Say Salita nen Jehova et Mabilay

Saray Pabitar ed Libro na Isaias​—II

SI Isaias so matoor ya anumpal ed kimey a niganggan ed sikato bilang propeta. Tinmua la iray impropesiya to sumpad samploran-tribu a panarian na Israel. Wala ni so ipasakbay to nipaakar ed pansumpalan na Jerusalem.

Naderal so Jerusalem, tan nakautibo iray manaayam ditan. Balet, aliwan permanente so pankibalatar na satan. Kayari na sakey a peryodo, nipawil so tuan panagdayew. Saya so manunan mensahe a naromog ed Isaias 36:1–66:24. * Nagunggonaan itayo diad pangusisa ed sarayan kapitulo lapud dakel ed saray propesiya ed sayan kabiangan na libro so walaan la na baleg, odino kaunoran, a kasumpalan diad panaon tayo odino nasumpal diad magano lan arapen. Naromog met ed sayan kabiangan na libro iray makapasagyat a propesiya nipaakar ed Mesias.

“NIA, ONSABI SO AGEW”

(Isaias 36:1–39:8)

Diad koma-14 a taon ya uley nen Arin Ezekias (732 B.C.E.), saray Asiryano et linmusob ed Juda. Balet insipan nen Jehova a salimbengan to so Jerusalem. Angangga so makapasesgan ilulusob da sanen pinatey na sakey ya anghel nen Jehova so 185,000 a sundalon Asiryano.

Nansakit si Ezekias. Anggaman ontan, inebatan nen Jehova so pikakasi to tan pinaabig To, ya inaruman To ni na 15 a taon so bilay to. Sanen imbaki na ari na Babilonia iray manangilaman to pian miliket ed sikato, agmakabat ya impanengneng nen Ezekias ed sikara so amin a kayamanan to. Impasabi nen Isaias so mensahe nen Jehova ed si Ezekias, a kuan to: “Nia, onsabi so agew, sano amin a wala ed abung mo, tan saray tinipon na saray atateng mo ed panangisimpenan angga ed saya ya agew, niyakar ira naani ed Babilonia.” (Isaias 39:5, 6) Masulok a 100 a taon ed saginonor, tinmua iyan propesiya.

Makasulatan Iran Tepet a Naebatan:

38:8, Maung a Balita​—Anto iray “balitang” ya anandaan ed inyatras na anino? Lapud inusar diad Ehipto tan Babilonia nen komawalon siglo B.C.E. iray relo ya ibabase ed aninon papawalaen na sinag na agew, sarayan balitang so nayarin manukoy ed saray panandaan na satan a klase na relo a posiblin inusar nen Acaz ya ama nen Ezekias. Odino nayarin walay takayan diad loob na palasyo, tan say poste ed gilig na satan a takayan et kalkalnan mangipapatnag na anino diad saray balitang, a nayarin kinmana a panandaan ed oras.

Saray Leksion Parad Sikatayo:

36:2, 3, 22. Anggaman nakal si Sebna ed posisyon to bilang mayordomo, sikatoy naabuloyan nin mantultuloy a manlingkor ed ari bilang sekretaryo na samay sinmalat ed sikato. (Isaias  22:15, 19) No naandian itayo na pribilehyo ed loob na organisasyon nen Jehova lapud pigaran rason, nepeg a mantultuloy itayon manlingkor ed Dios antokaman a kimey ya iyaabuloy ton gawaen tayo.

37:1, 14, 15; 38:1, 2. Sano nagogonigon itayo, makabat so pampikasi ed si Jehova tan sigpot itayon manmatalek ed sikato.

37:15-20; 38:2, 3. Sanen sesesgaen na Asirya so Jerusalem, say manunan nampagaan nen Ezekias et ompan nabalaw so ngaran nen Jehova sano naderal so Jerusalem. Ontan met, sanen naamtaan nen Ezekias a makapatey so sakit to, aliwa labat a say dili to so nampagaan to. Say mas nanaburidoan to et ompan naapektoan so Davidikon linya na saray arari no sikatoy ompatey ya andian na ilalak a mananawir. Nampagaan to met no siopa so mangidaulo ed pibakal ed saray Asiryano. Singa si Ezekias, nonoten tayo a mas importante ni so kapasantos na ngaran nen Jehova tan pakasumpal na gagala to nen say dilin kilalaban tayo.

38:9-20. Ibabangat ed sikatayo na sayan kanta nen Ezekias ya anggapo lay mas importante ed bilay nen say pakapandayew ed si Jehova.

“SIKATO NIPAALAGEY NAANI”

(Isaias 40:1–59:21)

Kayarin tuloy ya impasakbay nen Isaias so kaderal na Jerusalem tan say pakakautibo na saray Judio diad Babilonia, impropesiya to so nipaakar ed kipawil da. (Isaias 40:1, 2) “Sikato [say Jerusalem] nipaalagey naani,” so kuan na Isaias 44:28. Saray talintao na dirios ed Babilonia et “nagawa ra ya awit.” (Isaias 46:1) Naderal so Babilonia. Asumpal iyan amin manga duaran siglo ed saginonor.

Ibaki nen Jehova so lingkor to bilang “silew na saray Gentil.” (Isaias 49:6) “Saray tawen” na Babilonia, odino saray manuuley ditan, et “naandipat ira naani a singa asewek,” tan “ompatey” iray uuleyan to; balet ‘saray balor na tenger na adakep a bii ya anak na Sion et naukbar.’ (Isaias 51:6; 52:2) Oniay inkuan na Dios ed saramay onasingger ed sikato tan ontalineng: “Manggawa ak naani na ando lan ando a sipan ed sikayo, a sikato so saray ag-onsaew a panangasi nen David.” (Isaias 55:3) Sikatayo so ‘manliket ed kinen Jehova’ no manbilay itayo a mitunosan ed saray matunong ya estandarte na Dios. (Isaias 58:14) Diad biek a dapag, say kasalanan na saray totoo so sengegan na ‘inkisian da ed Dios.’​—Isaias 59:2.

Makasulatan Iran Tepet a Naebatan:

40:27, 28​—Akin ya inkuan na Israel a: “Say dalan ko nisanib ed kinen Jehova, tan say inkatunong a nipaakar ed siak linmabas a nanlapu ed Dios ko”? Nayarin inisip na arum a Judion walad Babilonia ya ag-ira nanenengneng nen Jehova odino agto naiimano iray sasagmaken dan ag-inkahustisya. Nipanonot ed sikara a say kipapasen da ed Babilonia et nanenengneng na Manamalsa na dalin, ya agbalot nakekesawan odino onkakapuy.

43:18-21​—Akin a nikuan ed saramay pinmawil ya adestiero ya ‘agda nodnonoten iray inmuna a bengatla’? Agkabaliksan na saya a lingwanan da la iray apalabas ya impangiliktar nen Jehova ed sikara. Imbes, labay nen Jehova a sikatoy idayew da unong ed “balo a bengatla” a naeksperiensya ran mismo, a singa say agnasigensigen a pambaroy da a paarap ed Jerusalem, a nayarin mas antikey a rota diad kalawakan. Say “baleg ya ulop” a makaliktar ed “baleg ya irap” so nawalaan met na balo tan personal a rason pian mangigloria ed si Jehova.​—Apocalipsis 7:9, 14.

49:6​—Panon a say Mesias et “silew na saray Gentil” anggaman parad saray Israelita lambengat so ministeryo to diad dalin? Ontan so impanawag ed si Jesus lapud samay agawa kayari na impatey to. Iyaaplika na Biblia so Isaias 49:6 dia ed saray babangatan to. (Gawa 13:46, 47) Natan, saray alanaan a Kristiano, a tutulongan na baleg ya ulop na saray managdayew, so manlilingkor bilang “silew na saray Gentil,” a manliliwawa ed totoo ya “angga ed kasampotan na dalin.”​—Mateo 24:14; 28:19, 20.

53:10​—Panon a si Jehova et nanggayaga ed impatey na Anak to? Si Jehova, a maabagey tan  maempatya a Dios, et maseguron asakitan sanen anengneng ton nanirap so Anak to. Anggaman ontan, Sikatoy nanggayaga ed mabulos ya intulok nen Jesus tan ed amin a nasumpal diad panirap tan ipatey na Anak to.​—Uliran 27:11; Isaias 63:9.

53:11​—Anto so pikakabat a ‘pamatunongan na Mesias ed dakel a totoo’? Saya so pikakabat ya agamoran nen Jesus sanen linma dia ed dalin, sanen nagmaliw a too, tan sanen agmakatunongan a nanirap ya anggad inatey. (Hebreos 4:15) Diad ontan et nitarya to so dondon bagat, a kinaukolan pian nagamoran na saray alanaan a Kristiano tan say baleg ya ulop so matunong a talindeg ed imaton na Dios.​—Roma 5:19; Santiago 2:23, 25.

56:6​—Siopa so “saray sankaili,” tan diad anton paraan a ‘kakawaloen da so impisipanan’ nen Jehova? “Saray sankaili” et saray “arum a karnero” nen Jesus. (Juan 10:16) Kakawaloen odino bebembenan da so balon sipanan lapud uunoren da iray ganggan a nisiglaot ed satan, sigpot iran mikokoopera ed saray ginawan uksoyan panamegley na satan a sipanan, minanabang ira ed parehon espiritual a tagano a singa ed saray alanaan a Kristiano, tan tutulongan da iratan diad panangipulong ed Panarian tan panaggaway babangatan.

Saray Leksion Parad Sikatayo:

40:10-14, 26, 28. Si Jehova so mabiskeg tan matamoy, sankamakapanyarian tan sankamakabatan, tan walaan na malaklaknab a pakatalos ya agtayo narandan.

40:17, 23; 41:29; 44:9; 59:4. Say pialyansa ed politika tan saray talintao et ‘kaapaan.’ Anggapon balot so kakanaan na panmatalek ed sikara.

42:18, 19; 43:8. Say pangibaliwala ed nisulat a Salita na Dios tan ag-italineng ed panangibangat to panamegley na “matoor tan makabat ya aripen” et mankabaliksan na pagmaliw a bulag tan telek ed espiritual.​—Mateo 24:45.

43:25. Punasen nen Jehova iray kasalanan parad dilin pankaabigan to. Say kibulos tayo manlapud panangaripen na kasalanan tan patey tan pakagamor na bilay so onkokomadua labat ed kapasantos na ngaran nen Jehova.

44:8. Sikatayo so tutulongan nen Jehova, a sikatoy niyaliling ed agnagiing tan malet a batondampay. Nepeg ya ag-itayon balot ontakot a mangipulong ed inka-Dios to!​—2 Samuel 22:31, 32.

44:18-20. Say panagtalintao et pakapatnagan na mauges a puso. Nepeg ya anggapo lay sananey a pangiyapasakeyan tayoy puso tayo noag si Jehova labat.

46:10, 11. Say pakayari nen Jehova a ‘mamasiansia ed simbawa to,’ salanti, manumpal ed gagala to, so seguradon mamaneknek ed inka-Dios to.

48:17, 18; 57:19-21. No sikatayo so manilalo ed si Jehova parad kilalaban, onapit ed sikato, tan mangimano ed saray ganggan to, ondaak so kareenan tayo a singa saray danum a manag-agus ed ilog tan saray matunong a gawa tayo so ondakel a singa saray daluyon na dayat. Saramay mangibabaliwala ed Salita na Dios et singa ra “saray nagulo a dayat.” Anggapo so kareenan da.

52:5, 6. Lingon inisip na saray taga-Babilonia ya agmakayari so tuan Dios. Agda binidbir a say impakaaripen na Israel et makasengeg ed impanermen nen Jehova ed totoo to. Sano makasagmak na desyang so arum, nepeg ya ag-itayo mangiter a tampol na konklusyon no akin a nasasagmak da itan.

52:7-9; 55:12, 13. Walaan itayo na taloran rason pian maliket a mibiang ed panangipulong ed Panarian tan panaggaway babangatan. Saray sali tayo so marakep ed pakanengneng na saray mapaabeba a naeerasan ed espiritual. Sikatayo so minengnengan ed si Jehova ed “mata tan mata,” odino nawalaan itayo na maapit a relasyon ed sikato. Sikatayo met so manggayaga ed espiritual ya inkaaligwas.

52:11, 12. Pian makanepegan itayo a man-awit ed “saray kagawaan nen Jehova,” salanti, saray probisyon to parad sagradon panaglingkor, nepeg a sikatayoy malinis ed espiritual tan moral.

 58:1-14. Say pankunkunwari a debosyonado tan pantunongtunongan et kaapaan. Nepeg ya ipatnag lawas na saray tuan managdayew so puron debosyon da ed Dios tan panangaro ed agagi diad salita tan gawa.​—Juan 13:35; 2 Pedro 3:11.

59:15b-19. Iimatonan nen Jehova iray kurang na too tan sikatoy onsalet diad panaon ya inggeter to.

SIKATO SO “SAKEY A BALANGET NA KALIMGASAN”

(Isaias 60:1–66:24)

Diad pangipapabitar ed kipawil na tuan panagdayew nensaman tan diad panaon tayo, oniay imbaga na Isaias 60:1: “Onalagey ka, onsinag ka; ta say liwawam onsabi; et say gloria nen Jehova ompelnak ed sika.” Say Sion et magmaliw a “sakey a balanget na kalimgasan ed lima nen Jehova.”​—Isaias 62:3.

Impikasi nen Isaias ed si Jehova iray totoo ed nasyon to a mangipatnag na pagbabawi legan na inkadakep da ed Babilonia. (Isaias 63:15–64:12) Kayarin impabitar na sayan propeta so pidumaan na saray tuan lingkor ed saray palso, inyabawag to no panon a bendisyonan nen Jehova iramay manlilingkor ed Sikato.​—Isaias 65:1–66:24.

Makasulatan Iran Tepet a Naebatan:

61:8, 9​—Anto so ‘maando a sipanan,’ tan siopa iray “bini”? Saya so balon sipanan a pinaletan nen Jehova ed saray alanaan a Kristiano. Say “bini” et saray “arum a karnero,” salanti, saray minilyon a totoo ya onkikiwas ed mensahe ra.​—Juan 10:16.

63:5​—Panon a say sanok na Dios so anayakop ed sikato? Kontroladon emosyon so sanok na Dios, say matunong ya isasanok to. Say sanok to so manasayakop tan mamapakiwas ed sikato pian mangukom diad matunong a paraan.

Saray Leksion Parad Sikatayo:

64:6. Agnisalba na ag-ayadyarin totoo so inkasikara. No nipaakar ed pananakbong ed kasalanan, anggapo so pidumaan na saray matunong a kiwas da ed saray kawes ya arutakan.​—Roma 3:23, 24.

65:13, 14. Bebendisyonan nen Jehova iray matoor a lingkor to, a daakan ton itatarya so espiritual a pankaukolan da.

66:3-5. Kagula nen Jehova so pansimpisimpitan.

‘Manggayaga Kayo’

Talagan makaligliwa iray propesiya a panangipawil parad saray matoor a Judio ya adakep ed Babilonia! “Manggayaga tan manliket kayo ed ando lan ando ed saman a palsaen ko,” kuan nen Jehova. “Ta nia, palsaen ko so Jerusalem a sakey a panliketan, tan say ombaley ed sikato a sakey a liket.”​—Isaias 65:18.

Sikatayo met so manbibilay la diad panaon a say dalin so nasasakbongan na kabilungetan tan saray nasyon et wala ed makapal a bilunget. (Isaias 60:2) Manbibilay itayo la ed “saray panaon a maatap.” (2 Timoteo 3:1) Kanian makapaseseg a tuloy ed sikatayo so mensahe nen Jehova nipaakar ed kilalaban, a naromog ed libro na Biblia ya Isaias.​—Hebreos 4:12.

[Paimano ed leksab]

[Litrato ed pahina 8]

Amta yo ta so manunan rason no akin ya impikasi nen Ezekias a sikatoy nilaban ed saray Asiryano?

[Litrato ed pahina 11]

‘Agayla so kalimgasan ed tapew na saray palandey iray sali na mangiyakar na saray maong a balita!’