Kasin Mipadpara ed si Jehova so Panmoria Yo ed Saray Sagradon Bengatla?

“Nengnengen yon maong . . . anggapo komon so managlawan, odino too ya agmangigalang ed saray bengatla a sagrado.”—HEBREOS 12:15, 16.

1. Anton kaplesan ya awawey so ag-aawaten na saray lingkor nen Jehova?

 SAY mundo ed inkalapagan et lalon agmangiiter na importansia ed saray sagradon bengatla. Oniay inkuan na Pranses a sosyologo a si Edgar Morin: “Agla bibidbiren so inkanapanmatalkan na amin a pundasyon ya akaletnegan na moral—Dios, palsa, binalegan a dalin, awaran, katunongan. . . . Dedesidien tan pipilien la na totoo so labay dan estandarte.” Ipapatnag na saya so “espiritu na mundo” odino “espiritu a natan [et] manggawa ed saray anak na kasusumpa.” (1 Corinto 2:12; Efeso 2:2) Satan ya agmapagalang ya espiritu so ag-aabobonan na saramay dedikado ed si Jehova tan mabulos a manpapasakop ed maptek ya inkasoberano to. (Roma 12:1, 2) Imbes, momoriaen na saray lingkor na Dios ya importante so inkasagrado, odino kasantosan, ed panagdayew da ed si Jehova. Antoran bengatla ed bilay tayo so nepeg a sagrado? Konsideraen ed sayan artikulo so limaran bengatla a masanto parad amin a lingkor na Dios. Iyapasakey na ontumbok ya artikulo so inkasagrado na saray Kristianon pantitipon tayo. Balet anton talaga so kabaliksan na salitan “masanto”?

2, 3. (a) Panon ya ipapabitar na Kasulatan so inkasanto nen Jehova? (b) Panon tayon nepeg ya ipasen a masanto so ngaran nen Jehova?

² Diad Biblikon Hebreo, say salitan “masanto” et mankabaliksan na inkibiig. Diad panagdayew, onaplika so “masanto” ed samay bengatlan nibiig manlapud ordinaryon panguusaran, odino samay ipapasen a sagrado. Si Jehova et masanto ed absoluton pantalos. Sikato so “Sankasantosan.” (Uliran 9:10; 30:3) Diad Israel nensaman, ipepeket na atagey a saserdote ed turbanti to so sakey a balitok a plata ya akaukitan na saray salitan “Say Inkasanto kien nen Jehova.” (Exodo 28:36, 37, NW) Saray mangatatawen a kerubin tan serapin a walad paliber na trono nen Jehova so nilitrato ed Kasulatan bilang mangiyaabawag na: “Santo, santo, santo, si Jehova.” (Isaias 6:2, 3; Apocalipsis 4:6-8) Sayan impangulit so mangidadanet a si Jehova et masanto, malinis, dalisay, tan sagrado diad superlatibon pantalos. Diad tua, sikato so Lapuan na amin a kasantosan.

³ Say ngaran nen Jehova et sagrado, odino masanto. Oniay inkelyaw na salmista: “Idayew da so abalbaleg tan tatakotan a ngaran mo: ta sikato so Masantos.” (Salmo 99:3) Oniay imbangat nen Jesus ya ipikasi tayo: “Ama min wala ka ed tawen, Nagalang [odino, “ipasen a sagrado; bidbiren a masanto”] komon so ngaran mo.” (Mateo 6:9) Oniay inyabawag na mangaraldalin ya ina nen Jesus, a si Maria: “Itandoro na kamarerwak so Katawan . . . say makapanyari nanggawa ed siak na angkakabaleg a bengatla; et santo so ngaran to.” (Lucas 1:46, 49) Bilang lingkor nen Jehova, ipapasen tayon masanto so ngaran to tan papaliisan tayo so antokaman a bengatla a mamabanday ed sayan masanton ngaran. Niarum ni, mipadpara ed si Jehova so panmoria tayo ed inkasagrado, salanti, ipapasen tayon sagrado iray ipapasen ton sagrado.—Amos 5:14, 15.

No Akin a Walaan Itayo na Aralem a Respeto ed si Jesus

4. Akin a deneskribe na Biblia si Jesus bilang say “Santo”?

⁴ Bilang say “bogbogtong” ya anak na masanton  Dios a si Jehova, si Jesus so apalsan masanto. (Juan 1:14; Colosas 1:15; Hebreos 1:1-3) Sikato sirin so tinawag a “Santo na Dios.” (Juan 6:69) Impansiansia to so inkasanto to sanen say bilay to ed tawen et niyalis diad dalin, ta diad panamegley na pakayari na masanton espiritu so impangiyanak nen Maria ed si Jesus. Oniay imbaga na anghel ed sikato: “Say espiritu santo onla ed sika . . . say nianak met ningaran naani Santo, say Anak na Dios.” (Lucas 1:35) Diad pikakasi ed si Jehova, saray Kristiano ed Jerusalem so amiduan anukoy ed Anak na Dios bilang say “masanton aripen mo a Jesus.”—Gawa 4:27, 30.

5. Anton sagradon kimey so sinumpal nen Jesus diad dalin, tan akin a mabmabli so dala to?

⁵ Si Jesus so walaan na sagradon kimey a sumpalen diad dalin. Sanen sikatoy abautismoan nen 29 C.E., si Jesus so alanaan bilang say Atagey a Saserdote na baleg ya espiritual a templo nen Jehova. (Lucas 3:21, 22; Hebreos 7:26; 8:1, 2) Niarum ni, sikato so ompatey bilang bagat. Say niyibung a dala to so onkanan dondon a kilabanan na saray totoon makasalanan. (Mateo 20:28; Hebreos 9:14) Ipasen tayo sirin so dala nen Jesus bilang sagrado, odino ‘mabmabli.’—1 Pedro 1:19.

6. Anto so awawey tayo ed si Kristo Jesus, tan akin?

⁶ Diad pangipapabitar to a nepeg a respetoen tayon maong so Ari tan Atagey a Saserdote tayo a si Kristo Jesus, oniay insulat nen apostol Pablo: “Say Dios met sankatageyan so impangirayew to ed [Anak to], tan inter to ed sikato so ngaran ya analonggaring ed ami-amin a ngaran; a dia ed ngaran a Jesus so talimukoran na amin a pueg, na saray wala ed tawen, tan wala ed dalin tan wala ed dalem na dalin, tan pian ganagana a dila nepeg da a patuaen a si Jesu-Kristo sikato so Katawan, a kadayewan na Dios Ama.” (Filipos 2:9-11) Nipatnag tayo a mipadpara ed si Jehova so panmoria tayo ed saray sagradon bengatla diad maliket a pampasakop tayo ed say Lider tan manuuley lan Ari tayo, si Kristo Jesus, say Ulo na Kristianon kongregasyon.—Mateo 23:10; Colosas 1:18.

7. Panon tayon nipatnag so panagpasakop tayo ed si Kristo?

⁷ Say pampasakop tayo ed si Kristo so mangilalanor met ed manepeg a panagrespeto tayo ed saray lalakin uusaren ton mangidaulo ed kimey ya iwawanwan to. Say betang na saray alanaan na espiritu a manugyop ed Mananguley ya Ulop tan saray manangasikaso a tinuro ra diad saray sangan opisina, distrito, sirkito, tan kongregasyon so nepeg a bidbiren a sagradon responsabilidad. Sirin, sayan uksoyan so mankaukolan na aralem a panagrespeto tan panagpasakop tayo.—Hebreos 13:7, 17.

Sakey a Masanton Totoo

8, 9. (a) Diad anton paraan a saray Israelita et masanton totoo? (b) Panon ya impurek nen Jehova ed saray Israelita so prinsipyo na inkasagrado?

⁸ Si Jehova so nanggawa na pisisipanan ed Israel. Sayan siglaotan so angiter ed satan a balon nasyon na nikaduman talindeg. Sikara so apasantos, odino nibiig. Oniay imbaga a mismo nen Jehova ed sikara: “Mansantos kayo naani ed siak: ta Siak, a Jehova, santo ak, tan insian ta kayo ed saray katooan, pian sikayo so kayarianen ko.”—Levitico 19:2; 20:26.

⁹ Sanen niletneg so nasyon na Israel, impurek nen Jehova ed saray Israelita so prinsipyo na  inkasagrado. Pian ag-ira nadusa ed ipapatey, nepeg ya agda anggan diwiten so palandey a ditan niiter so Samploran Ganggan. Diad saman et impasen a sagrado so Palandey Sinai. (Exodo 19:12, 23) Say inkasaserdote, say tabernakulo tan saray kagawaan ed loob na satan so impasen met a sagrado. (Exodo 30:26-30)Anto so kipapasen na Kristianon kongregasyon?

10, 11. Akin a nibaga a sagrado so Kristianon kongregasyon na saray alanaan, tan anto so epekto na saya ed “arum a karnero”?

¹⁰ Say Kristianon kongregasyon na saray alanaan et sagrado ed imaton nen Jehova. (1 Corinto 1:2) Diad tua, say interon grupo na saray alanaan a Kristiano diad dalin ed anggan anto a panaon so niyaliling ed sakey a masanton templo, anggaman agda tutugyopen so baleg ya espiritual a templo nen Jehova. Manaayam si Jehova ed satan a templo diad panamegley na masanton espiritu to. Oniay insulat nen apostol Pablo: “Dia ed [si Kristo Jesus] balang sakey ed saray dakel ya abung, maong so inkasangal to ed sikaton dili, ombaleg a magmaliw a sakey a templo a masantos ed Katawan; a dia ed sikato sikayo met apaalagey kayo ya amin ya onkanan panabungan na Dios ed inka-espiritu.”—Efeso 2:21, 22; 1 Pedro 2:5, 9.

¹¹ Oniay kaaruman nin insulat nen Pablo ed saray alanaan a Kristiano: “Agyo ta amta a sikayo so sakey a templo na Dios, tan say espiritu na Dios manaayam ed sikayo? . . . Say templo na Dios masantos, saya a templo sikayo.” (1 Corinto 3:16, 17) Diad panamegley na espiritu to, si Jehova so ‘manaayam’ ed limog na saray alanaan tan ‘manaakar ed limog da.’ (2 Corinto 6:16) Sikato so mantutultuloy a mangigigiya ed matoor ya “aripen” to. (Mateo 24:45-47) Papablien na “arum a karnero” so pribilehyo ra a makapilimog ed “templo” a klase.—Juan 10:16; Mateo 25:37-40.

Saray Sagradon Bengatla ed Bilay Tayo Bilang Kristiano

12. Antoran bengatla so sagrado ed bilay tayo, tan akin?

¹² Agpankelawan ta dakel so ipapasen a sagrado diad bilay na saray alanaan a membro na Kristianon kongregasyon tan saray kakaiba ra. Sagrado so relasyon tayo ed si Jehova. (1 Awaran 28:9; Salmo 36:7) Mabmabli iya ed sikatayo tan anggapo so antokaman odino siopaman ya abuloyan tayon mamaletey ed relasyon tayo ed Dios, si Jehova. (2 Awaran 15:2; Santiago 4:7, 8) Say pikakasi so importantin kabiangan na pamasiansia tayoy maapit a relasyon ed si Jehova. Say pikakasi  so sagradon tuloy parad si propeta Daniel anggan say bilay to et niiyan ed kapeligroan kanian sikatoy nantultuloy a matoor ed niyugali ton panagpikasi ed si Jehova. (Daniel 6:7-11) ‘Saray pikakasi na saray sasanto,’ odino saray alanaan a Kristiano, so niyaliling ed insenso ya uusaren ed panagdayew diad templo. (Apocalipsis 5:8; 8:3, 4; Levitico 16:12, 13) Sayan simbolismo so mangidadanet ed inkasagrado na pikakasi. Agaylan pribilehyo so pakapitalosan ed Soberano na uniberso! Agpankelawan sirin no akin a say pikakasi et ipapasen a sagrado ed bilay tayo!

13. Anton puersa so masanto, tan panon tayon abuloyan itan a mangimpluensya ed bilay tayo?

¹³ Wala so puersa ed bilay na saray alanaan a Kristiano tan saray kakaiba ra a seguradon ipapasen a sagrado, salanti, say masanton espiritu. Sayan espiritu et say aktibon puersa nen Jehova, tan lapud naynay ya onkukurang itan unong ed linawa na masanton Dios, satan so matukoy a tinawag a ‘masanton espiritu,’ odino “espiritu na kasantosan.” (Juan 14:26; Roma 1:4) Diad panamegley na masanton espiritu, itatarya nen Jehova ed saray lingkor to so pakayarin mangipulong ed maong a balita. (Gawa 1:8; 4:31) Iiter nen Jehova so espiritu to ed “saray ontulok ed sikato [bilang manuley],” diad saramay ‘manakar unong ed espiritu,’ ya aliwan unong ed silalaman a pilpilalek. (Gawa 5:32; Galacia 5:16, 25; Roma 8:5-8) Sayan mabiskeg a puersa so ontutulong ed saray Kristiano a mamawala na “bunga na espiritu”—saray maabig a kalidad—tan “amin a masantos a panagbilay tan kasimpitan.” (Galacia 5:22, 23; 2 Pedro 3:11) No say masanton espiritu et sagrado ed sikatayo, paliisan tayo so amin a bengatla a nayarin mamaermen ed satan ya espiritu, odino mangamper ed impluensya na satan ed bilay tayo.—Efeso 4:30.

14. Anton pribilehyo so ipapasen na saray alanaan bilang sagrado, tan panon a sayan pribilehyo et pibibiangan na arum a karnero?

¹⁴ Say pribilehyo tayo ya akbibiten so ngaran na masanton Dios, si Jehova, tan say pagmaliw tayon Tastasi to et sananey nin ipapasen tayon sagrado. (Isaias 43:10-12, 15) Saray alanaan a Kristiano so tinuro nen Jehova bilang kualipikadon ministro odino “manangasikaso na balon sipan.” (2 Corinto 3:5, 6) Bilang ontan, sikara so niganggan a mangipulong ed ‘sayan ebanghelyo na panarian’ tan ‘manggawa na saray babangatan ed amin a nasyon.’ (Mateo 24:14; 28:19, 20) Sikara so matoor a manusumpal ed sayan kimey a niganggan ed sikara, tan minilyon a kinmarneron totoo so onkikiwas, ya oniay masimbolikon ibabaga ra ed saray alanaan: “Sikami mila kami naani ed sikayo, ta sikami nadngelan mi a say Dios wala ed sikayo.” (Zacarias 8:23) Saraya so maliket a manlilingkor diad espiritual a pantalos bilang saray ‘managbaka’ tan ‘manangimaton ed kaubasan’ parad saray alanaan a ministro odino “katambayan na Dios tayo.” Diad onian paraan, say arum a karnero so ontutulong a maong ed saray alanaan diad panusumpal da ed ministeryo ra ed interon mundo.—Isaias 61:5, 6.

15. Anton kimey so impasen nen apostol Pablo bilang sagrado, tan akin ya ontan met so panmoria tayo?

¹⁵ Alimbawa, impasen nen apostol Pablo so mapublikon ministeryo to bilang sagrado, odino masanto. Tinukoy to so inkasikato bilang “sakey a ministro nen Jesu-Kristo ed saray nasyon, a mibibiang ed masanton kimey na maong a balita na Dios.” (Roma 15:16, NW) Sanen sinulat to iray Kristiano diad Corinto, tinukoy nen Pablo so ministeryo to bilang “kayarian,” odino kayamanan.  (2 Corinto 4:1, 7) Diad panamegley na mapublikon ministeryo tayo, ipapakabat tayo so “saray puyan na Dios.” (1 Pedro 4:11) Sirin, balanglan kabiangan itayo na alanaan odino na arum a karnero, ipapasen tayo bilang sagradon pribilehyo so mibiang ed kimey a panagtasi.

“Yadyarien Itayo na Kasantosan dia ed Takot ed Dios”

16. Anto so ontulong ed sikatayo pian napaliisan so totoon ‘agmanangigalang ed saray sagradon bengatla’?

¹⁶ Pinasakbayan nen apostol Pablo iray kapara ton Kristiano sumpad pagmaliw ya ‘agmanangigalang ed saray sagradon bengatla.’ Imbes, sinimbawa to ra a ‘tumboken da so kasantosan,’ a “nengnengen yon maong . . . ya anggapo komon so lamot na kapaitan ya ontubo tan mangalipanes ed sikayo, tan lapu ed sikato dakel so natilolan.” (Hebreos 12:14-16) Say balikas a “lamot na kapaitan” so manutukoy ed pigaran membro na Kristianon kongregasyon a nayarin mankrikritiko ed saray uksoyan. Singa bilang, nayarin ag-ira mipakna ed panmoria nen Jehova nipaakar ed inkasagrado na panangasawa odino pankaukolan na moral a kalinisan. (1 Tesalonica 4:3-7; Hebreos 13:4) Odino nayarin pantongtongan da tan ikakayat da iray apostatan ideya, “salsalita ya agmanepeg ed Dios,” ya ibabaga na saramay ‘kinmasipa ed katuaan.’—2 Timoteo 2:16-18.

17. Akin a nakaukolan so mantultuloy a pansagpot diad biang na saray alanaan pian nipatnag da so panmoria nen Jehova ed inkasanto?

¹⁷ Oniay insulat nen Pablo ed saray alanaan ya agagi to: “Inararok ira, linisan tayo komon so inkasikatayon dili ed ami’ tilol na laman tan espiritu, a yadyarien itayo na kasantosan dia ed takot ed Dios.” (2 Corinto 7:1) Ipapabitar na sayan balikas a nepeg a mantultuloy a paneknekan na saray alanaan a Kristiano, saray “minanabang ed inkatawag a mangatatawen,” ya ipapatnag da so panmoria nen Jehova ed inkasanto diad amin ya aspekto na bilay da. (Hebreos 3:1) Mipadpara, binilin nen apostol Pedro iray nailalak na espiritun agagi to: “Unong na anak na katooran dia ed agyo pinonong ed saray ugagep yo ‘wari nen wala kayo ni ed katikeyan na kanonotan: No ag ingen, unong a say anawag ed sikayo et masantos, masantos kayo met komon ed ganaganay panagbilay.”—1 Pedro 1:14, 15.

18, 19. (a) Panon a nipatnag na saray kabiangan na “baleg ya ulop” a mipadpara ed si Jehova so panmoria ra ed sagrado iran bengatla? (b) Anto nin sagradon aspekto na bilay na Kristiano so konsideraen ed ontumbok ya artikulo?

¹⁸ Komusta met iray membro na “baleg ya ulop,” a makaliktar ed “baleg ya irap”? Nepeg da met a paneknekan a mipadpara ed si Jehova so panmoria ra ed sagrado iran bengatla. Diad libron Apocalipsis, sikara so nirepresenta bilang mangisasaklang na ‘sagradon panaglingkor’ ed si Jehova diad mangaraldalin a saban na espiritual a templo to. Aagamilen da so pananisia ed dondon bagat nen Kristo, a masimboliko ran ‘uurasan so kawekawes da, tan papaputien da ed dala na Kordero.’ (Apocalipsis 7:9, 14, 15) Saya so mangiiter ed sikara na malinis a talindeg ed arap nen Jehova tan kakaukolanen to ed sikara a ‘linisan da so inkasikaran dili ed amin a tilol na laman tan espiritu, a yadyarien da so kasantosan dia ed takot ed Dios.’

¹⁹ Say importantin kabiangan ed bilay na saray alanaan a Kristiano tan saray kakaiba ra et say regular a pantitipon pian dayewen si Jehova tan aralen so Salita to. Ipapasen nen Jehova iray pantitipon na totoo To bilang sagrado. Konsideraen ed ontumbok ya artikulo no panon tan akin a nepeg a mipadpara ed si Jehova so panmoria tayo ed saray sagradon bengatla diad sayan importantin aspekto.

Bilang Panrepaso

• Anton minumundon panmoria so papaliisan na saray lingkor nen Jehova?

• Akin a si Jehova so Lapuan na amin a masanto?

• Panon tayon nipatnag a rerespetoen tayo so inkasanto nen Kristo?

• Antoran bengatla so nepeg tayon ipasen a sagrado ed bilay tayo?

[Tepetepet Parad Panagaral]

[Litrato ed pahina 23]

Diad kadaanan ya Israel, say inkasaserdote, tabernakulo, tan saray kagawaan ed loob na satan so nepeg ya ipasen a sagrado

[Litrato ed pahina 24]

Saray alanaan a Kristiano diad dalin so manutugyop ed masanton templo

[Saray litrato ed pahina 25]

Say pikakasi tan mapublikon ministeryo tayo et sagrado iran pribilehyo