Nankakasakey a Mangipapaalagey Pian Idayew so Dios

SARAY totoo ed sakey ed saray Solomon Islands so makakaimano ed balon Kingdom Hall na saray Tasi nen Jehova. Inkuan na sakey a bii: “Diad simbaan mi, dakel so oorganisaen iran ebento pian mamawalay pundo. Ibabaga mi ed saray membro a mangiter iray kuarta, balet kulang nin siansia so pundo mi pian makapampaalagey na balon simbaan. Sikayoran Tasi ey, iner so pangaalaan yoy pundo yo?” Oniay ebat na samay Tasin tinepetan to: “Dadayewen mi si Jehova bilang sakey a sankamundoan a pamilya. Say kongregasyon mi tan saray agagi mi ed interon mundo so angidonasyon na saray nakaukolan parad balon Kingdom Hall. Sikami so imbangat nen Jehova a mankakasakey ed amin a bengatla.”

Wala so pankakasakey ed limog na saray Tasi nen Jehova ed amin ya aktibidad da, pati diad panangipaalagey na nilibo iran Kingdom Hall. Say ontan a pankakasakey ed panusumpal ed sarayan proyekto et aliwa lan balo. Wala la itan ed limog na saray totoo na Dios ed loob na saray milenyo. Akin a nibaga tayon ontan?

Say Impamaalagey ed say Tabernakulo tan say Templo

Walad kanonotan nen Jehova so nasyon na Israel sanen oniay imbaga to’d si Moises, masulok a 3,500 taon lay apalabas: “Igawaan da ak na sakey a santuaryo.” (Exodo 25:8) Nipaakar ed desinyo na sayan proyekton panagpaalagey, inkuan ni nen Jehova: “Unong na amin ya impanengneng ko ed sika [si Moises], saman so pangaligan na tabernakulo, tan saman so pangaligan na amin a kagawaan to, ontan a peteg so nepeg yo [say interon nasyon] a panggawa.” (Exodo 25:9) Insan indatak nen Jehova so detalyado iran plano parad kipaalagey na santuaryo, saray kagawaan ya usaren, tan arum niran bengatla a pamarakep.(Exodo 25:10–27:19) Sayan “tabernakulo,” odino tolda, so magmaliw a sentro na tuan panagdayew ed interon Israel.

Agtayo amta no kaunongan karakel so nankimey ed proyekto, balet amin ya Israelita so naimbitaan a manuporta ed satan. Oniay inkuan nen Moises ed sikara: “Mangala kayo ed kasiksikanan yo na sakey a yapay ed kinen Jehova; say siopaman a mabulos so puso to, sikato komon so mangyakar na yapay ed Jehova.” Anto so kinaukolan? “Balitok, tan pilak, tan suer, tan azul, tan purpura, tan escarlata, tan fino a lienzo, tan bago na kanding, tan katat na karkarnero a kakalakian a binalanga, tan katakatat na saray foca, tan say kiew ya acacia, tan larak ya onkana a silew, tan saray especias ya onkana ed ipupuyok a larak, tan onkana ed ambalingit ya insenso, tan batobato ya onix, tan batobato ya itompok ed efod tan pectoral.” (Exodo 35:4-9) Panon so inkiwas na saray Israelita? Oniay ibabaga na Exodo 36:3: “Si Moises so nanawatan da na amin a panpanangaro na saray anak na Israel a nipaakar ed kagawa na bengatla ya ikana ed santuaryo. Tan angyakar ni ra ed sikato na saray bagbagat na mabulbulos a linawa ed kinabuasan.”

 Agnambayag et abunton la iray indonasyon a materyales, tan dakel ni so aawiten diman na saray totoo. Kanian, saray onsianon komikimey so angikuan ed Moises: “Say yaakar na totoo dia masulok na dakel nen say masarag ya onkana ed kimey ya imbilin nen Jehova a gawaen.” Diad ontan, oniay ingganggan nen Moises: “Anggan laki odino bii agkomon manggawa na antokaman a kimey ya onkana ed panangaro na santuaryo.” Antoy resulta? “Say ikakana a wala ed sikara masulok ya onkana ed amin a kimey a panggawa ed satan, tan dakel a tuloy.”—Exodo 36:4-7.

Lapud inkamabunlok na saray Israelita, asumpal so tabernakulo ed loob na sakey taon. (Exodo 19:1; 40:1, 2) Pinagalangan na totoo si Jehova diad impanuporta ra ed tuan panagdayew. (Uliran 3:9) Diad saginonor et wala so mas baleg a proyekton ipaalagey da. Kanian, amin lamet a malabay so nayarin mibiang, marunong man ira odino andi ed panagpaalagey.

Ngalngali limaran siglo kayarin nipaalagey so tabernakulo, ginapoan na Israel ya ipaalagey so templo diad Jerusalem. (1 Arari 6:1) Sayan paalagey a gawa’d bato tan kiew so alay dakep tan permanente. (1 Arari 5:17,18) Diad “panamegley na espiritu,” inter nen Jehova ed si David iray arkitektural a plano parad templo. (1 Awaran 28:11-19) Balet say pinili ton mangidaulo ed pangipaalagey et si Solomon ya anak nen David. (1 Awaran 22:6-10) Siansia ni, si David so interon-puso a sinmuporta ed sayan proyekto. Sikatoy anipon na saray bato, biga, tan arum nin materyales insan angiyarum na dakdakel a balitok tan pilak a kayarian ton dili. Pinaseseg to met iray kapara ton Israelita a magmaliw a mabunlok, a tinepetan to ra: “Siopa sirin so mangyapay a mabulbulos a mangikonsagra na inkasikato ed sayan agew ed Jehova?” Panon so inkiwas na totoo?—1 Awaran 29:1-5.

Sanen gapoan la nen Solomon ya ipaalagey so templo, nilibon tonilada na balitok tan pilak so akataryan usaren to. Wala so daakan a gansa tan balatyang a diad ontan et anggapo lay paraan a nasimbang iratan a metal. (1 Awaran 22:14-16) Lapud pananulong nen Jehova tan pananuporta na amin ed Israel, asumpal so proyekto ed loob labat na pitora tan kapalduan taon.—1 Arari 6:1, 37, 38.

‘Say Abung na Tuan Dios’

Say tabernakulo tan say templo so parehon atawag a “say abung na [tuan] Dios.” (Uko-ukom 18:31; 2 Awaran 24:7) Ingen, si Jehova so agbalot nankaukolan na abung a siroman. (Isaias 66:1) Impaipaalagey to iraman pian nagunggonaan so totoo. Kanian diad samay inagurasyon na templo,  intepet nen Solomon: “Labay kasi na Dios dia ed sankatuaan so manayam ed tapew na dalin? Nia, say tawen tan say tawen na katawenan agda ka nalugan; agni nagkalalo so saya ya abung ya impaalagey ko!”—1 Arari 8:27.

Diad panamegley nen propetan Isaias, oniay inkuan nen Jehova: “Say abung ko so natawag naani ya abung na pikakasi a nipaakar ed saray amin a baley.” (Isaias 56:7) Saray bagat tan pikakasin iyaapay diad templo, ontan met ed saray seremonyan gagawaen diman, so angiyabuloy ed maridios iran totoo—saray Judio tan aliwan-Judio—ya onapit ed tuan Dios. Agamoran da so pikakaaro tan proteksion nen Jehova diad pandadayew da diad abung to. Nidanet iyan katuaan diad samay pikakasin imbesngaw nen Solomon diad dedikasyon na templo. Nabasa yo irayan makatenyeg-liknaan a balikas parad Dios diad 1 Arari 8:22-53 tan 2 Awaran 6:12-42.

Say kadaanan ya abung na tuan Dios et abayag lan aderal, balet impaimano na Salitay Dios so panaon a saray totoo ed nanduruman nasyon so natipon pian mandayew ed si Jehova diad mas baleg ya espiritual a templo. (Isaias 2:2) Say ayadyarin bagat na bogbogtong ya anak na Dios, ya inyanino na bagbagat ya ayep a niyapay diad templo, so magmaliw a paraan pian makaasingger ed si Jehova. (Juan 14:6; Hebreos 7:27; 9:12) Saray Tasi nen Jehova so mangidadayew natan ed Dios ed ontan a mas atagey a paraan, tan tutulongan da so dakel nin totoo a manggawa met na ontan.

Saray Proyekton Panagpaalagey Natan

Diad sankamundoan, saray Tasi nen Jehova so manlilingkor ed tuan Dios. Sikaray manutugyop ed “mabiskeg a nasyon,” a say bilang da et tuloytuloy ya ondarakel. (Isaias 60:22) Say manunan pasen a pandaragupan na saray Tasi nen Jehova et diad Kingdom Hall. * Nilibo ed sarayan bilding so uusaren la, tan nilibo ni so nakaukolan.

Saray Tasi nen Jehova so ‘mabulbulos a mangiyaapay na inkasikara’ pian mamaalagey na nakaukolan iran Kingdom Hall. (Salmo 110:3) Balet, kaslakan iran Tasi ed lokal so andian na saray nakaukolan a dunong ed panagpaalagey, tan say arum a rehyon a walay maples ya idaraak et apektado na pirmin kairapay-bilay. Nen 1999, say Mananguley ya Ulop na saray Tasi nen Jehova so angigapo na programan panagpaalagey na Kingdom Hall pian natalonaan iratan a babeng. Diad panamegley na sayan programa, saray Tasi ya onsiano ed saray kimey a panagpaalagey so linma ed ararawin lugar pian ipasal iray agagi ran lalaki tan bibii ed panagpaalagey na saray Kingdom Hall. Insan saramay nipasal a komikimey so mangitutuloy ed panagpaalagey diad satan a rehyon. Antoy resulta na sayan nikaduman sagpot?

Nen Pebrero 2006 et masulok lan 13,000 a balon Kingdom Hall so nipaalagey diad saray bansan limitado so pundo na saray Tasi nen Jehova. Basaen pa iray balikas na pigara a manguusar la na balo iran Kingdom Hall.

“Say kongregasyon so walaan na promedyon bilang na onaatendi a 160. Diad sankaunaan a miting kayarin nipaalagey so balon Kingdom Hall, say bilang na inmatendi et inmabot ed 200. Natan, kayari na anem bulan, wala la so 230 ya onaatendi. Mapatpatnag a bebendisyonan nen Jehova so pangipapaalagey ed sarayan simpli balet ta mausa-usar a bilding.”—Sakey a Manangasikaso na sirkito ed Ecuador.

“Saray totoo so pigay taon lan mangitetepet ed sikami na, ‘Kapigan kasi so pakawalaan yo na Kingdom Hall a singa saray nanenengneng mi ed saray publikasyon yo?’ Salamat ed si Jehova lapud awalaan kamin siansia na marakep a pasen a panagdayewan. Say datin panaaralan mi et diad lakoan a gawa na agi, a say promedyon bilang na  onaatendi et 30. Balet diad primeron impanaral mi diad balon Kingdom Hall et 110 so inmatendi.”—Sakey a kongregasyon ed Uganda.

“Inreport na duaran regular payunir ya agagin bibii a mas makapaliket so mankimey ed teritorya nanlapu la nen nipaalagey so balon Kingdom Hall. Mas madengel la so totoo diad panagkabkaabungan a ministeryo tan diad impormal iran paraan. Sarayan agagi so walaan la natan na 17 ya iyaaralan ed Biblia, tan dakel ed sarayan iyaaralan da so onaatendi la ed saray pantitipon.”—Sangan opisina ed Solomon Islands.

“Say pastor a manaayam ed kaabay so angikuan a say balon Kingdom Hall so mangaarum na dignidad na interon simpok tan ikikinon itan na saray totoon manaayam ditan. Ibabano na dakel ya ondadalan so karakpan na Kingdom Hall. Mangiiter iya ed saray agagi na maabig a pankanawnawa a mantasi. Ondarakel so totoon malabay a makaamta nipaakar ed sankamundoan ya impanaagi tayo. Dakel ed saray abayag lan ag-onaatendi ed saray pantitipon so apakiwas a milimog lamet a regular.”—Sangan opisina ed Myanmar.

“Sakey ya agin bii so angimbita ed sakey ya interesadon laki diad pasen a pampapaalageyan ya asingger ed sikara. Diad saginonor et inkuan na laki: ‘Abaloan ko et agak palooben na saray mantratrabaho. Asurprisa ak sanen mapangasi iray Tasi ya angabrasa ed siak. Saray lalaki tan bibii so mankikimey ya impasya, ya anggapoy pipirdien dan oras. Wala so pantutunosan da tan malikeliket ira.’ Inawat na laki so panangiyaral ed Biblia tan ginapoan to la so onatendi ed saray pantitipon. Oniay inkuan to ed saginonor: ‘Anguman la so panag-isip ko. Agko la taynan so Dios natan lapud aromog ko la.’”—Sangan opisina ed Colombia.

 Importante so Suporta Tayo

Importantin kabiangan na sagradon serbisyo tayo so panagpaalagey na saray Kingdom Hall. Peteg a nakomendaan so panusuporta na saray Tasi nen Jehova ed sankamundoan ed satan a kimey—diad pinansyal tan arum nin paraan. Balet, kaukolan tayon tandaan a makanakana met iray arum ya aspekto na sagradon serbisyo. Panapanaon, saray Kristiano so nabibiktima na natural iran kalamidad tan nakaukolan da so tulong tayo. Say panamawala na literatura na Biblia so walaan na importantin betang ed panusuporta ed sagradon panaglingkor. Napapaneknekan na maslak ed sikatayo so pakayari na nibase’d-Biblia a magasin odino libro a nipalima ed maptek-impanpuson too. Niarum ni, importantin tuloy so panuporta tayo ed saray misionaryo tan arum a walad espisyal a sigpot-panaon a serbisyo. Saratan a Kristiano a mangisasakripisyo ed dili ra so walaan na makanan betang ed kilalaknab na kimey a panagpulong diad sarayan kaunoran ya agew.

Nanggayagan tuloy iramay akitulongan ed panagpaalagey ed templo. (1 Awaran 29:9) Ontan met natan, say pananuporta ed tuan panagdayew panamegley na saray kontribusyon tayo so makapaliket ed sikatayo. (Gawa 20:35) Naeksperiensya tayo itan a liket sano ipelag tayo iray kontribusyon tayo ed kahon a nigana parad Kingdom Hall Fund tan sano mandonasyon itayo parad sankamundoan a kimey, a diad ontan et nasuportaan iray arum a proyekto a mikonektaan ed panangipulong ed maong a balita na Panarian. Diad makapakelaw a paraan, saray Tasi nen Jehova natan so nankakasakey ed tuan panagdayew. Amin tayo komon so napenek ed liket lapud panusuporta tayo ed tuan panagdayew!

[Paimano ed leksab]

[Kahon/Litrato ed pahina 20, 21]

Saray Paraan A Pinili Na Arum Pian Mangiter Na

SARAY KONTRIBUSYON PARAD SANKAMUNDOAN A KIMEY

Dakel so mangigagana, odino mangigegetar, na kantidad ya ipelag da ed saray kahon na kontribusyon ya atatakan na “Contributions for the Worldwide Work—Matthew 24:14.”

Binulan ya ipapawit na saray kongregasyon irayan kantidad diad sangan opisina na saray Tasi nen Jehova a manlilingkor ed mismon bansa ra. Saray boluntaryon donasyon a kuarta so nayari met a direktan ipawit ed Watch Tower Bible and Tract Society of the Philippines, Inc., Attention Treasurer’s Office, P.O. Box 2044, 1060 Manila, odino diad sangan opisina na saray Tasi nen Jehova a manlilingkor ed bansan kawalaan yo. Saray tseke ya ipawit ed address ed tagey so kaukolan ya ingaran ed “Watch Tower.” Saray alahas odino arum niran ankablin bengatla so nayari met ya idonasyon. Nepeg ya itekep ed sarayan donasyon so sakey ya antikey a sulat a mangibabagan satan so sakey a direktan langkap.

UKSOYAN NA KONDISYONAL A DONASYON

Nayari met ya imatalek ed Watch Tower so kuarta pian nausar ed sankamundoan a kimey. Bangbalet, satan so ipawil sano kerewen la na angimatalek. Parad kaaruman ya impormasyon, ipangasin mitalosan ed Treasurer’s Office diad address a nipaima-no la.

NIPLANON PANANULONG

Kaaruman ni ed saray direktan langkap a kuarta, walaray arum a paraan na panangiter parad sankamundoan a serbisyo ed Panarian. Kabiangan ed saratan so:

Insurance: Say Watch Tower so nayarin ingaran bilang benepisyaryo na life insurance policy odino retirement/pension plan.

Saray Deposito ed Bangko: Saray deposito ed bangko, kaletan nipaakar ed deposito, odino indibidual a deposito ed panretiro so nayarin imatalek odino ingaran ed Watch Tower diad ipatey, unong ed saray kakaukolanen na lokal a bangko.

Saray Stock tan Bond: Saray stock tan bond so nayarin idonasyon ed Watch Tower Society bilang direktan langkap.

Lote tan Abung: Say lote tan abung a nilako so nayarin iter balanglan direktan langkap odino, no abung et ireserba itan a panayaman na angidonar, a makapantultuloy a manayam ditan legan a mabilay. Mitalosan ed sangan opisina diad bansan kawalaan yo sakbay ya iyalis so titulo na antokaman a lote tan abung.

Gift Annuity: Say gift annuity et sakey a reglamento a niyalis na sakey so kuarta odino saray seguridad diad aturon korporasyon ya uusaren na saray Tasi nen Jehova. Bilang kasalat, say angidonar, odino siopaman a pangipiyaan to, so makaawat na pihon bayar ya annuity a tinaon legay bilay. Say angidonar so makaawat na income-tax deduction parad taon a niyareglo so gift annuity.

Testamento tan Inmatalek: Saray kayarian odino kuarta so nayarin ipatawir ed Watch Tower Society diad panamegley na sakey a legal a testamento, odino nayarin ingaran so Watch Tower Society bilang benepisyaryo na paknaan a pangimatalek. Say inmatalek a parad sakey a relihyoson organisasyon so nayarin mamawala na pigaran bentaha ed panag-buis.

Unong ya ipapatnag na terminon “niplanon pananulong,” sarayan nengneng na donasyon so kaslakan a mankakaukolan na panagplano ed biang na mangidonar. Pian natulongan iray indibidual a malabay ya ontulong ed sankamundoan a kimey na saray Tasi nen Jehova panamegley na pigaran nengneng na niplanon pananulong, niparaan so sakey a brosyur diad Ingles tan Español ya atituloan na Charitable Planning to Benefit Kingdom Service Worldwide. Sayan brosyur so inimprinta pian mangitarya na impormasyon diad nanduruman paraan a saray langkap et nayarin iter la natan odino ipatawir diad ipatey. Kayari ran abasa so brosyur tan tinmupleg ed saray legal a managkonseho ra ed panag-buis, dakel la so makakatulong pian nasuportaan so relihyoson kimey tan saray itutulong na saray Tasi nen Jehova ed kaparan totoo diad sankamundoan tan nagagamoran da met so dakel a benepisyo ed buis legan a gagawaen da itan. Makala kayo na sayan brosyur panamegley na ikerew na kopya manlapud mismon Charitable Planning Office.

Parad kaaruman ya impormasyon, nayarian yoy mitalosan diad Charitable Planning Office, balanglan diad pansulat odino itawag ed telepono, diad address a nilista ed leksab, odino nayarin tawagan yo so sangan opisina na Saray Tasi nen Jehova a manlilingkor ed bansan kawalaan yo.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue, San Francisco del Monte

1105 Quezon City

Telepono: (02) 411-6090

[Litrato ed pahina 18]

Nipapaalagey iray mararakep a Kingdom Hall ed sankamundoan lapud nankakasakey iran sagpot tayo

[Litrato ed pahina 18]

Balon Kingdom Hall ed Ghana