontan, nepeg mon paneknekan a sikay matoor tan matulok ed “Ari na saray tinaon.” Kaukolan mon aralen so nipaakar ed si Jehova tan si Jesu-Kristo, a lapud sikato et nagmaliw a posible so magnayon a bilay. Amin a mabulos a mangawat ed saray estandarte na Dios nipaakar ed duga tan aliwa so napalangkapan na ‘bilay ya andi-anggaan.’—Juan 17:3.

[Paimano ed leksab]

[Kahon/Litrato ed pahina 5]

Sakey ya Abaybayag lan Kugip

Say Epiko na Gilgamesh, a sakey ya andukey a salaysay ed Mesopotamia ya ibabagan apetsaan na komaduan milenyo B.C.E., so aneskribe ed panaanap na sakey a palbayani ed magnayon ya inkalangwer. Saray Ehipsio nensaman so angipreserba ed saray bangkay, lapud iisipen dan saray kamarerwa, a panisiaan dan imortal, so makapangusar lamet ed laman da. Kanian, walaray lubok na saray Ehipsio a kinargaan na nambabangil a kagawaan a nayarin nakaukolan na inatey dia ed tatawagen dan bilay kayari patey.

Diad limog na saray Intsik ya alchemist, ompatnag a say sisiaen dan ag-ompatey a laman et ginmapo nen komawalon siglo B.C.E., tan say sisiaen a posiblin nagamoran itan panamegley na misteryoso iran iinumen et ginmapo nen komapat a siglo B.C.E. Saray alchemist a Europeano tan Arabo nen kapegleyan a panaon so nansukimat tan sinali ray mantimpla na dili ran panagparukey na bilay. Arum ed saratan et lalaokan da na saray asin na arsenika, merkuri, tan asupre. Ag-amta no kaunongan karakel so asamalan lapud inyinum da ed saray mismon tinimpla ra!

Walay panaon a kinmayat met iray alamat nipaakar ed say tatawagen a Subol na Inkalangwer—sakey subol na danum ya ibabagan mangipawil ed biskeg na amin a makainom ed satan.

 [Kahon/Saray litrato ed pahina 7]

Bilay ya Andi-anggaan—Kasin Makapasawa?

Isusuppiat na arum a say bilay ya andi-anggaan et magmaliw a makapasawa, a kalkalnan panagdarak labat itan na magnayon a panaon panamegley na andiay kabaliksan a pamapalabas na oras a lawas a paulit-ulit. Nayarin say iisipen dan magnayon a panaon et say agmanampot a kasuldongan na saray kaplesan ya estiloy-bilay tan kipapasen a parad dakel et ompatnag a makapasawa tan andiay kabaliksan. Balet, dia ed Paraiso ya ipawil na Dios, insipan to a say too so ‘manliket ed inkadaakan na kareenan.’ (Salmo 37:11) Satan a bilay so mangiter ed katooan na pankanawnawan nagamoran so pikakabat nipaakar ed saray pinalsa nen Jehova tan nipanaon so pamaaligwas ed dinanman odino amin a makapainteres a dunong, panagaral, tan kimkimey a kukugkugipen tayo lambengat natan.

Oniay inkomento nen Dr. Aubrey de Grey, sakey ya eksperto ed henetika ed Cambridge University ya akibiang ed panagsukimat no panon a naparukey so bilay: “Saray totoo a walaay maabig ya edukasyon tan panaon a pangusaran ed satan so agbalot onsasawa natan tan agdan balot naisip a naupotan ira na balon bengatla a labay dan gawaen.” Anggaman kuan, ibabaga na impuyan a Salitay Dios a say “too agto[n balot] natontonan so gawa a ginawa na Dios a manlapu ed gapo angga ed sampot.”—Eclesiastes 3:11.