Si Daniel tan say Badge Card To ed Kombension

BINAAT nen Jesus iray mantunongtunongan a relihyoson lider a nagmaliw a maingongot sanen naimano da iray ugugaw a lalaki a mapublikon mangidadayew ed Dios. Oniay matukoy ya intepet nen Jesus ed sikara: “Agyo ta’n balot abasa, Dia ed sangi na saray ugugaw tan saray mansuso niyadyarim so panangigalang?”—Mateo 21:15, 16.

Diad Alemanya, pinaneknekan na anem-taon a si Daniel, a kabiangan ed kongregasyon a manguusar na lenguahen Ruso, a saray ugugaw et siansia nin mangidadayew ed si Jehova. Kaiba toy nanay tan atsi to, sikato so inmatendi ed kombension na saray Tasi nen Jehova diad Duisburg. Saya so primeron inyatendi ra ed baleg a kombension. Amin et balo parad sikara: say hotel, say dakel a dumerengel, mareen ya iyurong ed loob na taloy agew, say bautismo, ontan met ed drama. Tan komusta si Daniel? Napanuliranan so kondukta to.

Sinmabi so Lunes kayari na kombension, sanen akasempet la ra, si Daniel so asakbay a binmangon pian onloob ed eskuelaan na kindergarten. Balet anto so siansia nin akapeket ed dyakit to? Say badge card to ya angipabidbir ed sikato bilang sakey a delegado ed kombension! Oniay impaliwawa ed sikato nen nanay to: “Asumpal lay kombension. Sarag mo lan ekalen natan so badge card mo.” Balet oniay imbaga nen Daniel: “Labay kon nanengneng na amin no iner so nanlapuan ko pian naamtaan da so naaralan ko.” Kanian diad kindergarten et malikeliket ton impeket ed kawes to so badge card diad loob na sanagew. Sanen tinepetan na maestra to nipaakar ed satan, indeskribe to so programa na kombension.

Diad impanggawa to ed satan, aaligen nen Daniel so alimbawa na nilibo iran ugugaw a lalaki tan bibii a diad loob na dakel a siglo et sikara so mapublikon angidayew ed si Jehova.