No Panon Kan Magmaliw a Matalona
No Panon Kan Magmaliw a Matalona
NO PANON ya aasikoen na atateng so ananak da tan labay da iran ontalona, ontan met so mangatatawen ya Ama tayo ya aasikasoen to itayo tan labay ton ontalona itayo. Pian nipalikna so maaron panangasikaso to, intaryaan to itayo na daakan ya impormasyon nipaakar ed itatalona tan isasaew. Diad tua, sanen tutukoyen na Biblia so toon ontatalineng ed ibabaga na Dios, matalek ya imbalikas na satan: ‘Onaligwas iray amin a gawaen to.’—Salmo 1:3, Maung a Balita.
No ontan, akin balet ya aliwan maaligwas, maliket, tan makapenek so bilay na dakel a totoo? Naebatan iya diad pangusisa ed satan a salmo tan naamtaan tayo no panon itayon magmaliw met a maaligwas odino matalona.
‘Simbawa na Saray Mauges’
Say salmista so mamapasakbay a mapeligro so panumbok ed ‘simbawa na saray mauges.’ (Salmo 1:1, MB) Say manunan “mauges” et si Satanas a Diablo. (Mateo 6:13, MB) Ibabaga ed sikatayo na Kasulatan a sikato so “manuley ed sayan mundo” tan say sankamundoan so “walad silong na pakauley na samay mauges.” (Juan 16:11; 1 Juan 5:19, MB) Sirin, agla pankelawan a maslak ed saray simbawan naaawat na katooan so mangipapatnag ed kanonotan na samay mauges.
Anto ta a klase na simbawa so iyoopresi na saray mauges? Diad inkalapagan, samay mauges so manmumudmora ed Dios. (Salmo 10:13) Anggan iner et naromog so simbawa ra a mangibabaliwala odino agmanrerespeto ed Dios. Say modernon sosyedad so mangiyaalibansa ed “saray mauges a pilalek na too, saray labalabay a nengnengen tan alaen na too, tan amin a bengatla diad mundo ya ipapasirayew na totoo.” (1 Juan 2:16, MB) Andi-tundan ipaparungtal na media so materyalistikon pilosopiya, salanti, “gamoran so amin a nasarag mo ed bilay.” Diad sankamundoan, masulok a 500 bilyon a dolyar (U.S.) so gagastosen ed tinaon na saray kompanya diad panagpatalastas pian ayaten so totoon manaliw na saray produkto ra—kaukolan da man iratan odino andi. Aglabat inuman na sayan propaganda so ugali na totoo ed panagsaliw, noagta pinikewet met na satan so panmoria na katooan nipaakar ed iyaaligwas.
Bilang resulta, anggaman agamoran la na karaklan iray bengatlan kukugkugipen da labat diad apalabas iran taon, siansian labay da ni so nawalaan na dakel a kayarian. Parad sikara, agka magmaliw a maliket odino matalona anggad agmo ni agamoran irayan bengatla. Lingo iyan kanonotan tan “aliwa a kien na Ama noag kien na mundo.”—1 Juan 2:16.
Amta na Manamalsa tayo no anton talagay manggawa ed sikatayon matalona. Say simbawa to so midumaan ed ‘simbawa na saray mauges.’ Sirin, no sasalien tayon gamoray pabor na Dios insan tayo balet mankukurang ed dalan na mundo parad itatalona, singa tayo sasalien ya akaren a bansag so nandumaan a dalan. Imposible itan. Agpankelawan sirin ya oniay impasakbay na Biblia: “Agyo aaligey panagbilay na sankamundoan”!—Roma 12:2, MB.
Agka Paiimpluensyaan ed Mundo
Sasalien na mundon walad panangimpluensya nen Satanas ya ompatnag ya interesado ed pankaabigan tayo. Balet, kaukolan itayon manalwar. Tandaan a lapud sinisiblet iran interes nen Satanas et pinalikdo to so inmunan bii, si Eva. Insan to inusar a mangimpluensya ed si Adan pian mankasalanan. Natan et uusaren met nen Satanas so totoo pian nipasabi so mauges a propaganda to.
Alimbawa, si David ya abitla ed inmunan artikulo, so kinaukolan a man-overtime ed trabaho tan mabetbet a manbiahe parad kompanya. “Mangabkabuasan ak ya onsipot na Lunes insan say isempet ko la et diad Huebes na labi,” so inkuan nen David. Lapud natatalosan na kakaaro to, kapamilyaan to, tan katrabahoan to a kaukolan toy mansakripisyo pian onaligwas ed sayan mundo, pinabiskeg day liknaan to, ya inkuan da: “Gawam itan ta pankaabigay pamilyam.” Inrason da a sikatoy mananos na pigaran taon labat ed ontan ya eskedyul ya anggad maligen lay kipapasen to. Oniay inkuan nen David: “Inkatunongan da a mas pankaabigan iya na pamilyak lapud mas dakel so nisempet kon kuarta, a diad ontan et nibagan mas matalona ak. Anggaman agko nakakaamong so pamilyak, kinombinse ak na kakaarok a diad tua et baleg so niiiter ko ed pamilyak.” Singa si David, dakel so mantratrabaho ya impasya pian niiter so antokaman ya isisipen dan nakaukolan na pamilya ra. Balet peteg kasin ontalona ka no tumboken mo iyan simbawa? Anton talaga so nakaukolan na sakey a pamilya?
Amoria itan nen David sanen akaarawi’d pamilya to lapud trabaho. “Katongtong ko ed telepono so ugaw nin anak mi a si Angelica, sanen inkuanton: ‘Daddy, akin et lanang ya anggapo kayo’d abung?’ Agak akasel tan naermenan ak,” kuan nen David. Sikatoy lalon adagdag ya onekal ed trabaho to lapu ed imbaga na anak to. Denesidin siansia nen David ya iter ed pamilya to no anton talaga so nakaukolan da, salanti, sikaton mismo.
Ontalona Ka no Iyaplikam so Simbawa na Dios
Panon mon naresistian so negatibon propaganda a kasmak ed sayan mundo? Imbaga ed sikatayo na salmista a say matalona tan maliket a too et samay “say gayaga to wala ed ganggan nen Jehova, tan diad ganggan to mandalepdep ed agew tan labi.”—Salmo 1:2.
Sanen tinuro na Dios si Josue bilang lider na bansan Israel, sikato so binilin ya ‘umamengen to ed agew tan labi’ so Salitay Dios. On, makana so pambasa tan pandalepdep ed Salita na Dios, balet kaukolan met nen Josue ya “imatonan a gawaen so unong na amin a nisulat.” Siempre, agka automatikon ontalona lapu labat ed pambabasam na Biblia. Kaukolan mon iyaplika so nababasam. Oniay imbaga ed si Josue: “Dia ed ontan nagawam so dalan mo a maaligwas tan maong so kasumpalan mo.”—Josue 1:8.
Ilitratom pa’d isip mo so ugaw a manim-imis ya akaakwal ed maaron ateng to legan dan babasaen so paboriton istorya. Anggan aminpiga da lan abasa itan, pabpablien da iratan a makapaliket a bekta. Mipadpara, say sakey a mangaaro ed Dios so manliket ed inagew-agew a panagbasa na Biblia, a satan so sankaabigan a panaon a nakaiba to so mangatatawen ya Ama to. Diad panumbok to ed simbawa tan panangiwanwan nen Jehova, sikato so “mipara ed sakey a kiew a nitanem ed abay na saray ag-agus na danum, a mamapaway na bunga to no panaon to, say bulong to met agnamaga, tan antokaman a gawaen to so ombuna [“onaligwas,” NW].”—Salmo 1:3.
Say kiew a tinukoy na salmista so aglabat nibanbanan tinmubo. Satan so maal-alwar ya intanem ed gilig na danum tan inasikaso na angitanem. Diad mipadparan paraan, uumanen tan ipepetek na mangatatawen ya Ama tayo so panag-isip tayo panamegley na simbawan naromog ed Kasulatan. Bilang resulta, sikatayo so ontatalona tan makapapawala na maridios iran bunga.
Ingen, aliwan ontan iray totoon mauges. Tua, walay panaon a nayarin ompatnag a maaligwas ira, balet mauges lanlamang so pansumpalan da. “Ag-ira onalagey naani ed panangukom.” Imbes, “say dalan na saray agmatunong [et] natawtaw.”—Salmo 1:4-6.
Kanian agka paiimpluensyaan ed mundo nipaakar ed saray kalat mo tan estandartem. Anggaman nayarin maabilidar ka tan walay potensyal mon onaligwas ed sayan mundo, manalwar ka no panon mon usaren odino pausar ed mundo iratan ya abilidad mo. Say maapan pangegemtan na sakey a too ed materyal a kaykayarian et mansumpal ed isaew to. Diad biek a dapag, say pakawalaay maabig a relasyon ed Dios so manresulta ed peteg ya itatalona tan liket.
No Panon Kan Magmaliw a Matalona
Akin ya ontalona so amin a gawaen na sakey a too sano tumboken to so simbawa na Dios? Agtutukoyen na salmista so itatalona ed sayan mundo. Say itatalona na sakey a maridios a too et misiglaotan ed panggawa to na linawa na Dios, on lapud say linawa na Dios so lawas matalona. Nengnengen tayo no panon kan magmaliw a matalona no iyaplikam iray prinsipyo na Biblia.
Pamilya: Sisimbawaen na Kasulatan iray kaasawaan a lalaki a ‘nepeg dan aroen so asawa ra a singa panangaro ra’d laman dan dili,’ tan niganggan met ed saray Kristianon asawan bibii a ‘nepeg dan galangen so asawa ra.’ (Efeso 5:28, 33, MB) Saray ateng so papasesegen a mangiganay panaon a nakaibay ananak da, a milureyan ed sikara, tan bangatan da ira nipaakar ed saray importantin bengatla ed bilay. (Deuteronomio 6:6,7; Eclesiastes 3:4) Sisimbawaen met na Salita na Dios so kaatengan: “Agyo ilagyat a pasanoken so saray anak yo.” Sano niyaplika iyan simbawa, mas mainomay ya ‘ontulok iray anak ed kaatengan da’ tan ‘igalang da so ama tan ina ra.’ (Efeso 6:1-4) Say panumbok ed sayan simbawa na Dios so manresulta ed matalonan bilay na pamilya.
Kakaaro: Maslak a totoo so malabay a nawalaan na kakaaro. Walaan itayo na mental tan emosyonal a kapasidad a mangaro tan naaro. Binilin nen Jesus iray patumbok to a nepeg a “manaaroan” ira. (Juan 13:34, 35) Diad limog da et makaromog itayo na kakaaro a sarag tayon aroen tan napanmatalkan, a napangibesngawan tayo ni ingen na amin a nonoten tan nalilikna tayo. (Uliran 18:24) Manuna ed amin, no iyaplika tayo iray prinsipyo na Biblia, sikatayoy napaapit ed Dios tan natawag ni ingen a “kaaro [nen Jehova],” a singa si Abraham.—Santiago 2:23; 4:8.
Gagala ed Bilay: Say bilay na saramay peteg a maaligwas odino matalona et walaan na kabaliksan tan gagala, aliwan singa saramay manbibilay ed inagew-agew ya andian na gagala. Ag-akadepende so bilay da ed saray agmaligen a kipapasen na sayan sistema na bengabengatla. Saray kalat da so mangitonton ed peteg tan magnayon ya inkapnek, lapud niyapasakey iratan ed tuan gagala na bilay. Panon sirin a nawalaan na gagala so bilay na sakey a too? Diad ‘itakot ed tuan Dios tan pangunor ed saray ganggan to; ta saya sikato so katiponan na kanepegan na too.’—Eclesiastes 12:13.
Ilalo: No Kaaro tayo so Dios, nawalaan itayo met na ilalo ed arapen. Pinaseseg nen apostol Pablo iray Kristiano ya ‘agda igaton so ilalo ra ed saray kayamanan a panduaruwaan, noag dia ed Dios.’ No ontan et ‘mantitipon ira na nipaakar ed sikara na sakey a maabig a pangiletnegan a niparaan ed panaon ya onsabi, pian nabembenan da so bilay a peteg.’ (1 Timoteo 6:17-19) Maganggano lan niwala iyan peteg a bilay sano ipawil na mangatatawen a Panarian na Dios so Paraiso ed sayan dalin.—Lucas 23:43.
Anggano iyaaplikam la iray prinsipyo na Biblia, nawalaan ka nin siansia na saray problema, ingen napaliisan mo so gonigon tan kaermenan a nasasagmak na saray marelmeng. Si David, ya abitla ed gapo, tan saray minilyon a singa sikato so akaaral ed kaimportantian na pangiyaplika ed saray prinsipyo na Biblia ed bilay da. Sanen akaromog si David na trabahon walaay dugarugan eskedyul, oniay inkuan to: “Pisalsalamatan ko so maabig a relasyon ko ed asawak tan ananak mi ontan met ed pribilehyon pakapanlingkor ed si Jehova a Dios bilang matatken ed kongregasyon.” Agpankelawan sirin ya oniay inkuan na salmista nipaakar ed toon ontatalineng ed simbawa na Dios: ‘Onaligwas ya amin iray gawaen to’!
[Tsart ed pahina 6]
LIMARAN KUNDANG ED ITATALONA
1 Ag-itayo paiimpluensyaan ed saray estandarte na sayan mundo.
2 Basaen tan dalepdepen so Salitay Dios ya inagew-agew.
3 Iyaplikam so simbawa na Biblia ed bilay mo.
4 Mikaaro ed Dios.
5 Takotan so tuan Dios, tan unoren iray ganggan to.
[Saray litrato ed pahina 7]
Kasin tutumboken mo iray kundang ed itatalona?