Kasin Ninatnat Yo Ni so Panangaro Yo?

NEPEG a naresistian na gulonggulong na angkla so mabiskeg a kaguguyor na satan ta pian agniyanor so barko. Balet, posible labat itan no malmalet iray nankawingan na gulonggulong, ta no andi et napakset itan.

Mipadpara met ed satan so kipapasen na Kristianon kongregasyon. Pian magmaliw a mabiskeg tan mabunigas ed espiritual so kongregasyon, nepeg a nabedber ed pankakasakey iray kada membro. Anto ta so mamebedber ed sikara? Samay sankabiskegan a puersa ed pankakasakey, salanti, say aro. Agpankelawan ya oniay imbaga nen Jesu-Kristo ed saray babangatan to: “Sakey a balon ganggan so iter ko ed sikayo, a manaaroan so sakey tan sakey ed sikayo; salanti unong na impangarok ed sikayo, pian manaaroan met so sakey tan sakey ed sikayo. Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.” On, say panaaroan na saray tuan Kristiano et aliwa lambengat a pikakaaroan tan panrerespetoan. Say panangaro ra et atekepan na dilin-panagsakripisyo.​—Juan 13:34, 35.

Apresyaen Iray Kapananisiaan Tayo

Dakel a kongregasyon so tutugyopen na totoon aliwan pareparehoy edad, rasa, nasyonalidad, kultura, lenguahe, tan kipapasen ed sosyedad. Kada membro so walaan na nanduruman labay tan aglabay, iilaloan tan tatakotan, tan kaslakan et walaan na personal a problema, a nayarin masakit odino naiirapan ira ed pinansyal. Lapud satan, nayarin mairap a niwala so pankakasakey ed limog na saray Kristiano. Anto sirin so makatulong ed sikatayo pian ninatnat tayo so panangaro tayo tan mansiansian nankakasakey anggaman mairap itan? Napaaralem tayoy panaaroan tayo no masimoon tayon aapresyaen so amin a kabiangan na membro na kongregasyon.

Balet, panon tayon nipatnag so apresasyon ed saray kapananisiaan tayo? Aapresyaen tayo ira no maimano itayo ed saray pankaukolan da, papablien tayon maong ira, bibidbiren tayo so kaabigan odino kamaongan da, tan misalsalamat itayo lapud kaiba tayo ra a mandadayew. Diad ontan et sikaray lalon naaro tayo. Konsideraen tayo pan magano imay insulat nen apostol Pablo ed saray inmunan-siglon Kristiano ed Corinto ta pian naamtaan tayo no panon tayon ninatnat a maong so Makristianon aro tayo.

‘Akaputan so Puso’ na Saray Taga-Corinto

Insulat nen Pablo so unonan sulat to ed saray taga-Corinto nen 55 C.E. tan say komadua et diad satan lanlamang a taon. Ipapatnag na saray komento to a walaray membro ed kongregasyon na Corinto ya andian na apresasyon ed saray kapananisiaan da. Oniay impaneskribe nen Pablo ed satan a kipapasen: “Kakaaron taga-Corinto! Anggapoy iyaamot mi’d sikayo. Ibabaga mi’y amin a luga’y puso mi. Agmi kinaputan so puso mi ya angako’d sikayon amin, balet kinaputan yoy puso yo ta agyo kami inawat.” (2 Corinto 6:11, 12, Maung a Balita) Anto so labay ya ibaga nen Pablo sanen deneskribe to ya ‘akaputan so puso ra’?

Say labay ton ibaga et apegetan tan aliwan lukas so puso ra. Diad pakatebek na sakey ya iskolar na Biblia, say panangaro na saray taga-Corinto ed  si Pablo so “napupugeran na makapagonigon iran situasyon lapud andiay basiyan a panag-inap . . . tan impakasakitan na liknaan lapud agmarakep ya impantrato ed sikara.”

Imanoen pa so insimbawa nen Pablo: “Lapu ed sakey ya upa dia ed kapara a nengneng, mansalita ak a singa kayo ana’ko, ombaleg [“onnatnat,” NW] kayo met komon.” (2 Corinto 6:13) Pinaseseg nen Pablo iray taga-Corinto a pabalegen odino inatnat da so panangaro ra ed saray kapananisiaan da. Kabaliksan na saya ya ag-ira magmaliw a mainap tan mainomay ya ombarong, noagta nawalaan iray positibon awawey tan lukas a puso.

Inatnat so Panangaro Natan

Makapaligsay-puso a nanengneng so pirmin pansasagpot na saray tuan managdayew ed Dios a manginatnat na panaaroan da. Talagan nakaukolan so pansagpot pian ninatnat so panangaro. Agtayo labat nepeg ya amtaen no anto so gawaen tayo, noagta kaukolan met a midumaan so ugali tayo ed saramay ag-ontutumbok ed saray estandarte na Biblia. Saratan a totoo so mabetbet ya agmangaapresya ed arum. Sikaray bengatbengat, agmarespeto, tan ansakit a mansalita. Kanian, ag-itayon balot paiimpluensyaan ed ontan iran ugali. Agaylan makapaermen no agtayo nipatnag so panangaro tayo lapud panag-inap, a singa ed saramay taga-Corinto! Nayarin nagawa so ontan no say piimano tayo et saray lingo na Kristianon agi tayo imbes a saray maabig a kalidad to. Nagawa met so ontan no akaputan so puso tayo a mangaro ed sakey a too lapud sananey so kultura to.

Diad pidumaan, say lingkor na Dios a manginanatnat na panangaro to so masimoon a mangaapresya ed saray kapananisiaan to. Sikatoy mamapablin maong ed sikara, rerespetoen to so dignidad da, tan maimano ed saray pankaukolan da. Anggan walay katunongan ton manreklamo,  sikatoy mabulos a mamerdona tan agmaneem-em na sakit na linawa. Agto panduaruwaan iray motibo na kapananisiaan to. Say lukas a puso to so mamapakiwas ed sikaton ipatnag imay panangaro a tutukoyen nen Jesus sanen impasakbay to: “Lapu ed saya amin a too nabidbiran da a sikayoray babangatan ko, no wala so aro yo ed sakey tan sakey.”​—Juan 13:35.

Panggunaetan so Mikaaro ed Arum nin Agagi

Say tuan panangaro so mamakiwas ed sikatayo pian panggunaetan so milimog ed saray agagi ed kongregasyon a matalag tayon nakaiba, ya aliwa labat a saramay naynay a kaulop tayo. Siopa kasi iraya? Walaray kakongregasyon tayo a mabaing odino lapud nanduruman rason et daiset so kaaro ra. Nayarin diad gapo et moriaen tayon daiset so piparaan tayo ed sikara, nilikud ed kapara tayo iran managdayew. Balet agta tua ya arum ed saray sankaapitan a sankaaro diad Biblia et daiset so pamparehoan da, no say nengnengen labat et akinpaway?

Singa bilang, si Rut tan Naomi et mandumaan a tuloy so edad, nasyonalidad, kultura, tan anggan say mismon salita ra. Balet, agnaamper na saratan a pandumaan so impankaaro ra. Sakey nin alimbawa et si Jonathan a sakey a prinsipe tan si David a sakey a managpastol. Arawdawi so baetan na edad da, ingen ta say impankaaro ra et sakey ed saray sankaapitan ya ulopan ya asalambit ed Masanton Kasulatan. Saratan a siglaotan so nagmaliw a makapaliket tan makapabiskeg ed espiritual parad sarayan sankakaaro.​—Rut 1:16; 4:15; 1 Samuel 18:3; 2 Samuel 1:26.

Anggan natan et walaray tuan Kristiano a magmamaliw a maapit a sankaaro anggaman ag-ira mankaedaran odino sigpot a nandumaan so kipapasen na panagbilay da. Singa bilang, si Regina et sakey a mansusulon ateng na duaran tinedyer ya ananak. * Sikatoy okupadon maong, a ngalngalin anggapo lay panaon to a milimog-limog ed arum. Si Harald tan Ute et matatken lan sanasawa ya andian na anak. No nengnengen et ompatnag ya anggapo so tanton pamparehoan da. Balet inyaplika nen Harald tan Ute so simbawa na Biblia ya inatnat so panangaro. Nanggunaetan dan nipila si Regina tan saray anak to ed dakel iran aktibidad, a manuulop ira ed panagpulong tan diad panagligliwaan.

Kasin makapikaaro itayo ni ed arum, nilikud ed saray naynay lan kaulop tayo? Akin ta no manggunaet itayon milimog ed saray kapananisiaan tayo a midumaan so nasyonalidad, kultura, odino edad da?

Aliston Onkiwas ed Saray Pankaukolan na Arum

No lukas so puso tayo, magmaliw itayon maimano ed saray pankaukolan na arum. Antoran klase na pankaukolan? Obserbaan pa iray membro na Kristianon kongregasyon. Saray kalangweran et mankaukolan na panangigiya, saray maedad la et mankaukolan na panamaseseg, saray manlilingkor a sigpot-panaon et mankaukolan na komendasyon tan suporta, tan saray maneermen a kapananisiaan et mankaukolan na napangibesngawan day liknaan da. Balang sakey et walaan na saray pankaukolan, tan labay tayon nitarya irayan pankaukolan anggad nayarian tayo.

Say pananginatnat na panangaro et mankabaliksan met a talosan tayo iramay walaan na nikaduma iran pankaukolan. Wala ta so amta yo a grabe so sakit to odino nipapaarap ed sakey a klase na subok ed bilay? No inatnat yo so panangaro yo tan lukas so puso yo, natalosan tan natulongan yo iramay mankakaukolan.

Sano nasumpal la iray propesiya na Biblia diad magano lan arapen, saray malet a bedber na pankakasakey ed loob na kongregasyon et magmaliw a makanakana nen saray kaykayarian, abilidad, odino agawaan. (1 Pedro 4:7, 8) Kada sakey ed sikatayo so makatulong pian napaelet so bedber na pankakasakey ed mismon kongregasyon tayo diad panginatnat na panangaro tayo ed saray kapananisiaan tayo. Makaseguro itayo a nagamoran tayo so daakan a bendisyon nen Jehova no iyaplika tayo iray salita na Anak ton si Jesu-Kristo, a nankuan: “Saya so ganggan ko, a manaaroan so sakey tan sakey ed sikayo, salanti singa impangarok ed sikayo.”​—Juan 15:12.

[Paimano ed leksab]

[Blurb ed pahina 10]

Nipatnag tayoy apresasyon ed saray agagi tayo no sikaray papablien tayon maong, rerespetoen tayoy dignidad da, tan maimano itayo ed saray pankaukolan da