Sakey ya Isyu a Pakalalanoran Mo

WALA ta so kaarom odino kapamilyam a maap-apit ed sika? Panon to no walay mangakusa ed sika a pansiasiansiaen mo lambengat itan a relasyon lapud sinisiblet iran rason? Agka kasi nasakitan, a nayarin onsyodot ni ingen? Ontan so mismon iyaakusa nen Satanas a Diablo ed amin a walaan na maapit a relasyon ed si Jehova a Dios.

Nonoten pay agawa sanen atangguyor nen Satanas so inmunan sanasawa, si Adan tan Eva, a manumlang ed ganggan na Dios tan minonong ed sikato diad impanrebelde to ed Dios. Kasin sayan agawa et mankabaliksan a saray totoo so mansiansia labat a matulok ed si Jehova daput no pakagunggonaan da itan? (Genesis 3:1-6) Manga 2,500 a taon kayari na inkasipa nen Adan, imbangon lamet nen Satanas iyan mismon pamaakaran—a diad sayan pankanawnawa et mangilalanor ed lakin manngaran na Job. Lapud say akusasyon na Diablo nensaman so malinew ya angipabitar ed say isyu, usisaen tayo pan maong so salaysay na Biblia.

“Agko Ekalen so Inkaskey Ko”

Si Job et ‘sakey a laki a naskey tan matunong, a walaan na takot ed Dios tan ompapaliis ed mauges.’ Balet, pinikewet a maong nen Satanas so kaptekan nen Job. Oniay intepet to ed si Jehova: “Si Job antakot ta ed Dios ya andi-kabaliksan?” Insan, dineralan na Diablo so Dios tan si Job diad impangakusa to a sinaliw nen Jehova so katooran nen Job diad impanalimbeng tan impamendisyon To ed sikato. Tan oniay inyangat nen Satanas: “Yunat mo so limam natan, tan diwiten mo so amin a wala ed sikato, et ikaindan to ka ed lupam.”—Job 1:8-11.

Pian naebatan iratan, inabuloyan nen Jehova si Satanas a suboken si Job. Diad gunaet ton pabenegen iyan matoor a laki manlapud panaglingkor ed Dios, say Diablo so angitarok ed sikato na nantutumbokan a trahedya. Amin ya ayayep nen Job so balanglan tinakew odino inatey, saray ariripen to so pinatey, tan ananak to so inatey. (Job 1:12-19) Balet kasin tinmalona si Satanas? Andin balot! Anggaman ag-amta nen Job a si Satanas so sengegan na saray subok ed sikato, oniay inkuan to: “Si Jehova initer to, tan si Jehova inala to; bendito so ngaran nen Jehova.”—Job 1:21.

Kayari na satan, oniay inkuan nen Jehova sanen inmasingger ed sikato si Satanas: “[Si Job] et masiansia a bembenan to ni so inkaskey to, anggan tinenyeg mo ak sumpa ed sikato, pian sikato so bagbagen ya andi-sengeg.” (Job 2:1-3) Say importantin isyu et nipaakar ed inkaskey odino integridad nen Job—kalidad a mankaukolan na agmanguman a katooran ed Dios tan pansiansia ed inkatunong. Diad satan a pankanawnawa et tinmalonay Job diad isyu nipaakar ed integridad. Balet, agnin siansia tinmunda so Diablo.

Lalon pinalaknab nen Satanas so akusasyon to, ya angapekta la ed amin a totoo. “Baog tan baog,” so inkuan to ed si Jehova, “on, amin a say too wala ed sikato iter to nipaakar ed bilay to. Balet  yunat mo so limam natan, tan diwiten mo so pukel to tan laman to, et ikaindan to ka ed lupam.” (Job 2:4, 5) Diad impangusar to ed inkalapagan a terminon “say too” imbes a say ngaran a Job, susuppiaten na Diablo so integridad na amin a too. Singano ibabaga ton: ‘Gawaen na too so amin a bengatla pian niliktar so bilay to. Ikdan mo ak na pankanawnawa, tan sarag kon pabenegen so anggan siopa manlapud Dios.’ Kasin anggapo so too a mansiansian matoor ed Dios diad amin a kipapasen tan diad amin a panaon?

Inabuloyan nen Jehova so Diablo a mamairap ed si Job panamegley na graben sakit. Ontan lay impanirap nen Job ya impikasi to a sikatoy ompatey la komon. (Job 2:7; 14:13) Siansia ni, oniay inkuan nen Job: “Angga ed ompatey ak agko ekalen so inkaskey ko a manlapu ed siak.” (Job 27:5) Imbaga itan nen Job lapud inaro to so Dios, tan anggapoy makapanguman ed satan. Pinaneknekan nen Job a sikatoy walaan na integridad. “Dia ed ontan si Jehova,” kuan na Biblia, “benendisyonan to so kaunoran a kasampotan nen Job a lalo nen say gapo to.” (Job 42:10-17) Wala ni kasi so arum a singa si Job? Anto so niparungtal diad inlalabas na panaon?

No Panon a Naebatan so Angat

Diad kapitulo 11 na libro na Biblia a Hebreos, indatak nen apostol Pablo so kangaranan na saray matoor a lalaki tan bibii sakbay na panaon na saray Kristiano, laktip lay Noe, Abraham, Sara, tan Moises. Insan inyabawag na apostol: “Onkulang ak naani na panaon pian salitaen ko so nipaakar ed [arum].” (Hebreos 11:32) Ontan lay karakel na sarayan matoor a lingkor na Dios a tinukoy ira nen Pablo bilang “sankabalgan a lurem na saray tasi,” ya inkompara to ra ed sakey a baleg tan makapal a lurem ya onsasaknap ed tawen. (Hebreos 12:1) On, diad inlabas na dakel a siglo, dakerakel a totoo so angagamil ed kawayangan dan mandesidi tan pinili ray manmatoor ed si Jehova a Dios.—Josue 24:15.

Say ultimon ebat ed imbaga nen Satanas a sarag ton pabenegen so totoo manlapud si Jehova et say mismon Anak na Dios, si Jesu-Kristo. Anggan say makapaot-ot a maong ya ipapatey diad panamairapan a kiew so ag-aneral ed integridad to ed Dios. Legan a manpapanabos si Jesus, oniay inyakis to: “Ama, dia ed saray limam imatale’ko so espirituk.”—Lucas 23:46.

Lalon apaneknekan diad inlabas na panaon ya agnayarian na Diablo a pabenegen so amin a totoo manlapud panlilingkor da ed tuan Dios. Dakerakel a totoo so akapikabat ed si Jehova tan ‘sikatoy aaroen da ed masimoon a puso tan ed masimoon a kamarerwa tan ed masimoon a nonot.’ (Mateo 22:37) Say agnagiing a katooran da ed si Jehova so amaneknek a nalilingo si Satanas diad isyu nipaakar ed integridad na too. Nayarian mo met a paneknekan a nalilingo so Diablo diad pagmaliw mon matoor.

Anto so Nepeg Mon Gawaen?

Linawa na Dios ya “amin a totoo nilaban ira komon, tan ondago ra ed pakapikabat ed katuaan.” (1 Timoteo 2:4) Panon mon nagawaan itan? Ipanaon mo so panaral ed Biblia pian ‘naamtaan mo so saksakey a tuan Dios tan saman so imbaki to, salanti, si Jesu-Kristo.’—Juan 17:3.

Inangat nen Satanas so integridad na too diad impanuppiat to ed saray motibo na too ed panlilingkor to ed Dios. Pian naimpluensyaan na pikakabat iray motibom, nepeg mon pasabien itan ed pusom. Tan pian nagawa itan, nakaukolan a wala ni gawaen mo nen say basta pananap na impormasyon manlapud Biblia. Iyugalim so pandalepdep ed naaaralan mo. (Salmo 143:5) Sano babasaen mo so Biblia odino say publikasyon a nibase’d Biblia, seguroen mon nawalaan ka na panaon a manmotektek ed sarayan tepet: ‘Anto so ibabangat na saya ed siak nipaakar ed si Jehova? Antoran kalidad na Dios so naimanok a niparungtal dia? Diad antoran aspekto na bilay ko a kaukolan kon aligen itan? Anto iray aabobonan odino ag-aabobonan na Dios? Panon itan a mangapekta ed panmoriak nipaakar ed Dios?’ Say ontan a panagmolimoli so mamano ed pusom na panangaro tan apresasyon parad Manamalsa.

Say integridad ed Dios so aglambengat mangilalanor ed relihyoson sisisiaen. (1 Arari 9:4) Kaukolan moy magmaliw a maptek ed moral ed amin ya aspekto na bilay pian napansiansiam so integridad mo ed si Jehova a Dios. Ingen, anggapon balot so naandi ed sika no pansiansiaen mo  so integridad mo. Si Jehova so “maliket a Dios,” tan labay ton panggayagaan mo so bilay. (1 Timoteo 1:11, NW) Konsideraen tayo natan so pigaran agamil a kaukolan mon paliisan ta pian mansiansia kan malinis ed moral, a diad ontan et napanggayagaan mo so mas maliket a bilay tan say panangabobon na Dios.

Paliisan so Makapuy a Kondukta ed Sekso

Si Jehova a mismo so angidatak na estandarte ed panangasawa diad Salita to, say Biblia, a mangibabagan: “Say sakey a laki taynan to so ama to tan ina to, et yamong to so asawa to: et saksakey ira a laman naani.” (Genesis 2:21-24) Lapud magmaliw a ‘saksakey a laman’ so sanasawa, nigalang da so uksoyan na Dios ed panangasawa no pansiansiaen da a parad sikara labat a dua so seksual a relasyon. Oniay inkuan nen apostol Pablo: “Say panangasawa sikato komon so narayew ed saray ganagana, tan say dukolan andi komon so tilol to: ta saray managlawan tan saray mankakalugoran ukomen ira naani na Dios.” (Hebreos 13:4) Say balikas a “dukolan” so mankabaliksan na pan-akdol na laki tan bii a legal a sanasawa. Siopaman ed sikara a mirelasyonan ed sekso ed agto asawa so mankasalanan na pikakalugoran tan managmak na ambelat a panangukom na Dios.—Malaquias 3:5.

Komusta balet so pirelasyonan ed sekso sakbay na kasal? Sumlang met itan ed saray estandarte ed moral ya indatak nen Jehova. “Sikatoya so linaway Dios . . . a paliisan yo so lawan,” so kuan na Biblia. (1 Tesalonica 4:3) Say homoseksualidad, insesto, tan bestialidad (seksual a relasyon na too tan ayep) et kasalanan met ed Dios. (Levitico 18:6, 23; Roma 1:26, 27) Siopaman a malabay a mamaliket ed Dios tan nawalaan na peteg a maliket a bilay so nepeg ya onarawi ed imoral ya ag-agamil.

Komusta met so kondukta a mangisasagyat na pilalek ed sekso sakbay na kasal? Sayan agamil et aliwan makapaliket ed si Jehova. (Galacia 5:19) Nepeg met a mantultuloy ya iwaklit ed nonot iray imoral ya ideya. Inkuan nen Jesus: “Balang sakey ya onlimgis ed sakey a bii ed pangagum to; akilawanan la ed sikato diad puso to.” (Mateo 5:28) Onaplika met iratan a salita diad inengneng ed pornograpiko iran litrato diad papel, pelikula, odino Internet; diad pambasa na saray artikulo nipaakar ed seksual ya aktibidad; tan diad idengel ed mabanday iran liriko na kankanta. Say ipaliis ed ontan a materyal so mamaliket ed Dios tan walaay maabig ya epekto ed bilay na sakey.

Komusta met so pikakarinyoan? Say panagkarinyo so inukeran bilang “agseryoson panangipatnag na panggusto odino makapasagyat ed sekso” a kakikiwas. Say de-asawan laki odino bii a mankarinyo odino mikarinyoan ed sakey ya agto asawa et sumlang ed saray prinsipyo na Biblia tan pakapatnagan na agpanagrespeto ed si Jehova. (Efeso 5:28-33) Agaylan agmatukoy ya ipatnag na saray walad kasuloan so romantikon liknaan ed sakey tan sakey parad panliket labat! Panon to no sineryoso so pankakarinyo bangta agmet getma ya ontan? Isipen pa so pakasakitan ed emosyon makasengeg ed satan. Nepeg a nonoten met a say pikakarinyoan so makapangitonton ed pikakalugoran odino pilalawanan. Diad biek a dapag, say masimpit a pantrato ed saray agkapareho ed sekso so mamaaralem na dilin-respeto na sakey.—1 Timoteo 5:1, 2.

Paliketen so Dios Diad Arum Nin Aspekto na Bilay

Diad dakel a bansa et magmainomay so pakaala na de-alkohol iran iinumen. Kasin mauges so oninum na saratan? Ag-isesebel na Kasulatan so kabkaabigan ya iyinum na alak, serbesa, odino arum nin iinumen a de-alkohol. (Salmo 104:15; 1 Timoteo 5:23) Balet, say alablabas a panag-inum tan panagbuanges so makapuy ed imaton na Dios. (1 Corinto 5:11-13) Seguradon agmo labay a naderal so bunigas mo tan nabuyak so bilay na pamilyam lapud alablabas a panag-inum.—Uliran 23:20, 21, 29-35.

Si Jehova so “Dios na katuaan.” (Salmo 31:5) ‘Agnayarin mantila so Dios,’ so kuan na Biblia. (Hebreos 6:18) No labay mon nagamoran so panangabobon na Dios, paliisan moy mantila. (Uliran 6:16-19; Colosas 3:9, 10) “Salitaen yo so tua, balang sakey ed kapara ton too,” so insimbawa na Biblia ed saray Kristiano.—Efeso 4:25.

 Wadtan met so agamil a panagsugal. Anggaman labalabay itan na dakel a totoo, say panagsugal et sakey a nengneng na panag-agum, ta sakey itan a getma a nawalaan na kuarta diad pakatalo na arum. Ag-aabobonan nen Jehova iraman so “maagum na pilak.” (1 Timoteo 3:8) Kanian no labay mon paliketen si Jehova, ompaliis ka ed antokaman a nengneng na panagsugal, laktip la iray lotto, bingo, tan itaya ed kareray kabayo. Namoriam ed satan a talagan magenap manaya so kuartam a panlegpet ed saray pankaukolan na pamilyam.

Say panagtakew, salanti, pangala na bengatlan agmo kayarian, so sananey nin nengneng na agum. “Agka mantakew,” so kuan na Biblia. (Exodo 20:15) Mauges so pansaliw na saray bengatla ya amtam a tinakew tan say pangala na saray bengatla ya ag-ipatanir. “Saman so nantatakew nensaman agkomon la mantakew,” so kuan na Biblia, “noag mansagpot, a gawaen na saray limalima to so bengatla a makapaabig, pian wala so niiter to ed satay walay pankaukolan to.” (Efeso 4:28) Saray mangaaro ed si Jehova so matuan mantratrabaho ed sanagew, ya agda tatakewan na panaon so amo ra. ‘Pirawat day manbilay a sigagalang [odino, matua] dia ed saray amin a bengatla.’ (Hebreos 13:18) Tan say malinis a konsiensia et seguradon mamareen ed nonot na sakey.

Panon a momoriaen na Dios so sakey a maisasanok? Oniay impasakbay na Biblia: “Agka mikaaro ed too a maisasanok; tan agka mila ed masanok a too.” (Uliran 22:24) Say agnakontrol a sanok so mabetbet a mansusumpal ed panggaway karamsakan. (Genesis 4:5-8) Nipaakar ed ibabales, oniay imbaga na Biblia: “Aleg ya itumang yo ed anggan siopa so mauges ed mauges. Pansesegan yo so saray bengatla a makapagalang ed arap na ganagana a too. No nayari, dia ed anganggaan na nayarian yo, manayam kayo ed kareenan ed ganaganay totoo. Aleg a sikayo a dili so ombales, inararo, noag ingen ikdan na pasen so sanok na Dios; ta nisulat: Siak so akankien na panamales; siak so ontumang naani, kuan na Katawan.” (Roma 12:17-19) Sano unoren tayo itan a simbawa, magmaliw a mareen so bilay tayo—tan mangarum itan na liket tayo.

Ontalona Ka

Kasin ontalona ka ed pamasiansiam na integridad mo ed Dios anggaman ed saray desdes ya agmanmatoor? On, nayarian mo. Bidbiren a labay na Dios ya ontalona ka diad pamaneknek a nalilingo si Satanas diad isyu nipaakar ed integridad, lapud oniay ibabaga na Salita To: “Ana’ko, onkabat ka, tan paliketen mo so pusok, pian naebatan ko so mamalaw ed siak.”—Uliran 27:11.

Nayarian mon ipikasi ed si Jehova a pabiskegen to kan manggawa na duga diad imaton to. (Filipos 4:6, 7, 13) Kanian pansagpotan mon maong a padaaken so pikakabat mo ed Salitay Dios, say Biblia. Say maapresyan pandalepdep ed naaaralan mo ed Biblia so ontulong ed sikan napaaralem so panangarom ed Dios tan mamakiwas ed sika a mamaliket ed sikato. “Saya so aro na Dios,” kuan na 1 Juan 5:3, “a sumpalen tayo so saray ganggan to: tan saray ganggan to aliwa ran ambelat.” Saray Tasi nen Jehova ed lugar yo so maliket ya ontulong ed sika ed panaral ed Biblia. Papasesegen mi kan mitalosan ed sikara diad lugar yo, odino nayarian moy mansulat ed saray manangipalapag na sayan magasin.

[Litrato ed pahina 4]

Nansiansian matoor si Job anggaman nidunget ed subok

[Litrato ed pahina 7]

No padaaken mo so pikakabat mo ed Salita na Dios, ombiskeg so determinasyon mon manggawa na duga