Tepetepet na Saray Manbabasa

Anto so kabaliksan na panagtatak ya atukoy diad Apocalipsis 7:3?

Oniay imbaga na Apocalipsis 7:1-3: “Akanengneng ak na apatira ya anghel ya akaalagey ed saray apatiran suyok na dalin, a popokpokan da so apatiran dagem na dalin, pian ag-onsibok so dagem dia ed tapew na dalin, anggan dia ed tapew na dayat, anggan dia ed tapew na dinan a kiew. Tan anengneng ko so sananey ya anghel ya onsesegep ed letakan na banwa, a wala ed sikato so tatak na Dios a mabilay: tan tinmawag ed baleg a boses ed saray apatira ya anghel, a sikara so angikdan na pamasakit dia ed dalin tan dayat. A kuan to, Agyo pasakitan so dalin, anggan say dayat, anggan saray kiew, angga ed agmi natatakan so saray aripen na Dios tayo dia ed saray moling da.”

Sano bulosan la so “apatiran dagem,” manresulta itan ed “baleg ya irap,” a naderal la ed satan so palson relihyon pati say arum nin kabiangan na sayan marelmeng a mundo. (Apocalipsis 7:14) “Saray aripen na Dios tayo” et saramay alanaan ya agagi nen Kristo diad dalin. (1 Pedro 2:9, 16) Kanian, ipapatnag na sayan propesiya ya asumpal lan atatakan iray agagi nen Kristo sano ginmapo la so baleg ya irap. Balet, ipapabitar na arum a bersikulo na Biblia a wala so inmunan panagtatak ed saray alanaan. Kanian no maminsan et sasalambiten tayo so nipaakar ed inmuna tan kaunoran a panagtatak. Anto so pandumaan na sarayan dua?

Imanoen pa so kabaliksan na salitan ‘atatakan.’ Nensaman a panaon et uusaren so sakey a panagtatak pian tatakan so sakey a dokumento. Sayan salita et nayarin manukoy met ed mismon tatak. Kaslakan la nensaman a pepeketan na tatak a gawa’d-pitek so sakey a dokumento odino arum nin bengatla pian mamaneknek ed inkanapanmatalkan  na satan odino say makankayarian.​—1 Arari 21:8; Job 14:17.

Inkompara nen Pablo so masanton espiritu ed sakey a panagtatak sanen inkuan ton: “Say Dios so mamapaelet na pikakasakey mi tan sikayo ed Kristo. Say Dios met so amili’d sikami. Sikato met ni ananda a kayarian to kami, tan angiter na Espiritu Santo ed puso mi.” (2 Corinto 1:21, 22, MB) Kanian, nilanaan nen Jehova irayan Kristiano panamegley na masanton espiritu to pian ipatnag a sikaray kayarian to.

Balet, say panagtatak ed saray alanaan et walaan na duaran aspekto. Say inmuna ya impantatak et midumaan ed kaunoran a panagtatak diad (1) gagala tan (2) panaon. Say gagala na inmunan impantatak et pian pilien so sakey a balon membro ya iyarum ed bilang na saray alanaan a Kristiano. Bangta say gagala na kaunoran a panagtatak et pian pekderan a sayan apili odino atatakan ya indibidual et sigpot a nanmatoor. Sirin, dia lambengat ed kaunoran a panagtatak so permanentin pakatatakan ed “moling” na sakey ya alanaan, a mangipabidbir a sikatoy talagan asubok tan matoor ya “aripen na Dios tayo.” Kanian, sayan unor ya aspekto na panagtatak so tutukoyen na Apocalipsis kapitulo 7.​—Apocalipsis 7:3.

Nipaakar ed panaon na inmunan impantatak, oniay insulat nen apostol Pablo ed saray alanaan a Kristiano: “Dia ed sikato sikayo agawa kayo a tawir, nen kadngel yo na salita a matua, say ebanghelyo na kilalaban yo, a dia ed sikato nen sinisia yo, atatakan kayo na espiritu santo na sipan.” (Efeso 1:13, 14) Ipapanengneng na dakel a rekord na Biblia a saray Kristiano nen inmunan siglo et talagan atatakan kayarin tuloy na impakadngel da ed maong a balita tan sanen nagmaliw iran mananisia ed si Kristo. (Gawa 8:15-17; 10:44) Impatnag na satan a panagtatak ya agamoran da so primeron panangabobon na Dios. Balet, agda ni agamoran so kaunoran a panangabobon to. Akin?

Inkuan nen Pablo a saray alanaan a Kristiano so ‘atatakan parad agew na karondon.’ (Efeso 4:30) Ipapatnag na saya a kayari na inmunan impantatak et onlabas ni so sakey a peryodo na panaon, a nayarin dakel a taon. Saray alanaan so kaukolan a mansiansian matoor manlapud agew na impakatatakan da panamegley na masanton espiritu ya angga ed ‘agew na karondon’ odino kabulos da ed laman bilang totoo, salanti, anggad agew na ipatey da. (Roma 8:23; Filipos 1:23; 2 Pedro 1:10) Kanian sano manampot la so bilay nen Pablo, insan to labat nibaga ya: “Asumpal ko so binati’ko, inunor ko so pananisia. Manlapu ed natan angga ed arapen wala a niparaan ed siak so balanget na kaptekan.” (2 Timoteo 4:6-8) Niarum ni, oniay inkuan nen Jesus ed kongregasyon na saray alanaan a Kristiano: “Mansiansia ka [a matoor] angga ed patey, tan siak iter ko ed sika so balanget na bilay.”​—Apocalipsis 2:10; 17:14.

Say salitan “balanget” odino korona et sakey a kaaruman a paneknek a walay onlabas a panaon ed baetan na inmunan impantatak tan kaunoran a panagtatak. Akin? Niyugali la nensaman a panaon so pankorona ed sakey a bumabatik ya analo ed lumba. Pian naawat to so korona, kaukolan a sikatoy aglabat milumba, noagta sumpalen to so babatiken. Mipadpara, naawat lambengat na saray alanaan a Kristiano so balanget ya imortal a bilay ed tawen no mantultuloy ira angga ed sampot na babatiken da, salanti, manlapud inmunan impakatatakan da ya anggad kaunoran a pakatatakan da.​—Mateo 10:22; Santiago 1:12.

Kapigan so unor a pakatatakan na saray nakdaan na alanaan a Kristiano ya inmuna lan atatakan? Siopaman ed sikara a mabilay ni diad dalin so natatakan ed “moling” sakbay a nagawa so baleg ya irap. Kanian, sano bulosan la so apatiran dagem na kairapan, asumpal la so unor a pakatatakan na amin ya espiritual ya Israel, anggaman wala ni daiset ed sikara a mabilay ni diad dalin tan nepeg da nin sumpalen so mangaraldalin a kurso ra.