Kasin Nanonotan Yo?

Agunggonaan kayo kasi ed impanbasa ed agano niran paway na Say Panag-Bantayan? Salien yo pan ebatan so onggendan a tepetepet:

• Anto so makatulong ed sakey a tuan Kristiano sano ombeneg ed si Jehova so sakey ya inad-aro to?

Pabiskeg mo so inkasika tan saray manmamatoor nin kapamilyaan mo. Magmaliw kan okupado ed saray maespiritual a kimey. Lawas kan akaparaan ya ontulong ed arum. Mantuloytuloy ka a manilalo ya ompawil ni so inad-arom. Agmo tetelen so inkasika. Respetoen so uksoyan na Dios parad panagdisiplina, tan ibalikas mo so naliliknam ed saray kakaarom.—9/1, pahina 18-21.

• Anto so duaran paraan a makatulong so Kasulatan pian nibiig so ‘kaunoran iran agew’?

Ipapasakbay na Biblia iray ebento a nagawa legan na panaon na “anggaan na mundo.” (Mateo 24:3, 7, 8; Lucas 21:11) Dedeskrbien met na satan iray pananguman ed awawey tan kakikiwas na saray totoon manbibilay ed ‘kaunoran iran agew.’ (2 Timoteo 3:1-5) Makapainteres, say maong a balita na panarian so kaukolan a nipulong ed sayan panaon.—9/15, pahina 4-6.

• Anto so responsabilidad na kongregasyon sano say sakey a Kristiano a manmamaneho na luganan et akaaksidente ya inateyan na arum a too?

Nayarin desisyonan na saray mangiimbestigan mamatatken ya anggapo so impankasalanan ed dala lapud agtanton nakontrol odino anggapoy kontrol na drayber ed saray kipapasen a nanresulta ed impatey na arum. Balet no talagan walay agawan impankasalanan ed dala tan nagbabawi so toon nankasalanan, sikato so makaawat na panamaat manlapud Kasulatan tan walaray restriksion ed sikato nipaakar ed saray pribilehyo ed kongregasyon.—9/15, pahina 30.

• Akin ya ag-akadependi so andi-anggaan a bilay ed saray iyaaligwas ed siensia?

Walaray pansasagpot ed siensia nipaakar ed pamparukey na bilay, a singa say getman ninatnat ni so pamarakel na saray selula odino therapeutic cloning pian nawalaan na balo tan mipadparan tuloy iran organo iray pasyente. Balet ipapanengneng na Biblia a say alenleneg a paraan pian nagamoran na totoo so bilay ya andi-anggaan et say dondon nen Jesus.—10/1, pahina 3-5.

• Kasin pagpauna na Makristianon bautismo so ritual a panag-ames na saray Judio?

Andi. Inagamil na saray Judio so ritual a panaglinis ed inkasikaran dili, balet agkinaukolan itan ed samay bautismon ginawa nen Juan. Say panaglinis a kinaukolan na Mosaikon Ganggan so nepeg ya uliten, balet say Makristianon bautismo so maminsan labat a nagawa.—10/15, pahina 12-13.

• Anto so Ministerial Training School?

Saya so waloran-simba a kurso parad saray walad kasuloan a mamatatken tan ministeryal a lingkor ed kongregasyon tan walad kipapasen a nibakin manlingkor ed lugar a baleg so pankaukolan. Say asainmin da et nayarin diad mismon kongregasyon a nanlapuan da, diad mismon bansa ra, odino diad arum a bansa.—11/15, pahina 10-11.

• Anto odino siopa so antikristo ya asalambit diad 1 Juan 2:18; 4:3?

Diad malaknab a pantalos, say tutukoyen na “antikristo” et say amin ya onsusumpa odino mankuankuanan a Kristo odino saray onaakto bilang manangilaman to. Saray imbalikas nen Jesus tan si Juan so mangipapabitar a say antikristo et sakey a grupo a tugyopen na dakel ya indibidual ya antikristo a mangikakayat na relihyoson panamalikdo tan mangipupulisay ed Panarian na Dios.—12/1, pahina 4-6.