“Akin a Wadia Itayo?”

SAY analo na Nobel Prize tan akaliktar ed Nazi Holocaust a si Elie Wiesel so angikuan ed saya a “say sankaimportantian a tepet a nepeg a panumamengan na too.” Anto itan? Say tepet ya, “Akin a wadia itayo?”

Kasin nanumamengan mo la itan a tepet? Dakel lan totoo so nanumameng ed satan, balet dakel ed sikara so ag-akaromog ed ebat. Diad panasali ton naromog so kabaliksan na bilay, oniay insulat na Ingles a historyador a si Arnold Toynbee: “Say peteg a kalat na too et say pangigloria ed Dios tan panggayaga ed Sikato ed andi-angga.”

Makapainteres, masulok a taloran milenyo lay apalabas et walay sakey a too, a kabkabat lapud inkamaobserba to nipaakar ed bilay, ya akabitla la ed manunan ebat ed satan a tepet. Oniay inkuan nen makabat ya Arin Solomon: “Saya sikato so anggaan na kanonotan; amin, sikara so nadngel: Takotan mo so Dios, tan unoren mo so saray ganggan to; ta saya sikato so katiponan na kanepegan na too.”—Eclesiastes 12:13.

Sayan manunan prinsipyo so pinekderan na Anak na Dios, si Jesu-Kristo. Legan a wadiad dalin, nanggunaetan nen Jesus ya igloria so mangatatawen ya Ama to. Say impanlingkor nen Jesus ed Manamalsa to so amaaligwas ed kalidad na bilay to. Satan so anustine ed sikato, kanian oniay nikuan to: “Say kanen ko sikato so panggawak na linawa na saman so angibaki ed siak.”—Juan 4:34.

Akin sirin a wadia itayo? Singa si Jesus, Solomon, tan dakel niran lingkor na Dios, naromog tayo so tuan kabaliksan tan magnayon a liket ed bilay diad panggawa ed linawa na Dios. Labay mo kasin naamtaan a nagkalalo no panon a dayewen so Dios “ed espiritu tan katuaan”? (Juan 4:24) Maliket iray Tasi nen Jehova ed lugar yo ya ontulong ed sika a natalosan so ebat ed tepet ya, “Akin a wadia itayo?”