Mansiansian Agnagiing Sano Nanrebelde so Anak

WALAY sakey a Kristianon bii, a tawagen tayo ed ngaran a Joy, a nanggunaetan to a pabalegen so anak ton laki a mangaro ed si Jehova a Dios. Balet, sanen asingger lan man 20 años, sikatoy nanrebelde tan tinmaynan ed abung. Oniay inkuan nen Joy: “Saman so sankasakitan lan asagmak ko. Singa ak atraidor, pirmi so aliknak a sinagem, tan adisdismaya ak. Negatibo lan amin so nonot ko.”

Nayarin nanggunaetan mo met a pabalegen iray anak mo a mangaro tan manlingkor ed Dios, balet ta nen baleg lara et sakey odino duara ed sikara so angibeneg ed si Jehova. Panon mon natalonaan so ontan a pirmin inkadismaya? Anto so ontulong ed sika a mansiansian agnagiing odino matoor ed serbisyom ed si Jehova?

Sanen Nanrebelde so Ananak nen Jehova

Unona et kaukolan mon moriaen ya amta nen Jehova no anto so peteg a naliliknam. Ta oniay nabasa tayo ed Isaias 49:15: “Nayarian ta na sakey a bii a nalingwanan so anak to a mansuso, ya agto komon kasian so anak na eges to? On, saraya makalingwan ira, balet agak makalingwan ed sika.” Talagan nalilikna nen Jehova so liknaan na sakey ya ama odino ina. Isipen pa so liket to sanen amin ya ananak ton anghel so angidayew tan nanlingkor ed sikato. Sanen eebatan nen Jehova “manlapu ed aloboob” so patriarkan Job, impanonot To ed sikato iray maliket a panaon sanen kaiba to so nankakasakey a pamilya to ed tawen, ya inkuan to: “Iner so kawalaan mo sanen inggaton ko so panangiletnegan ed dalin? . . . Sanen saray bitewen ed kabuasan nankanta ra a bansag, tan amin iray anak na Dios inmeyag ira lapu ed liket?”​—Job 38:1, 4, 7.

Diad ilalabas na panaon balet, walay sakey ya ayadyarin anghel ya anak na tuan Dios a nanrebelde ed sikato tan nagmaliw a Satanas, a say kabaliksan na saya et “Sumusumpa.” Insan, naimatonan a mismo nen Jehova no panon ya akinonong ed satan ya impanrebelde so sankaunaan ya anak ton too, si Adan, pati say ayadyarin asawa to, si Eva. (Genesis 3:1-6; Apocalipsis 12:9) Diad saginonor, arum met ed saray anghel ya ananak na Dios so ‘amaulyan ed ayaman da’ tan sikaray nanrebelde ed sikato.​—Judas 6.

Ag-ibabaga ed sikatayo na Kasulatan no antoy alikna nen Jehova sanen nanrebelde met iray arum ya ayadyarin anak to. Balet, oniay mabitabitar ya ibabaga na Biblia: “Si Jehova anengneng to a say kabaglan na too ed dalin  abalbaleg, tan mauges labat a lanang so amin a pimorekdek na nonot na puso to. Et impanguli-uli to so linawa nen Jehova a nanggawa na too ed dalin, tan sikato so amasinagem ed puso to.” (Genesis 6:5, 6) Say impanrebelde na totoo nen Jehova a pinili to, say Israel, so talagan “amasakit” tan “amaermen” met ed sikato.​—Salmo 78:40, 41.

Agpanduaruwaan sirin a mililikna si Jehova ed saray atateng a manasagmak na ot-ot tan sinagem lapud inkarebelyoso na ananak da. Diad panamegley na Salita to et inter to so maabig a simbawa tan panamaseseg ya ontulong ed saratan ya atateng pian natalonaan da met so situasyon da. Sikaray papasesegen na Dios ya imatalek da ed sikato iray kapagaan da, manpaabeba ira, tan sumpaen day Satanas a Diablo. Nengnengen tayo no panon ya ontulong ed sika so panumbok mo ed sayan simbawa pian mansiansian matoor ed serbisyom sano manrebelde so anak mo.

Imatalek so Kapagaan Yo ed si Jehova

Amta nen Jehova so pansesga na atateng sano nalilikas dan niiiyan ed kapeligroan so ananak da. Impabitar nen apostol Pedro so sakey a paraan pian natalonaan iya pati say arum niran kapagaan. Oniay insulat to: “Imatalek yo ya amin ed [si Jehova] so kapagaan yo, ta sikato asikasoen to kayo.” (1 Pedro 5:7) Akin a nagkalautlan makana iyan panamaseseg tan panamaseguro ed atateng a walaay rebelden anak?

Sanen melag ni so anak mo, pirmi panangiyagel mo ed sikato ed amin a kapeligroan tan maseguron sikatoy mauno-unor met ed maaron panangiwanwan mo. Balet, sanen ombabaleg la, nayarin aliwa lan singa dati so gagawaen mon panangiyagel ed sikato. Ingen ta siansia ni so pilalek mon pangiyagel ed sikato. Diad tua et mas ni ingen.

Kanian, no manrebelde so anak mo tan naapektaan so espiritualidad to, emosyon to, odino say laman to, nayarin liknaen mon sika so natetel. Ontan so alikna nen Joy ya abitla niman. Oniay inkuan to: “Lapud pakakagonigon ko et inagew-agew kon nononoten iray agawa tan tetepetan koy inkasiak no anto kasi nankulangan ko.” Diad ontan iran momento a nagkalautlan labay nen Jehova ya “imatalek moy kapagaan mo ed sikato.” No ontan so gawaen mo, tulongan to ka. “Paawit mo ed Jehova so awit mo,” so inkuan na salmista, “et sikato bembenan to  ka, agton balot paulyan so matunong a natentenyeg.” (Salmo 55:22) Naeksperiensyan mismo nen Joy so ontan a ligliwa. Inkuan to: “Talagan imbesngaw kon amin ed si Jehova so naliliknak. Tan nainawaan ak a maong.”

Bilang ag-ayadyarin ateng, nayarin wala met iray nankulangan mo diad impamabaleg mo ed anak mo. Balet, agmo nepeg a pinonot iratan. Lapud si Jehova et aliwan ontan. Oniay inkanta na apuyanan a salmista: “No sika, Jehova, et uninengen mo so saray kasulitan, O Katawan, siopa kasi naani makaalagey?” (Salmo 130:3) Anggan ikuan lan sankamaongan ka lan ateng, nayarin manrebelde nin siansia so anak mo. Kanian ibesngaw mo labat ed si Jehova so liknaan mo diad pikakasi, tan tulongan to kan mangarap ed satan. Balet, pian makapantultuloy kan aktibo ed panaglingkor ed si Jehova tan agnakalotan nen Satanas, wala niray nepeg mon gawaen.

Manpaabeba Ka

Oniay insulat nen Pedro: “Mangabeba kayo . . . ed silong na makapanyarin limay Dios, pian itandoro to kayo ed kanepegan a panaon.” (1 Pedro 5:6) Akin a nakaukolan so pampaabeba sano nanrebelde so anak mo? Likud ed pakakakonsiensiam tan sakit na liknaan mo lapud impanrebelde na anak mo, nayarin makalikna ka met na kababaingan. Nayarin say pinonot mo la et aderal lay reputasyon na pamilyam lapud ginawa na anak mo, lalo la no sikatoy kaukolan a dispelosipen manlapud kongregasyon. Tan nayarin natatabangan ka met lan miaral lapud kokondenaen mo lay inkasika tan sakey ni et nababaingan ka.

Pian natalonaan itan, nepeg mon agamilen so praktikal a kakabatan. Oniay pasakbay na Uliran 18:1: “Say onsian anapen to so dili a pilalek to, tan misangsangan sumpa ed amin ya aralem a kakabatan.” No regular kan miaral anggano maer-ermen ka, siansian makagamor ka na makanan instruksion tan panamaseseg. “Diad inmuna et agko labay so miarapan ed anggan siopa,” so inaksobi nen Joy. “Balet ta ninonot koy kaimportantian na espiritual a rotina. Sakey ni, no mankulong ak ed abung, lalok labat a nanonotan iray problemak. Tinmulong ed siak so piaaral pian niyapasakey koy imanok ed makapabiskeg ya espiritual iran bengatla. Misalsalamat ak ta agko insian so inkasiak ed saray agagi ta no andi et asaew koy maaron suporta ra.”​—Hebreos 10:24, 25.

Tandaan met a kaukolan a sakbaten na balang sakey ed pamilya so “awit ton dili,” salanti, say responsabilidad to bilang Kristiano. (Galacia 6:5) Iilaloan nen Jehova iray atateng ya aroen tan disiplinaen da iray anak da. Tan iilaloan to met iray ananak a tuloken tan igalang da iray kaatengan da. No gawaen na atateng so anggaay nayarian da ed pamabaleg ed ananak da diad “panamilin na Katawan,” sikaran mismo so nawalaan na maabig a reputasyon ed Dios. (Efeso 6:1-4) Balet no say anak so onsugnar ed maaron panagdisiplina na ateng, say reputasyon ton mismo so naderal. “Anggan say ugaw ipakabat to so inkasikato ed panamegley na saray gawa to, no say kimey to . . . so malinis, tan . . . maptek,” so kuan na Uliran 20:11. Say impanrebelde nen Satanas et seguradon ag-aneral ed reputasyon nen Jehova ed saramay makaamta ed peteg ya agawa.

Sumpaen so Diablo

Oniay impasakbay nen Pedro: “Mandangka kayo, manbantay kayo; ta say kabusol yo, say Diablo, wala ed kaliberliber yo a singa omoang a leon a mananap na buagen to.” (1 Pedro 5:8)  Singa say leon, say maslak a puntirya na Diablo et saray kalangweran tan kulang ed eksperiensya. Nensaman, sibarsibar iray leon ed Israel tan sesga iraya ed saray komponin ayayep. No akaarawi ed pulok so sakey a kordero, satan so mainomay a nabiktima. Sipor la ed kabatyan a karnero ya iyagel so anak to anggan nirisgay bilay to. Balet, anggan say baleg lan karnero et agmakalaban ed leon. Kanian, kaukolan iray makpel a pastol pian mangiyagel ed pulok.​—1 Samuel 17:34, 35.

Pian iyagel iray piguratibon karnero nen Jehova manlapud “onmuang a leon,” inyuksoy ton asikasoen na saray espiritual a pastol so pulok diad panangidaulo na “manunan pastol,” si Jesu-Kristo. (1 Pedro 5:4) Oniay bilin nen Pedro ed saratan ya aturon lalaki: “Pastolan yo so saray pulok na Dios a wala ed sikayo, pampagaan yo ra ya ag-iparalan ed kabiskegan, noag dia ed kalakal a mabulos unong ed linaway Dios, aliwa a lapud mabanday a pananubo noag lapu ed ataryan kalakal.” (1 Pedro 5:1, 2) Diad pitulongan yo bilang atateng, nayarian na sarayan pastol a tulongan so tobonbalo yo pian nipetek so kurang to ed espiritual.

Sano kaukolan a simbawaen na saray Kristianon pastol so rebelden anak mo, nayarin labay mon iyagel ed pakadisplina. Balet, lingon baleg no gawaen mo itan, ta inkuan nen Pedro, a say “sumpaen” et say Diablo aliwan saray espiritual a pastol.​—1 Pedro 5:9.

Sano Ambelat so Disiplina

No agmagbabawi so anak mo a bautismado lan Kristiano, nayarin sikatoy nadisiplina na sankabelatan, salanti, nadispelosip manlapud kongregasyon. Manlapu la’d satan et say pakapilimog mo ed sikato so mandependi la ed edad to tan ed arum niran sirkumstansya.

Balet, no menor de edad ni so anak mo tan kaamong mo ni, natural labat ya itultuloy mon legpeten. Kaukolan to met ni nadisiplina tan nabangatan no antoy duga, tan responsabilidad mon gawaen iratan. (Uliran 1:8-18; 6:20-22; 29:17) Nayarin labay mo met ya iyaralan na Biblia. Ipaimanom ed sikato iray nanduruman teksto tan publikasyon ya intarya na “matoor tan makabat ya aripen.” (Mateo 24:45) Nayarim met ya itagar a miaral tan payurongen ed abay mo. Sarag mon gawaen irayan amin agla pigan ipapuso to so Makasulatan a simbawa.

Ingen ta duma so situasyon no say adispelo et aliwa lan menor de edad tan anggapo la’d pudir mo. Binilin nen apostol Pablo iray Kristiano ed Corinto: “Agkayo miulop ed bengatlan too ya anggan tatawagen ni na agi no managlawan, odino maagum, odino manangigalang ed talintao, odino manag-ayew, odino managbuanges, odino managpatubo, dia ed satan a too agkayo miulop a mangan.” (1 Corinto 5:11) Anggaman walaray kipapasen a nayarin mankaukolan na pitongtong ed samay adispelo pian naasikaso iray pamaakaran nipaakar ed pamilya, nakaukolan a panggunaetan na Kristianon ateng a paliisan so pilimog ed sikato no agmet nakaukolan.

Sano disiplinaen na saray Kristianon pastol so nankasalanan ya anak, inkamakulangkulang no salien mon ipulisay odino palemewen so desisyon dan nibase ed Biblia. No pilaan mo so rebelden anak mo, sikatoy agnaikdan na peteg a proteksion sumpad Diablo. Diad tua et iiyan mo’d kapeligroan so mismon espiritualidad mo. Diad biek a dapag, no mitulongan ka ed sagpot na saray pastol, sika so mansiansian “mabiskeg [ed] pananisia” tan niiter moy sankaabigan a tulong parad anak mo.​—1 Pedro 5:9.

Tulongan Ka nen Jehova

No manrebelde man bilang so anak mo, tandaan ya agmo bukbukor. Asagmak met la itan na arum a Kristianon atateng. Sakey ni, anggan anton subok so dalanen tayo, nayarian itayon tulongan nen Jehova.​—Salmo 68:19.

Ompapeg ed si Jehova diad pikakasi. Regular a milimog ed Kristianon kongregasyon. Suportaan so panagdisiplina na saray aturon pastol. No gawaen mo iraya, makapansiansia kan matoor. Tan makatulong met so maabig ya ehemplom pian onkiwas so anak mo ed maaron imbitasyon nen Jehova ya ompawil ed sikato.​—Malaquias 3:6, 7.

[Saray litrato ed pahina 18]

Onggamor na biskeg manlapud pikakasi tan ed Kristianon kongregasyon