‘Ipaakseb nen Jehova so Hustisya’

‘Agkasi naani isingil na Dios [“ipaakseb na Dios so hustisya,” NW] parad saray pinili to, ya ontawag ed sikato ed agew tan labi?’—LUCAS 18:7.

1. Siopara so pakakapasesegan mo, tan akin?

 DIAD sankamundoan, panggagayagaan na saray Tasi nen Jehova so pipiulop ed matoor a Kristianon agagi ya abayag lan manlilingkor ed si Jehova. Walara kasi so kabkabat mo ed sarayan pinablin agagi? Nayarin nanonotan mo so akulaw lan agi, ya abayag lan abautismoan balet ta mataltalag ton naliwatan so aral diad Kingdom Hall. Odino nayarin nanonotan mo so masiken lan agi a diad loob na dakel lan dekada et matoor a manusuporta ed sinimban panagpulong na kongregasyon. On, inisip na dakel ed sarayan matoor ya agagi a diad sayan panaon et agawa la komon tan linmabas la so Armagedon. Ingen, anggano mansiasiansia ni iyan mundo ya andiay-hustisya, agbalot kinmapuy so panagmatalek da ed saray sipan nen Jehova nisay linmetey so determinasyon dan ‘mansungdo angga ed kasampotan.’ (Mateo 24:13) Say mabiskeg a pananisia na sarayan matoor a lingkor nen Jehova so peteg a lapuay panamaseseg parad interon kongregasyon.—Salmo 147:11.

2. Anton situasyon so makapaermen ed sikatayo?

² Balet, no maminsan et nayarin sananey ya awawey so naimano tayo. Walaray arum a Tasi a pigay taon lan manpupulong, balet diad saginonor et binmetel so pananisia ra, tan agla ra mililimog ed Kristianon kongregasyon. Makapaermen ta saratan a datin kaulop tayo et binenegan da si Jehova. Anggaman ontan, say impapuson pilalek tayo et mantultuloy a tulongan so kada sakey ed saratan ya “abalang a karnero” a makapawil ed pulok. (Salmo 119:176; Roma 15:1) Balet, walaray tepet ya onlesa nipaakar ed sarayan mandumaan a nansumpalan—arum so nansiansian mabiskeg ed pananisia bangta saray arum et binmetel. Anto so makakatulong ed dakel a Tasi pian napansiansia ra so pananisia ra ed saray sipan nen Jehova anggaman nababalang itan na arum? Anto so nagawaan tayon mismo pian mansiansian mabiskeg so kombiksion tayo a manasingger la so “baleg ya agew nen Jehova”? (Sofonias 1:14) Konsideraen tayo pa so sakey ya ilustrasyon a nabasa ed Ebanghelyo nen Lucas.

Pasakbay ed Saramay Manbibilay ‘Sano Onsabi so Anak na Too’

3. Siopa so nagkalautlan nagunggonaan ed ilustrasyon nipaakar ed say balo tan say ukom, tan akin?

³ Diad Lucas kapitulo 18, nabasa tayo so ilustrasyon nen Jesus nipaakar ed sakey a balo tan sakey ya ukom. Mipadpara itan ya ilustrasyon ed samay mapilit a managsankaili, ya asingbat tayo ed inmunan artikulo. (Lucas 11:5-13) Balet, ipapabitar na konteksto na kapitulo na Biblia ya akasulatan na ilustrasyon nipaakar ed say balo tan say ukom a saya so nagkalautlan onaplika ed saramay manbibilay ‘sano onsabi so Anak na too’ bilang nitrono lan Ari ed Panarian, a ginmapo itan a panaon nen 1914.—Lucas 18:8, Maung a Balita. *

4. Anto so siningbat nen Jesus antis ton isalaysay so ilustrasyon a nabasa ed Lucas kapitulo 18?

⁴ Antis ya isalaysay nen Jesus iyan ilustrasyon, imbaga to ni a say ebidensya na kiwawala to bilang Ari ed Panarian so malaknab a natebek a  ‘singano kirmat’ a “no onkirmat manlapu ed sakey a pasen ed leksab na tawen [et] onliwawa angga ed sananey a pasen ed leksab na tawen.” (Lucas 17:24; 21:10, 29-33) Anggaman ontan, maslak a totoo a manbibilay ed “panaon na kasumpalan” so agmangiimano ed satan a malinew ya ebidensya. (Daniel 12:4) Akin ya ag-ira mangiimano? Lapud mipadpara ira ed saramay totoo ed panaon nen Noe tan Lot ya angibaliwala ed saray pasakbay nen Jehova. Diad saraman a panaon, saray totoo et ‘nan-aakan, naniinum, nansasaliw, nanlalako, nantatanem, nanggagawa ira na abung angga ed agew a sikaray dineral.’ (Lucas 17:26-29) Sikaray aderal lapud akasentro so imano ra ed saratan a kaslakan ya aktibidades, ya imbaliwala ra so linaway Dios. (Mateo 24:39) Natan, saray totoo ed inkalapagan so okupado ed inagew-agew a kimey da, kanian agda la ingen nabibidbir so ebidensya ya asingger la so anggaan na sayan agmaridios a mundo.—Lucas 17:30.

5. (a) Siopa so pinasakbayan nen Jesus, tan akin? (b) Anto so sengegan na inkapuy na pananisia ra?

⁵ Malinew, nampagaan nen Jesus iray patumbok to ompan nisuawi met ira na mundo nen Satanas, ya angga ni ingen ed punton ‘pawilen da iray bengatlan binenegan da la.’ (Lucas 17:22, 31, NW) Tan ontan so talagan agawa ed arum a Kristiano. Diad loob na dakel a taon et pinirawat na sarayan agagi so isabi na agew a paneral nen Jehova ed sayan marelmeng a mundo. Balet, adismaya ira sanen agsinmabi so Armagedon diad panaon ya iilaloan da. Aglara tanton kombinsido ya asingsingger la so agew na panangukom nen Jehova. Aliwa la ran maseseg a manpulong tan kalkalna iran nagmaliw ya okupado ed inagew-agew a kimey da kanian daiset lay panaon da parad espiritual iran bengatla. (Lucas 8:11, 13, 14) Agbinmayag et ‘pinmawil ira ed saray bengatlan binenegan da la’—agaylan makapaermen itan!

Say Pankaukolan a “Lawas Manpikasi”

6-8. (a) Isalaysay so ilustrasyon nipaakar ed say balo tan say ukom. (b) Panon so impangiyaplika nen Jesus ed sayan ilustrasyon?

⁶ Anto so nagawaan tayo pian naseguron ag-onkapuy so mapekder a panagmatalek tayo ed pakasumpal na sipasipan nen Jehova? (Hebreos 3:14) Inebatan nen Jesus itan a tepet kayari ton pinasakbayan iray babangatan ya ag-ompapawil ed marelmeng a mundo nen Satanas.

⁷ Insalaysay nen Lucas a “sinalita [nen Jesus] ed sikara so sakey ya alimbawa pian nepeg da lawas so manpikasi, tan ag-ira komon napunaw.” Inkuan nen Jesus: “Wala so sakey ya ukom ed sakey a syudad, ya agto antakot so Dios, et agto pagalangan so too. Et walay sakey a bii a balo ed saman a syudad, so maparanay a linma ed sikato, a kuan to, Isingil mo ak ed kabusol ko. Et inmaleg ed magano, ingen kayari to inkuan to ed inkasikato, Anggan agko antakot so Dios, tan agko pagalangan so too; manwari lapud saya a balon bii makaalipanes ed sika, sikato so isingil ko, ompan napatikey to ak ed naynay ya idarago to.”

⁸ Kayari nen Jesus ya insalaysay iya, oniay impangiyaplika to: “Denglen yo so salita na ukom  ya agmatunong. Et say Dios agto kasi naani isingil so saray pinili to, ya ontawag ed sikato ed agew tan labi, et sikato so maanos ed sikara? Kuan ko ed sikayo, a sikara so isingil to a tampol. Anggaman ontan sano onla dia so Anak na too, makaromog kasi na pananisia ed dalin?”—Lucas 18:1-8.

“Seguroen Mon Makagamor Ak na Hustisya”

9. Anton tema so nipabitar ed ilustrasyon nipaakar ed say balo tan say ukom?

⁹ Mabitabitar so manunan tema na sayan malinew ya ilustrasyon. Saya so sinalambit nen Jesus tan saramay indibidual ed ilustrasyon. Oniay inkerew na balo: “Seguroen mon makagamor ak na hustisya.” Inkuan na ukom: “Seguroen ko a nagamoran to so hustisya.” Onia met so intepet nen Jesus: “Agkasi ipaakseb na Dios so hustisya?” Tan oniay inkuan nen Jesus nipaakar ed si Jehova: “Ipaakseb ton tampol so hustisya parad sikara.” (Lucas 18:3, 5, 7, 8, NW) Kapigan so eksakton ‘pangipaakseb nen Jehova ed hustisya’?

10. (a) Kapigan nipaakseb so hustisya nen inmunan siglo? (b) Kapigan tan panon a nipaakseb so hustisya parad saray lingkor na Dios natan?

¹⁰ Nen inmunan siglo, saray “agew na pangibales” (odino, “agew na dusa,” MB) so sinmabi nen 70 C.E. sanen aderal so Jerusalem tan say templo to. (Lucas 21:22) Parad saray totoo na Dios natan, nipaakseb so hustisya dia ed “baleg ya agew nen Jehova.” (Sofonias 1:14; Mateo 24:21) Diad satan a panaon, ‘ibales nen Jehova so kaermenan ed saray mamapaermen’ ed saray totoo to tan ‘iter nen Jesu-Kristo so panamales ed saray agmikabat ed Dios, tan dia ed saray ag-ontulok ed ebanghelyo na Katawan tayon Jesus.’—2 Tesalonica 1:6-8; Roma 12:19.

11. Diad anton paraan a nipaakseb a “tampol” so hustisya?

¹¹ Balet, panon tayon talosan so panamaseguro nen Jesus ya ipaakseb a “tampol” nen Jehova so hustisya? Ipapabitar na Salitay Dios ya anggaman ‘maan-anos si Jehova’, tampol ton ipaakseb so hustisya no asabi lay panaon. (Lucas 18:7, 8; 2 Pedro 3:9, 10) Diad panaon nen Noe, aderal a tampol iray marelmeng sanen sinmabi so delap. Ontan met diad agew nen Lot, atawtaw iray marelmeng sanen inmuran so apoy manlapud tawen. Oniay inkuan nen Jesus: “Singa saya, ontan met naani ed agew a kipatnag na Anak na too.” (Lucas 17:27-30) Saray marelmeng so makasagmak lamet na “biglan kaderal.” (1 Tesalonica 5:2, 3) On, makapanmatalek itayon maong ya agla abuloyan nen Jehova ya onnatnat ni anggan saksakey ya agew so kiwawalay mundo nen Satanas no asabi lay panaon a pangipaakseb toy hustisya.

“Ipaakseb To so Hustisya”

12, 13. (a) Anton leksion so naaralan ed ilustrasyon nen Jesus nipaakar ed balo tan say ukom? (b) Akin a segurado itayon dengelen nen Jehova so pikakasi tayo tan ipaakseb to so hustisya?

¹² Say ilustrasyon nen Jesus nipaakar ed say balo tan say ukom so mangipabitar na sananey nin importantin katuaan. Oniay inkuan nen Jesus sanen inyaplika to iyan ilustrasyon: “Denglen yo so salita na ukom ya agmatunong. Et say Dios agto kasi naani isingil so saray pinili?” Siempre, ag-inkompara nen Jesus ed si Jehova imay ukom a singa to ibabagan ontan met so pantrato na Dios ed saray mananisia. Imbes, imbangat nen Jesus ed saray patumbok to so sakey a leksion nipaakar ed si Jehova diad impangipabitar to ed pandumaan na satan ya ukom tan say Dios. Anto so pigaran pandumaan da?

¹³ Diad ilustrasyon nen Jesus, say ukom so “agmatunong,” bangta “say Dios [et] matunong ya ukom.” (Salmo 7:11; 33:5) Say ukom so ag-interesado ed samay balo, balet si Jehova et interesado ed balang too. (2 Awaran 6:29, 30) Say ukom so masuyat ya ontulong ed samay balo, ingen ta si Jehova so mabulos—on, magunaet ya ontulong ed saramay manlilingkor ed Sikato. (Isaias 30:18, 19) Anto so naaralan tayo ed saya? No say agmatunong ya ukom et dinengel to so kerew na balo tan impagamor toy hustisya ed sikato, mas nagkalalo sirin a dengelen nen Jehova so pikakasi na totoo to tan  seguradon ipaakseb to so hustisya parad sikara!—Uliran 15:29.

14. Akin a nepeg ya ag-ombetel so pananisia tayo ed manasingger ya agew na panangukom na Dios?

¹⁴ Nalilingo sirin iramay binmetel so pananisia ra ed isabi na agew na panangukom na Dios. Akin? Lapud inabuloyan da ya onkapuy so kombiksion da ya asingsingger la so “baleg ya agew nen Jehova,” singa da la panduaruwaan so inkanapanmatalkan na Dios a manumpal ed saray sipan to. Balet anggapo so makanepegan a manuppiat ed inkatoor na Dios. (Job 9:12) Say makatunongan a tepet et, Kasin makapanmatoor itayon mismo? Tan satan a mismo so teman pinalesa nen Jesus diad sampot na ilustrasyon nipaakar ed say balo tan say ukom.

‘Naromog To Kasi so Onian Pananisia ed Dalin?’

15. (a) Anto so intepet nen Jesus, tan akin? (b) Anto so kaukolan ya itepet tayo ed inkasikatayo?

¹⁵ Onia so makapainteres ya intepet nen Jesus: “Sano onla dia so Anak na too, makaromog kasi na [onian] pananisia ed dalin?” (Lucas 18:8, paimano’d leksab, Reference Bible) Diad balikas ya “[onian] pananisia,” say tutukoyen nen Jesus et aliwan say pananisia ed kaslakan a pantalos noagta say klase na pananisia ya impatnag na balo. Ag-inebatan nen Jesus so mismon intepet to, noagta pinalesa to itan pian usisaen na saray babangatan to so kalidad na dilin pananisia ra. Kasin onkakapuy la itan, a dawdawit da lan papawilen iray bengatlan intalirak da? Odino walaan ira na klase na pananisia ya impatnag na samay balo? Natan, kaukolan tayo met a tepetan so inkasikatayo, ‘Anton klase na pananisia so naromogan na “Anak na too” ed pusok?’

16. Anton klase na pananisia so walad samay balo?

¹⁶ Ta pian nakaiba itayo ed saraman so makaawat na hustisya nen Jehova, nepeg tayon tumboken so kurang na saman a balo. Anton klase na pananisia so walad sikato? Impatnag to so pananisia to diad andi-tunda ya “inyakar to ed ukom, a kuan to, ‘Seguroen mon makagamor ak na hustisya.’” Satan a balo et agtinmundan kinmerew ed samay agmatunong a too ta pian naawat to so hustisya. Mipadpara, saray lingkor na Dios natan so makapanmatalek a naawat da so hustisya nen Jehova—anggan manbayag ni itan nen say iilaloan da. Kaaruman ni, ipapatnag da so talek da ed sipasipan na Dios diad maparanay a pikakasi—on, diad ‘itawag ed sikato ed agew tan labi.’ (Lucas 18:7) On, sano ontundan manpikasi so sakey a Kristiano nipaakar ed kipaakseb na hustisya, ipapatnag to a naandi lay talek to ed ikiwas nen Jehova parad saray lingkor to.

17. Antoray rason pian mantultuloy itayon manpikasi tan pansiansiaen so pananisia tayo ed segseguradon isabi na agew na panangukom nen Jehova?

¹⁷ Say nikaduman sirkumstansya na saman a balo so mangipapabitar a walaan itayo na kaaruman niran rason pian mantultuloy a manpikasi. Ikonsidera so pigaran pidumaan na situasyon to ed sikatayo. Agtinmunda so balo ya inmasingger ed ukom anggaman anggapo so amaseseg ed sikaton manggawa ed satan, balet naynay itayon papasesegen na Salitay Dios a “mansiansia a malet ed pikakasi.” (Roma 12:12) Anggapoy panamaseguro ed samay balo no kasin naebatan so kerew to, balet pinaseguroan itayo nen Jehova ya ipaakseb to so hustisya. Oniay inkuan nen Jehova panamegley na propeta to: “Anggan manabala, sikato so alagden mo, ta petepeteg ya onsabi, ya agmanbayag.” (Habacuc 2:3; Salmo 97:10) Anggapo so tinmulong ed balo a mikasi parad sikato pian lalon mapuersa so kerew to.  Balet walaan itayo na makapanyarin mananulong, salanti, si Jesus, “a wala ed kawanan na Dios, tan sikato met so manangyesel ed sikatayo.” (Roma 8:34; Hebreos 7:25) Kanian, no say balo et nantultuloy ya akikasi ed ukom lapud paniilalo ton naikdan na hustisya, anggaman mairap so situasyon to, nagkalalo la sirin a pansiansiaen tayo so pananisia tayo ed segseguradon isabi na agew na panangukom nen Jehova!

18. Panon itayon natulongan na pikakasi pian ombiskeg so pananisia tayo tan nagamoran tayo so hustisya?

¹⁸ Say naaralan tayo ed ilustrasyon nipaakar ed balo et walay maapit a pansiglaotan na pikakasi tan pananisia, tan say andi-tundan pikakasi tayo so mangamper ed saray impluensyan makapaletey ed pananisia tayo. Siempre, agkabaliksan na saya a say maparungtal labat a panagpikasi et remedyo la pian ag-onletey so pananisia tayo. (Mateo 6:7, 8) Sano napakiwas itayon manpikasi lapud amoria tayo a sigpot itayon akadepende ed Dios, say pikakasi tayo sirin so mangiyapit ed sikatayo ed Dios tan mamabiskeg ed pananisia tayo. Tan lapud nakaukolan so pananisia parad kilalaban, agpankelawan no akin ya impasen nen Jesus a kakkaukolan a pasesegen iray babangatan to a ‘lawas manpikasi, tan agkomon napunaw’! (Lucas 18:1; 2 Tesalonica 3:13) Tua, say isabi na “baleg ya agew nen Jehova” so ag-akadepende ed saray pikakasi tayo—satan so talagan onsabi, ipikasi tayo man itan odino andi. Balanglan naikdan itayo na hustisya tan napalabas tayo so bakal na Dios odino andi, sigpot ya akadepende itan ed klase na pananisia tayo tan ed matunong a kurang tayo ya atekepan na pikakasi.

19. Panon tayon paneknekan a mapekder so pananisia tayo ya ‘ipaakseb na Dios so hustisya’?

¹⁹ No nanonotan tayo, oniay intepet nen Jesus: ‘Sano onla dia so Anak na too, makaromog kasi na sayan pananisia ed dalin?’ Anto so ebat ed sayan makapasagyat a tepet to? Agaylay liket tayo lapud papaneknekan na minilyon a matoor a lingkor nen Jehova ed sankadalinan panamegley na saray pikakasi, inka-anos, tan inkaseet da a walaan ira na onian pananisia. Kanian, positibon naebatan so tepet nen Jesus. On, anggaman maniirap itayo natan lapud saray ag-inkahustisya na mundo nen Satanas, mapekder so pananisia tayo ya ‘ipaakseb na Dios so hustisya parad saray pinili to.’

[Paimano ed leksab]

Kasin Natandaan Yo?

• Anto so sengegan na ileletey na pananisia na arum a Kristiano?

• Akin a nawalaan itayo na mabiskeg a pananisia ed isabi na agew na panangukom nen Jehova?

• Antoray rason no akin a mantultuloy itayon manpikasi?

• Panon a makatulong so andi-tundan panagpikasi ta pian ag-ombetel so pananisia tayo?

[Tepetepet Parad Panagaral]

[Litrato ed pahina 26]

Anto so nipabitar ed ilustrasyon nipaakar ed say balo tan say ukom?

[Saray litrato ed pahina 29]

Mapekder a papanisiaan na minilyon natan a say Dios so ‘mangipaakseb na hustisya’