Anto so Naaralan ed Ugugaw?
Anto so Naaralan ed Ugugaw?
“SINGA ka ugaw!” No ontan so ibaga ed sikatayo, seguradon nasakitan itayo. Anggaman makapalikliket iray angkekelag nin ugugaw, malinew ya andian nira na kalakal, eksperiensya, tan kakabatan a kaslakan lan napatnagan ed saray wala la’d edad.—Job 12:12.
Balet, diad sakey a pankanawnawa et onia so imbaga nen Jesus ed saray babangatan to: “Tua kuan ko ed sikayo, No agkayo ompawil tan agkayo magmaliw a singa saray angkekelag ya ugugaw, anggan panon agkayo naani makaloob ed panariay tawen.” (Mateo 18:3) Antoy labay ya ibaga nen Jesus? Antoray kalidad na ugugaw a nepeg ya aligen na saray wala la’d edad?
Bayuboan so Inkamapaabeba na Singa-Ugaw
Imanoen pa so situasyon ya amakiwas ed si Jesus pian ibalikas iraman a salita. Kasabi ra ed Capernaum manlapud andukey ya impanbaroy, onia so intepet nen Jesus ed saray babangatan to: “Anto so pansasangsangan yo ed dalan?” Ag-akasel iray abaingan a babangatan lapud nansasangsangan da no siopay sankatagyan ed sikara. Balet nitepel da lanlamang ya itepet ed si Jesus: “Siopa sirin so kabalbalgan ed panariay tawen?”—Marcos 9:33, 34; Mateo 18:1.
Singa makapakelaw a pansangsangan na saray babangatan so nipaakar ed posisyon odino ranggo anta mantaloy taon da lan kaiba si Jesus. Balet nodnonoten ya importantin maong iratan diad abangonan da a Judion relihyon. Mapatnag sirin a sayan abangonan na saray babangatan, tekep lay agda inkayadyari, so angimpluensya ed panmoria ra.
Marcos 9:35) Sikaray amemet lapud sarayan salita. Agaylan midumaan so katunongan nen Jesus ed say panmoria na saray Judio nipaakar ed inkatalonggaring! Diad saman et anawag si Jesus na sakey a melag nin ugaw diad abay to. Legan ton sankalakap so ugaw, onia so impangidanet to ed punto to: “Tua kuan ko ed sikayo, No agkayo ompawil tan agkayo magmaliw a singa saray angkekelag ya ugugaw, anggan panon agkayo naani makaloob ed panariay tawen. Kanian siopaman a manpaabeba a singa sayan melag ya ugaw, sikato lanlamang so kabalbalgan ed panariay tawen.”—Mateo 18:3, 4.
Yinmurong si Jesus, insan tinawag to ray babangatan to, tan inkuan to: “No siopaman a too labay ton sikatoy unaan, sikato so kaunoran naani ed amin, tan aripen na amin.” (Agaylan abig a pakaaralan na inkamapaabeba! Ilitrato pa’d nonot so eksena. Pinaliberan na sakey a grupo na seryoson lalaki a wala la’d edad so sakey a melag ya ugaw tan akateen iray mata ra ed sikato. Say ugaw so maam-amo tan agnatatakot, agton balot iisipen so milaslasan tan agmannononot na mauges, mapasakop tan aliwan mapaatagey. On, sayan melag nin ugaw et alay-abig ya ehemplo na maridios a kalidad ya inkamapaabeba.
Malinew so punto nen Jesus. Nepeg a bayuboan tayon amin so inkamapaabeba na singa-ugaw pian natawir tayo so Panarian na Dios. Diad loob na singa-pamilyan uksoyan nen Jehova, nepeg a paliisan so pikolkolan parad posisyon odino say inkamapaatagey. (Galacia 5:26) Diad tua et sarayan mismon awawey so anagdag ed si Satanas a Diablo pian manrebelde ed Dios. Agpankelawan sirin a kagula iratan nen Jehova!—Uliran 8:13.
Panggunaetan na saray tuan Kristiano so manserbi, aliwan say pangagamil na pakayari. Anggan panon lan kairap so kimey odino ordinaryon too labat so seserbian tayo, pakiwasen itayo na tuan kapaabebaan pian manserbi ed arum. Say ontan a mapaabeban panaglingkor so mangitarok na makapnek iran tumang. Onia so imbaga nen Jesus: “Siopaman a mangawat na sakey ed saray onia ya angkekelag ya ugugaw nisengeg ed ngaran ko, awaten to ak: tan siopaman a mangawat ed siak, aliwan siak so awaten to, noag say angibaki dia ed siak.” (Marcos 9:37) Sano bayuboan tayo so inkamabunlok, inkamapaabeba, tan awawey na singa-ugaw, sikatayoy maapit a makapisiglaotan ed sankatagyan a Persona ed uniberso tan ed Anak to. (Juan 17:20, 21; 1 Pedro ) Magmaliw tayo met a maliket lapud panangiter. ( 5:5Gawa 20:35) Tan nalikna tayo so inkapnek ed pakakatulong tayo ed pansiansia na kareenan tan pankakasakey a napapatnagan ed limog na totoo na Dios.—Efeso 4:1-3.
Sikaray Mainomay ya Ibangat tan Mapiya
Impabitar nen Jesus so sananey nin leksion a naaralan na saray wala la’d edad manlapud ugugaw: “Siopaman ya agmangawat na panariay Dios a singa sakey a melag ya ugaw, agmakaloob a balot diman.” (Marcos 10:15) Aglabat mapaabeba iray ugugaw noagta mainomay met iran ibangat. “Maneesep iray impormasyon a singa espongha,” so inkuan na sakey ya ina.
Kanian, pian natawir tayo so Panarian na Dios, nepeg tayon awaten tan tuloken so mensahe na Panarian. (1 Tesalonica 2:13) Singa kapangiyanak ya ugugaw, nepeg a ‘pampilalekan tayo so gatas a maespiritu ya andian na saol a mamabaleg ed sikatayo ed kilalaban.’ (1 Pedro 2:2) Panon to balet no walay bangat na Biblia a mairap tayon talosan? “Saray ugugaw et ag-ontutundan manupapet anggad agnaebatan iray tepet da,” so inkomento na sakey a biin say trabaho to et manag-asikasoy ugaw. Nepeg tayon aligen so ehemplo ra. Kanian ag-itayo ontutundan manaral. Mitongtong itayo ed saray eksperiensyadon Kristiano. Onkerew itayo na kakabatan ed si Jehova. (Santiago 1:5) Seguradon say tuloytuloy a pampikasi yo so natumangan diad saginonor.—Mateo 7:7-11.
Balet, oniay nayarin panumamengan na arum, ‘Agta say mainomay ya ibangat et mainomay met a palikdoen?’ Andi no napanmatalkan so giya ra. Bilang alimbawa, saray ugugaw et sipor lan paigigiya ed atateng da. Onia so imbaga na sakey ya ama: “Papaneknekan na saray ateng a napanmatalkan ira diad inagew-agew a panasalimbeng tan panlelegpet da ed saray anak da.” Seguradon walaan itayo met na mipadpara iran rason pian manmatalek ed mangatatawen ya Ama tayo, si Jehova. (Santiago 1:17; 1 Juan 4:9, 10) Ag-onsasaew so panangigiya ya itatarya ed sikatayo nen Jehova panamegley na nisulat a Salita to. Say masanton espiritu tan organisasyon to so manliligliwa tan ontutulong ed sikatayo. (Mateo 24:45-47; Juan 14:26) Nasalimbengan itayo manlapud kapeligroan ed espiritual no anamoten tayo irayan probisyon.—Salmo 91:1-16.
Sano bayuboan tayo so panagmatalek ed Dios a singa-ugaw, nawalaan itayo na deen na nonot. Onia so inkomento na sakey ya iskolar na Biblia: “Sanen ugugaw tayo ni, manpikal itayon ombiahe anggan anggapoy piliti tayo, tan agtayo amta no panon itayon makasabi ed laen tayo, ingen agtayon balot panduaruwaan a maligen itayon nisabi na atateng tayo.” Kasin walaan itayo na ontan a panagmatalek ed si Jehova legan itayon manbiabiahe ed sayan bilay?—Say mabiskeg a panagmatalek tayo ed Dios so ontulong ed sikatayo a napaliisan iray awawey tan kiwas a mameligro ed espiritualidad tayo. Walaan itayo na sigpot a kompiyansa ed saray salita nen Jesus a saray gagawaen tayo et amta na mangatatawen ya Ama tayo, tan legan ya iyuuna tayo so Panarian tan say inkatunong na Dios, asikasoen to itayo. Ontulong iya ed sikatayo a naresistian so tukso a nonoten iray materyal a kapagaan, ya ibaliwala iray responsabilidad ed espiritual.—Mateo 6:19-34.
“Manugaw-ugawan Kayo ed Kaugsan”
Anggaman niyanak ya ag-ayadyari iray angkekelag nin ugugaw, malinis so puso tan nonot da. Lapud saya et onia so ipapaseseg na Biblia: “Manugaw-ugawan kayo ed kaugsan.”—1 Corinto 14:20.
Imanoen pa so alimbawa na limay-taon a si Monique, ya oniay malikeliket ya imbaga to ed si Nanay to: “Parehon kulet so buek mi nen Sarah, say balon kaarok!” Ag-abitla so duman kolor na baog nisay tribu nen Sarah. “Say kolor na baog so ag-importante ed angkekelag nin ugugaw. Agda ni nibiig so rasa tan anggapoy panangidumaduma ra,” so kuan na sakey ya ateng. Lapud saya, alay-abig a nipatnag na ugugaw so panmoria na agmanangidumaduman Dios, a mangaaro ed totoo tan amin a nasyon.—Gawa 10:34, 35.
Saray ugugaw so mainomay met a mamerdona. Inkuan na sakey ya ateng: “Sano mansebeg nensaman si Jack tan Levi, ibaga mi’d sikara a manperdonaan ira, tan nagugunoyan et malikeliket iran manggalaw lamet. Ag-ira maneem-em, agda ipapanonot so apalabas la odino anggapo so kondisyon ed pamerdona ra. Basta ituloy da labat lay manggalaw.” Alay-abig ya ehemplon aligen na saray wala la’d edad!—Colosas 3:13.
Niarum ni, bibidbiren a tampol na saray angkelag nin ugugaw so kiwawala na Dios. (Hebreos 11:6) Lapud sipor laran prangka a mansalita, makpel iran makapanpulong ed arum. (2 Arari 5:2, 3) Saray simpli, impapuson pikakasi ra so mamalemek ed anawet-impanpuson totoo. Tan no nasusubok ira, nipatnag da so nikadkaduman biskeg ed moral. Agaylan mablin regalo irayan angkelag nin ugugaw!—Salmo 127:3, 4.
Nipawil so Karakpan
Nayarin panumamengan yo, ‘Posible kasin nipatnag lamet na saray wala la’d edad iray balibalin ugali na ugugaw?’ Say simpli tan seguradon ebat et on! Say ganggan nen Jesus a “magmaliw a singa saray angkekelag ya ugugaw” et mamaneknek a posible itan. —Mateo 18:3.
Bilang pangiyilustra: Sakey a grupo na saray manag-apiger na painting so nayarin mansagpot pian nipawil so karakpan na mabmablin obra-maestra. Legan na satan et eekalen da iray atipon a dingot tan uumanen da iray akaunan impangapiger ya aliwan marakep. Kayari na impasyan sagpot na saray manag-apiger, amin so makanengneng lamet ed singa samay datin makolor tan marakdakep a painting. Mipadpara, diad tuloytuloy a pansagpot tayo, diad tulong na masanton espiritu na Dios, tan diad maaron suporta na Kristianon kongregasyon, nipatnag tayo lamet iray alay-abig a kalidad tayo sanen ugugaw tayo ni.—Efeso 5:1.
[Litrato ed pahina 9]
Sipor lan mapaabeba iray ugugaw
[Litrato ed pahina 10]
Saray angkelag nin ugugaw et agmanangidumaduma, tan mainomay iran mamerdona tan mangilingwan