Tulongan so Arum a Mangunor ed Ibabangat na Biblia

“Say naplag dia ed mabuna a dalin, saraya so totoo a dia ed masimpit tan maong a puso, nen nadngel da so salita, sikato so binembenan da, tan manbunga ra a maanos.”​—LUCAS 8:15.

1, 2. (a) Anto so inkadesinyoan na libron Anto so Peteg ya Ibabangat na Biblia? (b) Diad imbeneg iran taon, panon a benendisyonan nen Jehova iray sagpot na totoo ton manggawa na babangatan?

 “ALAY abig iyan libro. Labalabay iya na saray iyaaralan ko tan labalabay ko met itan. Mainomay ya igapo ed sayan libro so pangiyaral na Biblia ed totoo anggan diad mismon puerta ra.” Ontan so imbaga na sakey a sigpot-panaon a payunir a ministro na saray Tasi nen Jehova nipaakar ed libron Anto so Peteg ya Ibabangat na Biblia? * Nipaakar ed sayan publikasyon, onia met so imbaga na sakey a masiken lan manangiyabawag na Panarian: “Pribilehyok so impakatulong ed dakel lan totoo pian nakabatan da si Jehova diad aktibon pibibiang ko ed ministeryo ed loob na 50 taon. Balet nibagak ya alay abig iyan publikasyon ed panangiyaral. Makapalikliket iray balibalin ilustrasyon tan litrato.” Onia met kasi so nalilikna yo ed libron Ibabangat na Biblia? Sayan katulongan ed panangiyaral na Biblia so adesinyo pian ontulong ed sikayon manumpal ed ganggan nen Jesus: “Onla kayo sirin, tan manggawa kayo na saray babangatan ed amin a nasyones . . . ya ibangat yo ran mangunor na amin a bengabengatla ya ingganggan ko ed sikayo.”​—Mateo 28:19, 20.

² Seguradon naliliketan si Jehova ed pakakanengneng to ed 6.6 milyon a Tasi to a mabulos a manguunor ed ingganggan nen Jesus a manggawa na saray babangatan. (Uliran 27:11) Mapatnag a bebendisyonan nen Jehova iray sagpot da. Alimbawa, legan na 2005 et nipulong so maong a balita diad 235 a nasyon tan, diad promedyo et walay nikonduktan masulok a 6,061,500 a panangiyaral na Biblia. Bilang resulta, dakel so totoon akadngel ed ‘salita na Dios tan inawat da, ya aliwan singa salita na totoo, balet unong ed katuaan, say salitay Dios.’ (1 Tesalonica 2:13) Diad imbeneg a duaran taon, masulok a kapalduan milyon a balon babangatan so angitunos ed kabibilay da ed saray estandarte nen Jehova tan indedika ray bilay da ed sikato.

3. Antoran tepet nipaakar ed pangusar ed libron Ibabangat na Biblia so usisaen ed sayan artikulo?

³ Alikna yo la kasi so liket ed impangiyaral yo na Biblia ed sakey a too? Diad sankamundoan, wala niran siansia so totoon walaay “masimpit tan maong a puso,” a sano narengel da so salita na Dios et ‘bembenan da itan, tan manbunga ra a maanos.’ (Lucas 8:11-15) Konsideraen tayo natan no panon yon nausar so libron Ibabangat na Biblia diad panaggaway babangatan. Usisaen tayo so taloran tepet ed sayan artikulo: (1) Panon kayon makapangigapo na panangiyaral na Biblia? (2) Antoran metodo ed panagbangat so sankaepektiboan? (3) Panon yon natulongan so  sakey a too pian sikatoy aglabat magmaliw ya iyaaralan noagta magmaliw met a managbangat na Biblia, say nisulat a Salitay Dios?

No Panon Kayon Makapangigapo na Panangiyaral na Biblia

4. Akin a masuyat so arum a manaral na Biblia, tan panon tayo iran natulongan pian mabulos iran paiyaralan?

⁴ No sikayo so pabaliwen ed sakey a maawang ya ilog diad maminsan labat ya ilukso, nayarin agyo itan gawaen. Balet no walaray bato a pantontonan pian makabaliw kayo ed satan ya ilog, seguradon labay yon salien itan. Mipadpara, say okupadon too so nayarin masuyat a manaral na Biblia. Nayarin isipen to a nakaukolan so dakel a panaon tan sagpot pian aralen so Biblia. Panon yon natulongan so unabung pian sikatoy mabulos a mangawat ed satan? Diad pangikondukta na antikey tan makaibangat iran panagaral, nausar yo so libron Ibabangat na Biblia pian nasagyat yoy sakey a too a paiyaralan lan regular ed Salitay Dios. No manparaan kayon maong, say kada ibisita yo ed satan a too et magmaliw a singa-baton pantontonan to pian sikato so makapikaaro ed si Jehova.

5. Akin a nakaukolan yon kabisadoen so libron Ibabangat na Biblia?

⁵ Balet, sakbay yon natulongan so arum pian nagunggonaan ira ed libron Ibabangat na Biblia, nakaukolan yo nin kabisadoen a maong itan. Kasin abasa yo la so interon libro? Sayan libro so inawit na sakey a sanasawa sanen nambakasyon ira tan binasa ra itan legan iran manrerelaks ed gilig na baybay. Sanen sikaray inasinggeran na sakey a biin managlako ed saray turista, naimano to so titulon Anto so Peteg ya Ibabangat na Biblia? Imbaga to ed sanasawa a pigara ni labat ya oras ed asasakbay et ontan a tepet so impikasi to ed Dios lapud labay ton naamtaan so ebat. Say sanasawa so maliket ya angiter ed sikato na sakey a kopya. Kasin ‘inanamot yo la so panaon’ a basaen iyan libro, a posiblin diad komadua lan pankanawnawa, legan ya aalagaren yo so katongtong yo odino diad oras na painawa ed trabaho odino diad eskuelaan? (Efeso 5:15, 16) No ontan so gawaen yo, nakabisado yo iyan katulongan ed panagaral na Biblia tan mamawala ni ingen na pankanawnawan nitongtong yo ed arum so karga na sayan libro.

6, 7. Panon yon nausar so libron Ibabangat na Biblia pian igapo so panangiyaral na Biblia?

⁶ Sano iyopresi yo so libro diad ministeryo, usaren a maong iray ilustrasyon, teksto, tan tepetepet ed pahina 4, 5, tan 6. Alimbawa, nayarin oniay itepet yo bilang gapo na pitongtong yo, “Diad amin a probleman aarapen na katooan natan, anto so iisipen yon napanmatalkan a lapuan na panangigiya?” Kayari yon dengelen a maong so ebat na unabung, basaen so 2 Timoteo 3:16, 17, tan ipaliwawa ed sikato a naamtaan ed Biblia so peteg a solusyon ed saray problema na katooan. Insan, ipaimano ed unabung so pahina 4 tan 5, tan oniay itepet: “Diad saray kipapasen a nilitrato ed sarayan pahina, dinan so pakakaaburidoan yon maong?” Sano ituro na unabung no dinan itan, pabembenan ed sikato so libro legan yon babasaen ed Biblia so mitukoyan a teksto. Insan, basaen so pahina 6, tan tepetan so unabung, “Diad  anemiran tepet a walad leksab na sayan pahina, dinan so labay yon naebatan?” Sano mamili na tepet so unabung, ipanengneng ed sikato so kapitulo a mangebat ed sayan tepet, itilak ed sikato so libro, tan tepeten no kapigan so ipawil yo pian singbaten itan a tepet.

⁷ Sayan presentasyon a nidatak so nagawaan ed loob na manga limaran minuto. Balet, diad saratan a minuto, naamtaan yo la no anto so papagaan na unabung, nibasa tan niyaplika yo la so duaran teksto, tan niletneg yo so ipawil lamet ed sikato. Say antikey ya impakapitongtong yo ed unabung so nayarin makapaseseg tan makatambayon maong a naeksperiensya to ed kapiganman. Bilang resulta, anggaman sikatoy okupado et seguradon talaranan to so pigara lamet a minuto na panaral yo legan yon tutulongan ya onkurang ed ‘dalan a mamaarap ed bilay.’ (Mateo 7:14) Onsabi so panaon, legan a nababayuboan so interes na unabung, nayarin ondukey ni so oras na pangiyaral ed sikato. Nagawaan itan sano payurongen to kayo la tan andukey lan oras so panaral yo.

Saray Sankaepektiboan a Metodo ed Panagbangat

8, 9. (a) Panon yon niparaan so iyaaralan yo na Biblia pian natalonaan to iray babeng tan subok a nayarin onsabi ed sikato? (b) Iner so pakaromogan ed saray agnapoolan a materyales pian nawalaan na mabiskeg a pananisia?

⁸ Sano unoren la na sakey a too so ibabangat na Biblia, sikato so nayarin nipaarap ed saray babeng a nayarin mangamper ed iyaaligwas to. Oniay imbaga nen apostol Pablo: “Amin so saray malabay a manbilay ed sinasanto ed Kristo Jesus, manako’ra naani pamasegsegang.” (2 Timoteo 3:12) Inkompara nen Pablo irayan subok ed sakey ya apoy a maneral ed lupok iran materyales ed panagpaalagey, balet say materyales a singa say balitok, pilak, tan ankablin bato so agnaderal. (1 Corinto 3:10-13; 1 Pedro 1:6, 7) Pian natulongan yo so iyaaralan na Biblia a makabayubo ed nakaukolan iran kalidad ta pian natalonaan to iray subok ya onsabi ed sikato, nakaukolan a tulongan yon ombiskeg so pananisia to panamegley na singa agnapoolan a materyales.

⁹ Inyaliling na salmista ‘iray salita nen Jehova’ ed ‘pilak a ginogolan ed sakey a palbaan a dalin, ya inanosan ya aminpito.’ (Salmo 12:6) On, lugan na Biblia so amin ya ankablin materyales a nausar pian napabiskeg so pananisia yo. (Salmo 19:7-11; Uliran 2:1-6) Tan ipapabitar na libron Ibabangat na Biblia no panon kayon magmaliw ya epektibo diad pangusar ed saray Kasulatan.

10. Panon yon niyapasakey so imano na iyaaralan dia ed Biblia?

¹⁰ Legan na panagaral, iyapasakey so imano na iyaaralan ed saray tekston walad kada kapitulo ya aaralen. Mangusar na saray tepet pian natalosan na iyaaralan iray importantin teksto na Biblia tan no panon ton iyaplika iratan. Agyo komon ididikta ed sikato no anto so desisyon to. Imbes, aligen yo so alimbawa nen Jesus. Sanen sikato so tinepetan na sakey a lakin mikabisado ed Ganggan, oniay inyebat nen Jesus: “Anto so nisulat ed ganggan? Panon so pambabasam?” Inmebat so laki unong ed Kasulatan, tan sikato so tinulongan nen Jesus a makatalos ed no panon ton iyaplika so prinsipyo. Diad impangusar nen Jesus ed ilustrasyon, tinulongan to met so laki a manebek ed epekto na satan a bangat. (Lucas 10:25-37) Say libron Ibabangat na Biblia so napno na simpli iran ilustrasyon a nausar yo pian natulongan so iyaaralan a mangiyaplika ed saray prinsipyo na Biblia.

11. Kaunongan karakel a materyal so nepeg yon kobrian ed kada sesyon na panagaral yo?

¹¹ No panon ya impaliwawa nen Jesus iray komplikadon ideya diad simplin paraan, inusar met na libro so simpli tan malinew iran termino pian ipaliwawa so Salitay Dios. (Mateo 7:28, 29) Aligen so alimbawa to. Ipaliwawa so impormasyon diad simpli, malinew, tan suston paraan. Ag-aapuraen a kobrian so materyal. Imbes, imanoen ed saray kipapasen tan abilidad na iyaaralan no pigaran parapo so singbaten yo ed sikato legan na kada sesyon na panagaral yo. Amta nen Jesus iray limitasyon na saray babangatan to kanian agto ira binuntonan na dakel ya impormasyon ya agda ni nakaukolan ed saman a panaon. ​—Juan 16:12.

12. Panon yon usaren so apendise?

¹² Karga na libron Ibabangat na Biblia so sakey ya apendise a walaan na 14 a tema. Unong  ed saray pankaukolan na iyaaralan, sikayo a managbangat so nepeg a makadetermina no panon a nausar iyan materyal ed sankaabigan a paraan. Alimbawa, no agnatalosan na iyaaralan so sakey a tema odino walaray tepet to ed espisipiko iran tema lapud dati iran sisiaen to, nayarin magenap la ya ipaimano ed sikato so matukoy a seksion na apendise tan pausisa yo itan ed sikato. Diad biek a dapag, nayarin natebek yo a nakaukolan yon singbaten itan a tema ed sikato. Walad apendise so importante iran Makasulatan a tema, a singa say “Kamarerwa” tan “Espiritu”​—Anto so Talagan Kabaliksan na Saratan a Termino?” tan say “Pakabidbir ed No Anto so ‘Babilonia a Baleg.’” Nayari met a singbaten yo irayan tema ed iyaaralan yo. Lapud anggapo iray nitaryan tepet parad saratan a tema ed apendise, nakaukolan yon kabisadoen so impormasyon ditan ta pian makagawa kayo na makabaliksan iran tepet.

13. Panon a makatulong so pikakasi pian ombiskeg so pananisia?

¹³ Oniay inkuan na Salmo 127:1: “Noag si Jehova so mangipaalagey na abung, saray manangipaalagey mansagpot ira ya andi kakanaan.” Kanian, legan kayon manpaparaan parad pangiyaral yo na Biblia, manpikasi kayo ed si Jehova pian natulongan kayo. Diad kada pangiyaral yo, napatnagan komon ed saray panlukas tan pansaran pikakasi yo so maapit a relasyon yo ed si Jehova. Pasesegen yoy iyaaralan yo a manpikasi ed si Jehova, ya onkerew na kakabatan pian natalosan to so Salita To, tan onkerew met na biskeg pian niyaplika to so simbawa na saya. (Santiago 1:5) No ontan so gawaen to, napabiskeg so iyaaralan yo pian nasungdoan to iray subok tan mantultuloy ya ombiskeg so pananisia to.

Tulongan Iray Iyaaralan na Biblia a Magmaliw Met a Managbangat

14. Anton iyaaligwas so nakaukolan a nadampot na saray iyaaralan na Biblia?

¹⁴ Nakaukolan ya onaligwas iray iyaaralan tayo na Biblia ta pian naunor da so “amin a bengatla” ya ingganggan nen Jesus ed saray babangatan to. Sikara so aglambengat mansiansian iyaaralan noagta magmaliw met iran managbangat. (Mateo 28:19, 20; Gawa 1:6-8) Anto so gawaen yo ta pian natulongan so iyaaralan yon onaligwas ed espiritual?

15. Akin a nepeg yon pasesegen iray iyaaralan yo na Biblia ya onatendi ed saray Makristianon pantitipon?

¹⁵ Diad primero labat nin panaral yo et imbitaan yo lan onatendi so iyaaralan yo diad saray pantitipon na kongregasyon. Isalaysay ed sikato a diad saratan a pantitipon so kipasalan ton magmaliw a managbangat na Salitay Dios. Diad loob na pigaran simba, mangusar na pigaran minuto antis yon saraan so kada panangiyaral yoy Biblia ta pian deskribien ed sikato so programa na espiritual a panangibangat a naaawat yo ed nanduruman pantitipon tan asamblea. Maligsan itongtong iray nagugunggona yo ed sarayan pantitipon. (Hebreos 10:24, 25) No regular lan onaatendi so iyaaralan yo, nayarin sikato so magmaliw met a managbangat ed Salitay Dios.

16, 17. Antoran kalat so nayarin iletneg tan dampoten na sakey ya iyaaralan na Biblia?

¹⁶ Tulongan yo so iyaaralan yoy Biblia a mangiletneg na saray kalat a nadampot to. Alimbawa, sikato so paseseg yon manginabang ed saray naaaralan to dia ed sakey a kaaro odino kanayon to. Isuheri met ed sikato a gawaen ton kalat so pambasa ed interon Biblia. No sikato so natulongan yon mangiletneg tan mamasiansia ed regular a panagbasa toy Biblia, saya so tuloytuloy a mangunggona ed sikato anggad kayari na pakabautismoan  to. Niarum ni, akin ta no isuheri yo ed iyaaralan yo a gawaen ton kalat so pangipatlep na anggan sakey a teksto na Biblia a mangebat ed sakey ya importantin tepet ed kada kapitulo na libron Ibabangat na Biblia? No onia so gawaen yo, sikato so magmaliw a ‘singa tometeger ya anggapo so ibaing to, ya agamilen to ed matunong so salita a tua.’​—2 Timoteo 2:15.

¹⁷ Imbes a sikatoy ibangat yo labat a mangipatlep na saray teksto odino mangiter ed segek na saratan, sikato so pasesegen yon mangipaliwawa ed matukoy iran bersikulo na Biblia sano ebatan to iramay ontepet ed sikato nipaakar ed pananisia to. Nayarin makatulong met so antikey iran panagpasal, ya onakto kayo bilang kanayon odino katrabahoan to a mantetepet nipaakar ed saray sisiaen to. Ibangat yo so iyaaralan yo ya onebat a “mauyamo tan mapagalang.”​—1 Pedro 3:15.

18. Sano onkualipika so sakey ya iyaaralan na Biblia bilang agbautismadon manangipalapag, anto ni so nitulong yo ed sikato?

¹⁸ Onsabi so panaon et nayarin onkualipika lan manpulong so sakey ya iyaaralan. Idanet ed sikato a pribilehyo so pakapibiang ed sayan kimey. (2 Corinto 4:1, 7) No atebek la na mamatatken a kualipikado la so iyaaralan yo bilang agbautismadon manangipalapag, sikato so tulongan yon mangiparaan na simplin presentasyon insan ibaan yo ed lawak na kimeyan. Mantultuloy kayon mikimey ed sikato diad nanduruman aspekto na panagpulong, tan sikato so ibangat yo no panon so manparaan tan manggawa na epektibo iran panagpawil. Say maabig ya alimbawa yo et walaan na positibon impluensya ed sikato.​—Lucas 6:40.

‘Nilaban Mo so Inkasika tan Saray Ondengel ed Sika’

19, 20. Anton kalat so nepeg tayon gawaen, tan akin?

¹⁹ Seguradon nakaukolan so pirmin pansagpot pian natulongan so sakey a too a nawalaan na ‘[suston] pikakabat ed katuaan.’ (1 Timoteo 2:4) Balet, nikadkaduman liket so nalikna diad pakatulong ed sakey a toon mangunor ed ibabangat na Biblia. (1 Tesalonica 2:19, 20) On, agaylan abig so pribilehyo tayo bilang “kakimeyan na Dios” ed sayan panagbangat a kimey ed sankamundoan!​—1 Corinto 3:9.

²⁰ Diad panamegley nen Jesu-Kristo tan saray makapanyarin anghel, magano lan ukomen nen Jehova iramay “agmikabat ed Dios, tan dia ed saray ag-ontulok ed ebanghelyo na Katawan tayon Jesus.” (2 Tesalonica 1:6-8) Napepeligro la so bilay na totoo. Sarag yo kasin gawaen a kalat so pangikondukta na anggan sakey a panangiyaral na Biblia panamegley na libron Anto so Peteg ya Ibabangat na Biblia? Legan kayon mibibiang ed sayan kimey, walaan kayo na pankanawnawan ‘mangilaban ed inkasikayo tan saramay ondengel ed sikayo.’ (1 Timoteo 4:16) Nagkalalo la natan, pankaganatan so itulong ed arum pian naunor da so ibabangat na Biblia.

[Paimano ed leksab]

Anto so Naaralan Yo?

• Anto so inkadesinyoan na libron Ibabangat na Biblia?

• Panon kayon makapangigapo na panangiyaral diad pangusar ed libron Ibabangat na Biblia?

• Antoran metodo ed panagbangat so sankaabigan ya usaren?

• Panon yon natulongan so iyaaralan a magmaliw a managbangat na Salitay Dios?

[Tepetepet Parad Panagaral]

[Litrato ed pahina 26]

Kasin uusaren yon maong iyan libro?

[Litrato ed pahina 27]

Say antikey a pantongtong so nayarin managyat ed interes na sakey a too ed pikakabat ed Biblia

[Litrato ed pahina 29]

Anto so gawaen yo ta pian nipaarap yo ed Biblia so imano na iyaaralan?

[Litrato ed pahina 30]

Tulongan yon onaligwas so iyaaralan yo na Biblia