Si Samuel so Anuporta ed Tuan Panagdayew

BINAAT nen propetan Samuel iray kapananisiaan to a kinmerew na toon manari ed sikara tan binilin to ira a tuloken da so Dios. Pian nipabidbir to a walay autoridad to, sikatoy kinmerew ed si Jehova na sakey a tanda panamegley na sakey a bagyo. Mataltalag iray bagyo ed Israel diad saman a tiempo na taon lapud panaon na panag-ani na trigo. Ingen, say Dios so amakarol tan amauran. Kanian saray totoo so tinmakot a maong ed si Jehova tan ed manangilaman to a si Samuel.​—1 Samuel 12:11-19.

Si propetan Samuel et sakey met a managsulat. Saray maawaran a salaysay to a napno na makapainteres iran ebento so mangokobre ed ngalngali 330 a taon, a mangilaktip ed saray makatantandan gawa na saray Ukom ed Israel. Singa bilang, say tuan istorya na bilay nen Samson, a sankabiskegan a toon nambilay diad dalin, so nagmaliw a tema na saray anlong tan drama ontan met ed saray arum a palabas ed entablado tan pelikula. (Uko-ukom, kapitulo 13-16) Insulat met nen Samuel so nipaakar ed si Rut tan say katulangan ton si Noemi, a parehon abalo tan pobri. Sayan tuan istorya a walaay maliket a nansumpalan so makapainteres met.​—Rut, kapitulo 1-4.

Antoray naaralan tayo manlapud sulsulat tan bilay nen Samuel? Panon ton sinuportaan so tuan panagdayew?

Say Impanugaw To

Say ama nen Samuel a si Elkana et mandadayew ed si Jehova tan sakey a maaron asawa. Si Ana ya asawa to et sakey a biin mabiskeg ed espiritual. Diad abung nen Jehova ed Siloh, sayan lepes a bii so masimoon a nampikasi tan angisipan, a kuan to: “O Jehova na saray ehersito, no tua a nengnengen mo so kaermenan na aripen mo a bii, tan nonoten mo ak, tan agmo lingwanan so aripen mo a bii, noag ingen mangiter ka ed aripen mo a bii na sakey ya anak a laki, sirin sikato so iter ko ed Jehova ed saray amin ya agew na bilay to tan anggapo so pangiskis ya onlabas ed ulo to.” (1 Samuel 1:1-11) Kabaliksan na saya a say ugaw so iyapay a manlingkor ed si Jehova.

Mareereen a nampikasi si Ana. ‘Saray bibil to lambengat so mitimiti,’ kuan na salaysay. Abaloan na Atagey a Saserdoten si Eli a sikatoy abuek kanian binaat to. Anggaman ontan, marespeton impaliwawa nen Ana so kipapasen to, kanian inkuan nen Eli: “Onla ka ed kareenan, et say Dios na Israel yabobon to komon so kerew mo a kinerew mo ed sikato.” Talagan dinengel nen Jehova so pikakasi nen Ana, ta oniay intuloy na salaysay: “Et agawa, sanen say panaon sinmabi, a si Ana nanlukon, tan angiyanak na sakey a laki, et tinawag to so ngaran to a Samuel, ya inkuan to, Lapu ed sikato so kinerew ko ed Jehova.”​—1 Samuel 1:12-20.

Si Samuel so pinabaleg dia ed “kadudusa tan panamilin na Katawan.” (Efeso 6:4) Sanen apakso la, sikatoy inawit nen Ana diad abung na Dios ed Siloh tan impresenta to ed Atagey a Saserdoten si Eli. Say ugaw so inasikaso nen Eli tan sikato so “nankatangbayan ed Jehova.” Si Ana so malikeliket, a napatnagan itan diad makapatenyeg iran balikas na pisasalamat to ya insulat a mismo nen Samuel diad saginonor.​—1 Samuel 2:1-11.

No sakey kan ateng, kasin ipapaseseg mo ed ananak mo ya iyuna ra ed bilay da so panaglingkor ed si Jehova? Say panuporta ed tuan panagdayew so sankaabigan a napangusaran na sakey a too ed biskeg to.

Nipasal a maong si Samuel ed bilay diad santuaryo. Sikatoy “binmaleg ed arap nen Jehova” tan nagmaliw a ‘labalabay nen Jehova tan saray totoo.’ On, sikatoy pinabpabli na arum lapud impangipatnag to na maridios iran kalidad.​—1 Samuel 2:21, 26.

Balet, aliwan ontan iray andi-kakanaan ya ilalak a lalaki nen Eli, si Hopni tan Phinehas, ya “agda amta si Jehova.” Sikaray angagamil na seksual ya imoralidad tan aalaen da iray sankaabigan  a kabiangan na bagbagat ya aawiten na totoo ed santuaryo. Angibaki la so Dios na sakey a propeta pian iyabawag so dusa a nailaloan nen Eli, ya angilaktip ed ipatey na duaran ilalak to. (1 Samuel 2:12, 15-17, 22-25, 27, 30-34) Usaren nen Jehova si Samuel pian mangipasabi na sananey nin mensahe na panangukom.

Nanlingkor si Samuel Bilang Propeta

Say Dios inkuan to ed si Samuel: “Imbagak ed [si Eli] ya ukomen ko so abung to lawas, ta say inkauges a naamtaan to, lapu ed saray anak to a lalaki angiyakar ira na ayew ed sikara lanlamang, tan sikara so agto binaat.” Satan a mensahe so aliwan mainomay ya ipasabi, balet pinilit nen Eli si Samuel ya ibaga ton amin itan. Kanian imbaga nen Samuel so amin a sinalita nen Jehova. Talagan kinaukolan toy manpakpel!​—1 Samuel 3:10-18.

Sanen binmaleg la si Samuel, naamtaan na interon Israel a sikatoy propeta na Dios. (1 Samuel 3:19, 20) Ginmapo so panangukom ya impasakbay nen Samuel sanen say Israel so pirmin tinalo na saray Filisteo. Inatey si Hopni tan Phinehas diad bakalan, tan sinamsam na saray Filisteo so kaban na sipan nen Jehova. Sanen naamtaan nen Eli ya inatey iray ilalak to tan asamsam so Kaban, sikatoy abitwag ed yurongan to tan aputer so tenger to kanian inatey.​—1 Samuel 4:1-18.

Duamplon taon ed saginonor, pinaseseg nen Samuel iray Israelita a taynan da so palson panagdayew. Kinmiwas ira diad impaneral da ed saray talintao ra, impanayunal da, tan impangipatua ra ed saray kasalanan da. Sikara so impikasian tan inyapayan nen Samuel na bagat a popoolan. Anto so resulta? Sanen linmusob iray Filisteo, winetwet ira na Dios, tan atalo ira sanen linmusob ed sikara so Israel. Lapud panamendisyon na Dios, inmaligwas a maong so kipapasen na saray Israelita, tan abawi ra so teritoryan sinamsam na saray Filisteo.​—1 Samuel 7:3-14.

Talagan sinuportaan nen Samuel so tuan panagdayew. Singa bilang, sineguro to ya arum ed saray asamsam ed bakalan so nausar ed pangapiger ed tabernakulo. Sikatoy tinmulong a mangorganisa ed saray selebrasyon na Paskua tan ed kimey na saray Levitan managbantay na wangalan. (1 Awaran 9:22; 26:27, 28; 2 Awaran 35:18) Manlapud abung to diad Rama, si Samuel so tinaon a manbabaroy pian mangukom diad nanduruman syudad. Sikatoy binidbir na totoo bilang matua tan agmanangidumaduma. Lapud rerespetoen na totoo si Samuel, atulongan to ira diad espiritual paraan. (1 Samuel 7:15-17; 9:6-14; 12:2-5) Say inkamatua tan inkabiskeg na pananisia to ed Dios so andi-duaruwan amakiwas ed dakel pian aligen da so ehemplo to. Kasin walaan na ontan ya epekto ed sika so kurang nen Samuel?

Kinmerew so Israel na Sakey ya Ari

Lapud masiken lay Samuel, tinuro to iray ilalak to a si Joel tan Abias bilang uko-ukom. “Ag-ira nanakar dia ed saray dalan to, noag ingen sinmipa ra a maunor ed agum, tan angala ra na saray pasuksok, tan dineral da so inkatunong.” Say kondukta ra so anagdag ed saray mamasiken ed Israel pian onkerew na sakey ya ari. (1 Samuel 8:1-5) Saya so mauges ed imaton nen Samuel. Balet sanen impikasi to so nipaakar ed satan, oniay inkuan nen Jehova: “Aliwan sikay impulisay da; siak so impulisay da ya ari ra.” (1 Samuel 8:6, 7, MB) Imbaga na Dios ed si Samuel ya iter to so kerew na totoo balet pinasakbayan to ra a naandi so pigaran kawayangan da no sikaray uleyan na sakey a toon ari. Sanen mapilit iray totoo, imbaki nen Jehova si Samuel a lanaan to si Saul bilang ari.​—1 Samuel 8:6-22; 9:15-17; 10:1.

Sinuportaan nen Samuel iyan uksoyan  anggaman napapagaan. Kayari na impanalo na Israel sumpad saray Amonita, tinipon to so totoo diad Gilgal pian pekderan so inkaari nen Saul. (1 Samuel 10:17-24; 11:11-15) Nirepaso nen Samuel so awaran na Israel tan binilin to so ari tan saray totoo a tuloken da si Jehova. Inebatan nen Jehova so pikakasi nen Samuel panamegley na sakey ya anggapo’d-panaon a bagyo, unong ya asalambit diad gapo. Lapud satan, apakiwas so totoo a mangaksobi ed lingo ran impangipulisay ed si Jehova. Sanen kinerew da ya ipikasian ira nen Samuel, oniay inyebat to: “Arawi pa komon ed siak a mankasalanan ak sumpa ed Jehova ed itundak a mikasi nipaakar ed sikayo, balet sikayo so ibangat ko dia ed maong tan maptek a dalan.” Agaylan abig ya ehemplo na matoor a panangaro ed si Jehova tan ed totoo to! (1 Samuel 12:6-24) Mabulos ka met kasi a manuporta ed saray uksoyan parad tuan panagdayew tan mangipikasi ed saray kapananisian?

Say Inmunan Duaran Too a Nan-ari ed Israel

Si Saul so mapaabeban too ya inabobonan na Dios. (1 Samuel 9:21; 11:6) Balet diad saginonor et imbaliwala to so panangiwanwan na Dios. Singa bilang, sikatoy binaat nen Samuel lapud agmakankaanos ya impangiyapay to na bagat imbes a manalagar, unong a niganggan ed sikato. (1 Samuel 13:10-14) Sanen tinmunganga si Saul diad agto impamatey ed ari na Amalekita a si Agag, oniay inkuan nen Samuel ed sikato: “Si Jehova pinilat to so panarian na Israel manlapu ed sika manlapu ed sayan agew, tan sikato so initer to ed sakey a kaabay mo, a magmaong nen sika.” Si Samuel a mismo so amatey ed si Agag tan nandageyem lapud si Saul.​—1 Samuel 15:1-35.

Diad saginonor, oniay inkuan nen Jehova ed si Samuel: “Panon kabayag so pandageyem mo nipaakar ed Saul, anta sikato so pinaulyan ko ed inkaari to ed Israel?” Diad saman, imbaki nen Jehova si Samuel ed Betlehem pian lanaan to so ilalak nen Jesse bilang ari. Sansakey a sinuri nen Samuel iray ilalak nen Jesse anggad inabobonan nen Jehova a lanaan to so bolirek, si David. Diad saman ya agew, akaaral si Samuel na makanan leksion: “Si Jehova onnengneng ya aliwa a singa say too ya onnengneng, ta say too onnengneng ed mapaway a nengneng, balet si Jehova onnengneng ed puso.”​—1 Samuel 16:1-13.

Lapud asakitan si Samuel ed intunganga nen Saul, seguradon sikatoy naermenan a maong sanen inggagaem nen Saul a pateyen si David! Balet, anggan wala iratan a subok, nansiansian aktibo so masiken lan Samuel tan ginawa toy anggaay nayarian to ed panaglingkor ed si Jehova.​—1 Samuel 19:18-20.

Say Pakanodnonotan ed si Samuel

Nanermen so Israel sanen inatey si Samuel, a sakey a mapaabeba tan makmakpel a propeta ya angimpluensya ed bilay na dakel. (1 Samuel 25:1) Ag-ayadyari si Samuel, tan no maminsan et nalilingo ed panaghusga to. Balet, anggaman ed saray limitasyon to, inter to so nikabkabiig a debosyon to ed si Jehova tan nansagpotan ton tulongan so arum a gawaen met so ontan.

Dakel lay anguman manlapula’d panaon nen Samuel, ingen say istorya na bilay to so walaan na makanakana iran leksion parad sikatayo. Manuna ed amin, si Samuel so angagamil tan anuporta ed tuan panagdayew ed si Jehova. Kasin ontan so gagawaen mo?

[Kahon ed pahina 16]

MOLIMOLIEN SO BILAY NEN SAMUEL

• No panon a si Samuel et imbangat na atateng to unong ed salitay Dios, pabaleg yo met so ananak yo unong ed “kadudusa tan panamilin na Katawan.”​—Efeso 6:4.

• Paseseg yo iray anak yo ya aligen da si Samuel, a gawaen dan manunaan ed bilay da so panaglingkor ed si Jehova.

• Si Samuel so pinabpabli na arum lapud impangipatnag to na maridios iran kalidad, kanian sikato so maabig ya ehemplo tayo.

• Ginawa nen Samuel so amin a nayarian to pian suportaan so tuan panagdayew, ontan met komon so gawaen tayo.

[Litrato ed pahina 15]

Sinuportaan nen Samuel so tuan panagdayew tan mabulbulos a tinmulong ed totoo diad espiritual paraan