Ibangat No Anto so Peteg ya Ibabangat na Biblia
Ibangat No Anto so Peteg ya Ibabangat na Biblia
“Manggawa kayo na saray babangatan ed amin a nasyones, . . . ya ibangat yo ra.”—MATEO 28:19, 20.
1. Kaunongan lan kalaknab so kibubunog na Biblia?
SAY Salita nen Jehova, say Masanton Biblia, so sakey ed saray sankadaanan lan libro tan say sankalaknaban a nibubunog diad interon mundo. Nipatalos so interon Biblia odino say kabiangan na satan diad masulok a 2,300 a lenguahe. Masulok a 90 porsiento ed saray manaayam diad dalin so walaan na Biblia ed dilin lenguahe ra.
2, 3. (a) Akin a wala so pakakawetwet nipaakar ed saray bangat na Biblia? (b) Antoran tepet so konsideraen tayo?
2 Minilyon a totoo so inagew-agew a manbabasa na Biblia. Arum so aminpiga lan akabasa ed interon Biblia. Ibabaga na nilibon relihyon ya ibabase da ed Biblia so bangabangat da, balet ag-ira mantutunosan no anto so ibabangat na satan. Nilikud ed pakakawetwet da, wala so pirmin agpanpapakna na saray mankakarelihyonan. Arum so manduduaruwa nipaakar ed Biblia, say nanlapuan na satan, tan say kablian na satan. Saya so ipapasen na dakel bilang sagradon libro ya uusaren labat ed seremonya na pansipanan odino pansamba ed arap na korte ya ibaga labat so katuaan.
3 Diad tua, karga na Biblia so mapuersan salita odino mensahe na Dios parad katooan. (Hebreos 4:12) Bilang Tasi nen Jehova, labay tayo sirin a naamtaan na totoo no anto so ibabangat na Biblia. Panliketan tayon gawaen so ingganggan nen Jesu-Kristo ed saray patumbok to sanen inkuan ton: “Onla kayo . . . tan manggawa kayo na saray babangatan ed amin a nasyones . . . ya ibangat yo ra.” (Mateo 28:19, 20) Diad pampupulong tayo et naroromog tayo iray nagogonigon a matuan-impanpuson totoo lapud pakakawetwet na saray relihyon diad interon mundo. Labay dan naamtaan so katuaan nipaakar ed Manamalsa tayo tan labay dan naaralan so ibabaga na Biblia nipaakar ed kabaliksan na bilay. Kanian konsideraen tayo pa so taloran tepet a pinonot na dakel a totoo. Dinanman ed sarayan tepet, imanoen tayo no anto so lingon ibabaga na saray lider na relihyon, insan repasoen tayo no anto so peteg ya ibabangat na Biblia. Saray tepet et: (1) Kasin iyaansakit itayo na Dios? (2) Akin a wadia itayo? (3) Anto so nagawa ed sikatayo sano ompatey itayo?
Kasin Iyaansakit Itayo na Dios?
4, 5. Akin ya iisipen na dakel a totoo ya ag-itayo iyaansakit na Dios?
4 Say primeron tepet ya ebatan tayo et no kasin iyaansakit itayo na Dios. Makapaermen ta iisipen na dakel a totoo ya agmangiyaansakit so Dios. Akin ya ontan so iisipen da? Say sakey lan rason et manbibilay ira ed mundon napnoy panggula, guerra, tan irap. Ikakatunongan dan, ‘No talagan mangiyaansakit so Dios, seguradon agto la abuloyan a nagawa irayan makapasinagem a bengatla.’
5 Say sakey nin rason no akin ya iisipen na totoo ya ag-itayo iyaansakit na Dios et lapud satan so ipapamoria ed sikara na saray lider na relihyon. Anto so mabetbet ya ibabaga na papari sano walay nagawan trahedya? Sanen inatey so duaran angkekelag ya anak na sakey a bii lapud aksidente ed luganan, oniay inkuan na ministro to: “Panlabayan itan na Dios. Nakaukolan ni na Dios so duaran anghel.” Sano ontan so ibabaga na papari, diad tua et itetetel da ed Dios iray makapasinagem a nagagawa. Balet, oniay insulat nen babangatan a Santiago: “Agkomon ibaga na too no natukso a, Tinukso ak na Dios: ta say Dios agnayari a tuksoen na mauges tan agmet manukso na siopaman a too.” (Santiago 1:13) Say kaugsan et agbalot manlapu ed si Jehova a Dios. On, ‘arawi ed Dios a sikato so manggawa na karelmengan.’—Job 34:10.
6. Siopa so pansesengegan na kaugsan tan kairapan ed sayan mundo?
6 Akin sirin ya alablabas lay kaugsan tan kairapan? Say sakey a rason et impulisay na katooan so Dios bilang Manuley, ya agda labay so manpasakop ed saray matunong a ganggan tan prinsipyo to. Agnamomoria na totoo a say pampapasakopan da et si Satanas, say Kabusol na Dios, lapud “say sankamundoan mandukdukol ed kaugsan.” (1 Juan 5:19) No amta tayo iyan katuaan, mas mainomay tayon natalosan no akin a nagagawa iray mauges a kipapasen. Si Satanas et mauges, napnoy panggula, mapalikdo, tan maruksa, kanian nailaloan tayo a napatnagan ed mundo so personalidad na manuley na satan. Agpankelawan sirin no akin ya alablabas lay karelmengan!
7. Antoray arum a rason no akin a naeeksperiensya tayo so irap?
7 Say ag-inkayadyari so sakey nin rason no akin a nasasagmak tayo so kairapan. Saray makasalanan a totoo et walaay tendensian misamsaman ed pakayarin manuley, tan saya so mabetbet a manreresulta ed guerra, panaglames, tan kairapan. Oniay matukoy ya imbaga na Eclesiastes 8:9: “Sakey a too walaan na pakayari ed sananey pian kaugsan to.” Say sakey nin rason na paniirap et say “panaon tan ag-iilaloan a nagawa.” (Eclesiastes 9:11, NW) Mabetbet a naeeksperiensya na totoo so trahedya lapud nibanbana ira a walad pasen a walay mauges ya agawa.
8, 9. Panon tayon naseguro a talagan iyaansakit itayo na Dios?
8 Makapaligliwan naamtaan ya aliwan si Jehova so panlalapuan na irap. Balet talaga kasin iimanoen na Dios so nagagawa ed bilay tayo? Say makapaligsay-puson ebat et on! Amta tayon mangiyaansakit si Jehova lapud ibabaga ed sikatayo na apuyanan a Salita to no akin ya inabuloyan to iray totoon mantultuloy ed mauges a gagawaen da. Saray rason na Dios et mangilalanor ed duaran isyu: say inkasoberano to tan say katooran na saray totoo. Lapud si Jehova et makapanyarin-amin a Manamalsa, sikato so ag-obligadon mangibaga ed sikatayo no akin ya aabuloyan to so kairapan. Ingen ta ibabaga to ed sikatayo itan a pamaakaran lapud iyaansakit to itayo.
9 Konsideraen pa ni so kaaruman ya ebidensya a talagan iyaansakit itayo na Dios. Sikato so “naermenan” sanen say dalin ed panaon nen Noe so napno na kaugsan. (Genesis 6:5, 6, Maung a Balita) Duma la kasi so liknaan na Dios natan? Andi, lapud sikatoy agmanguuman. (Malaquias 3:6) Kagula to so ag-inkahustisya tan agto labay a nanengneng so paniirap na totoo. Ibabangat ed sikatayo na Biblia a magano lan panampoten na Dios so amin ya irap a resulta na pananguley na too tan impluensya na Diablo. Agta saya so makakombinsin prueba ya iyaansakit itayo na Dios?
10. Anto so liknaan nen Jehova ed paniirap na too?
10 Saray lider na relihyon so lingon mangirerepresenta ed Dios sano ibabaga ran saray trahedyan nasasagmak tayo et panlabayan to. Balet diad pidumaan et pilalek la nen Jehova a panganggaen so paniirap na too. Ibabaga na 1 Pedro 5:7 ya iyaansakit odino ‘aasikasoen to itayo.’ Saya so peteg ya ibabangat na Biblia!
Akin a Wadia Itayo?
11. Anto so mabetbet ya ibabaga na saray relihyon ed mundo nipaakar ed bilay na too diad dalin?
11 Konsideraen tayo natan so komaduan tepet a panuumamengan na dakel a too, Akin a wadia itayo? Say mabetbet ya iyeebat na saray relihyon ed mundo et temporaryo labat so too diad dalin. Sayan planeta tayo so ipapasen da bilang temporaryon panayaman, odino pasen a panubokan, sakbay ya onla ed biek a bilay. Arum a klero so palson mangibabangat a tunawen na Dios so planeta tayo. Bilang epekto na sarayan bangat, inisip la ingen na dakel a totoo a manpenek la ra’d bilay da natan lapud ompatey met lanlamang ira ed saginonor. Anto so peteg ya ibabangat na Biblia no akin a wadia itayo?
12-14. Anto so ibabangat na Biblia nipaakar ed gagala na Dios parad dalin tan katooan?
12 Say Dios so walaan na alay abig a gagala parad dalin tan katooan. “Pinalsa to [so dalin] aliwa a kibalatar” noagta “tinibukel to ta pian sikato so panayaman.” (Isaias 45:18) Niarum ni, si Jehova so ‘angipasen ed saray angipaletnegan na dalin, pian aglawas nagalaw.’ (Salmo 104:5) Say pakapikabat ed sarayan bengatla nipaakar ed gagala na Dios ed dalin tan ed katooan so makatulong pian natalosan tayo no akin a wadia itayo.
13 Impabitar na Genesis kapitulo 1 tan 2 a maalwar ya imparaan nen Jehova so dalin a panayaman na too. Sanen manampot la so peryodo na impamalsa to ed dalin tayo, amin a bengatla et “maong iran tuloy.” (Genesis 1:31) Impasen na Dios so inmunan laki tan bii, si Adan tan Eva diad marakdakep a hardin na Eden tan intaryaan to ra na daakan a maabig a tagano. Onia so niganggan ed inmunan paris a too: “Manbunga kayo, tan ondakel kayo, tan makmakan yo so dalin, tan sikato so patuloken yo.” Sikara so manilalak na saray ayadyarin ananak, inatnat da ed interon dalin iray ketegan na hardin ya ayaman da, tan maaron patuloken da iray ayayep.—Genesis 1:26-28.
14 Say gagala nen Jehova et niwala so ayadyarin katooan a manayam diad dalin ed andi-anggaan. Oniay ibabaga na Salitay Dios: “Say matunong tawiren to so dalin tan manayam diman lawas.” (Salmo 37:29) On, say gagala ed sankatooan et panggayagaan da so andi-anggaan a bilay diad Paraison dalin. Saya so gagala na Dios, tan saya so peteg ya ibabangat na Biblia!
Anto so Nagawa ed Sikatayo Sano Ompatey Itayo?
15. Anto so ibabangat na maslak ed saray relihyon ed mundo nipaakar ed kipapasen tayo sano inatey itayo?
15 Konsideraen tayo natan so komatlon tepet a pampapagaan na dakel a totoo: Anto so nagawa ed sikatayo sano ompatey itayo? Ibabangat na maslak ed saray relihyon ed mundo a walay ompaway ed inatey a laman na too a mantultuloy nin manbilay. Siansia nin papanisiaan na arum a grupo na relihyon a dudusaen na Dios iray mauges diad andi-anggaan a pamapairap to ed sikara diad mandarlang ya impierno. Balet tua kasi iya? Anto so peteg ya ibabangat na Biblia nipaakar ed ipapatey?
16, 17. Unong ed Biblia, anto so kipapasen na inaatey?
16 Oniay ibabaga na Salitay Dios: “Saray mabilay amta ra a sikara ompatey ira: balet saray inaatey agda amta so bengatla, ag-ira met nawalaan la na tumang.” Lapud saray inaatey et “agda amta so [anggan anton] bengatla,” ag-ira makarengel, makanengneng, makasalita, makalikna, odino makanonot. Anggapo lay nagamoran dan antokaman a tumang. Panon iran natumangan ta agla ran balot makapankimey? Niarum ni, say ‘aro ra tan gula ra tan siblet da so atawtaw lan abayag,’ lapud agda la nayarian so mangipatnag na antokaman ya emosyon.—Eclesiastes 9:5, 6, 10.
17 Simpli tan malinew so ibabaga na Biblia nipaakar ed saya: Saray inaatey et agla mantultuloy a manbilay diad arum a pasen. Anggapo so bengatlan ompaway ed laman tayo sano ompatey itayo, a mantultuloy nin manbilay ta pian nianak lamet itan ed arum a laman, a singa ibabaga na saramay manisia ed reinkarnasyon. Nayarin onia so pangiyilustra tayo ed saya: Say bilay tayo et singa apoy na kandila. Sano naerep so apoy, ag-itan onla ed arum a pasen. Satan so naandipat la.
18. Sano naamtaan na iyaaralan na Biblia ya anggapo lay pakalikna na inaatey, antoray namoria to?
18 Isipen pa so epekto na sayan simpli balet mapuersan katuaan. Sano naaralan na sakey ya iyaaralan na Biblia ya anggapo lan balot so pakalikna na inatey, mainomay ton natalosan ya anggan panon lay sanok na saray inaatey lan laki tan bai to sanen mabilay nira, sikato so agda lan balot nagonigon. Namoria to met a tampol a saray inaatey a pinabli to’d bilay et agla makarengel, makanengneng, makasalita, makalikna, odino makapanisip. Kanian, ag-ira manasagmak na agnaanosan ya ermen diad purgatoryo odino maniirap diad mandarlang ya impierno. Balet, ibabangat na Biblia a napaoli iray inaatey a walad pakanodnonotan na Dios. Agaylan abig iyan ilalo! —Juan 5:28, 29.
Balon Libro a Nausar Tayo
19, 20. Bilang Kristiano, anto so responsabilidad tayo, tan anton katulongan ed panagaral na Biblia so denesinyon usaren tayo ed ministeryo tayo?
19 Kinonsidera tayo so talora lambengat a tepet a panuumamengan na totoo. Dinanman ed saratan, malinew tan direkta so ibabangat na Biblia. Agaylan makapaliket so panginabang ed katuaan diad saramay malabay a makaamta ed ibabangat na Biblia! Balet ta aanapen nin siansia na saray matuan-impanpuso so makapnek ya ebat ed dakel niran importantin tepet. Bilang Kristiano, walaan itayo na responsabilidad a tulongan ira a makaromog ed saray ebat ed saratan a tepet.
20 Sakey ya angat so pangibangat ed katuaan na Biblia diad malinew tan makapasagyat a paraan. Pian natulongan itayon mangarap ed sayan angat, intarya na “matoor tan makabat ya aripen” so sakey a libro a denesinyon usaren tayo ed ministeryo tayo bilang Kristiano. (Mateo 24:45-47) Sayan 224-pahinan libro so apauloan na Anto so Peteg ya Ibabangat na Biblia?
21, 22. Anto so arum ed mausausar iran seksion na libron Anto so Peteg ya Ibabangat na Biblia?
21 Sayan libro a nipaway ed “Maridios a Katutulok” iran Distriton Kombension na saray Tasi nen Jehova nen Disyembre 2005 anggad Enero 2006 so walaan na nanduruman mausausar iran seksion. Singa bilang, makatulong na baleg so limaran-pahina ed gapo na sayan libro pian makapangigapo na saray panangiyaral na Biblia. Seguradon mainomay yon ipaliwawa so nipaakar ed saray litrato tan teksto a naromog ed saratan a pahina. Nayarin usaren yo met so materyal ed sayan seksion pian ibangat iray iyaaralan yo no panon dan anapen iray kapitulo tan bersikulo na Biblia.
22 Simpli tan malinew so estilo na impangisulat ed sayan libro. Walaray ginawan paraan pian makapibiang so iyaaralan anggad posible a manabi ed puso to. Diad kada kapitulo et walaray tepet ed gapo tan walay sakey a kahon ed sampot na kapitulo ya apauloan na “No Anto so Ibabangat na Biblia.” Walad sayan kahon iray ebat na Biblia ed saray tepet a pinalesa ed gapo na kapitulo. Saray balibalin litrato tan kapsion ontan met ed saray ilustrasyon ed sayan publikasyon so makatulong ed iyaaralan pian natalosan to iray balon ideya. Anggaman pinansiansian simpli so amin a kapitulo ed sayan libro, wala so apendise ya ontulong ed sikayo pian detalyadon nakonsidera so 14 ya importante iran tema no nakaukolan na iyaaralan so kaaruman ya impormasyon.
23. Antoray suhestion no panon yon usaren so libron Ibabangat na Biblia sano mangiyaaral kayo?
23 Say libron Ibabangat na Biblia so denesinyo pian natulongan itayon mangibangat ed totoo a nanduruma so edukasyon tan relihyon da. No say sakey ya iyaaralan et anggapoy amta to ed Biblia, nayarin kobrian so sakey a kapitulo ed maminpigan ibisita ed sikato. Ag-aapuraen a sumpalen so materyal, balet panggunaetan a sabien so puso na iyaaralan. No agto atalosan so sakey ya ilustrasyon diad libro, ipaliwawa yo itan odino mangusar kayo na sananey ya ilustrasyon. Manparaan kayon maong, gawaen yo so anggaay nayarian yo pian epektibo yon nausar iyan libro, tan manpikasi kayo ed Dios pian tulongan to kayon ‘mangikana a susto ed salita na katuaan.’—2 Timoteo 2:15, NW.
Apresyaen Yo so Mabmablin Pribilehyo Yo
24, 25. Antoran mabmablin pribilehyo so inter nen Jehova ed saray totoo to?
24 Mabmabli iran pribilehyo so inter nen Jehova ed saray totoo to. Tinulongan to itayon makaaral na katuaan nipaakar ed sikato. Agtayon balot leleglemewen iyan pribilehyo! Diad tua, ag-impaamta na Dios ed saray mapaatagey so nipaakar ed saray gagala to noagta imparungtal to iratan ed saray mapaabeba. Nipaakar ed saya, oniay imbaga nen Jesus: “Misalamat ak ed sika, O Ama, Katawan na tawen tan dalin, ta inyamot mo so sarayan bengatla ed saray makabat tan makatalos, et sikaray impuyan mo’d saray ugugaw.” (Mateo 11:25) Mataltalag a pribilehyo so pagmaliw a kabiangan ed saramay mapaabeban manlilingkor ed Soberano ed Uniberso, si Jehova.
25 Inter met na Dios ed sikatayo so pribilehyon ibangat so arum nipaakar ed sikato. Tandaan a sikato so lingon inrepresenta na saramay mangibabangat na katilaan nipaakar ed sikato. Kanian aliwa la ingen so panmoria na totoo ed si Jehova lapud iisipen dan sikatoy agmangiyaansakit tan anggapoy panangabagey to. Kasin mabulos tan magunaet kayon mangipetek ed sayan lingon pakatalos? Labay yo met kasin nakabatan na amin a matuan-impanpuson totoo so katuaan nipaakar ed Dios? Ipatnag yo sirin so maridios a katutulok diad maseseg a pampulong tan pangibangat ed arum no anto so ibabaga na Biblia nipaakar ed saray importantin tema. Nakaukolan a naamtaan na saray manaanap na katuaan no anto so peteg ya ibabangat na Biblia.
Antoray Ebat Yo?
• Panon tayon naseguro ya iyaansakit itayo na Dios?
• Akin a wadia itayo ed dalin?
• Anto so nagawa ed sikatayo sano ompatey itayo?
• Antoran seksion na libron Ibabangat na Biblia so labalabay yon usaren?
[Tepetepet Parad Panagaral]
[Saray litrato ed pahina 22]
Ibabangat na Biblia a manampot lay kairapan
[Credit Lines]
Nikawanan ed tagey, ugaw a bii: © Bruno Morandi/age fotostock; kawigi, akulaw: AP Photo/Gemunu Amarasinghe; nikawanan ed leksab, refugees: © Sven Torfinn/Panos Pictures
[Litrato ed pahina 23]
Saray matunong so manbilay ya andi-anggaan diad Paraiso