Aroen so Dios a Mangaaro ed Sikayo
Aroen so Dios a Mangaaro ed Sikayo
“Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo.”—MATEO 22:37.
1, 2. Anto so nayarin sengegan no akin a nitepet no dinan so sankaimportantian a ganggan?
MAPATNAG a pandedebatian lan maong na saray Fariseo ed panaon nen Jesus so sakey ya isyu. Dinan so sankaimportantian ed masulok a 600 a ganggan a manugyop ed Mosaikon Ganggan? Kasin say ganggan a nipaakar ed panagbagat? Tutal, gagawaen iray panagbagat ta pian naperdona iray kasalanan tan makapangiyapay na pisasalamat ed Dios. Odino kasin say sankaimportantian a ganggan et say ganggan nipaakar ed panaggalsim? Importante met itan lapud say panaggalsim et tanda na impisipanan nen Jehova ed si Abraham.—Genesis 17:9-13.
2 Diad biek a dapag, mapatnag ya inkatunongan na saray maapit a manutumbok ed tradisyon a lapud importante so amin a ganggan ya inter na Dios—anggaman arum ed saratan so ompatnag ya agtanton importante—makapuy ya ipasen so dinanman a ganggan a mas importante nen say arum. Denesidi na saray Fariseo ya itepet ed si Jesus iyan kontrobersial ya isyu. Nayarin iilaloan da a sikatoy mangibaga na bengatlan maneral ed kredibilidad to. Sakey ed sikara so inmasingger ed si Jesus tan oniay intepet to: ‘Dinan so sankabalegan a ganggan ed katunongan?’—Mateo 22:34-36.
3. Anto so imbaga nen Jesus nipaakar ed sankaimportantian a ganggan?
3 Importantin tuloy ed sikatayo natan so ebat nen Jesus. Diad ebat to, sinegek to no anto so lawas a sankaimportantian a kabiangan na tuan panagdayew. Diad impangaon to ed Deuteronomio 6:5, oniay imbaga nen Jesus: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo. Sikato’ya so baleg tan unonan ganggan.” Anggaman say intepet na Fariseo et sakey lambengat a ganggan, angiter ni si Jesus na sakey a ganggan. Oniay imbaga to ya inaon to ed Levitico 19:18: “Say komadua a mipadpara ed sikato saya, Aroen mo so kaparam a too unong ed sikan dili.” Impabitar sirin nen Jesus a sayan duaran ganggan so manegek ed interon kabiangan na puron panagdayew. Ta pian naamper to la so antokaman a getma ed sikaton mangidatak no dinan ed arum niran ganggan so sankaimportantian, oniay impanampot to: “Dia ed sarayan duaran ganggan so pansaksabitan na amin a katunongan tan say salita na saray Propeta.” (Mateo 22:37-40) Konsideraen tayo ed sayan artikulo so sankaimportantian ed sayan duaran ganggan. Akin a nepeg tayon aroen so Dios? Panon tayon nipatnag a gagawaen tayo itan? Tan panon tayon nabayuboan itan a panangaro? Importantin naamtaan iray ebat ed sarayan tepet lapud napaliket tayo si Jehova no sikatoy aroen tayo ed interon puso, kamarerwa, tan nonot tayo.
Say Kaimportantian na Panangaro
4, 5. (a) Akin ya ag-asurprisa so Fariseo ed ebat nen Jesus? (b) Anto so mas mabli ed Dios nen saray bagat tan apay?
4 Ompatnag ya ag-abigla odino ag-adismaya so Fariseo a nantepet ed si Jesus nipaakar ed ebat a nadngel to. Amta ton say panangaro ed Dios so importantin aspekto na tuan panagdayew, anggaman ag-itan nipapatnag na dakel. Diad saray sinagoga, niyugali la so pangibalikas ed Shema, odino pangiyabawag ed pananisia, tan laktipen na saya so tekston nabasa ed Deuteronomio 6:4-9, ya angaonan nen Jesus. Unong ed miparan salaysay ed Marcos, oniay imbaga na Fariseo ed si Jesus: “Managbangat, maong so impangikuan mo a sikatoy saksakey; tan anggapoy sananey noag sikato lambengat. Tan say pangaro ed sikato ed amin a puso, tan ed amin a pakatalos, tan ed amin a biskeg, tan say pangaro ed kaparan too a singa sikato lanlamang, sikatoy dakdakel nen saray amin a lapag a panangaro a poolan tan saray bagat.”—Marcos 12:32, 33.
5 On, anggaman kinaukolan na Ganggan iray popoolan ya apay tan bagat, say talagan importante ed Dios et say maaron kipapasen na puso na saray lingkor to. Say anuyaw ya inyapay ed Dios tekep na aro tan debosyon so mas mabli ed sikato nen say nilibon kalakian a karnero ya inyapay tekep na makapuy a motibo. (Miqueas 6:6-8) Nodnonoten pa so salaysay nipaakar ed dukan balo a naimatonan nen Jesus diad templo ed Jerusalem. Say duaran sinsilyo ya impelag to ed simpenan na kayamanan so agni ingen makasaliw na anggan saksakey ya anuyaw. Ingen, satan a kontribusyon, ya inter to tekep na masimoon ya aro ed si Jehova, so mas mabli ed Sikato nen say angkakabaleg a donasyon na mayayaman ya inala da ed sulok da. (Marcos 12:41-44) Agaylan makapaseseg a naamtaan a papablien a tuloy nen Jehova so nayarian tayon amin ya ipatnag antokaman so kipapasen tayo, salanti, say panangaro tayo ed sikato!
6. Anto so insulat nen Pablo nipaakar ed kaimportantian na aro?
6 Diad impangidanet to ed kaimportantian na aro diad tuan panagdayew, oniay insulat nen apostol Pablo: “No mansalita ak komon ed dila na totoo, tan saray angheles, balet anggapoy arok, nagawa ak a singa mantaknol a gansa odino manbanengbeng a piangpiang. Tan no wala komon so langkap na inkapropeta ed siak, tan amtak komon ya amin so misteryo tan amin a karunongan; tan no wala komon ya amin ed siak so pananisia, ta pian napaalis ko komon so saray kapalandeyan, et no anggapoy arok andi kakanaan ko. Tan no ipayabol ko komoy ami kayarian ko pian napakan koray duruka, tan no iter ko komon so laman ko a papoolan, et no anggapoy arok komon, anggapo so nagunggonak.” (1 Corinto 13:1-3) Malinew, say aro et importante ta pian magmaliw a makapaliket ed Dios so panagdayew tayo. Balet, panon tayon nipatnag so panangaro tayo ed si Jehova?
No Panon Tayon Nipatnag so Panangaro Tayo ed si Jehova
7, 8. Panon tayon nipatnag so panangaro tayo ed si Jehova?
7 Papanisiaan na dakel a totoo a say aro et sakey a liknaan ya agtayo nakontrol; sasalambiten na totoo so pakawalaan na romantikon aro ed sakey. Ingen, say peteg ya aro et aglambengat nalilikna. Satan so napatnagan tan nibiig panamegley na kiwas, aliwan liknaan. Tutukoyen na Biblia so aro bilang say ‘sankaabigan a dalan’ tan sakey a bengatlan “tumboken” tayo. (1 Corinto 12:31; 14:1) Papasesegen iray Kristiano a mangaro, ya aliwa lambengat a diad “salita o dia ed dila; noag dia ed gawa tan dia ed katuaan.”—1 Juan 3:18.
8 Papakiwasen itayo na panangaro ed Dios a gawaen so makapaliket ed sikato tan idepensa tan itandoro so inkasoberano to, diad salita tan gawa. Satan so mamakiwas ed sikatayon agmangaro ed mundo tan ed agmaridios iran dalan to. (1 Juan 2:15, 16) Saramay mangaaro ed Dios so manggula ed mauges. (Salmo 97:10) Say aro ed Dios so mangilalanor met ed panangaro ed kaparan too, a singbaten ed ontumbok ya artikulo. Niarum ni, say panangaro ed Dios so mankaukolan na katutulok tayo. Oniay ibabaga na Biblia: “Saya so aro na Dios, a sumpalen tayo so saray ganggan to: tan saray ganggan to aliwa ran ambelat.”—1 Juan 5:3.
9. Panon ya impatnag nen Jesus so panangaro to ed Dios?
9 Naspot ya impatnag nen Jesus so kabaliksan na panangaro ed Dios. Lapud aro, sikato so apakiwas a manaynan ed mangatatawen ya ayaman to ta pian manayam diad dalin bilang too. Satan so amakiwas ed sikaton mangigloria ed Ama to diad panamegley na saray bengatlan ginawa tan imbangat to. Say aro so amakiwas ed sikaton magmaliw a “matulok ya anggad say ipapatey.” (Filipos 2:8) Satan a katutulok—a pakapatnagan na panangaro to—so angilukas na dalan pian saray matoor et nawalaan na matunong a talindeg ed arap na Dios. Oniay insulat nen Pablo: ‘Lapud katageyan na linawa na sakey a too [si Adan], say dakel nagmaliw ira a makasalanan, ontan met a lapud katutulok na sakey [si Kristo Jesus], say dakel magmaliw ira a matunong.’—Roma 5:19.
10. Akin a say panangaro ed Dios et mangilalanor ed katutulok?
10 Singa si Jesus, nipatnag tayo so panangaro tayo diad pagmaliw a matulok ed Dios. Onia so insulat nen Juan, say apostol a pinabli nen Jesus: “Saya so aro, a manakar itayo komon unong ed saray ganggan to.” (2 Juan 6) Saramay talagan mangaaro ed si Jehova so manpirawat ed panangigiya to. Lapud bibidbiren da ya agda matalonan nidirehi so dilin kurang da, manmamatalek ira ed kakabatan na Dios tan manpapasakop ira ed maaron panangidirehi to. (Jeremias 10:23) Aaligen da iray mapagalang-kanonotan a totoo diad Berea nensaman ya angawat ed mensahe na Dios tekep na “sipaparaan a nonot,” a walaan ira na pirmin pilalek a gawaen so linawa na Dios. (Gawa 17:11) Maalwar dan inusisa so Kasulatan pian mas natalosan dan maong so linawa na Dios, ya akatulong pian nipatnag da so aro ra diad panamegley na arum niran gawa na katutulok.
11. Anto so kabaliksan na pangaro ed Dios tekep na interon puso, nonot, kamarerwa, tan biskeg?
11 Singa ed inkuan la nen Jesus, say panangaro ed Dios so mangilalanor ed interon puso, nonot, kamarerwa, tan biskeg tayo. (Marcos 12:30) Say ontan a panangaro so manlalapud puso—a mangilalanor ed saray liknaan, pilalek, tan akindalem iran kanonotan tayo—tan masimoon a pilalek tayon paliketen si Jehova. Mangaaro itayo met tekep na abilidad tayon manisip. Say debosyon tayo et atekepan na pikakabat; akabat tayo si Jehova—saray kalidad, estandarte, tan gagala to. Uusaren tayo so kamarerwa tayo, say interon inkatoo tan bilay tayo, pian manlingkor tan mandayew ed sikato. Tan usaren tayo so biskeg tayo parad satan a gagala.
No Akin a Nepeg Tayon Aroen si Jehova
12. Akin a kakaukolanen na Dios a sikatoy aroen tayo?
12 Sakey lan rason no akin a nepeg tayon aroen si Jehova et kakaukolanen to ya ipatnag tayo iray kalidad to. Say Dios so lapuan tan sankatalonggaringan ya alimbawa na aro. “Say Dios sikato so aro,” so insulat nen apuyanan ya apostol Juan. (1 Juan 4:8) Saray totoo so pinalsa unong ed indengan na Dios kanian adesinyo itayon mangaro. Diad tua, say inkasoberano nen Jehova so nibase ed aro. Labay ton saray sakop to et manlingkor ed sikato lapud inaro tan pilalek da so matunong a paraan na pananguley to. On, say aro so importante pian niwala so kareenan tan pantutunosan na amin a pinalsa.
13. (a) Akin a niganggan iray Israelita ya: “Aroen mo so Katawan a Dios mo?” (b) Akin a makatunongan ya iilaloan nen Jehova a sikatoy aroen tayo?
13 Say sakey nin rason no akin ya aroen tayo si Jehova et aapresyaen tayo so ginawa to para ed sikatayo. Nodnonoten pa so imbaga nen Jesus ed saray Judio: “Aroen mo so Katawan a Dios mo.” Ag-iilaloan ed sikara ya aroen da so sakey a dios a mairap ya asinggeran tan agkabat. Sikara so nepeg a mangaro ed Persona ya angipatnag na aro ed sikara. Si Jehova so Dios da. Sikato so angipaway ed sikara manlapud Ehipto tan intarok to ra diad Insipan a Dalin. Sikato so analimbeng, amabiskeg, tan angaro ed sikara. Sikato so maaron nandisiplina ed sikara. Natan, si Jehova so Dios tayo, ya angiter na Anak to bilang dondon ta pian nawalaan itayo na andi-anggaan a bilay. Makatunongan labat ya ilaloan nen Jehova ed sikatayo a sikatoy aroen tayo met! Say aro tayo et aktibon panangipatnag na aro ed mangaaro ed sikatayo, kanian akerew ed sikatayo ya aroen so Dios a mangaaro ed sikatayo. Say aro tayo et parad Samay “angaro ed sikatayo ya inmuna.”—1 Juan 4:19.
14. Diad anton paraan a mipadpara so panangaro nen Jehova ed panangaro na maaron ateng?
14 Say panangaro nen Jehova ed katooan et singa panangaro na maaron ateng ed ananak to. Anggaman ag-ira ayadyari, saray maaron atateng so mansasagpot ed dakel a taon pian asikasoen so ananak da, a gagawaen da itan tekep na baleg a sakripisyo ed materyal tan arum nira. Ibabangat, papasesegen, susuportaan, tan didisiplinaen na atateng so ananak da lapud labay dan manliket tan onaligwas ira. Anto so labay met na atateng ya ipanengneng ed sikara na ananak da? Labay da met a sikaray aroen na ananak da tan ipapuso ra so makagunggonan imbangat na atateng da. Agta makatunongan sirin ya ilaloan na ayadyarin mangatatawen ya Ama ya ipatnag tayo met so maaron panangapresya tayo ed amin a ginawa to parad sikatayo?
Bayuboan so Panangaro ed Dios
15. Anto so primeron kundang ta pian nabayuboan so panangaro ed Dios?
15 Agtayo nanengneng so Dios odino narengel so boses to. (Juan 1:18) Balet, iimbitaan to itayon nawalaan na maaron relasyon ed sikato. (Santiago 4:8) Panon tayon nagawaan itan? Say primeron kundang pian naaro so sakey et say pikabat a maong ed sikato lapud mairap a nalikna so aralem a panangaro ed sakey ya agtayo kabat. Intarya nen Jehova so Salita to, say Biblia, ta pian naaralan tayo so nipaakar ed sikato. Satan so rason no akin a diad panamegley na organisasyon to et papasesegen itayo nen Jehova a naynay a basaen so Biblia. Say Biblia so mangibangat ed sikatayo nipaakar ed Dios, saray kalidad to, personalidad to, ontan met ed pidedeneng to ed totoo to diad loob na nilibon taon. Legan tayon dadalepdepen iratan a salaysay, ombulaslas so pakatalos tan panangaro tayo ed sikato.—Roma 15:4.
16. Panon ya ombiskeg so panangaro tayo ed Dios sano morekdeken tayo so ministeryo nen Jesus?
16 Say importantin paraan ta pian ombulaslas so panangaro tayo ed si Jehova et say panmorekdek ed bilay tan ministeryo nen Jesus. Diad tua, naspot ya impatnag nen Jesus iray kalidad nen Ama to kanian oniay nibaga to: “Say akanengneng ed siak anengneng to so Ama.” (Juan 14:9) Agkayo kasi natenyeg ed panangabagey nen Jesus sanen binilay to lamet so saksakey ya anak a laki na balo? (Lucas 7:11-15) Agta makapasagyat a naamtaan a sikato—say Anak na Dios tan say sankatalonggaringan a toon nambilay ed kapiganman—so mapaabeban anguras ed sali na saray babangatan to? (Juan 13:3-5) Agta napakiwas kayo no naamtaan yon sikatoy mainomay ya asinggeran na amin pati saray ugugaw, anggaman sikato so mas matalonggaring tan makabat nen say siopaman a too? (Marcos 10:13, 14) Legan na maapresyan pandadalepdep tayo ed sarayan bengatla, naalig tayoray Kristiano a tinukoy nen Pedro ed sulat to: “Anggan agyo nanengneng [si Jesus] aroen yo.” (1 Pedro 1:7, 8) Diad ibubulaslas na aro tayo ed si Jesus, ombulaslas met so aro tayo ed si Jehova.
17, 18. Say pandalepdep ed antoran probisyon nen Jehova so mamabulaslas ed panangaro tayo ed sikato?
17 Say sakey nin paraan pian ombulaslas so panangaro tayo ed Dios et say pandalepdep ed daakan tan maaron probisyon to ed sikatayo pian napanggayagaan so bilay—say karakpan na palsa, say dakerakel tan masasamit iran naakan, say maapit a pipiulop ed saray maong a kakaaro, ontan met ed dakerakel niran maabig a bengatla a mamaliket tan mamenek ed sikatayo. (Gawa 14:17) No lalon naaaralan tayo so nipaakar ed Dios tayo, lalon ondakel iray rason tayo pian misalamat ed magnayon a kamaongan tan inkamabunlok to. Isipen pa so amin a ginawa nen Jehova parad sikayon mismo. Agkayo kasi miabobon a sikatoy manepeg ed panangaro tayo?
18 Kabiangan ed dakerakel iran langkap na Dios et say pankanawnawa tayo ya onasingger ed sikato diad pikakasi ed antokaman a panaon, ya amta tayon tatalinengen itayo na ‘Dumerengel na pikakasi.’ (Salmo 65:2) Impabtang nen Jehova ed pinabli ton Anak so autoridad a manuley tan mangukom. Balet, agto impabtang ed arum, pati ed Anak to, so idengel ed saray pikakasi. Personal ton dedengelen iray pikakasi tayo. Onapit itayo sirin ed si Jehova lapud maaro tan personal a panangiyansakit to ed sikatayo.
19. Onapit itayo ed si Jehova lapud antoran sipan to?
19 Onapit itayo met ed si Jehova sano nodnonoten tayo so imparaan to parad katooan. Insipan to a panganggaen to so sakit, ermen, tan ipapatey. (Apocalipsis 21:3, 4) Sano nagmaliw lan ayadyari so katooan, anggapo la so managmak na depresyon, pakadismaya, odino trahedya. Naandi la so eras, kairapan na bilay, tan guerra. (Salmo 46:9; 72:16) Say dalin so magmaliw lan paraiso. (Lucas 23:43) Itarok nen Jehova irayan bendisyon, aliwan lapud sikato so obligadon manggawa ed satan, noagta lapud aaroen to itayo.
20. Anto so imbaga nen Moises nipaakar ed saray nagunggona ed panangaro ed si Jehova?
20 Sirin, walaray mabiskeg a rason pian aroen so Dios tayo tan abuloyan ya ombulaslas itan a panangaro. Kasin mantultuloy yon pabiskegen so panangaro yo ed Dios, a sikatoy abuloyan yon mangidirehi ed saray dalan yo? Walad sikayo so pandesisyon. Atebek nen Moises iray gunggona na pamayubo tan pamasiansia ed panangaro ed si Jehova. Oniay imbaga nen Moises ed saray Israelita nensaman: “Pilien mo so bilay ta pian manbilay ka, sika tan say kapolian mo; say panangaro ed Jehova a Dios mo, say pananumpal ed boses to tan say ipepeket ed sikato; ta sikato so bilay mo tan kinarukey na saray agew mo.”—Deuteronomio 30:19, 20.
Kasin Natandaan Yo?
• Akin ya importante ya aroen tayo si Jehova?
• Panon tayon nipatnag so panangaro tayo ed Dios?
• Antoray rason tayo pian aroen si Jehova?
• Panon tayon nabayuboan so panangaro ed Dios?
[Tepetepet Parad Panagaral]
[Litrato ed pahina 20]
Peteg a papablien nen Jehova so nayarian tayon amin ya ipatnag, salanti, say panangaro tayo ed sikato
[Saray litrato ed pahina 23]
“Say akanengneng ed siak anengneng to so Ama.”—Juan 14:9.