Mansiansia Kayo ed Panangaro na Dios!
Mansiansia Kayo ed Panangaro na Dios!
“Inaro, . . . mansiansia kayo ed panangaro na Dios, . . . ya onkana ed bilay ya andi-angga.”—JUDAS 20, 21.
1, 2. Panon kayon makapansiansia ed panangaro na Dios?
ONTAN lay impangaro nen Jehova ed mundo na katooan kanian inter to so bogbogtong ya Anak to ta pian saramay mangaagamil na pananisia ed sikato so nawalaan na andi-anggaan a bilay. (Juan 3:16) Agaylan abig so pakaeksperiensya ed ontan a panangaro! No sakey kayon lingkor nen Jehova, maseguron labay yon panggayagaan itan a panangaro ed andi-anggaan.
2 Imparungtal nen babangatan a Judas no panon kayon makapansiansia ed panangaro na Dios. “Ipaalage’yo so inkasikayo ed sankasantosan a pananisia, a manpipikasi kayo ed espiritu santo,” so insulat nen Judas, “mansiansia kayo ed panangaro na Dios, tan manalagar kayo ed panangasi na Katawan tayo a Jesu-Kristo ya onkana ed bilay ya andi-angga.” (Judas 20, 21) Say panaral ed Salitay Dios tan say pangipulong ed maong a balita so makatulong pian napabiskeg kayo ed “sankasantosan a pananisia”—saray Makristianon bangat. Pian mansiansia kayo ed panangaro na Dios, nepeg a manpikasi kayo ‘panamegley na masanton espiritu,’ odino paimpluensyaan ed satan. Ta pian natumangan kayo na bilay ya andi-anggaan, nepeg met ya agamilen yo so pananisia ed dondon bagat nen Jesu-Kristo.—1 Juan 4:10.
3. Akin a say arum et aliwa lan Tasi nen Jehova natan?
3 Arum a datin walaan na pananisia so agnansiansia ed panangaro na Dios. Lapud pinili ra so mankurang ed kasalanan, sikara so aliwa lan Tasi nen Jehova. Panon yon napaliisan so ontan a kipapasen? Say pandalepdep ed onggendan iran punto so makatulong ed sikayo pian napaliisan so kasalanan tan mansiansia kayo ed panangaro na Dios.
Ipatnag Yo so Panangaro ed Dios
4. Kaunongan kaimportante so katutulok ed Dios?
4 Ipatnag yo so panangaro yo ed Dios diad pangunor ed sikato. (Mateo 22:37) “Saya so aro na Dios,” so insulat nen apostol Juan, “a sumpalen tayo so saray ganggan to: tan saray ganggan to aliwa ran ambelat.” (1 Juan 5:3) Say niyugali lan katutulok ed Dios so mamabiskeg ed sikayon manresisti ed tukso tan mamaliket ed sikayo. Oniay imbaga na salmista: “Mapalar so too ya agmanakar ed panangibangat na saray agmatunong, . . . noag say gayaga to wala ed ganggan nen Jehova.”—Salmo 1:1, 2.
5. Say panangaro ed si Jehova so mamakiwas ed sikayon manggawa na anto?
5 Say panangaro yo ed si Jehova so mamakiwas ed sikayon ompaliis ed panggawa na ambelat a kasalanan a mamabanday ed ngaran to. “Agmo iter komon ed siak so kadukaan ono saray kayamanan,” so impikasi nen Agur. “Taganoen mo ak ed kanen a nakaukolan ed siak: Ompan napesel ak, tan iburi ta ka, tan kuan ko, Siopa si Jehova? Odino ompan onduka ak, tan mantakew ak, tan agamilen ko a mudmoraen so ngaran na Dios ko.” (Uliran 30:1, 8, 9) Magmaliw a determinado ya ‘agmudmoraen so ngaran na Dios’ diad pangitarok na kabandayan ed sikato. Imbes, lawas panggunaetan a gawaen iray maptek a bengatla a mangidayew ed sikato.—Salmo 86:12.
6. Anto so nagawa no gagalaen yo so mankasalanan?
6 Naynay a manpikasi ed maaron mangatatawen ya Ama yo parad tulong pian naresistian so tukso a manggawa na kasalanan. (Mateo 6:13; Roma 12:12) Naynay ya unoren so simbawa na Dios ta pian agnapugeran iray pikakasi yo. (1 Pedro 3:7) No gagalaen yo so mankasalanan, saray pansumpalan et makapasinagem lapud piguratibon pupugeran nen Jehova so iyasingger ed sikato na saray rebelyoso a singano diad panamegley na makapal a lurem ta pian agmakasabi ed sikato iray pikakasi ra. (Tagleey 3:42-44) Kanian ipatnag yo so mapaabeban awawey, tan ipikasi yon anggapo so nagawa yon makaamper ed sikayon onasingger ed Dios diad pikakasi.—2 Corinto 13:7.
Ipatnag so Panangaro ed Anak na Dios
7, 8. Panon a makatulong ed sakey so pangunor ed simbawa nen Jesus pian nipulisay so makasalanan a kurang?
7 Ipatnag so panangaro ed si Jesu-Kristo diad pangunor ed saray ganggan to, lapud saya so makatulong pian nipulisay yo so makasalanan a kurang. “No sumpalen yo so saray ganggan ko,” so imbaga nen Jesus, “mansiansia kayo ed arok, salanti singa impangunor ko ed saray ganggan nen Amak, tan mansiansia ak ed aro to.” (Juan 15:10) Panon a makatulong ed sikayo so pangiyaplika ed saray salita nen Jesus pian makapansiansia kayo ed panangaro na Dios?
8 Say pangimanon maong ed saray salita nen Jesus so makatulong pian napansiansia yo so moral ya integridad yo. Oniay indatak na Ganggan na Dios ed Israel: “Agka manlawan [“mikalugoran,” NW].” (Exodo 20:14) Balet impabitar nen Jesus so prinsipyo na satan a ganggan diad impangikuan ton: “Balang sakey ya onlimgis ed sakey a bii ed pangagum to, akilawanan [odino, akikalugoran] la ed sikato diad puso to.” (Mateo 5:27, 28) Imbaga nen apostol Pedro a pigaran indibidual ed kongregasyon nen inmunan siglo so walaan na ‘matamata a napno na panagderal ed panamaley’ tan ‘ilagyat da iray magapil a kamarerwa.’ (2 Pedro 2:14) Balet, aliwan singa sikara, napaliisan yo iray kasalanan ed seksual a pamaakaran no aroen tan unoren yo so Dios tan si Kristo tan determinado kayon mamasiansia ed relasyon yo ed sikara.
Paiwanwan Kayo ed Espiritu nen Jehova
9. Nipaakar ed masanton espiritu, anto so nagawa no say sakey et mantultuloy a manggaway kasalanan?
9 Kerewen so masanton espiritu na Dios panamegley na pikakasi, tan paiwanwan kayo ed satan. (Lucas 11:13; Galacia 5:19-25) No mantultuloy kayon manggawa na kasalanan, nayarin ekalen na Dios ed sikayo so espiritu to. Kayari na impankasalanan nen David nipaakar ed si Batseba, oniay inyey-ey to ed Dios: “Agmo ak ibantak ed arawi ed arap mo; tan agmo ekalen ed siak so masanto ya espiritum.” (Salmo 51:11) Lapud agnagbababawin managkasalanan si Arin Saul, naandi ed sikato so espiritu na Dios. Nankasalanan si Saul sanen sikatoy angiyapay na bagat a popoolan tan sanen agto dineral so amin a pulok, saray baka, tan say ari na saray Amalekita. Lapud satan, inekal nen Jehova so masanton espiritu to ed si Saul.—1 Samuel 13:1-14; 15:1-35; 16:14-23.
10. Akin ya agnepeg a getmaen so pankasalanan?
10 Agyo gegetmaen so mankasalanan. “No mankasalanan itayo manlapu ed linawa dia ed kayari pangawat ed pakaamta na tua,” so insulat nen apostol Pablo, “anggapo la so pankaukolan tayo na bengatlan bagat nisengeg ed saray kasalanan.” (Hebreos 10:26-31) Agaylan makapasinagem so pansumpalan no gagalaen yoy mankasalanan!
Ipatnag so Tuan Panangaro ed Arum
11, 12. Diad antoran paraan a say panangaro tan respeto so mangamper ed sakey manlapud pangagamil na makapuy a kondukta ed sekso?
11 Say panangaro ed kaparan totoo so mangamper ed sikayo ed pangagamil na makapuy a kondukta ed sekso. (Mateo 22:39) Say ontan a panangaro so mamakiwas ed sikayon manalwar ed puso yo ta pian agkayo natukson manakew ed panangaro na asawa na sananey a too. Say panggawa ed ontan so mansumpal ed kasalanan a pikakalugoran. (Uliran 4:23; Jeremias 4:14; 17:9, 10) Aligen so maptek a si Job, ya agto inabuloyan so inkasikaton manimano ed siopaman a bii nilikud ed asawa to.—Job 31:1.
12 No respetoen yo so inkasagrado na panamaley, napaliisan yo so ambelat a kasalanan. Gagala na Dios a say mapagalang a panamaley tan seksual a relasyon et nepeg ya ikana pian mamawala na bilay. (Genesis 1:26-28) Tandaan a say gagala na seksual iran kayarian et pian mamawala na bilay, kanian sagrado itan. Saray milalawanan tan mikakalugoran so onsusunggay ed Dios, mangiyaabeba ed seksual a gawa, agmanrerespeto ed inkasagrado na panamaley, tan mankakasalanan ed dilin laman da. (1 Corinto 6:18) Balet say panangaro ed Dios tan ed kaparan too ya atekepan na maridios a katutulok so mangipaliis ed sakey a too manlapud sakey a kondukta a pakadispelosipan to ed Kristianon kongregasyon.
13. Diad anton paraan a say imoral a too so ‘manederal ed saray [mabli a] kayarian’?
13 Nakaukolan tayon iwaklit iray makasalanan a kanonotan ta pian agtayo napaermen iray pinabli tayo ed bilay. “Say miulop ed saray balangkantis daraken [“deralen,” NW] to so [mablin] kayarian to,” so inkuan na Uliran 29:3. Say agmagbabawin mikakalugoran so manederal ed relasyon to ed Dios tan ed relasyon to ed pamilya to. Say asawa ton bii so walaan na saray basiyan parad diborsio. (Mateo 19:9) Balanglan say asawan laki odino bii so nankasalanan, say pansian da so mamasakit a maong ed inosentin kapareha, ananak, tan ed arum nira. Agkayo kasi mipakna a say pakaamta ed makaderal ya epekto na imoral a kondukta so nepeg a mamakiwas ed sikatayo pian resistian so tukson manggawa ed satan?
14. Anton leksion nipaakar ed gawan-mauges so naaralan ed Uliran 6:30-35?
14 Say katuaan ya anggapo la so makapangipetek ed makaderal ya epekto na pikakalugoran so nepeg a mamakiwas ed sakey ya ompaliis ed sayan sinisiblet a tuloy a gawa. Ipapabitar na Uliran 6:30-35 a nayarin milikna so totoo ed sakey a nantakew lapud sikato so narasan, balet ta mudmoraen da so mikakalugoran lapud sikato so walaan na mauges a motibo. Sikato so “mamagbag ed dili a kamarerwa [odino, bilay] to.” Diad silong na Mosaikon Ganggan, sikato so ipapatey. (Levitico 20:10) Say sakey a mikakalugoran so mamasakit ed arum pian napenek to labat so mauges a pilalek to, tan say agmagbabawin mikakalugoran so agmansiansia ed panangaro na Dios tan sikato so naekal ed malinis a Kristianon kongregasyon.
Pansiansiaen so Malinis a Konsiensia
15. Anto so kipapasen na sakey a konsiensia ya amarkaan na ‘singa balatyang a mandarlang’?
15 Pian mansiansia ed panangaro na Dios, agtayo aabuloyan so konsiensia tayo a naandian na pakalikna ed kasalanan. Mabitar, agtayo nepeg ya awaten so abebbeban estandarte na mundo nipaakar ed moral, tan nakaukolan itayon manalwar a maong ed saray pipilien tayon kaulop, babasaen, tan panagligliwaan. Oniay impasakbay nen Pablo: “Dia ed saray arapen a panaon saray arum onsian ira ed pananisia, a dengelen da so saray espiritu a manangilawan tan saray bangat na saray demonyo. A mansalita ra a mankinonsimpit na tila, ya amarkaan so dilin konsiensia ra na singa say balatyang a mandarlang.” (1 Timoteo 4:1, 2) Say konsiensia ya amarkaan a singa diad panamegley na ‘balatyang a mandarlang’ et singa apoolan a laman a pinmiglat tan agla makalikna. Say ontan a konsiensia so agla mamasakbay ed sikatayo ya ompaliis ed saray apostata tan manlapud saray situasyon a nayarin mangikasipa ed sikatayo manlapud pananisia.
16. Akin ya importantin tuloy so pakawalaan na malinis a konsiensia?
16 Say kilalaban tayo so akadepende ed pakawalaan na malinis a konsiensia. (1 Pedro 3:21) Diad panamegley na pananisia tayo ed nipaagus a dala nen Jesus, say konsiensia tayo so alinisan manlapud inatey iran gawa, ‘pian makapanlingkor itayo ed Dios a mabilay.’ (Hebreos 9:13, 14) No gagalaen tayo so mankasalanan, say konsiensia tayo so narutakan tan aliwa itayo lan malinis a totoo a kualipikadon manlingkor ed Dios. (Tito 1:15) Balet diad tulong nen Jehova, nawalaan itayo na malinis a konsiensia.
Arum Iran Paraan Pian Napaliisan so Makapuy a Kondukta
17. Anto so gunggona na ‘sigpot a panumbok ed si Jehova’?
17 ‘Sigpot a tumboken si Jehova,’ a singa ginawa nen Caleb a taga-Israel nensaman. (Deuteronomio 1:34-36) Gawaen so kakaukolanen na Dios ed sikayo, tan agbalot nononoten so pangan ed “dulang na saray demonyo.” (1 Corinto 10:21) Ipulisay so apostasya. Panliketan a kanen so espiritual a tagano a naromog labat ed dulang nen Jehova, tan agkayo napalikdo na saray palson managbangat odino marelmeng iran puersa na saray espiritu. (Efeso 6:12; Judas 3, 4) Iyapasakey ed espiritual iran bengatla a singa say panagaral na Biblia, pipiaral, tan pibibiang ed lawak na ministeryo. Seguradon manliket kayo no sigpot yon tumboken si Jehova tan manggawa na daakan ed kimey na Katawan.—1 Corinto 15:58.
18. Panon a say takot ed si Jehova et makaapekto ed kondukta yo?
18 Magmaliw a determinadon ‘manlingkor ed Dios a tukoyan na galang tan takot.’ (Hebreos 12:28) Say mapagalang a takot ed si Jehova so mamakiwas ed sikayon mangipulisay ed antokaman a pikewet a kurang. Makatulong itan ed sikayo pian say kondukta yo et mitunosan ed simbawa nen Pedro ed saray kapara ton alanaan: ‘No ontawag kayo ed Ama, a manguukom ed saray totoo ya andi-intalonggaring noag unong ed gawa na sakey tan sakey, mansiansia kayo komon a sitatakot legan na pankukurang yo bilang sankaili.’—1 Pedro 1:17.
19. Akin a nepeg ya iyaplika yon naynay iray bengatlan nanaaralan yo ed Salitay Dios?
19 Naynay ya iyaplika so nanaaralan yo ed Salita na Dios. Saya so ontulong ed sikayo pian napaliisan iray ambelat a kasalanan lapud napaneknekan yo a kaiba kayo ed “saraman so lapud panangagamil, saray pakalikna ra apasal ed panangibiig na maong tan mauges.” (Hebreos 5:14) Imbes a magmaliw a bengatbengat ed panagsalita tan kondukta yo, magmaliw ya alerto ta pian mankurang kayo a singa makabat a too, ya “anamoten yo so panaon” ed sarayan marelmeng a panaon. “Talosan yo no anto so linawa na Katawan,” tan mantultuloy yon gawaen itan.—Efeso 5:15-17; 2 Pedro 3:17.
20. Akin a nepeg tayon paliisan so inkaagum?
20 Sigpot a paliisan so inkaagum—say maagum a pampilalek ed kien na arum. Oniay nikuan ed sakey ed Samploran Ganggan: “Agmo iibegan [“aaguman,” New International Version] so abung na kaparam a too, agmo iibegan so asawa na kaparam a too, odino say igaganggan to a laki, odino say igaganggan to a bii, odino say baka to, odino say asno to, odino antokaman a kayarian na kaparam a too.” (Exodo 20:17) Sayan ganggan so analimbeng ed abung, asawan bii, ariripen, ayayep na sakey a too, tan arum nira. Balet say sankaimportantian et say imbalikas nen Jesus a say inkaagum et mandutak ed sakey a too.—Marcos 7:20-23.
21, 22. Antoran paraan so gawaen na sakey a Kristiano pian napaliisan to so mankasalanan?
21 Manalwar a maong ta pian say ontan a pilalek et agmangitonton ed kasalanan. Oniay insulat nen babangatan a Santiago: “[Say] sinansakey a too natukso, no natangguyor tan naayat na kaibgan na laman to a dili. Et no say kaibgan na laman so nanlukon la ‘yanak to so kasalanan, et no asabi to lay inkagnap to, say kasalanan ‘yanak to so patey.” (Santiago 1:14, 15) Alimbawa, no sakey a too et walaan na apalabas a problema nipaakar ed panag-inum, nayarin desidien ton agto mangikarga na de-alkohol ya iinumen ed abung to. Pian napaliisan so tukso a mangilalanor ed sakey ya agkapareho ed sekso, nayarin nakaukolan a salatan na sakey a Kristiano so lugar na trabaho to odino say mismon trabaho to.—Uliran 6:23-28.
22 Agbalot gagawaen ni ingen so unonan kundang a mangitonton ed kasalanan. Say pikakarinyoan ed arum tan pannonot ed imoral iran bengatla so nayarin mangitonton ed pilalawanan odino pikakalugoran. Say pantila nipaakar ed angkelag iran bengatla so mamapakpel ed sakey a too pian mantila la nipaakar ed angkabaleg iran bengatla tan nayarin mansumpal itan ed makasalanan ya agamil na panagtila. Say panagsikot so mangepel ed konsiensia na sakey anggad sikato lay mantakew na angkakabaleg iran bengatla. Anggan say pangonsenti ed apostatan panag-isip so nayarin mangitonton ed sakey diad sigpot a panag-apostasya.—Uliran 11:9; Apocalipsis 21:8.
Panon To No Akapankasalanan Kayo?
23, 24. Anton ligliwa so nagamoran ed 2 Awaran 6:29, 30 tan Uliran 28:13?
23 Ag-ayadyari so amin a totoo. (Eclesiastes 7:20) Balet no akapankasalanan kayo na ambelat, naligliwa kayo ed pikakasi nen Arin Solomon diad inagurasyon na templo nen Jehova. Oniay impikasi nen Solomon ed Dios: “Anggan anto a pikakasi tan pankerew so gawaen na siopaman a too, no say amin a baley mo ya Israel, ya amtaen na balang too so dili a salot to tan say dili ya ermen to, tan yunat da so lima ra ya arap ed saya ya abung: Diad ontan ondengel ka komon manlapu ed tawen ya ayaman mo a pasen, tan mamerdona ka, tan itumang mo ed balang too so manepeg ed saray amin a dalan to, tan say puso antam (ta sika, sika a bukbukor, antam so saray puso na saray anak na saray totoo).”—2 Awaran 6:29, 30.
24 On, amta na Dios so walad puso tan sikato so manamerdona. Oniay kuan na Uliran 28:13: “Say manakbong ed saray impakalukso to ag-onaligwas; balet say mangipatua tan mangikaindan ed sikara makagamor na panangasi.” Diad pangipatua tan pangikaindan ed kasalanan tekep na panagbabawi, nagamoran na sakey a too so panangasi na Dios. Ingen, no sikayo so kinmapuy ed espiritual, anto ni so makatulong pian mansiansia kayo ed panangaro na Dios?
Panon Yon Ebatan?
• Panon itayon makapansiansia ed panangaro na Dios?
• Panon a makatulong so panangaro ed Dios tan ed si Kristo pian nipulisay tayo so makasalanan a kurang?
• Akin a say peteg a panangaro ed arum so mangamper ed sikatayo manlapud panggawa na makapuy a kondukta ed sekso?
• Anto so pigaran paraan pian napaliisan so mauges a kondukta?
[Tepetepet Parad Panagaral]
[Litrato ed pahina 21]
Ipapabitar ed sikatayo nen Judas no panon itayon mansiansia ed panangaro na Dios
[Litrato ed pahina 23]
No mansian so sanasawa, nasakitan a maong so inosentin kapareha tan say ananak da
[Litrato ed pahina 24]
Singa si Caleb, kasin determinado kayon ‘sigpot ya ontumbok ed si Jehova’?
[Litrato ed pahina 25]
Naynay kayon manpikasi parad tulong pian naresistian so tukso