Masulok To Lan Sanlasus​—Makabkabaliksan ni Bilay To

SI Elin so sakey ed saray 60 ed Sweden a diad agano ni et nibilang ed saramay manedad na 105 patagey. Say edad to et 105. Anggaman sikatoy apukok ed sakey a panagkomponian a parad saray maedad la, sarag ni na laman to so mantultuloy a manlingkor bilang aktibon Tasi nen Jehova, a gagawaen to itan ed masulok lan 60 a taon.

Sano manpupulong si Elin, tutumboken to so ehemplo nen Pablo a nampulong ed amin a binmisita ed sikato sanen nikulong ed sakey ya abung. (Gawa 28:16, 30, 31) Aanamoten met nen Elin so amin a pankanawnawan nitongtong so maong a balita a naromog ed Biblia diad saray managlinis, dentista, doktor, manag-ayos na buek, ners, tan ed arum nira ditan. Sagpaminsan et itatagar na saray kakongregasyon to iray iyaaralan da na Biblia diad ibibisita ra ed sikato pian minabang met ira ed pikakabat tan eksperiensya to.

Labalabay na saray kakongregasyonan nen Elin so inkamasayaksak tan inkamausisa to. Oniay inkuan na sakey a kaparan Tasi: “Sikatoy pankelkelawan lapud amta to iray nagagawa ed kongregasyon. Tan natatandaan to so kangaranan na amin ya ugugaw tan saramay agano nin inmalis ed kongregasyon to.” Kabkabat met si Elin ed inkamaparawes, inkamapaelek, tan inkapositibo to.

Balet, panon a napansiasiansia nen Elin a maliket tan makabkabaliksan so bilay to? Inagew-agew ton babasaen so teksto ed Biblia diad bokletan Usisaen so Kasulatan ya Inagew-agew, ya impalapag na saray Tasi nen Jehova. Kada agew et manbabasa met na kabiangan na Biblia diad tulong na sakey a panagpabaleg na letra. Ipaparaan to iray sinimban pantitipon na saray Tasi nen Jehova, tan lapud agto la sarag ya atendian iratan, dedengelen toray inrekord a programa ed sarayan pantitipon. No regular tayon basaen so Biblia tan saray nibase ed Biblian publikasyon, tan agtayo papaulyanan iray pantitipon, natulongan itayo met a nawalaan na makapenek tan makabkabaliksan a bilay, anggan anto lay edad tayo.​—Salmo 1:2; Hebreos 10:24, 25.