Tepetepet na Saray Manbabasa

Kasin ag-angipanengneng na respeto odino mapasang si Jesus diad samay paraan na impanawag to ed ina to diad ponsia ed Cana?—Juan 2:4.

Ag-abayag kayari na bautismo nen Jesus, sikato tan saray babangatan to so naimbitaan ed sakey a ponsia na kasal diad Cana. Wadman met si ina to. Sanen kinmulang lay alak, onia so inkuan nen Maria ed si Jesus: “Anggapoy alak da.” Et inmebat si Jesus: “Bii, antoy pibibiangan ko ed sika? Say oras ko agni sinmabi.”—Juan 2:1-4.

Natan, no tawagen na sakey so ina to na “bii” tan ibaga ton “antoy pibibiangan ko ed sika?” nayarin sikatoy ipasen bilang agmarespeto, makakainsulto ni ingen. Balet say pangibagan ontan si Jesus et mankabaliksay ag-impangikonsidera ed aspekto na kultura tan lenguahe na saman ya ebento. Makatulong so pakatalos ed inkausar na sarayan balikas diad panaon na Biblia.

Nipaakar ed terminon “bii,” oniay inkuan na Vine’s Expository Dictionary of Old and New Testament Words: “No inusar itan [a termino] a panawag ed bii, aliwa itan a panag-bano odino inka-malangas, noagta inka-lamuyot odino inka-marespeto.” Mitunos ed saya so arum niran reperensya. Alimbawa, oniay inkuan na The Anchor Bible: “Aliwa iyan panagpasnok, nisay andiay galang a termino, odino pakapatnagay kaandiay panangaro . . . Ontan a talaga so mapagalang a pananawag nen Jesus ed saray bibii.” Impaliwawa na The New International Dictionary of New Testament Theology a satan a salita et “inusar bilang pananawag ya agmangipapasiki na antokaman ya agpanagrespeto.” Tan ibabaga na Theological Dictionary of the New Testament nen Kittel a say inkausar na satan et “seguradon aliwan agpanagrespeto odino mangipabpaabeba.” Kanian, agtayo nepeg ya ipapasen a si Jesus et ag-angipanengneng na respeto odino mapasang ed ina to sanen tinawag ton “bii.”—Mateo 15:28; Lucas 13:12; Juan 4:21; 19:26; 20:13, 15.

Komusta balet so balikas ya “antoy pibibiangan ko ed sika?” Ompatnag a sakey iyan kaslakan ya idyom na saray Judio ya aminpigan pinmatnag ed Biblia. Alimbawa, diad 2 Samuel 16:10 et popokpokan nen David si Abisai a mamatey ed si Simei diad impangibagan: “Anto so pibiangan ko ed sikayo, anak ira nen Sarvia? Lapu ed manayew, tan lapu ed si Jehova inkuan to ed sikato, Ayewen mo si David.” Onia met so nabasa tayo ed 1 Arari 17:18 ya inkuan na balo ed Sarepta ed si Elias sanen nalmoan ton inatey lay anak to: “Anto so pibiangan ko ed sika, O sika laki na Dios? Linma ka ed siak pian ipanonot mo so kasalanan ko, tan pateyen mo so ana’ko.”

Diad sarayan alimbawa ed Biblia, naimano tayon say balikas ya “anto so pibibiangan ko ed sika?” et mabetbet ya inusar, aliwan lapud pan-melmelag odino inka-arogante, noagta pian ipulisay so pibali ed antokaman a niproponi odino nisuherin aksion odino pian ipatnag so miduman panmoria odino opinyon. Anto sirin so nibaga ed saray imbalikas nen Jesus ed si Maria?

Sanen imbaga nen Maria ed si Jesus ya “Anggapoy alak da,” mapatnag ya agto lambengat ipapaamta so problema ed si Jesus noagta insuheri ton remedyoan to met komon itan. Inusar nen Jesus itan a kaslakan ya idyom pian ipulisay so impasagilig nen Maria, tan say inyarum To iran salita a, “Say oras ko agni sinmabi,” so ontulong ed sikatayon natalosan no akin ya ontan so ginawa to.

Manlapud inkabautismoan tan inkilanaan nen Jesus nen 29 C.E., kabat ton maong a linawa nen Jehova a, bilang say insipan a Mesias, sikatoy mankurang ed katooran a diad kaunoran et mansumpal ed ipatey, kioli, tan kigloria to. “Say anak na too [so] agdia linma a panlingkoran, noag say manlingkor, tan iter toy bilay to a panondon ed amayamay,” so inkuan to. (Mateo 20:28) Legan a manasingger so ipapatey to, saya so impalinew nen Jesus diad impangikuan: “Say oras sinmabi la.” (Juan 12:1, 23; 13:1) Kanian, oniay impikasi nen Jesus diad samay labi antis na  impatey to: “Ama, sinmabi la so oras; igloriam so Anak mo, pian say Anak igloria to ka.” (Juan 17:1) Kaunoran, sanen sinmabi so pangkat a mangaresto ed sikato diad Getsemani, binangon nen Jesus iray apostol to tan inkuan to: “Say oras asabi la; nia, say Anak na too niyawat ed limalima na saray managkasalanan.”—Marcos 14:41.

Balet, diad samay bansal ed Cana, kapkagapo ni labat nen Jesus ed ministeryo to bilang Mesias tan say “oras” to et agni sinmabi. Say manunan gagala to et say panggawa na linawa nen Ama to unong ed paraan tan panaon a pangiwanwanan nen Ama to, tan anggapoy anggan siopa a makaamper ed determinasyon to. Sanen imbalikas iya nen Jesus ed ina to, sikatoy mapekder balet agbalot nagmaliw ya agmarespeto odino mapasang. Agmet alikna nen Maria a sikatoy pinabaingan odino ininsulto na anak to. Diad tua, lapud atalosan to so labay ya ibaga nen Jesus, oniay imbaga nen Maria ed saramay wadman a manseserbi ed bansal: “Anggan anto a kuanto ed sikayo, gawa yo.” Imbes ya ibaliwala nen Jesus so ina to, ginawa nen Jesus so primeron milagro to bilang Mesias—pinagmaliw ton alay abig ya alak so danum—diad ontan et angipanengneng na maabig a panagbalanse ed panaggawa na linawa nen Ama to tan panangimano ed kapapagaan na ina to.—Juan 2:5-11.

[Litrato ed pahina 31]

Si Jesus so maomaong ingen ta mapekder sanen mitotongtong ed ina to