Ipatnag so Respeto ed Saray Sagradon Pantitipon Tayo
Ipatnag so Respeto ed Saray Sagradon Pantitipon Tayo
“Sikara yakar ko ra ed masanto a palandey ko, tan gawaen ko ra naani a malikeliket ed abung ko a panagpikasian.”—ISAIAS 56:7.
1. Antoray Makasulatan a rason tayo pian ipatnag so manepeg a respeto ed saray pantitipon tayo?
TINIPON nen Jehova so totoo to, saray alanaan a Kristiano tan saray kakaiba ra, pian sikatoy dayewen da ed “masanto a palandey” to. Gagawaen to ran malikeliket diad loob na ‘abung a panagpikasian’ ed sikato, say espiritual a templo to, a satan so “abung na pikakasi nipaakar ed saray amin a nasyones.” (Isaias 56:7; Marcos 11:17) Ipapabitar na sarayan nagagawa a say panagdayew ed si Jehova et masanto, malinis, tan nitandoro. No ipatnag tayo so suston panagrespeto ed saray pantitipon tayo pian manaral tan mandayew, papaneknekan tayo a mipadpara ed si Jehova so panmoria tayo ed saray sagradon bengatla.
2. Anto so mangipabitar ya impasen nen Jehova a sagrado so pasen a pinili ton pandayewan ed sikato, tan panon ya impatnag nen Jesus ya ontan met so panmoria to?
2 Diad Israel nensaman, say pasen a pinili nen Jehova a pandayewan ed sikato et nepeg ya ipasen a sagrado. Say tabernakulo tan saray kagawaan ed loob na satan so nalanaan tan napasantos ‘ta pian saratan so sankasantosan a tuloy.’ (Exodo 30:26-29) Say duaran silir na santuaryo so tinawag a “Masanto a Pasen” tan “Sankasantosan a Pasen.” (Hebreos 9:2, 3) Diad saginonor et say tabernakulo so sinalatan na templo diad Jerusalem. Bilang sentro na panagdayew ed si Jehova, say Jerusalem so tinawag a “masanton syudad.” (Nehemias 11:1; Mateo 27:53) Legan na mangaraldalin a ministeryo to, impatnag a mismo nen Jesus so manepeg a respeto ed templo. Sikato so sinmanok ed totoo lapud agmarespeton panguusar da ed sular na templo bilang pasen na negosyo tan asingger a dalanan paonla’d arum a lugar.—Marcos 11:15, 16.
3. Anto so mangiyilustra ed sagradon kipapasen na saray pantitipon diad Israel?
3 Regular a nantitipon iray Israelita pian mandayew ed si Jehova tan ontalineng ed panagbasa ed Ganggan to. Say pigaran agew na piesta ra so tinawag a masanto iran kombension odino mapagalang iran asamblea, a mangipapatnag ed sagradon kipapasen na sarayan pandaragup. (Levitico 23:2, 3, 36, 37) Diad sakey a mapublikon pantitipon ed panaon nen Esdras tan Nehemias, saray Levita et “impatalos da ed baley so tunong.” Lapud “amin a baley nannangis, sanen nadngel da so saray salita na tunong,” saray Levita et “pinareen da so amin a baley, ya inkuan da, Deen kayo, ta say agew sikato so santo.” Insan saray Israelita so nanselebra ed pitoran-agew a Piesta na Kobongkobong tekep na “baleg a gayaga.” Niarum ni, “wala so nambasa ed libro na tunong na Dios. Et inunor da so liket a pitoy agew; et dia ed komawalo ya agew wala so manuna a tipon, unong ed pananguksoyan.” (Nehemias 8:7-11, 17, 18) Saraya so talagan masanton okasyon a mankaukolan na marespeton panangimano na saramay inmatendi.
Sagrado Iray Pantitipon Tayo
4, 5. Antoran aspekto na saray pantitipon tayo so mamaneknek a sagrado iratan?
4 Tua, anggapo ed dalin natan so literal a masanton syudad nen Jehova, a walaan na nikaduman templo a nitalagan pandayewan ed sikato. Anggaman kuan, nepeg ya agtayo lilingwanan so katuaan a sagrado iray pantitipon parad panagdayew ed si Jehova. Mamitlo ed loob na kada simba, mantitipon itayo ta pian manbasa tan manaral na Kasulatan. Say Salita nen Jehova so ‘nipaliwawa,’ tan diad panaon nen Nehemias et wala so ‘impangiter na belas ed satan.’ (Nehemias 8:8) Amin a pantitipon tayo so onggapo tan manampot ed pikakasi, tan diad maslak ed saratan et mangakansion itayo na saray kanta na panangidayew ed si Jehova. (Salmo 26:12) Saray pantitipon ed kongregasyon et talagan kabiangan na panagdayew tayo tan mankaukolan itan na masimoon ya awawey tan marespeton panangimano tayo.
5 Bebendisyonan nen Jehova so totoo to no mantitipon ira a mandayew ed sikato, manaral na Salita to, tan manggayaga ed alay abig a panlilimog na saray Kristiano. Sano nasabi so oras na iyatendi ed pantitipon, makaseguro itayo ya ‘ibaki nen Jehova ditan so panamapalar.’ (Salmo 133:1, 3) Nagamoran tayo iyan bendisyon no presente tan atentibo itayon mangiimano ed espiritual a programa. Niarum ni, oniay imbalikas nen Jesus: “No iner so kawalaan na duara ono talora a nantitipon nisengeg ed ngaran ko, siak wala ak ed nanleleetan da.” Bilang konteksto, sayan balikas so onaplika ed miting na saray Kristianon mamatatken sano asikasoen da iray seryoson problema ed baetan na saray indibidual, balet onaplika met itan diad saray pantitipon tayo. (Mateo 18:20) No si Kristo, diad panamegley na masanton espiritu, et presente sano mantitipon iray Kristiano diad ngaran to, agta sarayan pantitipon et nepeg ya ipasen a sagrado?
6. Anto so nibaga nipaakar ed saray pasen a pantitiponan tayo, baleg man itan odino melag?
6 Tua ya agmanaayam si Jehova ed saray templon ginawa na too. Anggaman kuan, saray Kingdom Hall tayo et pasen parad tuan panagdayew. (Gawa 7:48; 17:24) Mantitipon itayo ditan pian manaral ed Salita nen Jehova, manpikasi ed sikato, tan mankanta na panangidayew ed sikato. Ontan met so nagagawa diad saray Assembly Hall tayo. Saray angkakabaleg a pasilidad ya aabangan parad saray kombension tayo—a singa saray auditoryum, exhibition hall, odino istadyum—so magmaliw a pasen a panagdayewan legan ya uusaren iratan ed sagradon pantitipon tayo. Sarayan pantitipon parad panagdayew, baleg man odino melag, so makanepegan na panagrespeto tayo, tan nepeg a napatnagan itan diad awawey tan ugali tayo.
Saray Paraan a Nipatnag Tayo so Panagrespeto ed Saray Pantitipon Tayo
7. Diad anton mapatnag a paraan a narespeto tayo iray pantitipon tayo?
7 Wala iray mapatnag a paraan pian narespeto tayo iray pantitipon tayo. Say sakey lan paraan et say pagmaliw tayon presente diad pangansion ed saray kanta ed Panarian. Dakel ed sarayan kanta so walaan na saray balikas diad nengneng na saray pikakasi tan nepeg sirin a kansionen iratan a mapagalang. Diad impangaon to ed Salmo 22, oniay insulat nen apostol Pablo nipaakar ed si Jesus: “Ipakabat ko so ngaran mo ed saray agagik, dia ed pegley na iglesia [“kongregasyon,” NW] igalang ta ka.” (Hebreos 2:12) Kanian, nepeg ya iyugali tayo so onyurong la sakbay itayon pankantaen na tsirman insan iyapasakey tayo ed kabaliksan na saray salita legan na kanta. Komon ta napatnagan ed panangansion tayo so liknaan na salmista ya angisulat: “Misalamat ak ed Jehova ed sankabukel a pusok, dia ed duypo na maptek tan ed muyongan.” (Salmo 111:1) On, say pankanta na saray panangidayew ed si Jehova et sakey a sankaabigan a rason pian onsabin masakbay diad saray pantitipon tayo tan mansiansia ditan anggad nasumpal.
8. Anton alimbawa ed Biblia so mangipatnag a saray pikakasi ed saray pantitipon tayo et makanepegan na marespeton panangimano tayo?
8 Sakey nin kabiangan na amin a pantitipon tayo a makapabiskeg ed espiritual et say masimoon a pikakasi parad amin na saramay nantitipon. Diad sakey ya inkagawa, saray inmunan-siglon Kristiano diad Jerusalem so nantitipon tan “nankakasakey ira, ya angipaatagey na boses da ed Dios” diad masimoon a pikakasi. Bilang resulta, nantultuloy ira—anggaman ed panamasegsegang—a “sinalita ra so salita na Dios a makmakpel.” (Gawa 4:24-31) Kasin naisip tayo ya arum ed sikara et manteteyengteyeng so kanonotan da legan na pikakasi? Andi, sikara so “nankakasakey” a nampikasi. Saray pikakasi ya ibabalikas ed saray pantitipon so mangipatnag ed saray liknaan na amin ya inmatendi. Sarayan pikakasi so makanepegan na mapagalang ya imano tayo.
9. Panon tayon nipatnag so panagrespeto tayo ed sagrado iran pantitipon diad panamegley na panangawes tan kondukta tayo?
9 Niarum ni, nipatnag tayo so kaaralem na panagrespeto tayo ed inkasagrado na saray pantitipon tayo diad panamegley na panangawes tayo. Say itsura tayo diad panamegley na kawes tan ayos na buek tayo so lalon mangiter na kagalangan ed saray pantitipon tayo. Oniay insimbawa nen apostol Pablo: “Pirawat ko sirin a saray totoo mikasi’ra komon dia ed ganagana a pasen, ya itagey da so malinis a kalimaan da, ya anggapo so sanok tan siblangan. Ontan met so saray bibii a manpales ira na masimpit, a manparakep ira na mabinta tan madangka; aleg ed saray buek a nilaga, tan balitok odino perlas odino kawes ya ankabli; noag ingen dia ed saray maabig a gawa (a sikato so matukoy ed saray bibii a labay da so mansimpit).” (1 Timoteo 2:8-10) Sano onatendi itayo ed angkabaleg iran kombension diad saray istadyum ed paway, saray kawes tayo so nepeg ya itukoy ed kipapasen na panaon balet ta siansia nin mapagalang. Niarum ni, say panagrespeto tayo ed okasyon so ontulong ed sikatayo pian agmangan odino agmanggatgat na bubble gum legan na saray sesyon. Say suston panangawes tan kondukta diad saray pantitipon tayo so mamagalang ed si Jehova a Dios, diad panagdayew ed sikato, tan ed saray kapara tayon managdayew.
Say Konduktan Manepeg ed Sankaabungan na Dios
10. Panon ya impabitar nen apostol Pablo a nakaukolan so atagey ya estandarte na kondukta diad saray Makristianon pantitipon tayo?
10 Diad 1 Corinto, kapitulo 14, naromog tayo so makabat ya alimbawa nen apostol Pablo nipaakar ed no panon so nepeg a kagawa na saray Makristianon pantitipon. Oniay impanampot to: “Nagawa komon so sarayan amin ed kasimpitan tan mauksoy.” (1 Corinto 14:40) Saray pantitipon tayo so importantin kabiangan na aktibidad na Kristianon kongregasyon, tan mankaukolan iratan na klase na kondukta a manepeg ed sankaabungan nen Jehova.
11, 12. (a) Anto so nepeg a nipurek ed kanonotan na ananak ya onaatendi ed saray pantitipon tayo? (b) Diad anton matukoy a paraan a nibalikas na ananak so pananisia ra diad saray pantitipon tayo?
11 Nagkalautla, nakaukolan ya ibangat so ananak no panon so pandeen da diad saray pantitipon tayo. Nepeg ya ipaliwawa na Kristianon atateng ed ananak da a say Kingdom Hall tan say lugar na Panagaral na Kongregasyon ed Libro et aliwan pasen a panggalawan. Saratan so pasen pian mandayew ed si Jehova tan manaral ed Salita to. Oniay insulat nen makabat ya Arin Solomon: “Dangkaan mo so salim sano onla ka ed abung na Dios; ta say yaasingger a pandengel sikato so magmaong.” (Eclesiastes 5:1) Imbangat nen Moises iray Israelita a pantitiponen da iray wala la’d edad tan “saray angkelag.” Inkuan to: “Pantitipon mo naani totoo . . . ta pian narengel da tan natumbok da tan ontakot ira ed Jehova a Dios yo, tan sumpalen da a gawaen so saray amin a salsalita na kaptekan. Tan pian saray anak da ya ag-akaamta, narengel da tan naaralan da so ontakot ed Jehova.”—Deuteronomio 31:12, 13.
12 Mipadpara natan, saray angkekelag ya ananak so onaatendi ed saray pantitipon a kaiba iray atateng da pian ontalineng tan manaral ira. No sarag da lay ontalineng tan anggan panon et natalosan da la iray manunan katuaan na Biblia, nayarian met na ananak so “manggawa na panangipatua” ed pananisia ra diad pankomento ra na antikey. (Roma 10:10) Nayarin onggapo so malangwer ya ugaw diad pangibaga toy daiset iran salita bilang ebat ed tepet a natalosan to. Diad primero, nayarin basaen to so ebat, balet diad kaunoran et salien ton ibalikas itan diad dilin salita to. Saya so makagunggona tan makapainteres ed ugaw, tan saray dilin balikas to nipaakar ed pananisia to so panliketan na saray inmatendin wala la’d edad. Siempre, ipatnag na saray atateng so alimbawa diad pankomento ran mismo. No posible, maabig met no saray ananak et walay dili ran Biblia, panagkantaan, tan kopya na publikasyon ya aaralen. Nepeg dan naaralan so pangipatnag na suston panagrespeto ed saratan a publikasyon. Amin na saya so mangipaslep ed kanonotan na ananak a sagrado iray pantitipon tayo.
13. Anto so ilaloan tayo nipaakar ed saramay primero ray onatendi ed saray pantitipon tayo?
13 Siempre, agtayo labay a saray pantitipon tayo et singa saray misa ed simbaan na Kakristianoan. Saratan et nayarin andiay-ligsa tan walay pansantosantoan odino singa maingal iran konsierto. Labay tayon maligsa tan makaaro iray pantitipon tayo diad saray Kingdom Hall tayo balet ta agmagmaliw a singa iratan sosyal a pandaragup a nagagawa ed kaliberliber. Mantitipon itayo pian mandayew ed si Jehova, kanian saray pantitipon tayo et nepeg a mapagalang lawas. Kayari na italineng da ed niparungtal a materyal tan naimano iray kondukta tayo tan ananak tayo, pilalek tayon narengelan iramay primero ray onatendi a mangibagan: “Say Dios wala ed sikayo.”—1 Corinto 14:25.
Say Permanentin Kabiangan na Panagdayew Tayo
14, 15. (a) Panon tayon napaliisan so ‘pangikaindan ed abung na Dios tayo’? (b) Panon lan nasusumpal so Isaias 66:23?
14 Unong ya asalambit la ed akadkauna, titiponen nen Jehova so totoo to tan paliliketen to ra diad loob na ‘abung na panagpikasian’ ed sikato, say espiritual a templo to. (Isaias 56:7) Pinanonotan na matoor a toon si Nehemias iray kapara ton Judio a nepeg dan ipatnag so manepeg a respeto ed literal a templo diad panamegley na materyal a suporta ra ed satan. Oniay inkuan to: ‘Agtayo nepeg ya ikaindan so abung na Dios tayo.’ (Nehemias 10:39) Niarum ni, nepeg ya agtayo ikaindan so imbitasyon nen Jehova a mandayew ed sikato diad loob na ‘abung a panagpikasian’ ed sikato.
15 Diad impangipabitar to ed kaimportantian na regular a pantitipon parad panagdayew, oniay impropesiya nen Isaias: “Nagawa naani, a manlapu ed sakey a lesek angga ed sananey, tan manlapu ed sakey ya agew a pampainawa angga ed sananey, amin a laman onla naani a manpikasi ed arapan ko, kuan nen Jehova.” (Isaias 66:23) Nagagawa iya natan. Diad sinimba ed kada bulan, regular a mantitipon iray dedikadon Kristiano pian mandayew ed si Jehova. Nilikud ni ed arum a bengatla, gagawaen da iya diad iyaatendi ra ed saray Makristianon pantitipon tan pibibiang ed mapublikon ministeryo. Kasin kaiba kayo ed saramay regular ya ‘oonla tan manpipikasi ed arap nen Jehova’?
16. Akin a say regular ya iyaatendi ed pantitipon et nepeg a permanente lan kabiangan na saray bilay tayo natan?
16 Sigpot ya onaplika so Isaias 66:23 diad bilay ed balon mundo ya insipan nen Jehova. Diad satan a panaon et “amin a laman” diad literal a pantalos, so sinimba tan binulan ya ‘onla tan manpikasi ed arap,’ odino mandayew ed si Jehova diad andi-anggaan. Lapud say pantitipon pian mandayew ed si Jehova et permanentin kabiangan na maespiritual a kabibilay tayo diad balon sistema na bengabengatla, agta nepeg a gawaen tayon permanente lan kabiangan na bilay tayo natan so regular ya iyaatendi ed saray sagradon pantitipon tayo?
17. Akin a nakaukolan tayo iray pantitipon tayo ‘nagkalalo la a nanenengneng tayon manasingger lay agew’?
17 Legan a manasingger so anggaan, nepeg a lalon determinado tayon onatendi a naynay ed Makristiano iran pantitipon tayo parad panagdayew. Lapud panagrespeto ed inkasagrado na saray pantitipon tayo, agtayo aabuloyan so sekular a trabaho, asainmin ed eskuelaan, odino anggan say panklase ed labi a pakasaewan tayo ed regular a pilimog ed saray kapananisiaan tayo. Nakaukolan tayo so biskeg manlapud ontan a panlilimog. Diad saray pantitipon tayo ed kongregasyon, nawalaan itayo na pankanawnawan nakabkabat so balang sakey, makapanpapasesegan, tan makapanaayatan itayo ed ‘aro tan maabig iran gawa.’ Nakaukolan tayon gawaen iya lapud ‘nagkalalo la a nanenengneng tayo a manasingger lay agew.’ (Hebreos 10:24, 25) Lawas tayo sirin ya ipatnag so manepeg a respeto ed saray sagradon pantitipon tayo diad regular ya iyaatendi, matukoy a panangawes, tan maabig a kondukta. No onia so gawaen tayo, nipatnag tayo a mipadpara ed si Jehova so panmoria tayo ed saray sagradon bengatla.
Bilang Panrepaso
• Anto so mangipabitar a saray pantitipon na saray totoo nen Jehova so nepeg ya ipasen a sagrado?
• Antoran aspekto na saray pantitipon tayo so mamaneknek a sagrado iratan?
• Panon a nipatnag na ananak a rerespetoen da so inkasagrado na saray pantitipon tayo?
• Akin a say regular ya iyaatendi ed pantitipon et nepeg a permanente lan kabiangan na bilay tayo?
[Tepetepet Parad Panagaral]
[Saray litrato ed pahina 28]
Sagrado iray pantitipon tayo pian mandayew ed si Jehova inerman so pakagawaan na satan
[Litrato ed pahina 31]
Onaatendi iray angkekelag ya ananak tayo diad saray pantitipon pian ontalineng tan manaral