“Nakaukolan ya Unoren Mi so Dios, nen Saray Totoo”

Nagnap a Panagtasi Tekep na ‘Inkakpel’

NGALNGALI la pateyen na marawal a grupo so sakey a matulok a lingkor na Dios. Maong labat ta sikatoy asamsam na saray Romanon sundalo manlapud saray mangaataki tan agda imbulos. Saya la so gapoan na nantutumbokan ya ebento a nambayag na ngalngali limay taon. Bilang resulta et nadngel na dakel ya atagey-rangkon opisyales a Romano so nipaakar ed si Jesu-Kristo.

Sayan pinairap a too et si apostol Pablo. Nen 34 C.E., imparungtal nen Jesus a si Pablo (Saulo) so mangakbibit ed ngaran To ed arap na “saray arari.” (Gawa 9:15) Kasabi na taon 56 C.E., agni iya agawa. Balet, sanen magano lan manampot so komatlon panagbaroy nen apostol Pablo bilang misionaryo, ngalngali la manguman so kipapasen.

Inambon Da Balet Ag-adismaya

Intuloy nen Pablo so pambabaroy to a paarap ed Jerusalem, tan “lapu ed pabano na espiritu” et sikatoy pinasakbayan na pigaran Kristiano a dakel so mangigagagaem a mamasegsegang ed sikato ed satan a syudad. Balet si Pablo so makpel ya angikuan: “Aliwa labat ya akaparaan ak a nabalor, noag met ompatey ed Jerusalem, lapu ed ngaran nen Jesus a Katawan.” (Gawa 21:4-14) Sanen akasabin siansia si Pablo diad templo ed Jerusalem pian ombisita, saray Judion nanlapud Asia a makaamta ed maaligwas ya impan-ebanghelyo to diman so angisagyat ed sakey marawal a grupo pian mamatey ed sikato. Sinmabin tampol iray Romanon sundalo tan sikatoy inyagel da. (Gawa 21:27-32) Lapud satan, si Pablo so awalaan na nikaduma iran pankanawnawa pian niyabawag so katuaan nipaakar ed si Kristo dia ed saray masumpan totoo tan ed saray atagey-rangkon indibidual.

Panagpulong ed Saray Totoon Mairap a Nasabi

Si Pablo so insegep ed tagey na kastilyo a tatawagey Tori na Antonia * pian naprotektaan. Manlapud takayan, say apostol so angiter na mabiskeg a pantasi ed relihyoson grupo na totoo. (Gawa 21:33–22:21) Balet, sanen sinalambit to a sikatoy niganggan a manpulong ed saray Gentiles, sikatoy labay ya atakien lamet na totoo. Ingganggan na komandante na militar a si Lysias ya usisaen si Pablo tan leweten pian naamtaan da no akin a sikatoy aakusaan na saray Judio. Balet, naamper so panlewet ed si Pablo sanen impakabat toy inkasikato bilang sakey a mibabaley na Roma. Diad kaimbuasan, inyarap nen Lysias si Pablo ed Sanhedrin pian naamtaan no akin a sikatoy aakusaan na saray Judio.—Gawa 22:22-30.

Sanen akaalagey ed arapan na sayan atagey a korte, si Pablo so awalaan lamet na maabig a pankanawnawan manpulong ed saray kapara ton Judio. Inyabawag na sayan makpel ya ebanghelisador so sisiaen to nipaakar ed kikioli. (Gawa 23:1-8) Agnin siansia kinmepa ed saman so sanok na saray Judio a malabay a mamatey ed si Pablo, kanian sikatoy inloob ed silir na saray sundalo. Diad tinmumbok a labi, sikatoy akaawat na sayan makapaseseg a panamaseguro na Katawan: “Manpakpel ka; ta no panon so impamatuam na nipaakar ed siak ed Jerusalem, ontan met a nakaukolan so pamatuam ed Roma.”—Gawa 23:9-11.

Naamper so getman pamatey ed si apostol Pablo sanen sikatoy maamot ya imbatik ed Cesarea, say kabisera na Judea a kawalaay administratibo na Roma. (Gawa 23:12-24) Diman et awalaan lamet si Pablo na alay abig iran pankanawnawa, tan pinulongan to so “saray arari.” Balet, diad primero et impabitar na apostol ed si Gobernador Felix ya anggapo so ebidensyan manuporta ed saray akusasyon ed sikato. Diad saginonor et pinulongan nen Pablo so gobernador tan say asawan ton si Drusilla nipaakar ed si Jesus, panagdangka, inkatunong, tan say onsabin panangukom. Anggaman ontan, si Pablo so pinansiansia ni ed prisoan ed loob na duay taon, lapud iilaloan nen Felix a sikatoy pasuksokan balet agbalot agawa itan.—Gawa 23:33–24:27.

 Sanen si Felix so sinalatan nen Festus, nansagpot lamet iray Judio pian nadusa tan napapatey si Pablo. Dinengel lamet so kaso to diad Cesarea, tan pian agniyalis ed Jerusalem so pan-usay ed sikato, oniay imbaga nen Pablo: “Siaalagey ak ed arap na panangukoman nen Cesar . . . Ompanon ak ed Cesar.” (Gawa 25:1-11, 20, 21) Pigaran agew ed saginonor, kayarin inyarap na apostol so kaso to ed si Arin Herodes Agrippa II, oniay inkuan na ari: “Dia ed dagdaiset a salita nauyot [“natangguyor,” NW] mo ak a man-Kristiano.” (Gawa 26:1-28) Nen manga 58 C.E., niyakar si Pablo ed Roma. Bilang sakey a priso diman, sayan maabilidar ya apostol so nantultuloy a nananap na saray pankanawnawa ed loob na duara nin taon pian nipulong to so nipaakar ed Kristo. (Gawa 28:16-31) Ompatnag a diad kaunoran et tinmalindeg si Pablo ed arapan nen Emperador Nero, indeklara ya andiay-kasalanan, tan diad kaunoran et nituloy to lamet so panagmisionaryo to bilang bulos lan too. Anggapo so rekord a wala ni arum ya apostol ya awalaan na pankanawnawan mangipasabi na maong a balita ed prominentin totoo.

Unong a nipabitar ed tagey, si apostol Pablo so nambilay unong ed makanakanan prinsipyo ya imbalikas na saray kapara ton Kristiano ed arapan na Judion korte: “Nakaukolan ya unoren mi so Dios, nen saray totoo.” (Gawa 5:29) Agaylan abig ya alimbawa so impatnag to parad sikatayo! Anggaman ed pampoporsigi na totoo a mamatunda ed sikato, sigpot ya inunor na sayan apostol so ganggan a mangiter na nagnap a panagtasi. Bilang resulta na agnagiing a katutulok to ed Dios, asumpal nen Pablo so asainmin to bilang “sakey a baso a pinili” pian mangakbibit ed ngaran nen Jesus “ed arap na saray Gentiles, tan saray arari, tan saray anak na Israel.”—Gawa 9:15.

[Paimano ed leksab]

[Kahon/Saray litrato ed pahina 9]

KASIN INTERESADO LAMBENGAT SI PABLO A MANGIDEPENSA ED INKASIKATO?

Bilang komento ed sayan tepet, oniay insulat na autor a si Ben Witherington, III: “Diad punto de bista nen Pablo . . . , say importante et aliwan say pangidepensa ed inkasikato, noagta say pantasi nipaakar ed ebanghelyo diad saray walad pakauley, namparan Judio tan Gentil. . . . Diad tua, say talagan uusayen et say ebanghelyo.”