Nepeg a ‘Mansayaksak Kayo ed Amin’

“Ngilinan [yo]so sakey a piesta nen Jehova . . . et masayaksak kayo naani ed amin.”​—DEUTERONOMIO 16:15.

1. (a) Antoran isyu so pinalesa nen Satanas? (b) Anto so impasakbay nen Jehova kayari na impanrebelde nen Adan tan Eva?

 SANEN alagyat nen Satanas si Adan tan Eva a manrebelde ed Manamalsa ra, pinalesa to so duaran importantin isyu. Unona, kinuestion to so inkamatua nen Jehova tan say maptek a paraan na pananguley to. Komadua, impasagilig nen Satanas a saray totoo so manlingkor labat ed Dios lapud sinisiblet iran rason. Malinew a nipabitar so komaduan isyu diad panaon nen Job. (Genesis 3:1-6; Job 1:9, 10; 2:4, 5) Anggaman kuan, kinmiwas a tampol si Jehova pian resolbien iyan isyu. Anggaman wadman ni ed hardin na Eden si Adan tan si Eva, impasakbay la nen Jehova no panon Ton resolbien irayan isyu. Impasakbay to so isabi na sakey ya “ilalak” odino bini, a kayarin nasugat so mukor to et mekmeken to so ulo nen Satanas.​—Genesis 3:15.

2. Anton malinew a pakatalos so inter nen Jehova nipaakar ed kasumpalan na propesiya a nisulat ed Genesis 3:15?

² Diad inlabas na panaon, si Jehova so angitarya na malinew a pakatalos nipaakar ed satan a propesiya, a mangipapabitar ed inkasegurado na pakasumpal na satan. Alimbawa, imbaga na Dios ed si Abraham ya ompaway ed kapolian to so bini. (Genesis 22:15-18) Si Jacob, ya apo-ed-pueg nen Abraham, so nagmaliw ya ama na 12 tribu na Israel. Nen 1513 B.C.E., sanen nagmaliw a nasyon iyan 12 tribu, inter ed sikara nen Jehova so sakey a sistema na saray ganggan ya angilaktip ed saray tinaon a piesta. Imbaga nen apostol Pablo a saratan a piesta et “sakey ya anino na saray bengatla ya onsabi.” (Colosas 2:16, 17; Hebreos 10:1) Ipapabitar na sarayan piesta so pagpauna na kasumpalan na gagala nen Jehova parad Bini. Malikeliket so Israel sanen sinelebraan da irayan piesta. Sirin, ombiskeg so pananisia tayo ed inkanapanmatalkan na saray sipan nen Jehova no konsideraen tayon antikey irayan piesta.

Pinmatnag so Bini

3. Siopa so insipan a Bini, tan panon ya asugat so mukor to?

³ Masulok a 4,000 taon so linmabas kayari na inmunan propesiya nen Jehova, pinmatnag so insipan a Bini. Sayan bini et si Jesus. (Galacia 3:16) Bilang ayadyarin too, si Jesus so nanmatoor anggad impatey to kanian apaneknekan a palso iray akusasyon nen Satanas. Niarum ni, lapud andiay-kasalanan si Jesus, say impatey to et sakey a mabmablin bagat. Diad panamegley na satan, intarya nen Jesus so kilalaban manlapud kasalanan tan ipapatey parad saray matoor a poli nen Adan tan Eva. Say tutukoyen na ‘impanugat ed mukor’ na insipan a Bini et say impatey nen Jesus diad panamairapan a kiew.​—Hebreos 9:11-14.

4. Panon a nilitrato so bagat nen Jesus?

⁴ Inatey si Jesus nen Nisan 14, 33 C.E. * Diad Israel, say Nisan 14 et makapaliket ya agew na selebrasyon na Paskua. Diad kada taon ed satan a petsa, pandurungoan na saray pamilya so sakey a kordero ya andian na depekto. Diad onian paraan, nanonotan da so kakanaan na dala na sakey a kordero diad inkiliktar na saray panguloan ya anak na saray Israelita sanen pinatey na anghel iray panguloan ya anak na saray Ehipsio nen Nisan 14, 1513 B.C.E. (Exodo 12:1-14) Say inlitrato na kordero ed Paskua et si Jesus, ya oniay insulat nen apostol Pablo nipaakar ed sikato: ‘Say paskua  tayo et nibagat met, salanti si Kristo.’ (1 Corinto 5:7) Singa met say dala na kordero ed Paskua, say nipaagus a dala nen Jesus so angitarya na kilalaban parad dakel a totoo.​—Juan 3:16, 36.

Say Inmunan Bunga na Saray Naugip ed Patey

5, 6. (a) Kapigan so inkioli nen Jesus, tan panon itan a nilitrato ed Ganggan? (b) Panon a nagmaliw a posible so kasumpalan na Genesis 3:15 lapud inkioli nen Jesus?

⁵ Diad komatlon agew, si Jesus so apaoli ed bilay ta pian ipresenta to so balor na bagat to ed Ama to. (Hebreos 9:24) Say inkioli to so inlitrato na sananey nin piesta. Diad agew kayari na Nisan 14 et ginapoan so Piesta na Andi-lebaduran Tinapay. Diad tinmumbok ya agew, Nisan 16, saray Israelita so angawit na sakey a bedber na saray inmunan bunga na inanin sebada, say sankaunaan ya inani ed Israel, pian ipaayag na saserdote diad arap nen Jehova. (Levitico 23:6-14) Agaylan matukoy ta diad satan a mismon agew na taon 33 C.E. et pinaer nen Jehova iray mauges a getma nen Satanas a pateyen so ‘matoor tan matuan tasi’ To! Nen Nisan 16, 33 C.E., pinaoli nen Jehova si Jesus manlapud inaatey tan awalaan na imortal a bilay bilang espiritu.​—Apocalipsis 3:14; 1 Pedro 3:18.

⁶ Si Jesus so nagmaliw ya “inmunan bunga na saray naugip [ed patey].” (1 Corinto 15:20) Aliwan singa saramay inmunan apaoli sakbay to, si Jesus so agla inatey lamet. Imbes, sikato so tinmokotok ed tawen diad nikawanan a lima nen Jehova, a ditan to inalagar so kitrono to bilang Ari diad mangatatawen a Panarian nen Jehova. (Salmo 110:1; Gawa 2:32, 33; Hebreos 10:12, 13) Manlapu la’d inkitrono to bilang Ari, nayarian la nen Jesus a permanentin mekmeken so ulo na manunan kabusol, si Satanas, tan deralen iray bini to.​—Apocalipsis 11:15, 18; 20:1-3, 10.

Arum Niran Kabiangan na Bini nen Abraham

7. Anto so Piesta na Simsimba?

⁷ Si Jesus so Bini a nisipan ed Eden tan diad panamegley to et ‘deralen nen Jehova iray gawa na Diablo.’ (1 Juan 3:8) Balet, sanen akitongtong si Jehova ed si Abraham, impabitar To a say bini nen Abraham et aliwan saksakey a too. Magmaliw itan a singa “saray bitewen ed katawenan, tan singa saray buer a wala ed gilig na dayat.” (Genesis 22:17) Say kipatnag na arum niran kabiangan na bini so nilitrato diad sananey nin maliket a piesta. Limamplon agew kayari na Nisan 16, sinelebraan na Israel so Piesta na Simsimba. Oniay nidatak ed Ganggan nipaakar ed saya: “Angga met lanlamang ed ontumbok a kabuasan na komapito ya agew a sabaton, mamilang kayo ed satan na limamplo ya agew; insan kayo mangyapay na balo a kanen a yaapay ed kinen Jehova. Mangipaway kayo naani ed saray panag-ayaman yo na duaran tinapay ya ipaayag a duaran kakaplo na sakey ya efa: nepeg da so pino ya arina, nepeg da so iyurno a nilebaduraan, ya onkana ya unaan ira a bungabunga a yapay ed kinen Jehova.” *​—Levitico 23:16, 17, 20.

8. Anton nikadkaduman ebento so agawa nen Pentecostes 33 C.E.?

⁸ Sanen wadiad dalin si Jesus, say Piesta na Simsimba et kabkabat bilang Pentecostes (a nanlapud  Griegon salita a mankabaliksay “koma-limamplo.”) Nen Pentecostes 33 C.E., say babaleg ya Atagey a Saserdote, say apaolin Jesu-Kristo, so angiyibung na masanton espiritu ed melag a grupo na 120 a babangatan a nandaragup ed Jerusalem. Saraya sirin a babangatan so nagmaliw ya alanaan ya ananak na Dios tan agagi nen Jesu-Kristo. (Roma 8:15-17) Sikara so nagmaliw a balon nasyon, say “Israel na Dios.” (Galacia 6:16) Manlapud daiset a bilang, satan a nasyon so magmaliw a 144,000 diad kaunoran.​—Apocalipsis 7:1-4.

9, 10. Panon a nilitrato diad Pentecostes so kongregasyon na saray alanaan a Kristiano?

⁹ Say kongregasyon na saray alanaan a Kristiano so inlitrato na duaran alebaduraan a tinapay ya impaayag ed arap nen Jehova diad panaon na Pentecostes. Say impanlebadura ed saray tinapay so angipabitar a saray alanaan a Kristiano so walaan nin siansia na atawir a kasalanan, a singa alebaduraan. Anggaman kuan, makaasingger ira ed si Jehova base ed dondon bagat nen Jesus. (Roma 5:1, 2) Akin a duaran tinapay? Satan so angipabitar ed katuaan a saray alanaan ya ananak na Dios et manlapu ed duaran grupo​—unona et manlapud saray nisipor a Judio tan komadua et manlapud saray Gentil.​—Galacia 3:26-29; Efeso 2:13-18.

¹⁰ Say duaran tinapay ya inyapay ed panaon na Pentecostes so ginawa manlapud sankaunaan iran bunga na inanin sebada. Matukoy ya ililitrato na satan iramay Kristiano a nailalak ed espiritu a tinawag ya “unona a bunga na pinalsa to.” (Santiago 1:18) Sikara so inmuna ya aperdona ed saray kasalanan da base ed nipaagus a dala nen Jesus, tan lapud satan et nagamoran da la so imortal a bilay diad tawen, a miuley ira ed si Jesus diad Panarian to. (1 Corinto 15:53; Filipos 3:20, 21; Apocalipsis 20:6) Diad ontan a kipapasen da, sikara so maganggano lan ‘manuley ed saray nasyon, ya akasetro ira na balatyang’ tan seguroen da a ‘nimedmer si Satanas ed leksab na saray sali ra.’ (Apocalipsis 2:26, 27; Roma 16:20) Oniay imbaga nen apostol Juan: ‘Sikara so manutumbok ed Kordero ed anggan iner a laen to. Sikara so asaliw dia ed saray totoo, a pinagka-unonan bungabunga ed Dios tan Kordero.’​—Apocalipsis 14:4.

Sakey ya Agew a Mangipupurek ed Kililiktar

11, 12. (a) Anto so nagagawa nensaman ed Agew na Pananakbong? (b) Antoran gunggona so agamoran na Israel ed pangibabagat da na baka tan saray kanding?

¹¹ Diad komasamplon agew na Etanim (a tinawag  ed saginonor bilang Tisri), * sinelebraan na Israel so sakey a piesta ya angilitrato ed no panon a nitarya iray gunggona na dondon bagat nen Jesus. Diad satan ya agew et nandaragup so interon nasyon diad Agew na Pananakbong pian iyapay iray bagat parad sikara ta pian nasakbongan iray kasalanan da.​—Levitico 16:29, 30.

¹² Diad Agew na Pananakbong, partien na atagey a saserdote so kilaw a baka, tan maminpito ton iwalsik ed Sankasantosan a pasen so arum ed dala na satan diad arap na sakbong na Kaban, a mangirerepresenta ed kiyapay na satan a dala diad arap nen Jehova. Satan ya apay et parad saray kasalanan na atagey a saserdote tan ‘sankaabungan’ to, salanti, saray katambayan ton saserdote tan Levitas. Insan, say atagey a saserdote so mangala na duaran kanding. Partien to so sakey a kanding bilang apay parad kasalanan na ‘saray totoo.’ Arum ed dala na satan so ipatedter met ed arap na sakbong na Kaban diad Sankasantosan a pasen. Kayari na satan, itapew na atagey a saserdote so lima to diad ulo na komaduan kanding tan ipatua to iray kasalanan na ananak na Israel. Insan, tengtengen to so kanding tan ibalang to diad kalawakan a simbolikon mangawit ed saray kasalanan na nasyon.​—Levitico 16:3-16, 21, 22.

13. Panon ya inlitrato na saray ebento ed Agew na Pananakbong so betang nen Jesus?

¹³ Singa ed ililitrato na sarayan agamil, usaren na baleg ya Atagey a Saserdote, si Jesus, so balor na dilin dala to pian naperdona iray kasalanan. Unona, say balor na dala to so ikana parad ‘espiritual ya abung’ na 144,000 ya alanaan a Kristiano, ta pian sikaray nipasen a matunong tan nawalaan na malinis a talindeg ed arapan nen Jehova. (1 Pedro 2:5; 1 Corinto 6:11) Saya so inlitrato na impangibagat ed baka. Kanian angiter itan na pankanawnawa pian naawat da la so mangatatawen a tawir da. Komadua, say balor na dala nen Jesus so onaplika ed minilyon nin mangaagamil na pananisia ed si Kristo, unong a nipabitar ed impangibagat ed kanding. Sikara so napalaboan na andi-anggaan a bilay diad dalin, say tawir ya abalang di Adan tan Eva. (Salmo 37:10, 11) Base ed nipaagus a dala nen Jesus, intarok to iray kasalanan na katooan, a singa diad masimbolikon paraan ya impangitarok na mabilay a kanding ed saray kasalanan na Israel diad kalawakan.​—Isaias 53:4, 5.

Manliket Kayo ed Arap nen Jehova

14, 15. Anto so nagagawa nensaman ed Piesta na Kobongkobong, tan anto so impanonot na satan ed saray Israelita?

¹⁴ Kayari na Agew na Pananakbong, sinelebraan na saray Israelita so Piesta na Kobongkobong,  say sankaliketan a piesta ed taon na saray Judio. (Levitico 23:34-43) Nagagawa itan a piesta manlapud koma-15 anggad koma-21 ya agew ed bulan ya Etanim tan mansampot itan ed sagradon pandaragup ed koma-22 ya agew na satan a bulan. Diad satan et manampot la so panag-ani tan panaon itan na pisasalamat ed mapalabon pangipapatnag nen Jehova na kamaongan. Lapud satan, oniay ingganggan nen Jehova ed saray nanselebra: “Si Jehova a Dios mo bendisyonan to ka naani ed saray amin ya anien mo, tan amin a pansagpotan na saray limam, et masayaksak ka naani ed amin.” (Deuteronomio 16:15) Agaylan liket itan a panaon!

¹⁵ Legan na satan a piesta, saray Israelita so pitoy agew a manayam ed saray kobongkobong. Satan so mangipanonot ed sikara a nanayam ira nensaman diad saray kobongkobong ed kalawakan. Sayan piesta so angiter ed sikara na magenap a panaon pian manmorekdek ed singa-ama a panangasikaso nen Jehova. (Deuteronomio 8:15, 16) Tan lapud parparehon kobongkobong so nanayaman na mayaman tan mairap-bilay, nipanonot ed saray Israelita a legan na sayan piesta et parepareho iran amin.​—Nehemias 8:14-16.

16. Anto so inlitrato na Piesta na Kobongkobong?

¹⁶ Say Piesta na Kobongkobong et sakey a piesta na panag-ani, sakey a maliket a selebrasyon a panagtipon, tan inlitrato na satan so maliket a panagtipon ed saramay mangaagamil na pananisia ed si Jesu-Kristo. Say panagtipon so ginmapo nen Pentecostes 33 C.E., sanen say 120 a babangatan nen Jesus so alanaan pian magmaliw a kabiangan na ‘masanton inkasaserdote.’ Singa ed impanayam na saray Israelita ed kobongkobong ed loob na pigaran agew, amta na saray alanaan a singa labat ira ‘sankaili’ ed sayan agmaridios a mundo. Say ilalo ra et mangatatawen. (1 Pedro 2:5, 11) Wala la’d kapantokan iyan panagtipon ed saray alanaan a Kristiano diad sarayan “kaunoran ya agew,” sano natipon lan amin so kaunoran iran membro na 144,000.​—2 Timoteo 3:1.

17, 18. (a) Anto so mangipabitar a wala niray arum a nagunggonaan ed bagat nen Jesus nilikud ed saray alanaan a Kristiano? (b) Siopa natan so nagugunggonaan ed iyaanino na “Piesta na Kobongkobong,” tan kapigan so kapantokan na sayan maliket a piesta?

¹⁷ Makatantanda ed sayan piesta nensaman so  impangiyapay na 70 a baka. (Numeros 29:12-34) Say numeron 70 (7 x 10) so nirepresenta ed Biblia bilang mangatatawen tan mangaraldalin ya inkanaspot. Kanian, say bagat nen Jesus so mangunggona ed saray matoor a manlapud amin a 70 a pamilya na katooan a nanlapud si Noe. (Genesis 10:1-29) Mitunosan ed satan, ninmatnat ed panaon tayo so panagtipon pian magmaliw a kabiangan iray indibidual a nanlapud amin a nasyon a mangaagamil na pananisia ed si Jesus tan nawalaan na ilalon manbilay diad paraison dalin.

¹⁸ Anengneng nen apostol Juan ed pasingawey iyan panagtipon ed modernon panaon tayo. Unona, nadngel to so impangiyanunsio ed panagtatak ed unor iran kabiangan na 144,000. Insan, anengneng to so “sakey a baleg ya ulop, a sikato so agnayari a bilangen na too,” ya akaalagey ed arapan nen Jehova tan si Jesus, ya akabemben na “palmas ed saray kalimaan da.” Sikara so “nanlapu ed baleg ya irap” insan amaarap ira ed balon mundo. Sikara so singa met sankaili ed sayan daan a sistema na bengabengatla, tan maniilalo ira tekep na panagmatalek diad panaon sano “say Kordero . . . sikatoy pastol da, tan sikara so irawa’to ed saray subol na danudanum na bilay.” Diad satan a panaon, “say Dios punasen to so balang lua ed saray kamataan da.” (Apocalipsis 7:1-10, 14-17) Mamantok la so iyaanino na “Piesta na Kobongkobong” kayari na Sanlibon Taon ya Uley nen Kristo sano say baleg ya ulop pati saray matoor ya apaoli so apagamoran lay andi-anggaan a bilay.​—Apocalipsis 20:5.

19. Panon itayon nagunggonaan ed saray akonsidera tayon piesta a sinelebraan ed Israel?

¹⁹ Nayarian tayo met so ‘makapansayaksak ed amin’ no dalepdepen tayo so kabaliksan na saray piesta na Judio nensaman. Makapaliket ya ikonsidera iray pagpauna ya intarya nen Jehova nipaakar ed pakasumpal na samay impropesiya to ed Eden, tan makapalikliket a nanengneng so aktual tan kalkalnan pakakasumpal na satan a propesiya. Natan, amta tayo a pinmatnag la so Bini tan sikato so asugatan ed mukor. Natan et sikato lay manaari ed tawen. Niarum ni, karaklan ed 144,000 so amaneknek la ed katooran da anggad patey. Anto ni so nagawa? Panon lan kaasingger so sigpot a pakasumpal na sayan propesiya? Singbaten iya diad ontumbok ya artikulo.

[Saray paimano ed leksab]

Kasin Nipaliwawa Yo?

• Anto so inlitrato na kordero ed panaon na Paskua?

• Anton panagtipon so inlitrato na Piesta na Pentecostes?

• Antoran seremonya ed Agew na Pananakbong so angipabitar ed kiyaplikaan na dondon bagat nen Jesus?

• Diad anton paraan ya inlitrato na Piesta na Kobongkobong so panagtipon ed saray Kristiano?

[Tepetepet Parad Panagaral]

[Tsart ed pahina 22, 23]

(Parad aktual a format, nengnengen so publikasyon)

Ebento: Inlitrato:

Paskua Nisan 14 Papartien so kordero Nibagat

a parad Paskua si Jesus

Piesta na Nisan 15 Sabaton Niyapay so sebada

Andi-lebaduran Nisan 16 Apaoli si Jesus Tinapay

(Nisan 15-21)

↑

50 ya agew

↓

Piesta na Simsimba Sivan 6 Niyapay so duaran tinapay (Pentecostes) Impresenta nen Jesus ed si Jehova

iray alanaan ya agagi to

Agew na Pananakbong Tisri 10 Niyapay so sakey a baka tan duaran kanding

Inyapay nen Jesus so balor na dala to parad amin a katooan

Piesta na Kobongkobong Tisri 15-21 Saray Israelita so

(Panagtipon, Saray Tabernakulo) maliket a nanayam

diad kobongkobong,

tan nanliket ira ed

panag-ani, tan angiyapay

ira na 70 a baka

Panagtipon ed saray alanaan tan “baleg ya ulop”

[Saray litrato ed pahina 21]

Singa samay dala na kordero ed Paskua, say nipaagus a dala nen Jesus so onkana parad kisalba na dakel a totoo

[Saray litrato ed pahina 22]

Say inmuna iran bunga ed panag-ani na sebada ya inyapay nen Nisan 16 so angilitrato ed inkioli nen Jesus

[Saray litrato ed pahina 23]

Say duaran tinapay ya inyapay ed panaon na Pentecostes so angilitrato ed kongregasyon na saray alanaan a Kristiano

[Saray litrato ed pahina 24]

Say Piesta na Kobongkobong so angilitrato ed maliket a panagtipon ed saray alanaan tan say “sakey a baleg ya ulop” a manlalapud amin a nasyon