Saray Nangraduar ed Gilead so Akaawat na Makapatenyeg-puson Panangibangat

NEN Setyembre 9, 2006, nangraduar so koma-121 a klase na Watchtower Bible School of Gilead diad Watchtower Educational Center ed Patterson, New York. Makapaligsay-puso iman a programa.

Say programa so ginapoan nen Geoffrey Jackson, a membro na Mananguley ya Ulop na saray Tasi nen Jehova, diad impangabrasa to ed 56 a mangraduar tan 6,366 ya inmatendi a nanlalapud nanduruman bansa. Impaliwawa to so nipaakar ed Salmo 86:11, ya oniay inkuan na satan: ‘Ibangat mo ak ed dalan mo, O Jehova. Manakar ak ed katuaan mo. Iyapasakey mo so pusok ya ontakot ed ngaran mo.’ Impabitar nen Brother Jackson so taloran bengatla a nidanet ed sayan bersikulo. Oniay inkuan to: “Say primeron punto et nipaakar ed panangibangat; say komadua et nipaakar ed panangiyaplika; tan say komatlo et nipaakar ed motibo. Importante irayan bengatla nagkalalo la ed sikayoran misionaryo sano onla kayo la ed saray teritorya yo.” Insan to imparungtal iray nantutumbokan a paliwawa tan interbio ya angidanet ed sayan taloran punto.

Makapaligsay-puson Panangibangat

Si William Malenfant, a kaiba ed saray mangaasikaso ed hedkuarter, so angipaliwawa ed teman “Say Sankaabigan lan Bilay Natan.” Impaimano to so alimbawa nen Maria, ya agi nen Marta. Mas inyuna nen Maria so onyurong tan ondengel ed kinen Jesus sanen sikatoy binmisita diad abung da. Kanian inkuan nen Jesus ed si Marta: “Si Maria pinili to so maong a betang, a sikato so agnaekal ed sikato.” (Lucas 10:38-42) “Isipen pa labat iya,” kuan na manpapaliwawa. “Lawas nanonotan nen Maria a sikatoy yinmurong ed salian nen Jesus tan dinmengel a mapetepet ed alay abig iran espiritual a katuaan, on, lapud maabig so pinili to.” Kayari ton kinomendaan iray mangraduar lapud maabig so pinili ra nipaakar ed espiritual, inkuan to: “Niwala ed sikayo so sankaabigan lan bilay natan lapud saray pinili yo.”

Say tinmumbok a nampaliwawa et si Anthony Morris, a membro na Mananguley ya Ulop, nipaakar ed teman “Ikawes Yo so Katawan Tayo a Jesu-Kristo,” a nibase ed Roma 13:14. Panon tayon nagawaan iya? Impabitar nen Brother Morris a say ‘pangikawes ed Katawan tayo a Jesu-Kristo’ et mankabaliksan na pangalig ed saray paraan na Katawan, salanti, aligen tayo so alimbawa tan awawey nen Jesus. “Impatnag nen Jesus ed saray totoo a sikatoy mainomay ya asinggeran,” so kuan na espiker, “lapud sikatoy walaan na masimoon ya interes ed sikara, tan sankalikna ra itan.” Insan impaliwawa na espiker ya agaylan laknab a kakabatan so agamoran na saray estudyante diad impanaral da ed Gilead ta ‘pian natalosan da so kaawang tan karukey tan kaatagey tan kaaralem’ na katuaan, unong ya inkuan na Efeso 3:18. Balet impanonot to ed sikara so bersikulo 19, ya oniay inkuan na satan: “Say pangamta na panangaro nen Kristo a manalonggaring ed kakabatan.” Insan pinaseseg nen Brother Morris iray estudyante: “Legan yon gagawaen  so personal a panagaral yo, motektek yo no panon yon naalig so maaron panangabagey nen Kristo ta pian peteg a ‘nikawes yo so Katawan tayon Jesu-Kristo.’”

Say Unor a Bilin na Saray Instruktor na Gilead

Say tinmumbok a nampaliwawa et say instruktor na Gilead a si Wallace Liverance, a say tema to et nibase ed saray salita ed Uliran 4:7. Inkuan to ya anggaman sankaimportantian so maridios a kakabatan, nepeg tayo met a ‘gamoran so pakatalos,’ a mangilalanor ed panugyop ed saray nanduruman katuaan insan imanoen no panon a mansisiglaotan iratan ta pian natebek tayo so kabaliksan na sakey a pamaakaran. Impabitar na espiker a no nagamoran tayo so pakatalos, nalikna tayo so liket. Alimbawa, diad panaon nen Nehemias, saray Levita so ‘angipaliwawa ed ganggan’ tan ‘impatalos da.’ Kanian saray totoo so ‘nanliliket, lapud atalosan da iray imbasa ed sikara.’ (Nehemias 8:7, 8, 12, Maung a Balita) Oniay  impanampot nen Brother Liverance ed paliwawa to: “Say liket so resulta na pakatalos ed apuyanan na espiritu a Salitay Dios.”

Si Mark Noumair, a sananey nin instruktor ed Gilead, so angipaliwawa ed teman “Siopan Talaga so Kabusol Yo?” Diad guerra, dakel a sundalo so napapatalosan na bala odino napapabantoan na mismon kakaiba ra. Insan oniay intepet to: “Komusta met ed espiritual a pibabakal tayo?” “No ag-itayo manalwar, ompan agtayo la nibiig no siopa so peteg a kabusol tayo tan napasakitan tayo la ingen so kakaiba tayo.” Lapud panibeg, mairap a nibiig na sakey no siopa so kabusol to. Singa bilang, ginetma nen Arin Saul a pateyen si David, a kapara ton managdayew, anta say talagan kabusol da et saray Filisteo. (1 Samuel 18:7-9; 23:27, 28) Intuloy na espiker: “Panon to no say kaiba yon misionaryo et maabilidad ed dakel a pamaakaran? Kasin mansalita kayo na makapasakit ed sikato, odino mabulos yon bidbiren a talagan mas maabilidad so arum nen say sikayo diad nanduruman paraan? No say piimano tayo et say ag-inkayadyari na arum, mairap la ingen a nibiig no siopa so peteg a kabusol tayo. Say labanan tayo et say peteg a kabusol tayo, si Satanas.”

Makapaliket Iran Eksperiensya tan Makaibangat Iran Interbio

Say tinmumbok a parte ya atemaan na, “Gawaen Yo so Kimey na Ebanghelisador,” so imparungtal na instruktor na Gilead a si Lawrence Bowen tan kabiangan ed satan iray interbio tan impangisalaysay na saray eksperiensya. Impaliwawa to a matukotukoy iray nibalikas ed 2 Timoteo 4:5, lapud “say manunan kimey na sakey a misionaryo a nanaral ed Gilead et say pangikayat ed maong a balita, tan onia so ginawa na sarayan estudyante inerman so pakaromogan da ed totoo.” Inyakto lamet iray pigaran makapaliket ya eksperiensya.

Say tinmumbok ed programa et say nankaduan parte ya imparungtal nen Michael Burnett tan si Scott Shoffner, a parehon membro na pamilyan Bethel. Ininterbio da iray membro na Komite na Sanga ed Australia, Barbados, Korea, tan Uganda. Napatnagan ed saray komento na sarayan membro na komite na sanga so pirmin pansasagpot da pian nitarya iray pankaukolan na saray misionaryo, kalaktip lay magenap a panayaman da ontan met ed pangasikaso ed bunigas da. Indanet na saray membro na komite na sanga a saray matalonan misionaryo so mabulos ya onadapta ed saray kipapasen ed teritorya ra.

Makapakiwas tan Makapaseseg ya Impansumpal

Si John E. Barr, ya abayag lan membro na Mananguley ya Ulop, so angiparungtal ed manunan paliwawa ed programa ya atemaan na “Takotan Yo so Dios tan Iter Yo ed Sikato so Gloria.” Kinonsidera to so Apocalipsis 14:6, 7, ya oniay nabasa: “Anengneng ko so sananey ya anghel a mantektekkiab dia ed pegley na tawen, a wala ed sikato so andi-angga a maabig a balita pian sikato so ipulong to ed saray manaayam dia ed dalin, tan diad balang nasyon tan poli tan salita tan baley; et kuanto ed baleg a boses: Takotan yo so Dios, tan iter yo ed sikato so gloria: ta say oras na pangukom to sinmabi la.”

Pinaseseg nen Brother Barr iray estudyante ya ipapuso ra so taloran bengatla nipaakar ed satan ya anghel. Unona, kaukolan ya iyabawag na anghel so andi-angga a maabig a balita a si Kristo et manuuley la natan bilang Ari na Panarian. Inkuan na espiker: “Sigpot a panisiaan tayo a sikatoy nitrono la nen 1914. Kanian sarayan maabig a balita so nepeg a niyabawag ed sankadalinan.” Komadua, oniay inyabawag na anghel: “Takotan yo so Dios.” Impaliwawa na espiker a kaukolan a tulongan na saray nangraduar iray iyaaralan da na Biblia a nawalaay panagrespeto ed Dios ta pian ag-ira manggawa na antokaman a makapaermen ed sikato. Komatlo, oniay ingganggan na anghel: ‘Iter yo ed Dios so gloria.’ Oniay nipaseseg ed saray estudyante: “Agtayon balot lilingwanan a manlilingkor itayo pian igloria so Dios, aliwan say inkasikatayo.” Insan oniay inkuan nen Brother Barr sanen impaliwawa to so nipaakar ed ‘oras na panangukom’: Dagdaiset la so nakekeraan a panaon antis a nagawa so kaunoran a panangukom. Dakel a totoo ed teritorya tayo so kaukolan nin makarengel ed mensahe na maong a balita antis a naatrasado.”

Legan a sankanonot da irayan balikas, niiter ed 56 a nangraduar iray diploma ra tan nibaki ira ed nanduruman bansa. Talagan atenyeg so kapusoan na saray nangraduar tan arum niran inmatendi ed makapaseseg a simbawan naawat da diad sayan makapaliket ya agew.

[Kahon ed pahina 17]

ESTATISTIKA NA KLASE

Bilang na bansa a nanlapuan: 6

Bilang na bansa ya angibakian: 25

Bilang na estudyante: 56

Aberids ya edad: 35.1

Aberids a taon ed katuaan: 18.3

Aberids a taon ed sigpot-panaon a ministeryo: 13.9

[Litrato ed pahina 18]

Koma-121 a Klase a Nangraduar ed Watchtower Bible School of Gilead

Diad listaan ed leksab, saray dasig so anumeroan manlapud arap a pasener, tan saray ngaran so akalista manlapud kawigi a manpakawanan ed kada dasig.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.