Nayari Kasin Ipetek so Sakey a Huis?

SI Sladjana, a sakey ed saray Tasi nen Jehova diad Croatia, so aka-eskedyul ya onarap ed korte lapud pinansyal iran pamaakaran. Sikato so asakbay ya inmarap ed huis. Balet ta atrasado imay sakey nin toon nalalanor ed kaso. Magunaet si Sladjana a makapanpulong, kanian legan dan manaalagar ya amin, sikato so nampakpel ya akitongtong ed say huis.

“Sir, agyo ta amta ya agla manbayag et anggapo laray huis tan korte diad dalin?” so intepet to. Siempre, say tutukoyen to et saray huis ya amta tayo natan.

Nikelawan so huis tan ag-akasel a ninmengneng ed sikato. Diad saman a bekta et ginmapo so bista. Sanen asumpal la ra tan inmalagey si Sladjana pian pirmaan so dokumento, sinmingger ed sikato so huis tan onia so tepet ya inyesaes to: “Segurado ka ed kapkapangibagam ed siak, ya agla manbayag et anggapo laray huis tan korte diad dalin?”

“On, Sir. Segsegurado ak!” so inyebat nen Sladjana.

“Anto so ebidensyam ed satan?” so intepet na huis.

“Naromog itan ed Biblia,” so inyebat nen Sladjana.

Inkuan na huis a labay ton basaen itan ya ebidensya, balet ta anggapo so Biblia to. Kanian inyopresi nen Sladjana ya iyalaan to na sakey a kopya. Say huis so binisita na saray Tasi, inikdan da na Biblia, tan pinaseseg dan nawalaan na sinimban panagaral ed Biblia. Inawat na huis so opresi tan ag-abayag et nagmaliw met a Tasi nen Jehova.

Oniay mapropetikon inkuan na Salmo 2:10: “Mankalakal kayo natan sirin, O sikayo arari: nabilin [“paipetek,” NW] kayo komon, sikayo uko-ukom ed dalin.” Agaylan makapaligsay-puso sano mapaabeban awaten na saratan so maaron panangiwanwan nen Jehova!

[Litrato ed pahina 32]

Si Sladjana tan say huis