Bangatan Yo Iray Anak Yo a Mankomento

NANONOTAN nen Perla a taga-Mexico a nen sikatoy melag nin ugaw et sikatoy tinulongan nen ina to a mangiparaan na antirikey a komento parad Panagaral na Panag-Bantayan. Natan et si Perla so walaan lay limay-taon ya anak a laki. Panon ton tutulongan? “Unona et nepeg koy manparaan. Legan kon gagawaen itan, mamili ak lay sakey a parapon natalosan na anak ko, sakey a nayarian ton isalaysay ed dili iran salita to. Insan iyapasakey mi so imano mi ed tatawagen ton ‘betang kon parapo.’ Paisalaysay ko itan ed sikato a pangusaren ko na saray kaslakan lan alimbawa a natalosan to. Insan maminpiga min ipraktis so komento to. Mangusar kami na sakey a bengatlan mipara ed kabaleg na mikropono ta pian amta ton bembenan itan sano mankomento la. Malikeliket ak ta diad amin a miting et sikatoy makapankokomento odino makapangitatagey na lima to. Lanang ton aasinggeran so konduktor sakbay na miting pian ibaga ed sikato no dinan a parapo so labay ton ebatan.”

Si Jens, sakey a matatken a manlilingkor ed sakey a grupon mansasalitay Hindi, so walaan na duaran ilalak a manedad na duara tan apatira. Sano manparaan ira a sanasawa parad miting a kaibay ananak da, uusaren da so metodo a naaralan nen Jens ed atateng to. Inkuan to: “Pipilien mi no dinan a parte na materyal so natalosan na ugugaw. Insan mi salien ya iter ed sikara so sumaryo na partikular a tema odino say segek na artikulo, tan kayari na satan et itepet mi ed sikara iray labay min ebatan da ed miting. Mabetbet a nikekelawan kami ed natural a paraan na kakaebat da. Talagan napatnagan ed panagkomento ra no antoy natatalosan da. Bilang resulta, saray ebat da so petepeteg a panangidayew ed si Jehova tan personal a panangibalikas na pananisia ra.”