Akin a Nepeg ya Ibaga so Tua?

SI Manfred, a manedad na 18, so ipapasal ed trabaho ed opisina. * Inyuksoy na kompanyan pantratrabahoan to a sikato tan say pigara nin kakaiba ton ipapasal et manaral na vocational a duay agew ed kada simba. Sakey ya agew et asaksakbay ya asumpal so klase ra. Unong ed reglamento na kompanya, kaukolan a mantrabaho iray ipapasal no wala ni nakekeraan ya oras ed sanagew. Balet amin da so nampasyar, nilikud ed si Manfred a linman nantrabaho. Nibanbana a sinmabi so manedyer na kompanya a mangaasikaso ed saray ipapasal. Kanengneng to ed si Manfred, sikatoy tinepetan to: “Akin ya anggapo ka’d klase natan? Tan kawalaan na saramay kakaibam?” Panon kasin ebatan iratan nen Manfred?

Kaslakan la so mairap a situasyon ya inkidungetan nen Manfred. Nepeg kasin ibaga to so katuaan, odino andi ta pian nasakbongan iramay kakaiba to? No ibaga to so tua, nipalalbong iray kakaiba to tan sikatoy busolen da. Kasin nayari mantila ed ontan iran situasyon? No nipaarap ka ed ontan a kipapasen, antoy gawaen mo? Pawilen tayo ed saginonor si Manfred, ingen konsideraen tayo nin unona no anto so nalalanor sano kinaukolan itayon mandesidi no kasin ibaga tayo so katuaan odino andi.

Say Inggapo na Pankontraan na Katuaan tan Aliwan Katuaan

Diad gapo na awaran na too, amin a bengatla et puros katuaan. Anggapo so panamikewet, pananguman, odino lingon panangirepresenta ed katuaan. Si Jehova a Manamalsa so “Dios na katuaan.” Say salita to et katuaan; agto nayarian so mantila, tan kabusol to so panagtila tan saray matila.​—Salmo 31:5; Juan 17:17; Tito 1:2.

No ontan sirin, panon a ginmapo so aliwan katuaan? Nia so napanmatalkan ya ebat nen Jesu-Kristo sanen inkuan to ed saray relihyoson onsusumpa a nanggetman mamatey ed sikato: “Sikayo kien kayo na ama yo a diablo, et saray kalikaliktan nen ama yo sikato so labay yo a gawaen. Sikato so akapatey nanlapu ed gapo, tan agtinmalindeg ed katuaan, ta anggapo ed sikato so katuaan. Bangno mansalita na tila, mansalita nipaakar ed kayarian to, ta sikato matila, tan ama na tila.” (Juan 8:44) Siempre, say tutukoyen nen Jesus et samay agawa ed hardin na Eden sanen tinangguyor nen Satanas so inmunan sanasawa ya ontunganga ed Dios, a lapud satan et sikaray  nankasalanan tan inatey.​—Genesis 3:1-5; Roma 5:12.

Malinew ya ipapabidbir na saray salita nen Jesus a si Satanas so “ama na tila,” say angigapo na panagtila tan aliwan katuaan. Manunaan lawas si Satanas a mangikakayat na aliwan katuaan tan diad tua et ‘titilaan to so lapag na sankamundoan.’ Sikato so manunan natetel ed panasagmak na totoo natan ed makapuy ya epekto na inkalapagan a panagtila.​—Apocalipsis 12:9.

Samay inggapo nen Satanas a pankontraan na katuaan tan aliwan katuaan so mantutultuloy ya onkakayat anggad natan. Kasmak la itan ed amin a sosyedad na too tan naaapektoan so balang indibidual. Napatnagan diad paraan na kabibilay na sakey a too no kasin sikatoy walad dapag na katuaan odino andi. Saramay walad dapag na Dios et manbibilay unong ed katuaan na Salitay Dios, say Biblia. Balet siopaman ya ag-ontutumbok ed dalan na katuaan et walad dapag nen Satanas, balanglan amta ra itan odino andi, lapud “say sankamundoan mandukdukol ed kaugsan.”​—1 Juan 5:19; Mateo 7:13, 14.

Akin a Magmainomay na Totoo so Mantila?

Lapud uuleyan nen Satanas so “sankamundoan,” agtayo la pankelawan no akin a dakdakel so totoo a mantitila. Balet oniay nayarin itepet tayo, Akin ya ontan so gagawaen nen Satanas, “say ama na tila”? Amta nen Satanas a si Jehova labat so makanepegan a Soberano ed amin a pinalsa To, laktip lay inmunan paris a too. Balet, pinirawat nen Satanas itan ya atagey tan nikaduman posisyon, ya agto kanepegan. Lapud inkaagum tan sinisiblet ya ambisyon to, ginetma ton samsamen so posisyon nen Jehova. Pian nadampot sirin nen Satanas so pirawat to, sikato so nantila tan amalikdo.​—1 Timoteo 3:6.

Komusta balet natan? Agta onabobon kayo a say inkaagum tan sinisiblet ya ambisyon so siansia nin manunaan a motibo a mamapakiwas ed totoo pian mantila? Say masaol a panagnegosyo, kurakot a politika, tan palson relihyon so napno na panamalikdo, katilaan, panag-anamot, tan panagpalsipika. Akin? Agta say mabetbet a sengegan et saray totoo so maagum tan maambisyon kanian labay da so ontalona odino nawalaan na kayamanan, pakayari, odino posisyon ya agda kanepegan? Oniay impasakbay nen makabat ya Arin Solomon: “No maganat kan onyaman nadusa ka.” (Uliran 28:20, MB) Tan oniay insulat met nen apostol Pablo: “Say aro ed pilak sikato so sakey a lamot na saray amin a nengneng na mauges.” (1 Timoteo 6:10) Seguradon ontan met so nibaga nipaakar ed alablabas a pampilalek ed pakayari odino posisyon.

Say sananey nin mamapakiwas ed totoo pian mantila et say takot, salanti, natatakot ira ed saray pansumpalan odino ed say nayarin isipen na arum no ibaga ra so katuaan. Natural labat so pankaliktan na totoo a sikaray labalabay odino aabobonan na arum. Anggaman ontan, say onian pilalek so nayarin mamakiwas ed sikara pian pikeweten so katuaan, anggan samet labat, ta pian nasakbongan iray lingo ra, pian niyamot iray bengatlan negatibo, odino pian mansiansian maabig so impresyon ed sikara. Matukotukoy sirin ya oniay insulat nen Solomon: “Say takot na too mantarok na kalot; balet anggan siopa ya ipasen to so ilalo to ed Jehova nilaban.”​—Uliran 29:25.

Inkamatoor ed Dios na Katuaan

Antoy imbaga nen Manfred sanen tinepetan na samay manedyer na kompanya? Imbaga to so katuaan. Oniay inkuan to: “Asakbay kamin pinasempet na maestro mi, kanian dinmiretso ak dia pian mantrabaho. Balet anggapoy nibagak nipaakar ed saray kaibak. Maabig seguro no sikara lan mismo so tepetan yo.”

Nayarian komon nen Manfred so onebat a masilib tan mamalingo ta pian nagamoran toy pabor na saray kaiba ton ipapasal. Balet maabig iray  rason to ed impangibaga toy katuaan. Sikatoy sakey ed saray Tasi nen Jehova. Lapud inkamatua to, nansiansian malinis so konsiensia to. Sikato met so nanmatalekan na amo to. Bilang kabiangan na panangipasal ed si Manfred, sikato so impantrabaho ed departamento na alahas, a kaslakan et ag-itan ipipiya ed saray ipapasal ni labat. Manga 15 a taon ed saginonor, sanen inmatagey so posisyon nen Manfred diad kompanya, sikatoy tinawagan ed telepono na samay manedyer pian ibalikas so panliket to tan pian ipanonot ed si Manfred imay agawa nensaman nipaakar ed inkamatua to.

Lapud si Jehova et Dios na katuaan, amin a malabay a nawalaan na maapit a relasyon ed sikato so nepeg a ‘mangipaliis ed katilaan’ tan ‘mansalita na katuaan.’ Say lingkor na Dios so nepeg a mangaro ed katuaan. Oniay insulat na sakey a lakin makabat: “Say matoor a tasi agmantila.” Anto ta so tila?​—Efeso 4:25; Uliran 14:5.

No Anto so Tila

Amin a tila et aliwan tua, balet aliwan amin ya aliwan tua et tila. Akin? Impalinew na sakey a diksionaryo so kabaliksan na tila bilang “pangibaga na sakey a too ed bengatlan amta odino panisiaan ton aliwan tua, a say getma to et mamalikdo.” On, kabiangan ed panagtila so getman pamalikdo ed arum. Kanian, say agginagalan pakapansalita na aliwan tua, a singa say pakapangipasabi ed arum na agsuston impormasyon, so agmipara ed panagtila.

Niarum ni, kaukolan tayon tebeken no kasin makanepegan na detalyadon ebat so toon mantetepet na impormasyon. Singa bilang, panon to no say mantepet ed si Manfred et manedyer na sananey a kompanya? Kasin naobliga si Manfred ya ibaga ed sikato so amin a bengatla? Siempre andi. Lapud andian na kanepegan itan a manedyer ed ontan ya impormasyon, agnaobliga si Manfred ya ibaga itan. Balet, anggano ontan so kipapasen, agnepeg a mantila si Manfred.

Anto so alimbawan impatnag nen Jesu-Kristo nipaakar ed saya? Diad sakey ya inkagawa, si Jesus so mitotongtong ed pigaran agmananisia a malabay a makaamta ed saray lugar a laen to. “Taynan ka dia, tan onla ka ed Judea,” so insuheri ra ed sikato. Balet, antoy inyebat nen Jesus? “Tatdang kayo ed piesta [ed Jerusalem]: Siak agak ni ontatdang ed sayan piesta: ta say panaon ko agni asapot.” Kabebekta et linma lanlamang si Jesus ed Jerusalem parad piesta. Akin balet et onman so inyebat to? Lapud agda kanepegan a naamtaan iray eksakton detalye nipaakar ed saray laen to. Kanian anggaman anggapoy imbaga nen Jesus ya aliwan tua, agto inter ed sikara so detalyadon ebat pian napaliisan so posiblin pamasakit da ed sikato odino ed saray papatumbok to. Aliwa iyan tila lapud oniay insulat nen apostol Pedro nipaakar ed si Kristo: “Anggapoy ginawa ton kasalanan, andi bengatlan kapaklapan ya anengneng ed sangi to.”​—Juan 7:1-13; 1 Pedro 2:22.

Komusta balet si Pedro a mismo? Diad samay labi ya inerel si Jesus, agta amitlon nantila si Pedro tan imburi to a kabat toy Jesus? On, tinmakot  ed too si Pedro kanian nantila. Balet sikatoy tampol a “nannangis na sankapaitan” tan nagbabawi, tan say kasalanan to et aperdona. Niarum ni, sikatoy akaaral manlapud lingo to. Manga pigaran agew ed saginonor, inyabawag to ed publiko so nipaakar ed si Jesus tan determinadon nantultuloy anggaman pinagyaw na saray Judion papangulo ed Jerusalem. Lapud amin tayo so mainomay a nadaeg na sakey a kakapuyan tan nagapol ed salita odino gawa, seguradon napaseseg itayo ed alimbawa nen Pedro, a sikato so alingo balet ta impetek ton tampol so lingo to.​—Mateo 26:69-75; Gawa 4:18-20; 5:27-32; Santiago 3:2.

Mansiansia so Katuaan ed Andi-angga

Impabitar na Uliran 12:19 a “say dila na tua mansiansia lawas; balet say matila a dila sikato lambengat so maganggano.” On, lawas napanmatalkan tan agbalot nauman so matua a panagsalita. Tan lalon onelet tan makapenek iray siglaotan na totoo sano naynay dan sasalitaen so katuaan tan onkikiwas ira unong ed satan. Natan ni labat et nagamoran la iray tumang ed pansalita na katuaan. Kabiangan ed saratan so malinis a konsiensia, maabig a reputasyon, tan malet a relasyon na sanasawa, sankapamilyaan, sankakaaro, ontan met na saray negosyante.

Diad biek a dapag, saray katilaan so agmansiansia. Say dila a manbitla na katilaan et nayarin mamalingo diad maganon panaon, balet agmanbayag et niwalwal lanlamang so aliwan katuaan. Sakey ni, si Jehova, say Dios na katuaan, so angigeter na panaon parad kikakayat na aliwan katuaan tan ed saramay mangiyaalibansa na katilaan. Insipan na Biblia a paandien nen Jehova so impluensya nen Satanas a Diablo, say ama na tila, a mamapalikdo ed interon panaayaman a dalin. Magano lan panampoten nen Jehova so amin a katilaan tan saray matitila!​—Apocalipsis 21:8.

Agaylan sikatayoy nainawaan sano “say dila na tua” et mansiansia la ed andi-angga!

[Paimano ed leksab]

[Blurb ed pahina 5]

Say agum tan sinisiblet ya ambisyon so motibon mamapakiwas ed dakel a totoo pian mantila

[Blurb ed pahina 6]

Amin a tila et aliwan tua, balet aliwan amin ya aliwan tua et tila

[Litrato ed pahina 6]

Anto so naaralan tayo ed impangiburi nen Pedro ed si Kristo?

[Litrato ed pahina 7]

Say pansalita na katuaan et manresulta ed malet tan makapenek iran siglaotan