Natalonaan Mo Iray Singa-Bagyon Kairapan

DIAD sarayan mapeligron panaon, susungdoan na dakel iray singa-bagyon kairapan. Ingen, makapansusungdo iray tuan Kristiano lapud panangaro ra ed Dios tan pangiyaaplika ra ed saray prinsipyo to. Panon? Bueno, naromog so ebat dia ed samay ilustrasyon ya imbaga nen Jesu-Kristo. Inkompara to iray matulok a babangatan to ed sakey “a toon makalakal, ya impaalagey toy abung to ed tapew na baton-dampay.” Insan inkuan to: “Pinmelag so uran, tan sinmabi danas, tan sinmibok so saray dagem, tan binmasig ira ed saman ya abung; et agnagba; lapud nipaletneg ed tapew na baton-dampay.”​—Mateo 7:23-26.

Imanoen ya anggaman makalakal imay too diad ilustrasyon, sikato nin siansia so makakasagmak na kairapan ya irerepresenta na uran, saray delap, tan makaderal a dagedagem. Sirin, aglabay ya ibaga nen Jesus a napaliisan na saray babangatan to so amin a kairapan tan lawas manbilay a maligen tan mareen. (Salmo 34:19; Santiago 4:13-15) Balet impabitar to a saray matoor a lingkor na Dios so makapamparaan tan makatalona ed grabe iran kairapan tan krisis.

Ginapoan nen Jesus so ilustrasyon to diad impangibagan: “Ganagana sirin a makadngel na saraya a salitak, et sumpalen to ra, sikato so niulibay ed sakey a toon makalakal, ya impaalagey toy abung to ed tapew na baton-dampay.” Siempre, agtutukoyen nen Jesus so nipaakar ed literal a panagpaalagey na kaabungan, noagta say panagpaalagey na Makristianon kabibilay. Saramay mangiimano ed salita nen Kristo so manguusar na pakatebek tan dugan panagkatunongan. Ileletneg da iray motibo tan gawa ra ed singa baton-dampay iran bangat nen Kristo diad pangiyaaplika ra ed saray nibabangat ed sikara. Makapasurprisa ta sayan piguratibon baton-dampay et agnaromog ed akintapew. Samay too diad ilustrasyon so kaukolan a mankotkot anggad nasabi to so ‘aralem.’ (Lucas 6:48) Mipadpara, saray babangatan nen Jesus so impasyan mansasagpot pian nabayuboan iray magnayon a kalidad a mamaapit ed sikara ed Dios.​—Mateo 5:5-7; 6:33.

Anto so nagawa sano saray singa-bagyon kairapan so manubok ed inkapekder na pananisia na saray patumbok nen Jesus? Say mabulos a katutulok da ed bangabangat nen Kristo tan saray kalidad da bilang Kristiano so mamapabiskeg ed sikara legan na saratan a kairapan tan nagkalautla diad sayan panaon a ngalngali lan onterak so Armagedon. (Mateo 5:10-12; Apocalipsis 16:15,16) On, lapud panutumbok da ed bangabangat nen Kristo, dakel so makakatalona ed singa-bagyo a subsubok. Nagawaan mo met itan!​—1 Pedro 2:21-23.