Nagagawa La Natan so ‘Unonan Kikioli’!

“Saray inaatey ed Kristo ombilay ira ya unona.”​—1 TESALONICA 4:16.

1, 2. (a) Anto so ilalo na saramay inaatey la? (b) Anto so prueba a talagan walay kikioli? (Nengnengen so paimano’d-leksab.)

 “SARAY mabilay [et] amta ra ya ompatey ira.” Onia so peteg a kipapasen manlapu la’d impankasalanan nen Adan. Diad interon awaran, amta na balang sakey a nianak a sikatoy ompatey ed saginonor, kanian onia so nononoten na dakel: ‘Anto so onsublay a nagawa? Anto so kipapasen na saray inaatey?’ Oniay ebat na Biblia: “Saray inaatey anggapoy amta ran balot.”​—Eclesiastes 9:5, Maung a Balita.

² Wala kasi so ilalo na saray inaatey? On, wala. Diad tua, nepeg a wala so ilalo ra ta pian nasumpal so orihinal a gagala na Dios parad katooan. Diad inlabas na saray siglo, inagamil na saray matoor a lingkor na Dios so pananisia ed sipan nen Jehova, salanti, say Bini a maneral ed si Satanas tan mangekal ed makaderal a ginawa to. (Genesis 3:15) Inaatey la so maslak ed saray  lingkor na Dios kanian nakaukolan a paolien ira ta pian nanengneng da so kasumpalan na satan a sipan pati ed arum niran insipan nen Jehova. (Hebreos 11:13) Posible kasi itan a nagawa? On. Oniay imbaga nen apostol Pablo: “Wala naani kioli ed bilay na saray matunong tan agmatunong.” (Gawa 24:15) Nensaman et pinaoli nen Pablo so kalangweran a si Eutico, ya “inakop ya inatey” lapud naplag manlapud bintana na komatlon grado. Saya so unor ed siameran impamaoli a nisulat ed Biblia.​—Gawa 20:7-12. *

3. Panon kayon naligliwa ed saray salita nen Jesus a nisulat ed Juan 5:28, 29, tan akin?

³ Sayan siameran salaysay na impamaoli so basiyan pian panisiaan so imbalikas nen Pablo. Saraya so mamabiskeg ed kompiyansa tayo ed panamaseguro nen Jesus: “Onsabi oras, ya amin so saray wala ed saray lubok narengel da so boses [nen Jesus], et ompaway ira.” (Juan 5:28, 29) Agaylan makapaligsay-puso iratan a salita! Tan makaligliwan tuloy iratan parad minilyon a totoo ya inateyan na saray pinabli ra ed bilay!

4, 5. Anton nanduruman klase na kikioli so asalambit ed Biblia, tan dinan ed saratan so aralen tayo ed sayan artikulo?

⁴ Karaklan ed saramay napaoli so manayam diad mareen a dalin ya uleyan na Panarian na Dios. (Salmo 37:10, 11, 29; Isaias 11:6-9; 35:5, 6; 65:21-23) Balet sakbay na saya et nepeg nin nagawa so arum a klase na kikioli. Unona, kinaukolan a napaoli si Jesus pian nipresenta to ed Dios so balor na bagat to parad sikatayo. Si Jesus so inatey tan apaoli nen 33 C.E.

⁵ Insan, saray alanaan a membro na “Israel na Dios” so kaukolan a nakaiba na Katawan a Jesu-Kristo diad maglorian kipapasen ed tawen, a ‘miayam ira lawas ed Katawan.’ (Galacia 6:16; 1 Tesalonica 4:17) Sayan nagawa et atawag ya “asasakbay a kikioli” odino “say unona a kioli ed bilay.” (Filipos 3:10, 11, NW; Apocalipsis 20:6) Kayari na sayan klase na kikioli, nagawa so kioli na minilyon a totoo  diad dalin a walaay ilalon manbilay ya andi-anggaan diad Paraiso. Kanian, interesado itayon maong ed “unona a kioli,” balanglan say ilalo tayo et parad tawen odino parad dalin. Anton klase na kikioli itan? Kapigan itan nagawa?

“Dinan Kasi a Nengneng na Laman?”

6, 7. (a) Sakbay ya onla’d tawen iray alanaan a Kristiano, anto so nepeg nin nagawa? (b) Anton nengneng na laman so walad sikara sano onoli ira?

⁶ Diad unonan sulat nen Pablo ed saray taga-Corinto, oniay intepet to nipaakar ed unonan kikioli: “Panon so iyoli’ra ed bilay so saray inaatey? Tan dinan kasi a nengneng na laman so awiten da?” Insan oniay ebat to ed satan: “Say itane’mo agnabilay, no agni inatey . . . balet say Dios ikdan to na sakey a laman singa kinaliktan to . . . Say gloria na mangatatawen sakey, tan say gloria na mangaraldalin sananey.”​—1 Corinto 15:35-40.

⁷ Ipapabitar na sarayan salita nen Pablo a nepeg nin ompatey iray Kristianon alanaan na masanton espiritu sakbay dan awaten so tumang da ed tawen. No ompatey ira, ompawil ed dabok so mangaraldalin a laman da. (Genesis 3:19) Diad panaon ya inggeter na Dios, sikara so napaoli a walaay sakey a nengneng na laman a matukoy ed bilay diad tawen. (1 Juan 3:2) Iter met na Dios ed sikara so imortal a bilay. Ag-itan nisipor ed sikara sanen nianak ira, a singano niiyan ed sikara so tatawagen ya ag-ompatey a kamarerwa. “Sayan ompatey kaukolan a kawesan na ag-ompatey,” so inkuan nen Pablo. Say imortal a bilay et regalo na Dios, ya ‘ikawes’ na saramay kabiangan ed unonan kikioli.​—1 Corinto 15:50, 53; Genesis 2:7; 2 Corinto 5:1, 2, 8.

8. Panon tayon naseguro ya agpilien na Dios so 144,000 manlapud saray membro na nanduruman relihyon?

⁸ Say 144,000 lambengat so kabiangan ed unonan kikioli. Inggapo nen Jehova so pamili ed sikara nen Pentecostes 33 C.E., kayarin tuloy na inkioli nen Jesus. Amin da so walaay “ngaran [nen Jesus] tan ngaran nen Ama to ed saray moling da.” (Apocalipsis 14:1, 3) Kanian, sikara so agpinili manlapud nanduruman relihyon. Amin da so patumbok nen Kristo, tan panlikliketan da so pribilehyo ya akbibiten so ngaran na Ama, si Jehova. Sano napaoli ira, walay kimey a nipabtang ed sikara diad tawen. Talagan makapaliket ed sikara so ilalon makapanlingkor ed mismon arapan na Dios.

Nagagawa la Natan?

9. Panon itayon natulongan na Apocalipsis 12:7 tan 17:14 ta pian naamtaan tayo no kapigan ginmapo so unonan kikioli?

⁹ Kapigan nagawa so unonan kikioli? Wala so mabiskeg ya ebidensya a nagagawa la itan natan. Alimbawa, pankomparaen tayo so duaran kapitulo na Apocalipsis. Unona, imanoen so walad Apocalipsis kapitulo 12. Nabasa tayo ditan so impibakal na nitronon Jesu-Kristo tan saray masanton anghel to sumpad si Satanas tan saray demonyo to. (Apocalipsis 12:7-9) Agawa itan a bakal nen 1914, unong a naynay ya ipapabitar na sayan magasin. * Balet, imanoen pa a diad sayan bakal ed tawen et anggapo ni so kaiba nen Kristo a kabiangan ed saray alanaan a patumbok to. Natan, imanoen tayo so kapitulo 17 na Apocalipsis. Nabasa tayo ditan a sano aderal lay “Babilonia a Baleg,” taloen na Kordero iray nasyones. Insan, oniay inyarum na satan: “Sikara naani taloen na saray ibiba to, ya atawag, tan apili, tan matoor.” (Apocalipsis 17:5, 14) Kaukolan a saray “atawag, tan apili, tan matoor” so apaoli la’d satan a panaon ta pian sikaray nakaiba nen Jesus sano sigpot da lan panampoten so mundo nen Satanas. Makatunongan sirin a say panaon na kioli na saray alanaan ya ompatey sakbay na Armagedon et diad baetan na 1914 tan Armagedon.

10, 11. (a) Siopa so irerepresenta na 24 a mamatatken, tan anto so imparungtal na sakey ed sikara ed si Juan? (b) Anto so konklusyon tayo ed saya?

¹⁰ Posible kasin naamtaan no kapigan so eksakton inggapo na unonan kikioli? Naromog so  makapasagyat ya ebidensya diad Apocalipsis 7:9-15, sanen deneskribe nen apostol Juan so pasingawey to nipaakar ed ‘sakey a baleg ya ulop, ya agnayarin bilangen na too.’ Say pakabidbiran ed sayan baleg ya ulop so nipasabi ed si Juan panamegley na sakey ed 24 a mamatatken, tan sarayan mamatatken so mangirerepresenta ed 144,000 a miuley ed si Kristo diad maglorian kipapasen da ed tawen. * (Lucas 22:28-30; Apocalipsis 4:4) Say ilalo nen Juan et parad tawen; balet diad saman et sikato so wadia ni’d dalin bilang too sanen nansalita ed sikato imay matatken, kanian diad pasingawey et inrepresenta nen Juan iray alanaan diad dalin ya agni akaawat na tumang da ed tawen.

¹¹ Anto sirin so nibaga tayo ed punto a nipasabi ed si Juan so pakabidbiran na baleg ya ulop panamegley na sakey ed 24 a mamatatken? Ompatnag a saray apaoli lan kabiangan na 24 a mamatatken et mibibiang ed panangipasabi na saray madibinon katuaan natan. Akin ya importante iyan punto? Lapud nen 1935 et niparungtal ed saray alanaan a lingkor na Dios diad dalin so nipaakar ed suston pakabidbiran ed baleg ya ulop. Kanian no sakey ed 24 a mamatatken so nausar pian mangipasabi ed sayan importantin katuaan, sikato sirin so apaoli la ed tawen antis na 1935 odino ed satan a taon. Ipapabitar na saya a ginmapo lay unonan kikioli ed baetan na 1914 tan 1935. Nayarian tayo kasin naamtaan no kapigan so mas eksakton taon?

12. Ipaliwawa no akin a nibaga tayon posiblin ginmapo so unonan kikioli diad primabera na 1918.

¹² Diad sayan punto, makatulong no konsideraen tayo so nibaga tayon mipetekan a salaysay na Biblia. Nen loglog na 29 C.E., si Jesu-Kristo so alanaan bilang say magmaliw ya Ari ed Panarian na Dios. Kayari na talora tan kapalduan taon, nen primabera na 33 C.E., sikato so apaoli bilang makapanyarin espiritu. Kasin nikatunongan tayo a lapud nitrono si Jesus diad loglog na 1914 et ginmapo la so kioli na saray matoor ya alanaan a patumbok to kayari na talora tan kapalduan taon, diad primabera na 1918? Makapainteres itan a posibilidad. Anggaman ag-itan direktan napekderan ed Biblia, mitunosan itan ed ipapabitar na arum niran teksto na Biblia a ginmapo so unonan kikioli diad banda’d gapo na kiwawala nen Kristo.

13. Panon so impangisuheri na 1 Tesalonica 4:15-17 a say unonan kikioli et agawa diad banda’d gapo na kiwawala nen Kristo?

¹³ Alimbawa, oniay insulat nen Pablo: “Sikatayon mabilay, ya atilak ya angga ed isasabi na Katawan [ya aliwan diad sampot na kiwawala to], agtayon balot unaan so saray naugip. Ta say Katawan a dili onlasor a manlapu ed tawen, a pati sakey ya eyag, pati boses na arkanghel, tan say trumpeta na Dios: et saray inaatey ed Kristo ombilay ira ya unona. Insan sikatayo a mabilay, ya atilak naabot tayo’ra naani a piulopen ed saray kalureman, a miabet ed Katawan diman ed tagey: et ontan miayam itayo lawas ed Katawan.” (1 Tesalonica 4:15-17) Kanian, saray alanaan a Kristiano ya inatey sakbay na kiwawala nen Kristo so unonan napaoli ed tawen sakbay na saramay mabilay ni legan na kiwawala nen Kristo. Kabaliksan na saya a ginmapo lay unonan kikioli diad banda’d gapo na kiwawala nen Kristo, tan nantultuloy itan “legan na kiwawala to.” (1 Corinto 15:23, NW) Say unonan kikioli so agnagawa a maminpinsan, noagta nagawa ed loob na sakey a peryodo na panaon.

“Naikdan Ira na Kawes ya Amputi”

14. (a) Kapigan asumpal iray pasingawey a nisulat diad Apocalipsis kapitulo 6? (b) Anto so nilitrato diad Apocalipsis 6:9?

¹⁴ Konsideraen met so ebidensya a nabasa ed Apocalipsis kapitulo 6. Nabasa ditan so nipaakar ed si Jesus ya akakabayo bilang mananalon Ari. (Apocalipsis 6:2) Akibiang iray nasyon ed malaklaknab a pambabakal. (Apocalipsis 6:4) Wala so eras ed nanduruman pasen. (Apocalipsis 6:5, 6) Say katooan so anagmak na makapatey iran salot. (Apocalipsis 6:8) Amin na sarayan nipropesiyan ebento so malinew a mitunosan ed  saray kipapasen na mundo manlapu la’d 1914. Balet wala ni so nagagawa. Nipaarap so imano tayo ed sakey ya altar a panagbagatan. Walad leksab na satan ya altar ‘iray kamarerwa na saray inaatey lapu ed salita na Dios, tan lapu ed impantasi ra.’ (Apocalipsis 6:9) Lapud “say bilay na laman wala ed dala,” say peteg ya irerepresenta na samay walad leksab na altar et say dala na saray matoor a lingkor nen Jesus a pinatey lapud makpel tan maseseg a panagpulong da.​—Levitico 17:11.

15, 16. Ipaliwawa no akin a tinukoy na saray salita ed Apocalipsis 6:10, 11 so unonan kikioli.

¹⁵ Singa say dala na matunong ya Abel, say dala na sarayan Kristianon martir so onkekerew na hustisya. (Genesis 4:10) ‘Ontawag ira ed baleg a boses, a kuan da, Angga ed kapigan, O Katawan, masanto tan matua, so agmo pangukom tan pangibales na dala mi ed saray manaayam ed dalin?’ Anto so tinmumbok ya agawa? “Naikdan ira na kawes ya amputi; tan nibaga ed sikara, a manpainawa nira ed sakey a daiset a panaon, angga ed pakasapot na saray kapara ra met ya aripen tan agagi ra, a napatey met ira a singa sikara.”​—Apocalipsis 6:10, 11.

¹⁶ Kasin niiter irayan amputin kawes ed saray inmagus a dala diad leksab na altar? Siempre, andi! Saray kawes so niiter ed saray indibidual a nipaagus so dala ra diad altar, a singa panangibaga. Insakripisyo ra so bilay da lapud ngaran nen Jesus tan apaoli la ra natan bilang espiritu. Panon tayon naseguro itan? Oniay nabasa tayo ed akadkaunan parte na libroy Apocalipsis: “Say manalo nakawesan naani na kawekawes ya amputi; tan agko punasen naani so ngaran to ed libro na bilay.” Tandaan met a say 24 a mamatatken et ‘akawesan ira na kawekawes ya amputi, tan dia ed ulo ra et walaray balanget da a balitok.’ (Apocalipsis 3:5; 4:4) Kanian sanen say dalin so atabek lay bakal, eras, tan salot, saray membro na 144,000 ya inatey, ya inrepresenta na dala ed leksab na altar, so apaoli la ed bilay diad tawen tan akawesan na masimboliko iran amputin kawes.

17. Diad anton pantalos a ‘manpainawa’ iramay makaawat na amputi iran kawes?

¹⁷ Nepeg nin “manpainawa” iramay agano nin inmoli. Maanos dan alagaren so agew na panangibales na Dios. Kaukolan nin paneknekan na ‘kapara ran ariripen,’ saray alanaan a Kristiano a wadia ni’d dalin, so katooran da diad subok. Sano onsabi lay panaon na panangukom na Dios, nasumpal so ‘pampapainawa’ ra. (Apocalipsis 7:3) Diad satan a panaon, saramay apaoli so miiba ed si Katawan a Jesu-Kristo diad paneral ed saray mauges, pati ed saramay amaagus ed dala na saray Kristianon andiay-kasalanan.​—2 Tesalonica 1:7-10.

 No Anto so Kabaliksan na Saya Parad Sikatayo

18, 19. (a) Antoray rason no akin a nibaga yon nagagawa la natan so unonan kikioli? (b) Anto so liknaan yo ed atalosan yon punto nipaakar ed unonan kikioli?

¹⁸ Ag-ipaparungtal na Salitay Dios so eksakton petsa na unonan kikioli, balet ipaparungtal na satan a nagawa itan ed loob na sakey a panat na panaon, salanti, legan na kiwawala nen Kristo. Saray unona nin napaoli et saramay alanaan a Kristiano ya inatey sakbay a ginmapo so kiwawala nen Kristo. Insan, kaleganan na kiwawala nen Kristo, saray alanaan a Kristiano a matoor a makasumpal ed mangaraldalin a bilay da so manguman “dia ed sankakirem” tan magmaliw iran makapanyarin espiritun pinalsa. (1 Corinto 15:52) Sakbay a nagawa so bakal ya Armagedon, kasin wala la’d tawen so amin ya alanaan? Agtayo amta. Balet, segurado itayon diad panaon ya inggeter na Dios et wala la’d mangatatawen a Palandey Sion so amin a kabiangan na 144,000.

¹⁹ Amta tayo met a karaklan la’d saray membro na 144,000 so kaiba la natan nen Kristo diad tawen. Dagdaiset lay nakdaan diad dalin. Kanian mabisbiskeg iyan ebidensya a talagan asingsingger la so pangukom na Dios! Magano lan naderal so interon sistema na mundo nen Satanas. Si Satanas so ibasileng ed kaaralman. Insan la onggapo so malaknab a kioli na totoo diad dalin, tan base ed dondon bagat nen Jesus et saray matoor so napaoli la’d inkayadyari, a mipadpara ed samay kipapasen ya abalang nen Adan. Agaylan abig so pakakasumpal na propesiya nen Jehova ed Genesis 3:15. Alay abig a pribilehyo a sikatayoy mabilay ni diad sarayan panaon!

[Saray paimano ed leksab]

Nayarian Yo Kasin Ipaliwawa?

Panon itayon natulongan na onggendan iran teksto na Biblia pian nadetermina tayo so panaon a kagawa na ‘unonan kioli’?

• Apocalipsis 12:7; 17:14

• Apocalipsis 7:13, 14

• 1 Corinto 15:23; 1 Tesalonica 4:15-17

• Apocalipsis 6:2, 9-11

[Tepetepet Parad Panagaral]

[Saray litrato ed pahina 26]

Anto niran klase na kikioli so nagawa sakbay a napaoli ed dalin iray inaatey a katooan?

[Litrato ed pahina 29]

Diad anton paraan a naikdan na amputi iran kawes iray naugip ed patey?