Ipagamor nen Jehova so ‘Masanton Espiritu To ed Saramay Onkekerew ed Sikato’

“No sikayo sirin, anta mauges kayo, amta yo so mangiter na saray maong a panangaro ed saray anak yo agkasi nagkalalo a say Ama yo a mangatatawen mangiter na espiritu santo ed saray onkerew ed sikato?”—LUCAS 11:13.

1. Kapigan a kakkaukolan tayo so tulong na masanton espiritu?

 ‘AGKO nayarian a bukor iyan subok. Naanosan ko lambengat iya diad tulong na masanton espiritu!’ Kasin nibesngaw yo la so onian liknaan? Maslak ed saray Kristiano so akapangibalikas la na ontan. Nayarin ontan so nibalikas yo sanen naamtaan yon wala manayay graben sakit yo, odino sanen inatey so asawa yo. Odino nibesngaw yo itan sanen say masayaksak a disposisyon yo et asalatan na maer-ermen a liknaan lapud depresyon. Diad makapasubok iran panaon ed bilay, nayarin alikna yo a naaanosan yo labat iratan lapud awalaan kayo na “sankatageyan ya inkabaleg na pakayari” panamegley na masanton espiritu nen Jehova.—2 Corinto 4:7-9; Salmo 40:1, 2.

2. (a) Antoran angat so kidudungetan na saray tuan Kristiano? (b) Antoran tepet so konsideraen tayo ed sayan artikulo?

² Nakaukolan ya arapen na saray tuan Kristiano so ompapalalon pananesdes tan isusumpa na agmaridios a mundo natan. (1 Juan 5:19) Niarum ni, saray patumbok nen Kristo so aatakien a mismo nen Satanas a Diablo, a masebeg a mamabakal ed saramay “manguunor ed ganggan na Dios, tan wala ed sikara so impantasi nen Jesus.” (Apocalipsis 12:12, 17) Agpankelawan sirin no akin a mas kakkaukolan tayo natan so tulong na espiritu na Dios. Anto so nagawaan tayo ta pian naseguro a mantultuloy tayon nagamoran so masanton espiritu na Dios diad daakan a paraan? Tan akin a makaseguro tayon mabulbulos ya iter nen Jehova so nakaukolan tayon biskeg ed panaon na subok? Naromog tayo iray ebat ed sarayan tepet diad duaran ilustrasyon nen Jesus.

Ag-ontutundan Manpikasi

3, 4. Anton ilustrasyon so indalatdat nen Jesus, tan panon to itan ya inyaplika diad pikakasi?

³ Oniay aminsan ya inkerew na sakey ed saray babangatan nen Jesus: “Katawan, ibangat mo kami a mikasi.” (Lucas 11:1) Bilang ebat, inter nen Jesus ed saray babangatan to so mansiglaotan iran ilustrasyon. Say primero et nipaakar ed sakey a managsankaili, tan say komadua et nipaakar ed sakey ya ama a dinengel to so anak ton laki. Sansakeyen tayon konsideraen iyan duaran ilustrasyon.

⁴ Imbaga nen Jesus: “Siopa ed sikayo so walaan na kaaro tan onla ed sikato diad pegley-labi, tan inkuan to ed sikato, ‘Kaaro, pabayes mo ak pa na taloran tinapay, ta walay kaarok a kasabisabi to a nanlapud biahe tan anggapo so iparungok ed sikato’? Tan onebat imay walad loob, ‘Agmo ak gogonigonen. Akatalak lay puerta, tan kaabay ko la’d dukolan iray angkelag ya anak ko; agko nayarian so ombangon tan mangiter ed sika na antokaman.’ Ibagak ed sikayo, Anggaman sikato so ag-ombangon tan mangiter na antokaman lapud kaaro to, segurado a lapud makpel a pamipilit to et ombangon tan ikdan to na saray bengatlan nakaukolan to.” Insan impaliwawa nen Jesus no panon ya onaplika iyan ilustrasyon ed pikakasi, a kuanto: “Unong ed saya, ibagak ed sikayo, Mantultuloy kayon onkerew, tan niiter itan ed sikayo; mantultuloy kayon mananap, tan naromog yo; mantultuloy kayon ontoktok, tan nalukasan itan  ed sikayo. Ta say siopaman ya onkerew et makaawat, tan say siopaman a mananap et makalmo, tan say siopaman ya ontoktok et nalukasan.”—Lucas 11:5-10, NW.

5. Anto so naaralan tayo ed ilustrasyon nipaakar ed mapilit a too no antoy manepeg ya awawey tayo sano manpipikasi itayo?

⁵ Ipapabitar na sayan malinew ya ilustrasyon nipaakar ed mapilit a too no antoy manepeg ya awawey tayo sano manpikasi itayo. Imanoen pa so imbaga nen Jesus sanen tinmalona iyan too diad impakagamor toy nakaukolan to lapud ‘makpel ya impamilit’ to. (Lucas 11:8) Say balikas a “makpel a pamipilit” so aminsan lambengat a pinmatnag diad Biblia. Satan so nipatalos ed Griegon salita a literal a mankabaliksay “ag-inkamabaing.” Mabetbet a say ag-inkamabaing et mangipapabitar na negatibon ugali. Balet, sano ipatnag so ag-inkamabaing odino inkamapilit makasengeg ed maong a gagala, magmaliw itan a marakep a kalidad. Ontan so kipapasen na samay managsankaili diad ilustrasyon. Agto nababaingan ya ipilit so ikekerew to na nakaukolan to. Lapud impabitar nen Jesus iyan managsankaili bilang ehemplo, saray pikakasi tayo so nepeg met a mapilit odino andi-tunda. Labay nen Jehova a ‘mantultuloy itayon onkerew, mantultuloy itayon mananap, mantultuloy itayon ompatok.’ Bilang ebat, ‘iter to so masanton espiritu to ed saramay onkekerew ed sikato.’

6. Diad panaon nen Jesus, anto so panmoria ed kustombren panagparawes?

⁶ Aglambengat impabitar nen Jesus ed sikatayo no panoy nepeg tayon pampikasi a mapilpilit, noagta impabitar to met no akin a nepeg tayon gawaen itan. Pian malinew tayon natalosan itan a leksion, nepeg tayon ikonsidera so panmoria na saramay akadngel ed ilustrasyon nen Jesus nipaakar ed mapilit a managsankaili dia ed kustombre ran panagparawes. Nipabitar ed dakel a teksto ed Kasulatan a diad panaon na Biblia et importantin tuloy so kustombren pangasikaso ed saray bisita, nagkalalo la ed saray lingkor na Dios. (Genesis 18:2-5; Hebreos 13:2) Sakey a kababaingan so agpakapangipatnag na panagparawes. (Lucas 7:36-38, 44-46) Legan tayon sankanonot iya, imanoen tayo lamet so istorya nen Jesus.

7. Akin a say managsankaili diad ilustrasyon nen Jesus so makpel ya amangon ed kaaro to?

⁷ Diad ilustrasyon, say managsankaili so awalaan na bisita diad kapegleyan na labi. Bunek na managsankaili so mangiparungo na tagano ed bisita to balet ta ‘anggapoy iparungo to.’ Diad panmoria to et kapilitan a sikatoy mangitarya! Sikato so kinaukolan a mangala na tinapay, anggano pakadisturboan itan na arum. Kanian nila to so kaaro to insan makpel ton binangon. “Kaaro, pabayes mo ak na taloran tinapay,” so inkelyaw na managsankaili. Sikato so mapilit a kinmerew anggad agamoran to so nakaukolan to. Sanen wala lay tinapay ya iparungo to, insan labat la nagmaliw a maong a managsankaili.

No Mas Dakel so Nakaukolan—Mas Mabetbet so Ikerew

8. Anto so mamakiwas ed sikatayo ta pian mantultuloy itayon onkerew na masanton espiritu panamegley na pikakasi?

⁸ Anto so ipapabitar na sayan ilustrasyon nipaakar ed no akin a mapilit odino andi-tunda itayon manpikasi? Samay too et nantultuloy a kinmerew na tinapay lapud inisip ton kakkaukolan  to iraman a tinapay ta pian nagawaan to so obligasyon to bilang managsankaili. (Isaias 58:5-7) No anggapo so niparungo ton tinapay, sikato so aliwan maong a managsankaili. Mipadpara, lapud amta tayon kakkaukolan tayo so espiritu na Dios pian nagawaan tayo so ministeryo tayo bilang tuan Kristiano, mantultuloy tayon manpikasi ed Dios a kerewen so espiritu to. (Zacarias 4:6) No andian itayo na espiritu to, ag-itayo ontalona. (Mateo 26:41) Natetebek yo kasi so importantin punto ed sayan ilustrasyon? No moriaen tayo a kakkaukolan tayo so espiritu na Dios, segurado a mapilit tayon kerewen itan.

9, 10. (a) Iyilustra no akin a nakaukolan tayo so onkerew a naynay ed Dios na espiritu to. (b) Anto so nepeg tayon itepet ed inkasikatayo, tan akin?

⁹ Pian niyaplika iyan leksion ed sayan panaon, nodnonoten pa a walay sakey a kapamilyaan yo a nansakit ed pegley-labi. Liingen yo kasi so sakey a doktor pian onkerew ed sikato na tulong? Agyo itan gawaen no agtanton grabe so nalilikna na pasyente. Balet, no sikato so naaataki la ed puso, sikayoy makmakpel a manawag na doktor. Akin? Lapud nidunget kayo ed emerhensia. Amta yon kakkaukolan yo so tulong na sakey ya eksperto. Nayarin ompatey so pasyente no agkayo onkerew na tulong. Mipadpara, saray tuan Kristiano so nidudunget natan ed sakey ya emerhensia, a singa panangibaga. Diad tua, si Satanas et “singa omoang a leon,” a manasalin mamingkas ed sikatayo. (1 Pedro 5:8) Pian mansiansia itayon mabilay ed espiritual, kakkaukolan tayo so tulong na espiritu na Dios. Makapatey so ag-ikerew na tulong na Dios. Sirin, makpel tayon kerewen a naynay so masanton espiritu na Dios. (Efeso 3:14-16) No oniay gawaen tayo, napansiansia tayo so biskeg a nakaukolan tayo pian ‘makapansungdo anggad kasampotan.’—Mateo 10:22; 24:13.

¹⁰ Importante sirin ed sikatayo so panapanaon a panmolimoli, ya oniay itepet tayo ed inkasikatayo, ‘Kaunongan kabetbet so pampipikasik? Tandaan, sano namoria tayon maong a kakkaukolan tayo so tulong na Dios, mas mabetbet so pampikasi tayo a kerewen so masanton espiritu.

Anto so Mamakiwas ed Sikatayon Manpikasi Tekep na Panagmatalek?

11. Panon ya inyaplika nen Jesus ed pikakasi so ilustrasyon nipaakar ed sakey ya ama tan say anak to?

¹¹ Say ilustrasyon nen Jesus nipaakar ed mapilit a managsankaili so mangipapabitar ed awawey na sakey a manpipikasi, salanti, sakey a mananisia. Ipapabitar na ontumbok ya ilustrasyon so awawey na samay dumerengel na saray pikakasi—si Jehova a Dios. Oniay intepet nen Jesus: “Siopa ed sikayo so ama sano say anak to onkerew ed sikato na tinapay, et sikato so ikdan to na sakey a bato? Ono sira, et sikato so mangiter na sakey ya uleg a panagkasira? Ono sikatoy onkerew na sakey ya iknol, iter to ed sikato so sakey ya alakdan?” Oniay imbaga nen Jesus bilang kiyaplikaan na satan: “No sikayo sirin, anta mauges kayo, amta yo so mangiter na saray maong a panangaro ed saray anak yo agkasi nagkalalo a say Ama yo a mangatatawen mangiter na espiritu santo ed saray onkerew ed sikato?”—Lucas 11:11-13.

12. Panon a nipabitar so inkamabulos nen Jehova ya onebat ed saray pikakasi diad ilustrasyon nipaakar ed sakey ya ama a kinmiwas ed kerew na anak to?

¹² Panamegley na sayan alimbawa na sakey ya ama ya onkikiwas ed kerew na anak to, imparungtal nen Jesus no anto so liknaan nen Jehova ed saramay ontutupleg ed sikato panamegley na pikakasi. (Lucas 10:22) Unona, imanoen pa so pandumaan. Aliwan singa samay too ed inmunan  ilustrasyon a masuyat ya ontulong, si Jehova et singa maasikason ateng a too, a magunaet ya onkiwas ed kerew na anak to. (Salmo 50:15) Imparungtal ni nen Jesus so mabulos ya awawey nen Jehova ed sikatayo, a pinandumaan to so kipapasen na sakey a toon ama tan say mangatatawen ya Ama. Inkuan to a no say toon ama, anggaman “mauges” lapud atawir ton kasalanan, so mangiter na maong a langkap ed anak to, mas nagkalalo sirin a nailaloan tayo a say mapalabon mangatatawen ya Ama tayo et mangiter na masanton espiritu ed baleg a pamilya to, salanti, saramay mandadayew ed sikato!—Santiago 1:17.

13. Anto so naseguro tayo no manpikasi itayo ed si Jehova?

¹³ Anto so leksion a naaralan tayo ed saya? Makapanmatalek tayo a mabulbulos ya ipagamor ed sikatayo na mangatatawen ya Ama tayo so masanton espiritu to sano kerewen tayo itan ed sikato. (1 Juan 5:14) Sano maminpigapiga itayon ontupleg ed sikato diad pikakasi, agbalot ibaga nen Jehova so onia: “Agmo ak gogonigonen. Akatalak lay puerta.” (Lucas 11:7, NW) Bilang pidumaan, oniay imbaga nen Jesus: “Mantultuloy kayon onkerew, tan niiter itan ed sikayo; mantultuloy kayon mananap, tan naromog yo; mantultuloy kayon ontoktok, tan nalukasan itan ed sikayo.” (Lucas 11:9, 10, NW) On, ‘ebatan itayo nen Jehova no ontawag itayo.’—Salmo 20:9; 145:18.

14. (a) Anto so lingon kanonotan a mangogonigon ed arum a nipapaarap ed subsubok? (b) Sano nasusubok itayo, akin a manpikasi itayo ed si Jehova tekep na panagmatalek?

¹⁴ Idadanet met na ilustrasyon nen Jesus nipaakar ed manangiyansakit ya ama a mas matalonggaring ni so kamaongan nen Jehova nen say kamaongan ya ipapatnag na siopaman a toon ateng. Sirin, agtayo komon iisipen a saray subok a kipapaarapan tayo et pakapatnagan lay agpanangabobon na Dios ed sikatayo. Say manunan kabusol tayo, si Satanas, so malabay ya ontan so isipen tayo. (Job 4:1, 7, 8; Juan 8:44) Anggapo so Makasulatan a basiyan pian kondenaen tayoy inkasikatayo. Ag-itayo susuboken nen Jehova panamegley na ‘saray mauges a bengatla.’ (Santiago 1:13) Agto itayo idudunget ed sakey a mairap a subok a singa ketket na uleg odino alakdan. Say mangatatawen ya Ama tayo et mangiiter na ‘maong iran panangaro ed saray onkerew ed sikato.’ (Mateo 7:11; Lucas 11:13) On, no lalon natetebek tayo so kamaongan tan inkamabulos nen Jehova ya ontulong ed sikatayo, lalon napakiwas itayon manpikasi tekep na panagmatalek. No ontan so gawaen tayo, nibalikas tayo met so liknaan na salmista ya oniay insulat to: “Say Dios dinengel to ak a tuatua; sikato inimano to so boses na pikakasik.”—Salmo 10:17; 66:19.

No Panon Itayon Tutulongan na Masanton Espiritu

15. (a) Anto so insipan nen Jesus nipaakar ed masanton espiritu? (b) Anto so sakey a paraan a makatulong ed sikatayo so masanton espiritu?

¹⁵ Sakbay a tuloy na impatey nen Jesus, inulit to so panamaseguro a sinalambit to ed saray ilustrasyon to. Oniay imbaga to ed saray apostol to sanen sinaglawi to so masanton espiritu: “Mikasi ak ed Ama, et ikdan to kayo na sananey a managligliwa, pian manayam ed sikayo lawas.” (Juan  14:16) Insipan sirin nen Jesus a say managligliwa, odino say masanton espiritu, so niwala ed saray patumbok to ed onsaginonor iran panaon, anggad panaon tayo. Anto so importantin paraan a pakakaeksperiensyaan tayo la ed ontan a tulong? Say masanton espiritu so ontulong ed sikatayo ta pian nasungdoan so nanduruman subok. Panon? Si apostol Pablo, a nidunget a mismo ed saray subok, so aneskribe diad sulat to ed saray Kristiano ed Corinto no panon a sikatoy tinulongan na masanton espiritu. Konsideraen tayon antikey so insulat to.

16. Panon a nayarin mipadpara so kipapasen tayo ed kipapasen nen Pablo?

¹⁶ Unona, prangkan imbaga nen Pablo ed saray kapanisiaan to a walay aanosan ton “sakey a sabit ed laman,” sakey a klase na subok. Insan, oniay imbaga to: “Akikasi ak ed Katawan [a Jehova] ya amitlo, pian naekal komon ed siak.” (2 Corinto 12:7, 8) Satan a pampapairapan nen Pablo et nansiansia ni anggano sikatoy akikasi la ed Dios a naekal itan. Nayarin ontan met so kidudungetan yon kipapasen. Singa si Pablo, nayarin mapilit tan matalek kayon manpipikasi, a kekerewen yo ed si Jehova ya ekalen to so sakey a subok. Balet, anggano aminpigapiga yo lan impikasi itan a problema, siansian agni naandi itan. Kabaliksan kasi na satan ya agdedengelen nen Jehova iray pikakasi yo tan agkayo tutulongan na espiritu to? Andin balot! (Salmo 10:1, 17) Imanoen pa so ontumbok ya imbaga nen apostol Pablo.

17. Panon ya inebatan nen Jehova iray pikakasi nen Pablo?

¹⁷ Bilang ebat ed saray pikakasi nen Pablo, oniay imbaga ed sikato na Dios: “Say grasyak so masarag ed sika; ta say pakayarik agawan ayadyari ed kakapuyan.” Imbaga nen Pablo: “Sankabalgan so liket a labalabay ko so manpasirayew ed saray kakapuyan ko, pian say pakayari nen Kristo manayam ed siak [“singa toldan akatarong ed siak,” NW].” (2 Corinto 12:9; Salmo 147:5) Diad panamegley nen Kristo, naeksperiensya sirin nen Pablo so makapanyarin pananalimbeng na Dios a singa tolda ya akatarong ed sikato. Natan et eebatan nen Jehova iray pikakasi tayo ed ontan met a paraan. Proproteksionan to iray lingkor to a singa to ra tatarongan.

18. Akin a nayarian tayon sungdoan iray subok?

¹⁸ Siempre, agnaamper na sakey a tolda so ipelag na uran odino isiplog na dagem, balet wala so proteksion a niiter na satan. Ontan met, say proteksion ya itatarya na “pakayari nen Kristo” so agmangamper ed saray subok odino ed saray paniirapan tayo. Ingen, itatarya na satan so espiritual a proteksion sumpad makaderal iran impluensya na sayan mundo tan ed saray panangataki na manuley ed satan, si Satanas. (Apocalipsis 7:9, 15, 16) Sirin, anggaman manasagmak kayo na sakey a subok ya ‘agnaekal ed sikayo,’ makaseguro kayo a nanenengneng nen Jehova so pipupuligesgesan yo tan sikato so onkiwas ed ‘boses na panatawag yo.’ (Isaias 30:19; 2 Corinto 1:3, 4) Oniay insulat nen Pablo: “Say Dios matoor, ta agto kayo paulyan a natukso na onlabas ed nayarian yo; noag ingen pati tukso, [sikato so] manggawa met na dalan a paliisan, ta pian nayarian yo ya itepel.”—1 Corinto 10:13; Filipos 4:6, 7.

19. Anto so determinado yon gawaen, tan akin?

¹⁹ On, say kaplesan a ‘kaunoran iran agew’ na sayan agmaridios a mundo so pakabidbiran na “saray panaon a maatap.” (2 Timoteo 3:1) Anggaman ontan, parad saray lingkor na Dios et nayarian dan arapen irayan panaon. Akin a nayarian da? Lapud tulong tan pananalimbeng na masanton espiritu na Dios, a mabulos tan daakan ya ipapagamor nen Jehova ed amin na saramay andi-tunda tan matalek ya onkekerew ed sikato. Komon ta determinado itayon mantultuloy a manpikasi, ya inagew-agew tayon kerewen so masanton espiritu.—Salmo 34:6; 1 Juan 5:14, 15.

Panon Yon Ebatan?

• Anto so nakaukolan tayon gawaen ta pian nagamoran tayo so masanton espiritu na Dios?

• Akin a makapanmatalek itayo ya ebatan nen Jehova iray pikakasi tayo sano kerewen tayo so masanton espiritu?

• Panon itayon natulongan na masanton espiritu pian nasungdoan iray subok?

[Tepetepet Parad Panagaral]

[Litrato ed pahina 21]

Anto so naaralan tayo ed ilustrasyon nen Jesus nipaakar ed mapilit a managsangkaili?

[Litrato ed pahina 22]

Kasin andi-tunda kayon manpipikasi sano onkekerew kayo na masanton espiritu na Dios?

[Litrato ed pahina 23]

Anto so naaralan tayo ed si Jehova manlapud ilustrasyon nipaakar ed maasikason ama?