Laki tan Bii Ginawa​—Parad Sakey tan Sakey

SAY laki tan bii so walaan lawas na pilalek a mankasakey. Sayan liknaan so insipor na Dios ed sikara. Parad si Jehova et aliwan maabig ed inmunan laki, si Adan, a mantultuloy a manbukbukor. Kanian sikatoy inggawaan na Dios na “sakey a manepeg a katulongan to.”

Maitlep a pinaugip nen Jehova si Adan, insan anguyos na sakey ed saray taglang to tan “ginawa to a sakey a bii insan inyakar to ed laki.” Nanliketan a maong nen Adan so impakanengneng to ed sayan maganggana a pinalsa nen Jehova, ya inkuan to: “Saya so pukel na saray pukepukel ko, tan laman na laman ko.” Talagan makaroyroyon maong iyan ayadyarin bii ya inngaran na Eva, lapu ed saray kalidad to bilang bii. Ontan met, say ayadyarin si Adan so makanepegan na respeto lapu ed kagalangan to bilang laki. Ginawa ira a parad sakey tan sakey. Kanian oniay inkuan na Biblia: “Say sakey a laki taynan to so ama to tan ina to, et yamong to so asawa to: et saksakey ira a laman naani.”​—Genesis 2:18-24.

Balet, saray pamilya natan so nabubuyak, tan mabetbet a napapatnagan so panangabuso odino sinisiblet ya awawey ed relasyon na sanasawa. Say kompetisyon ed baetan na laki tan bii so pansesengegan na kolkolan tan agpantatalosan. Amin iratan et sumlang ed gagala na Dios parad laki tan bii. Say laki et denesinyo a manumpal na alay abig a betang diad dalin, bangta say bii et walaan na nikaduma tan makanan betang bilang katulongan na asawa to. Kaukolan a mantunosan iran dua. Manlapu la nen niwala so too, saray maridios a lalaki tan bibii so matoor ya anumpal ed saray betang ya inggagala nen Jehova parad sikara, tan saya so lalon amaliket tan amenek ed sikara. Anto irayan betang, tan panon tayon nasumpal iratan?

[Litrato ed pahina 3]

Ginawa so laki tan bii pian manumpal na mapagalang iran betang ed uksoyan na Dios