Espirituy Krismas​—Napansiasiansia Kasi ed Interon Taon?

“Gloria ed Dios ed sankatageyan, tan dia ed dalin deen ed saray totoo a sikara so panliketan ton maong.”—Lucas 2:14.

PAMILYAR ed minilyon a totoo irayan salita na saray anghel na Dios, a mangiyaanunsio ed inkianak nen Jesus ed saray pomapastol a manbabantay na saray karnero ra ed labi. No manasingger la so petsa ya ibabaga na saray maslak a relihyon ya inkianak nen Jesus, nikadkadumay pansasagpot na saray mankuan a Kristiano pian parakepen so ugali ra. Sayan panaon a nagkalautlan itatangguyor so panliket, kareenan, tan maong ya ugali so mabetbet a natutukoy bilang espiritu na Krismas.

Saray totoon agmangipapasen ed Krismas bilang sakey a relihyoson selebrasyon so mandinayew ni ingen ed saratan a mararakep a kalidad. Anggan sikara et mangaapresya ed saray maligsan liknaan ya ompatnag ya isasagyat na satan a selebrasyon. No say panaon na Krismas et bakasyon ed eskuelaan odino trabaho, naiikdan na pankanawnawa iray totoo a makapanrelaks, makapilimog ed saray kapamilyaan tan kakaaro ra, odino pian labat makapanliket. Siempre, dakel met iray masimoon a totoo a momoriaen dan say Krismas et nagkalautlan parad panangigalang ed si Jesu-Kristo.

Antokaman so kabaliksan ya isisiglaot da ed Krismas, aksobien na karaklan a saray positibon liknaan a pawawalaen na satan et mabetbet ya ag-ombabayag. Kabebekta, ompawil laray totoo ed dati ran kagagawa. Inkuan na sakey ya essay ya apauloan na “The Spirit of Christmas,” ya impalapag na Royal Bank of Canada a “natotoor na maslak a ‘Kristiano’ so kabaliksan na satan a ngaran diad loob labat na pigaran simba kada taon, a mao-maong so ugali ra ed kapara ran too anggad kayari na Balon Taon, no kapigan magmaliw ira lamet a singa ason mannga-ngatngatan tan andian na interes ed pankaabigan na arum a totoo.” Intuloy na satan lanlamang a sulat a say “aliwa” ni ed espiritu na Krismas et ag-itan napansiasiansia na totoo ed “interon taon.”

Onabobon man kayo ed satan odino andi, mamapalesa itan na saray importantin tepet. Posible ni kasi a magnayon a nipatnag na totoo so inkamabunlok tan pakatalos ed sakey tan sakey? Kasin realistiko so panilalo a nasumpal imay inyabawag na anghel ed samay labin inyanak si Jesus? Odino kugkugip labat so panilalon niwala so tuan kareenan?