Sakey ya Eskuelaan a Saray Mansusumpal ed Satan so Mangugunggona ed Totoo ed Sankamundoan

DIAD masulok a 98,000 a kongregasyon na saray Tasi nen Jehova ed masulok a 200 a daldalin, nibabangat na Dios iray totoon manlalapud amin a kipapasen na panagbilay. Say manunan libro ya aaralen da et say Biblia, tan gagala na sayan edukasyon a tulongan iray indibidual ya onaligwas ed espiritual diad panaral da no anto so linawa na Dios tan no panon so pambilay da unong ed satan. Saramay mangaawat ed sayan edukasyon so nagugunggonaan a tuloy. Inanabang da met ed arum so naaaralan da, a mitunosan itan ed ganggan nen Jesu-Kristo a manggawa na saray babangatan.—Mateo 28:19, 20.

Nilikud ed say programan panagbangat a nagagawa ed saray kongregasyon da, saray Tasi nen Jehova so angiletneg na pigaran eskuelaan parad espisyal a gagala. Sakey ed saraya so Ministerial Training School. Ginapoan itan nen Oktubre 1987 diad Pittsburgh, Pennsylvania, E.U.A. Say primeron klase so tugyopen na 24 ya estudyante a mansasalitay Ingles. Manlapud saman, saray kurso so gagawaen la ed 21 a lenguahe diad 43 a bansa. Saray walad kasuloan a mamatatken tan ministeryal a lingkor ed masulok a 90 a bansa so akalista la diad kaplesan. Kasumpal na waloran-simba a kurso ra, saray mansusumpal so ibabaki a manlingkor ed lugar a walay pankaukolan, balanglan diad mismon bansa ra odino diad arum a bansa. Sanen anampot so taon 2005, masulok a 22,000 a Kristianon ministro so nangraduar la ed satan a kurso. Nabebendisyonan a tuloy so mapaabeban pansasagpot da ya iyalibansa so intereses na Panarian tan ed pangugunggona ra ed arum.—Uliran 10:22; 1 Pedro 5:5.

 Panggawa na Paraan Pian Makapanaral

Pian makapanaral ed Ministerial Training School so maslak ya estudyante, kaukolan day onkerew na bakasyon manlapud sekular a trabaho ra. No maminsan et problema itan. Diad Hawaii, kinaukolan na duaran Kristianon lalaki so onkerew na bakasyon manlapud trabaho ra bilang mamaestro lapud naimbitaan iran manaral ed Ministerial Training School. Tekep na pananisia, insubmiti ra so kerew da tan impaliwawa ra no akin a labay day onatendi tan no panon ira a nagunggonaan. Sikaran dua so inikdan na bakasyon.

Diad pigaran kaso, saray Tasi a kinmerew na bakasyon manlapud trabaho ra so binagaan a posiblin naekal ira ed trabaho. Mas pinili ra so panangipasal na organisasyon nen Jehova, anggano naandian ira na trabaho lapud satan. Arum ed sikara so pinapawil lanlamang na saray amo ra diad trabaho ra kasumpal dan nanaral. Say ontan a determinasyon pian makapanaral ed satan ya eskuelaan et nayarin deskribien ed antikey diad onian paraan: Isubmitim so kerew mon manbakasyon, ipikasim a tulongan ka nen Jehova, tan ipalimam la ed sikato so arum nin bengatla.—Salmo 37:5.

“Nibangat Ira ed Jehova”

Manunan kabiangan ed sayan waloy-simban kurso ed eskuelaan so aralem a panagaral ed Biblia. Naaaralan na saray estudyante no panon a naoorganisa iray totoo nen Jehova a manggawa ed linawa to tan no panon dan personal a nausar so Biblia ed mas epektibon paraan diad lawak na ministeryo ra, diad saray pantitipon ed kongregasyon, tan diad saray asamblea.

Oniay insulat na sakey a maapresyan estudyanten nangraduar la dia ed sakey a kalangweran ya agni akaatendi: “Manisia ka’d siak, talagan sankaabigan lan edukasyon so nagamoran mo ed saya. Lalon atalosan ko so kabaliksan na samay teksto ya analambit ed pagmaliw a ‘nibangat ed si Jehova.’ Amin a naeksperiensyam so makaibangat, makaimpluensya, tan makapanguman ed puso tan personalidad pian lalon nitunos iratan ed alimbawa nen Kristo Jesus. Talagan nawalaan ka na sankaliketan ya eksperiensya ed bilay mo.”—Isaias 54:13.

Managpulong, Managpastol, tan Managbangat

Saray asumpal la ed Ministerial Training School so manlilingkor la natan ed 117 a daldalin. Kabiangan la iray isla diad Atlantiko, Caribbean, tan Pasipiko ontan met ed dakel a bansa a walaray sangan opisina na saray Tasi nen Jehova. Irereport na saray sanga a napapatnagan so maabig ya inkipasal na saray estudyante diad paraan na panagpulong, panagpastol, tan panagbangat da. Nipasal ira a maong pian mas epektibo ran nausar so Biblia diad lawak na ministeryo. (2 Timoteo 2:15) Sano eebatan da iray tepet na saray unabung, mabetbet ya uusaren da met so libron Reasoning From the Scriptures * tan ipapasal day arum a manangipalapag na Panarian a mangusar met ed satan. Makaimpluensya so inkaseseg na saray nangraduar, tan napapabiskeg iray kongregasyon lapud saray kimey da.

Saray mamatatken ed kongregasyon so apribilehyoan a ‘manpastol ed pulok,’ ya ontutulong iran mangasikaso ed espiritual iran pankaukolan na arum. (1 Pedro 5:2, 3) Oniay inkuan na sakey a matatken nipaakar ed sayan uksoyan: “Misalsalamat kami lapud angibaki so sangan opisina na saray nipasal a maong ya agagin lalaki ya ontulong ed sikamin manakbat ed responsabilidad a panagpastol ed pulok na Dios.” Oniay mipadparan inkomento na sakey a sanga diad Arawin Bukig: “Saray nangraduar so mapangasin tuloy. Makukuli ra tan rerespetoen iran maong na kongregasyon. Sankaimano tan papablien a maong so inkamapaabeba, inkaligsa, tan inkaseseg da. Mabulos iran mangisasakripisyo ed inkasikara tan labalabay day ontulong ed saray kongregasyon a mankaukolan na saray managpastol.” (Filipos 2:4) Saratan a lalaki so mamapaseseg ed saray kapananisiaan da tan makanepegan ira na komendasyon.—1 Corinto 16:18.

Nilikud ed satan, saray instruktor ed Ministerial Training School so ontutulong ed saray estudyante a napaaligwas so dunong dan manpaliwawa ed publiko. Lapud iyaaplika da iray suhestion tan konsehon naaawat da, dakel ed saray mangragraduar so nauusar diad saray programa ed  sirkiton asamblea tan distriton kombension. Naobserbaan na sakey a manangasikaso na sirkito a saray nangraduar so “marundunong a manpaliwawa tan iyaaplika ra so materyal diad panamegley na maabig a panagkatunongan.”—1 Timoteo 4:13.

Say kalidad na panagbangat ed saray pantitipon ed kongregasyon diad sakey a bansa ed Aprika et inmaligwas a tuloy kayarin ginapoan diman so Ministerial Training School tan nibaki iray nangraduar dia ed teritorya ra. Saray mamatatken ya asumpal ed satan ya eskuelaan so ontutulong ed panagpulong, panagpastol, tan panagbangat, kanian napapabiskeg iray kongregasyon ed espiritual a paraan.—Efeso 4:8, 11, 12.

Maaligwas a Panangasikaso ed Kongregasyon

Diad dakel a lugar et nakaukolan so dakel nin mamatatken tan ministeryal a lingkor. Walaray kongregasyon ya andian a balot na mamatatken no anggapoy imbaki ed sikara a nangraduar ed Ministerial Training School. Kanian dakel a mansusumpal so nibabaki a manlingkor ed saray lugar a walay ontan a pankaukolan.

Inreport na dakel a sanga a sarayan lalaki so “mikabisadon maong ed saray uksoyan na organisasyon,” “seryoson manusumpal ed saray responsabilidad da,” “ontutulong ed arum a mangapresya tan manrespeto ed organisasyon nen Jehova,” tan “mamapaligsa tan mamapabiskeg ed espiritualidad na saray kakongregasyon da.” Nagagawaan iratan lapud tutumboken na saramay mansusumpal ed sayan eskuelaan so walan nisulat ed Salita na Dios tan ag-ira manmamatalek ed dilin pakatalos da odino agda ipapasen so inkasikaran dili a makabat. (Uliran 3:5-7) Magmamaliw a bendisyon iratan a lalaki diad saray kongregasyon a panlilingkoran da.

Manlilingkor Diad Niyarawi Iran Teritorya

Arum a mangragraduar et tuturoen bilang espisyal payunir ya ontutulong ed saray niyarawin grupo pian magmaliw iratan a kongregasyon. Bilang apresasyon ed itutulong da, oniay inkuan na sakey a matatken ed sulinek a lugar ed Guatemala: “Diad loob na 20 taon et pampapagaan ko no panon a naasikaso iyan maaw-awang a teritorya. Mabetbet kon ipipikasi itan. Saray agagin lalaki a nanaral ed Ministerial Training School so nipasal a maong ed panagsalita tan ed saray pamaakaran na organisasyon, tan misalsalamat ak lapud naaasikaso lan maong natan so teritorya.”

Naaralan na saray nangraduar so magmaliw ya epektibo ed saray teritorya a kaukolan day manbiahe na ararawi diad kapalandeyan pian nasabi iray ataytayak a purok. Diad saratan a niyarawin lugar et nileletneg tan naoorganisa ran tampol iray grupo, anggano ag-itan nasarag a gawaen na arum a manangipalapag. Singa bilang, sakey a matatken ed Niger so kinmerew na tulong na saray nangraduar lapud moriaen ton alay abig so nagawaan da diad lugar a panaayaman to. Nagkalalo la ed saray nisulinek a lugar, a mas mainomay parad saray lalakin andian na asawa so manlingkor bilang espisyal payunir tan manangasikaso na sirkito. Singa si apostol Pablo, kaukolan dan arapen ‘iray peligro ed saray ilog tan saray managsabat ed karsada, saray peligro ed kalawakan,’ tan saray agkomportable a kipapasen ontan met ed say kapagaan ed saray kongregasyon a panlilingkoran da.—2 Corinto 11:26-28.

Mangugunggona ed Saray Kalangweran

Papasesegen na Kasulatan iray kalangweran a nodnonoten da so Manamalsa ra. (Eclesiastes 12:1) Saray maseseg a nangraduar ed Ministerial Training School so maabig ya alimbawa parad saray Kristianon kalangweran. Sanen walay duaran nangraduar a sinmabi diad sakey a kongregasyon ed Estados Unidos, adoble so dagup a bilang na oras ya inusar na saray agagi diad ministeryo. Niarum ni, dinmakel so regular payunir, odino sigpot-panaon a manangipalapag na Panarian, manlapud 2 a nagmaliw a 11. Onia so kaslakan lan nagagawa ed dakel a kongregasyon.

Papasesegen met na saray nangraduar iray malangwer nin lalaki a gawaen dan kalat so panaral ed Ministerial Training School. Saya so amakiwas ed arum ya aliwa nin ministeryal a lingkor a dampoten itan a pribilehyo. Inkuan na sanga ed Netherlands a saray nangraduar ed Ministerial  Training School et “maabig ya ehemplo parad saray malangwer nin lalaki a mannononot no antoy gawaen da ed bilay da.”

Manlilingkor ed Saray Kongregasyon a Sananey so Lenguahe

Diad dakel a bansa et onaaligwas iray pansasagpot a nipulong so maong a balita ed totoo diad dilin salita ra. Mabetbet a saray nangraduar ed Ministerial Training School so manaaral na arum a lenguahe tan manlilingkor ed saray teritorya a dakel so manaayam ya imigrante. Alimbawa, diad Belgium et nakaukolan so dakel nin manangipulong na Panarian diad saramay mansasalita na Albaniano, Persiano, tan Ruso.

Saray kongregasyon tan grupo a manguusar na sananey a lenguahe diad Alemanya, Britanya, Estados Unidos, Italya, Mexico, tan arum niran bansa so nagugunggonaan lan maong ed saray ombiabiahen manangasikaso, mamatatken, tan ministeryal a lingkor a nangraduar ed Ministerial Training School. Inreport na sanga ed Korea a “balbaleg so nagagawaan na masulok a 200 a nangraduar diad itutulong da ed saray kongregasyon tan grupo a manguusar na sananey a lenguahe.”

Mapaabeban Manlilingkor ed Arum Niran Kapasidad

Nilikud ed panlilingkor da ed saray grupo tan kongregasyon a manguusar na sananey a lenguahe, saramay nangraduar ed Ministerial Training School so manlilingkor bilang mamatatken, ministeryal a lingkor, tan ombiabiahen manangasikaso. Arum so angawat ed saray asainmin ed arum a bansa, lapud nayarin walay maganat a pankaukolan ed Service Department diad sakey a sanga. Saramay marunong ed konstruksion so nayarin mibiang ed programan panagpaalagey na Kingdom Hall.

Lapud ondarakel iray kongregasyon tan sirkito ed sankamundoan, lawas nakaukolan so dakel nin ombiabiahen manangasikaso. Pian walaray nibaki, saray apilin nangraduar ed Ministerial Training School so ipapasal ed loob na samploran simba diad kimey a panagbaroy insan manlingkor ira bilang kasandi odino regular a manangasikaso na sirkito. Manga 1,300 a nangraduar so manlilingkor la natan bilang ombiabiahen manangasikaso diad 97 a bansa. Diad sakey a bansa ed Aprika, 55 porsiento na saray ombiabiahen manangasikaso et nangraduar ed Ministerial Training School. Diad sananey a bansa ed Aprika et 70 porsiento so bilang da.

Diad Arawin Bukig, Australia, Canada, Estados Unidos, tan Europa, nilasus a mangragraduar ed sayan eskuelaan so nibabaki a manlingkor ed arum a bansan walaan na espisipiko iran pankaukolan. Diad onian paraan et ninanatnat ed sankamundoan iray gunggona na sayan eskuelaan.

Diad panamegley na Anak ton si Jesu-Kristo, si Jehova so mangipapasal na saray managpulong, managpastol, managbangat, tan arum nira pian niyalibansa so intereses na Panarian diad sarayan kaunoran ya agew. Kasin nailaloan tayo ya ondakel ni iray totoo na Dios? Segurado! Kanian lawas nakaukolan so dakel nin dedikado a lalaki pian dampoten da so babaleg a responsabilidad. (Isaias 60:22; 1 Timoteo 3:1, 13) Say Ministerial Training School so mangiiter na pankanawnawa ed saray mamatatken tan ministeryal a lingkor pian nipasal tan napalaknab day ministeryo ra, a walaan na baleg a gunggona ed sikaran mismo tan ed arum ni diad sankamundoan a lawak.

[Paimano ed leksab]

[Saray litrato ed pahina 10]

Say Ministerial Training School so mamapabulaslas ed intereses na Panarian ed sankamundoan

[Saray litrato ed pahina 13]

Kasin pipirawaten moy makapanaral ed Ministerial Training School pian nagunggonaan mo so arum?