Istorya na Bilay

Tinulongan Ak nen Jehova a Manalona ed Saray Subok ed Bilay

UNONG ED SALAYSAY NEN DALE IRWIN

“SUSTO LAY WALORA! SAY APATIRA SO ANOBLE ED PROBLEMA.” Ontan so nabasa ed paulon-balita na sakey a peryodiko a mangipapakabat ed apatiran lason a niarum ed apatira lan bibii diad pamilya mi. Sanen balolaki ak ni, anggapon balot so planok a mangasawa, nagkalalo lay pagmaliw ya ama. Balet natan et sakey ak lan ama na walora!

NIANAK ak nen 1934 diad baley na Mareeba, Australia. Siak so sankayugtanan ed taloran sanaagi. Diad saginonor et inmalis so pamilya mi diad Brisbane, a diman et nambangat si nanay ko na relihyon kada Simba diad simbaan na Metodista.

Diad asasakbay na 1938, inreport na saray lokal a peryodiko a si Joseph F. Rutherford a nanlapud sankamundoan a hedkuarter na saray Tasi nen Jehova et ompan agnaabuloyan ya ondakat ed Australia. “Akin a gagawaen da itan ed sikato?” so intepet nen Nanay ed sakey a Tasi a dinmalaw ed abung mi. Oniay ebat na Tasi: “Agta imbaga nen Jesus a saray patumbok to et pasegsegangen na totoo?” Kayari na satan, inawat nen Nanay so bokletan Cure, ya angidatak ed dakel a pandumaan na tua tan palson relihyon. * Lapud agustoan a maong nen Nanay so bokleta, sikamin ananak to so inawit to ed pantitipon na saray Tasi nen Jehova diad tinmumbok a Simba. Diad primero et kontran maong si tatay ko, balet no maminsan et sikatoy mangisulat na saray tepet ed Biblia pian ipaiter to’d si Nanay ed sakey ed saray agagi. Insan isulat na samay agin laki iray Makasulatan ya ebat pian iter nen Nanay ed kinen Tatay.

Sakey a Simba et akila ed sikami si tatay ko diad pantitipon, a say getma to et pian ibalikas so agto  panangabobon ed saray Tasi. Balet, kayari na impitongtong to ed ombiabiahen manangasikaso ya ombibisita ed saman diad kongregasyon, anguman so awawey nen Tatay tan inyabuloy to ni ingen ya usaren so abung mi parad sinimban panagaral na Biblia, ya inatendian na saray interesado diad lugar mi.

Nen Setyembre 1938, saray ateng ko so abautismoan. Balet sikamin sanaagi et abautismoan nen Disyembre 1941 diad nasyonal a kombension a ginawa diad Hargreave Park ed Sydney, New South Wales. Pitoy taon ko ni labat ed saman. Manlapula’d saman et siak so maparanay ya akibiang ed lawak na ministeryo a kaiba iray ateng ko. Nensaman, saray Tasi so mangaawit na saray sankabitbit a ponograpo diad kabkaabungan tan ipaparengel da ed saray unabung iray nirekord a diskurso ed Biblia.

Sakey a Tasi ya agkon balot nalingwanan et si Bert Horton. Wala so luganan to a kinabitan na maksil ya amplipayer tan baleg a trumpa ya intapew ed atep. Makapaliket so pikimey ed si Bert, nagkalautla ed siak ya uga-ugaw ni. Alimbawa, sano paknolen to so sakey a diskurso ed Biblia manlapud toktok na pugaro, mabetbet min nanengneng so luganan na pulis a mamapaarap ed kawalaan mi. Erepen a tampol nen Bert so kagawaan to, insan manmaneho a paarap ed sananey a pugaro a manga pigaran kilometro so kaarawi, tan mamaknol lamet na sananey a nirekord a paliwawa. Akaaral ak a maong nipaakar ed panagmatalek ed si Jehova tan inkakpel manlapud si Bert tan arum niran matoor tan makpel ya agagin singa sikato.—Mateo 10:16.

Sanen mantaon ak na 12, siak so maparanay a manpupulong a bukor kasumpal na eskuela. Aminsan et akabat ko so pamilyan Adshead. Diad kaunoran, say parehon ateng, waloran anak da, tan dakel ya apo ra so nanaral na katuaan. Misasalamat ak ed si Jehova lapud inabuloyan to ak, anggaman uga-ugaw ak ni, pian nipakabat so katuaan na Biblia ed sayan maomaong a pamilya.—Mateo 21:16.

Saray Pribilehyo ed Panaglingkor Diad Malangwer ya Edad

Sanen mantaon ak na 18, nagmaliw ak a sigpot-panaon a payunir a ministro tan niasain ak diad Maitland, New South Wales. Nen 1956 et naimbitaan ak a manlingkor diad sangan opisina na Australia ed Sydney. Diad 20 ya staff diman, manga kakatlo so alanaan, a walaan na ilalon miuley ed si Kristo diad mangatatawen a Panarian to. Agaylan pribilehyo so pakapanlingkor a kaiba ra!—Lucas 12:32; Apocalipsis 1:6; 5:10.

Say desisyon kon mansiansian walad kasuloan et nauman sanen akabat ko so magangganan payunir a si Judy Helberg, a temporaryon naimbitaan diad sangan opisina pian ontulong ed siak diad baleg a proyekto. Akapan-inaroan kami nen Judy, tan kayari na duay taon et nankasal kami. Kayari na satan, ginmapo kami ed kimey ed sirkito, a sinimba kamin ombibisita ed saray kongregasyon na saray Tasi nen Jehova pian pasesegen iray agagi.

Nen 1960, inyanak nen Judy so panguloan min bii, si Kim. Natan, sano mananak so sanasawa a manlilingkor ed sirkito, kaukolan dan taynanan so pribilehyo ra tan manpirmi ra ed sakey a pasen. Balet asurprisa kamin maong lapud naimbitaan kamin mangituloy ni ed panagbisita ed saray kongregasyon. Kayari na dakel a pikakasi, inawat mi so imbitasyon, tan diad tinmumbok a pitoran bulan et akaiba mi lay Kim ya ombiabiahe panamegley na bus, eroplano, tan tren legan kamin manlilingkor diad nanaarawian iran kongregasyon ed Queensland tan ed Northern Territory. Anggapo ni so dilin luganan mi ed saman.

 Naynay kamin miaayam ed kaabungan na agagi. Lapud tropikal a klima, saray kuarton-ugipan nensaman et kaslakan a sasaraan na saray kurtina imbes a kapot, a mairap met itan parad sikami sano man-akis si Kim no labi. Diad kaunoran et talagan nairapan kamin la ed responsabilidad min mangasikaso ed anak mi tan ed asainmin mi. Kanian nampirmi kami la ed Brisbane, tan siak so nantrabaho bilang managpinta na karatula, sakey a klase na commercial art. Duay taon kayarin nianak si Kim, awalaan kami lamet na sananey nin anak a bii, si Petina.

Say Impanalonak ed Trahedya

Nen 1972, sanen mantaon na 12 tan 10 iray anak mi, si Judy so inatey lapud Hodgkin’s disease, sakey a klase na lymphoma. Ngalngalin agnaawat na pamilya mi so impakaandi to. Anggaman kuan, sanen mansasakit si Judy tan kayari na impatey to, sikami so niligliwa nen Jehova panamegley na Salita to, masanton espiritu to, tan saray agagi ed espiritual. Say magasin a Watchtower a naawat mi kayarin tuloy na trahedya so amabiskeg met ed sikami. Walaan itan na artikulon nipaakar ed personal iran subok, laktip lay pakaandian na inad-aro, tan impanengneng na satan no panon a makatulong ed sikatayo iray subok pian nabayuboan iray maridios a kalidad, a singa say panagsungdo, pananisia, tan katooran. *—Santiago 1:2-4.

Kayari na impatey nen Judy, lalon apaapit ed siak iray mamarikit ko. Balet aksobien ko a talagan nairapan ak ya anakbat ed responsabilidad na ama tan ina. Balet say makalkalakal a duaran mamarikit ko et amalemew ed kimey ko.

Impangasawa Lamet tan Binmaleg a Pamilya

Asabi panon et angasawa ak lamet. Siak tan si Mary, a komaduan asawak, et dakel so pamparehoan mi. Inatey met so asawa to lapud Hodgkin’s disease. Wala met so duaran anak to a bibii—si Colleen tan si Jennifer. Si Colleen et mas malangwer na taloy taon nen si Petina. Kanian say pamilya mi natan et tugyopen la na apatiran bibii, a mantaon na 14, 12, 9, tan 7.

Diad gapo et denesidi mi nen Mary a disiplinaen so balang ananak mi ya anggad mabulos laran mangawat na panamilin manlapud komaduan ateng da. Diad relasyon mi bilang sanasawa, walaan kami nen Mary na duaran importantin totontonen. Unona, agkamin balot mansangsangan ed arapan na ananak mi, tan komadua, unong a mitunosan ed prinsipyo na Biblia a nikurit diad Efeso 4:26, mantongtong kamin dua ya anggad naresolbe so problema—anggano manbayag itan na pigay oras!

Nipasal kami met lan amin ed bilay mi ed komaduan pamilya, balet ta say pakanodnonotan ed impakaandi na inad-aro mi so agni naandin tampol. Alimbawa, si Mary et onaakis kapag no labi na Lunes. Kayari min manaral bilang pamilya, sano naugip la iray mamarikit mi, mabetbet ya ompapaway iray liknaan ya inem-eman nen Mary.

Kinaliktan to a nawalaan kami na dilin anak mi. Balet makapaermen ta sikatoy nakalan. Sanen nanlukon lamet si Mary, wala so baleg ya akasurprisaan mi. Sanen nampa-ultrasound, aliwa labat a sakey ya ugaw so anengneng a lukon to noagta apatira! Abigbigla ak. Siak so 47 años la tan  agmanbayag et walora la so anak ko! Pinmaway so kuadruplet nen Pebrero 14, 1982 diad panamegley na Cesarean kayari na 32 a simba ra ed eges. Unong ed impanggegendanan da, si Clint et 3.5 pounds, si Cindy et 4.2 pounds, si Jeremy et 3.1 pounds, tan si Danette et 3.8 pounds. Ag-ira mankakalupa.

Kapananak nen Mary, inmasingger ed siak so doktor tan yinmurong ed abay ko.

“Panaaburidoan mo ta so pangasikaso ed saray ugugaw?” so intepet to.

“Siempre,” kuan ko, “lapud agko nin balot naeksperiensya so onia.”

Siak so nikelawan tan apaseseg a maong ed sinmublay ya imbaga to.

“Agkayo paulyanan na kongregasyon yo,” so kuan to. “Ombasis ka labat et sanlibo lan tampol a panyon-papel so iderew da’d sika!”

Lapud inkadunong na sayan doktor a manamianak tan saray katambayan to, apatiran mabunigas ya ugugaw so insempet mi ed abung kayari na duay bulan labat ed ospital.

Say Angat ed Impamabaleg Mi ed Apatiran Ugugaw

Ta pian mauksoy so panangasikaso, nanggawa kami nen Mary na 24-oras ya eskedyul. Baleg so nitulong na apatiran panguloan a bibii bilang managkomis. Tan tinmua imay imbaga na doktor—sakey labat a “basis” et mansasbi iray agagi ed kongregasyon pian ontulong ed sikami. Antis ni na satan, say abayag lan kaarok a si John MacArthur so angorganisa na saray Tasin komikimey pian paawangen so abung mi. Sanen sinmabi iray ugugaw, walaray grupo na agagin bibii a tinmulong a mankomis. Amin irayan kaabigan so pakapatnagan na Makristianon aro ya atekepay gawa.—1 Juan 3:18.

Saray kuadruplet et singano “ananak na kongregasyon.” Anggad natan et ipapasen na sarayan apat bilang kapamilyaan da so dakel a maaron agagin lalaki tan bibii a tinmulong ed sikami. No nipaakar ed si Mary, sikato so peteg a sankamaongan ya asawa tan ina ya andi-siblet ya angasikaso ed ananak to. Talagan inyaplika to so simbawan manlalapud Salita tan organisasyon na Dios. Satan la so sankaabigan a simbawa!—Salmo 1:2, 3; Mateo 24:45.

Say Makristiano iran pantitipon tan kimey a panagpulong so lawas importantin kabiangan na sinimban rotina mi, anggaman mairap so pangasikaso ed apatiran ugugaw. Sakey a bendisyon ed saman iray iyaaralan mi na Biblia a duaran sanasawa, a sikara lay oonla ed abung mi pian paiyaralan. Anggaman amainomay iya ed sikami, no maminsan et makateglep si Mary leleg na panagaral lapud kesaw to la, a wala ni ugaw a naugip ed akwalan to. Sarayan duaran sanasawa et nagmaliw ya agagi tayo ed espiritual diad kaunoran.

Espiritual a Panangipasal Legan ya Angkelag ni Ra

Anggan agni makaakar iray ugugaw, sikaray aawiten mi la nen Mary tan saray panguloan a bibii diad lawak na ministeryo. Sanen makaakar la ra, sikami nen Mary so mangitabin na sanderwa, tan aliwa ran problema. Diad tua et mabetbet a sikaray gapoan na pitotongtong na saray makaaron unabung. Sakey ya agew et walay akatongtong kon laki ya angikuan a no nianak ka ed sakey ya agew a pinmetek ed sakey a tanda na astrolohiya, say ugalim et onalig ed sakey a nigetar a personalidad. Agko sinuppiat so imbaga to, balet ta tinepetan ko no nayarian koy ompawil a tampol diad kaimbuasan. Sikatoy inmabobon, kanian pinmawil ak a kaibak iray kuadruplet. Sikatoy mankelkelaw legan ko ran panaamparen unong ed impanggegendanan da. Insan maliket min nantongtongan so aliwa labat a nipaakar ed mapatnag a pandurumaan da ed itsura noagta pati say baleg a pandurumaan da ed personalidad, a paneknek itan a lingo so teorya to. Oniay inkuan to: “Makapalpalek  ak ta sinalambit ko iyan teorya ed sika. Kaukolan koy mansukimat ni, awa?”

Lapud ugugaw ni ra, agda labay ya apat so inggrupon panagdisiplina sano benger ira, kanian sansakey mi ran bibilinen. Anggaman kuan, amoria ra a parad sikaran amin so pareho iran totontonen. Sano walay problema ed eskuelaan a mangilalanor ed konsiensia ra, mapekder dan iyaaplika iray prinsipyo na Biblia tan susuportaan da so sakey tan sakey, a si Cindy so pinagkasangiyan da. Diad kaunoran et amoria na totoo a say apatiran mankakalason et nepeg ya ipasen a mabiskeg a puersa!

Sikami nen Mary so kaslakan a nasusubok diad panutulong mi ed ananak mi a mansiansian matoor ed si Jehova legan na inkatin-edyer da. Say nibaga mi labat et lalon mair-irap komon so kimey mi no anggapoy pananuporta na maaron kongregasyon tan no anggapo so daakan ya espiritual a tagano a manlalapud nanengneng a kabiangan na organisasyon nen Jehova. Nambanikelan min gawaen a regular so panagaral mi na Biblia bilang pamilya tan naynay a walay komunikasyon mi, anggaman aliwan lanang a mainomay itan. Anggaman ontan, agunggonaan so impansagpot mi lapud amin a waloran ananak mi so nandesidin manlingkor ed si Jehova.

Say Panaanos Mi ed Itatakken Mi la

Diad inlabas na saray taon et nanggayagaan ko so dakel ya espiritual a pribilehyo bilang sakey a matatken ed kongregasyon, manangasikaso ed syudad (city overseer), tan kasandin manangasikaso na sirkito. Akapanlingkor ak met bilang membro na lokal a Hospital Liaison Committee, ya ontutulong ed saray doktor a mikoopera ed saray Tasin pasyente sano problema so panagpasaksak na dala. Diad loob na 34 a taon et apribilehyoan ak bilang rehistradon managkasal. Manga 350 a sankapareha so kinasal ko, kaiba la so anemiran anak kon bibii.

Lawas a misalsalamat ak ed si Jehova lapud matoor ya impanuporta ed siak nen Judy, say inmunan asawak, tan say panusuporta ed siak natan nen Mary. (Uliran 31:10, 30) Legan da ak a susuportaan ed kimey ko bilang matatken ed kongregasyon, nagmaliw met iran maabig ya ehemplo diad ministeryo tan tinmulong iran mangipurek ed ananak mi na saray maespiritual a kalidad.

Nen 1996, nalmoan a walay sakit ko ed utek a sengegan na panggiwgiw na limak tan pakakatumbak. Kanian agko la sarag so manpinta na saray karatula. Balet, siansia nin naliliketan ak a maong a manlingkor ed si Jehova, anggaman mataytayaman ak lan onkiwas. Ingen say makapaseseg et nagmaliw ak a mas maempatya ed arum a maedad met la.

Legan kon nonodnonoten so nipaakar ed bilay ko, misasalamat ak ed si Jehova lapud sikatoy lawas a tinmulong ed siak tan ed pamilyak pian maliket min naarap so dakel a subok ed sikami. (Isaias 41:10) Sikami nen Mary, pati say waloran ananak mi, so misalsalamat met ed alay abig tan masuportan pamilya na saray agagi espiritual. Amin da so angipatnag na panangaro ra diad paraan ya alabas ni nen say nanonotan mi.—Juan 13:34, 35.

[Saray paimano ed leksab]

[Litrato ed pahina 12]

Kaibak si Nanay, kuyak Garth, tan si atsik Dawn, sanen manbiahe kami la a paonla ed kombension ed Sydney nen 1941

[Litrato ed pahina 13]

Kaibak si Judy tan say kapangiyanak a si Kim sanen manlilingkor ak bilang manangasikaso na sirkito ed Queensland

[Litrato ed pahina 15]

Sanen kapangiyanak iray kuadruplet, tinmulong ed sikami so apatiran panguloan a bibii tan say kongregasyon