Itultuloy Yon Pabulaslasen so Apresasyon Yo
Itultuloy Yon Pabulaslasen so Apresasyon Yo
“Alay kablian na saray nodnonot mo ed siak, O Dios! Alay kinabalgan na asinop a bilang da!”—SALMO 139:17.
1, 2. Akin a nepeg tayon apresyaen so Salitay Dios, tan panon ya imbalikas na salmista so apresasyon to?
WALAY makatantandan adiskobre nensaman. Legan ya aapigeren so templo nen Jehova diad Jerusalem, aromog na Atagey a Saserdoten si Helkias so “libro na tunong nen Jehova, a niiter ed panamegley nen Moises,” samay orihinal a kopya a nisulat manga 800 a taon ed asasakbay! Anto so naisip yon liknaan na matakot-ed-Dios a si Arin Josias sanen imparungtal itan ed arapan to? On, satan so pinabpabli to kanian impabasa ton tampol ed si Safan, say sekretaryo.—2 Awaran 34:14-18.
2 Say Salitay Dios et nababasa la natan na binilyon a totoo, balanglan intero odino say kabiangan na satan. Balet, naaandi la kasi so kablian tan kaimportantian na Biblia lapud dakdakel lay makakala ed satan? Siempre andi! Diad tua, akasulat ditan iray mismon kanonotan na Makapanyarin-amin a pakagunggonaan tayo. (2 Timoteo 3:16) Oniay insulat nen salmistan David sanen imbalikas toy liknaan to nipaakar ed Salitay Dios: “Alay kablian na saray nodnonot mo ed siak, O Dios! Alay kinabalgan na asinop a bilang da!”—Salmo 139:17.
3. Anto so mangipatnag a si David et sakey a maespiritual a too?
3 Nantultuloy so apresasyon nen David ed si Jehova, ed Salita to, tan ed uksoyan To parad tuan panagdayew. Nabasa so liknaan nen David diad mararakep iran salmo ya insulat to. Alimbawa, oniay insulat to ed Salmo 27:4, NW: “Sakey a bengatla so kekerewen ko ed si Jehova—satan so aanapen ko, a makapanayam ak ed abung nen Jehova ed amin ya agew na bilay ko, ta pian imatonan ko so karakpan nen Jehova tan maapresyan nengnengen ko so templo to.” Diad orihinal a Hebreo, say kabaliksan na saray salitan “maapresyan nengnengen” et mareen a panmolimoli, pangusisa, inengneng tekep na panliket, pakaroyroyo, tan pandinayew. Malinew sirin a si David et sakey a maespiritual a too ya angapresyan maong ed saray espiritual a probisyon nen Jehova tan nanggayagaan to iray espiritual a katuaan ya imparungtal na Dios. Manepeg tayon aligen iyan alimbawa na panangapresya to.—Salmo 19:7-11.
Apresyaen Yo so Pribilehyo Yon Naamtaan so Katuaan na Biblia
4. Akin a si Jesus et ‘linmiket ed masanton espiritu’?
4 Say pakawalaan na aralem a pakatalos ed Salitay Dios so ag-akadepende ed inkautek na sakey odino ed impakawalaan na edukasyon ed mundo, a mangiyaalibansa na inkamapaatagey. Imbes, akadepende itan ed agkanepegan a panangasi nen Jehova, ya ipapatnag to ed saray mapaabeba tan matuan-impanpuson totoo a sinononot ed espiritual a pankaukolan da. (Mateo 5:3; 1 Juan 5:20) Sanen dinalepdep nen Jesus so katuaan a walaray ag-ayadyarin totoo a niyukit so kangaranan da ed tawen, sikato so “linmiket ed espiritu santo, et inkuan to, Misalamat ak ed sika, O Ama, Katawan na tawen tan dalin, ta inyamot mo so sarayan bengatla ed saray makabat tan makatalos, et sikara so impasingawey mo ed saray ugugaw.”—Lucas 10:17-21.
5. Akin ya agnepeg ya ibaliwala na saray babangatan nen Jesus so niparungtal ed sikaran katuaan nipaakar ed Panarian?
5 Kayari na impapuson pikakasi to, si Jesus so inmarap ed saray babangatan to insan oniay inkuan to: “Mapalar so saray mata a makanengneng ed saray nanengneng yo. Ta kuan ko ed sikayo, a dakel so saray propetas tan arari a kinaliktan da a nanengneng so saray nanengneng yo, et agda’ra anengneng tan dengelen so saray narengel yo, et agda’ra nadngel.” On, pinaseseg nen Jesus iray matoor a patumbok to ya agda babaliwalaen so ankabli iran katuaan nipaakar ed Panarian a niparungtal ed sikara. Sarayan katuaan so agniparungtal ed akadkauna iran kailalakan na saray lingkor na Dios, tan seguradon ag-iratan niparungtal ed “saray makabat tan makatalos” ed panaon nen Jesus!—Lucas 10:23, 24.
6, 7. (a) Antoray rason tayo no akin ya aapresyaen tayo so madibinon katuaan? (b) Anton pandumaan so naiimano natan ed baetan na tua tan palson relihyon?
6 Diad panaon tayo, walaan itayo na dakel nin rason pian apresyaen so espiritual a katuaan, lapud diad panamegley na “matoor tan makabat ya aripen” et itatarya nen Jehova ed totoo to so mas aralem a pakatalos ed Salita to. (Mateo 24:45; Daniel 12:10) Nipaakar ed panaon na anggaan, oniay insulat nen propeta Daniel: “Dakerakel naani so saray ombatik ya onla tan ompawil, tan say pikakabat ondaak naani.” (Daniel 12:4) Agkayo kasi mipakna a say pikakabat ed Dios natan et nagmaliw lan “daakan” tan napepesel ed espiritual iray lingkor nen Jehova?
7 Agaylay pidumaan na totoo na Dios lapud panggagayagaan da so daakan ya espiritual a probisyon no ikompara ed pakakawetwet na amin a palson relihyon ed interon mundo! Bilang resulta, dakel so nadidismaya odino nadidimla ed palson relihyon kanian ondadapag ira ed tuan panagdayew. Sikara so kinmarnero ya agmalabay a “nalanor ed saray kasalanan [na Babilonia a Baleg]” odino ‘makalikna ed saray bakbak to.’ Sikara so iimbitaan nen Jehova tan saray lingkor to ya onkamang ed tuan Kristianon kongregasyon.—Apocalipsis 18:2-4; 22:17.
Ondadapag ed Dios Iray Maapresyan Totoo
8, 9. Panon a nasusumpal natan iray salita na Aggeo 2:7?
8 Nipaakar ed espiritual ya abung a pandadayewan ed sikato, oniay impasakbay nen Jehova: “Panmayegmegen ko naani so saray amin a nasyon; et saray mabli a bengatla na saray amin a nasyon onsabi ra naani; et panoen ko naani so sayan abung ed gayaga.” (Aggeo 2:7) Sayan makapasagyat a propesiya so awalaan lay kasumpalan ed panaon nen Aggeo sanen impaalagey lamet na pinmawil a nakdaan na totooy Dios so templo diad Jerusalem. Natan, saray salita nen Aggeo so walaan ni na kasumpalan nipaakar ed baleg ya espiritual a templo nen Jehova.
9 Minilyon so ondadagsa natan ed piguratibon templo ta pian makapandayew ira ed Dios “dia ed espiritu tan katuaan,” tan diad kada taon et masulok a 200,000 a totoo, ya adeskribe bilang “saray mabli a bengatla na saray amin a nasyon” so tuloytuloy ya ondadagsa. (Juan 4:23, 24) Alimbawa, ipapabitar na sankamundoan a report parad 2006 a serbisyon taon a walay 248,327 a nampabautismo bilang simbolo na dedikasyon da ed si Jehova. Ipapabitar na saya a walay aberids a 680 a balon babangatan ed kada agew! Napatnagan ed pangaaro ra ed katuaan tan ed pilalek dan manlingkor ed si Jehova bilang manangiyabawag na Panarian a talagan sikara so inyasingger na Dios.—Juan 6:44, 65.
10, 11. Isalaysay pa so sakey ya eksperiensya a mangipapabitar ed pangaaapresya na saray totoo ed katuaan na Biblia.
10 Dakel ed sarayan matuan-impanpuso so asagyat ed katuaan lapud nibiig da so “matunong tan marelmeng, say manlingkor ed Dios tan say agmanlingkor ed sikato.” (Malaquias 3:18) Konsideraen pa so eksperiensya nen Wayne tan Virginia, sakey a Protestantin sanasawa ingen ta walaan na dakel nin tepet ya agnaebatan. Agda labay so guerra tan pareho iran awetwet tan agonigon sanen naimatonan da so papari a mamebendisyon ed saray sundalo tan saray armas da. Diad itatatken la na sayan sanasawa, liknaen dan ag-ira iimanoen na arum diad simbaan da, anggaman si Virginia et pigay taon lan mangibabangat na relihyon da ed kada Simba. “Anggapo lambengat so anggan sakey a binmisita ed sikami odino mangomusta ed kipapasen mi ed espiritual,” so inkuan da. “Say relihyon mi et interesado labat ed kuarta mi. Adismaya kamin maong.” Sikara so lalon adismaya sanen kinonsenti ed simbaan da so homoseksualidad.
11 Kaleganan na satan, nagmaliw a Tasi nen Jehova so apo ran bii insan say anak dan bii. Anggaman saya so agnaakon tampol nen Wayne tan Virginia, anguman lanlamang so kanonotan da tan impaiyaralan ira na Biblia. “Diad loob labat na taloy bulan,” so inkuan nen Wayne, “dakel lay naaralan mi ed Biblia nen say diad apalabas a 70 taon! Agmin balot nadngelan nensaman so ngaran na Dios a Jehova, tan anggapoy amta mi nipaakar ed Panarian tan say Paraison dalin.” Agnambayag, sayan masimoon a sanasawa so inmatendi la ed Makristiano iran pantitipon tan akibiang la ran manpulong. “Labay min inabang so katuaan ed amin a totoo,” so inkuan nen Virginia. Diad edad dan masulok a 80, sikara so abautismoan nen 2005. Inkuan da: “Aromog min siansia so tuan Kristianon ulopan.”
Apresyaen Yo so ‘Kibabangat Yo ed Amin a Gawan Maabig’
12. Anto so naynay ya itatarya nen Jehova ed saray lingkor to, tan anto so nepeg tayon gawaen ta pian nagunggonaan itayo?
12 Naynay a tutulongan nen Jehova iray lingkor to a manggawa na linawa to. Alimbawa, inawat nen Noe so malinew tan espisipiko iran instruksion no panon ton gawaen so biong—sakey a proyekto a diad sankaunaan a pankanawnawa et nepeg ya eksakton natumbok! Tan eksakto so impakagawa na satan. Akin? Lapud ‘ginawa nen Noe so amin ya ingganggan na Dios ed sikato, et ontan so ginawa to.’ (Genesis 6:14-22) Natan et kikinlongan met nen Jehova iray lingkor to a manggawa na linawa to. Siempre, say manunan kimey tayo et say pangipulong ed maong a balita na niletneg lan Panarian na Dios tan ontulong ed saray makanepegan pian magmaliw ira a babangatan nen Jesu-Kristo. Tan singa ed si Noe, magmaliw itayon matalona no ontulok itayo. Kanian, nepeg tayon tuloken so direksion ya itatarya nen Jehova panamegley na Salita tan organisasyon to.—Mateo 24:14; 28:19, 20.
13. Panon so pangipapasal nen Jehova ed sikatayo?
13 Ta pian nasumpal tayo itan a kimey, nepeg tayon aralen no panon so ‘suston pangusar’ ed manunan uusaren tayo, say Salitay Dios—a “maabig a pakaaralan, pakasumalan, pakasimbawaan, tan pakapanontonan a sikato so wala ed katunongan. Pian say too na Dios anggapo komon so pankulangan to, a nabangatan a maong ed amin a gawa a maabig.” (2 Timoteo 2:15, NW; 3:16, 17) Singa met nen inmunan siglo, itatarya met natan nen Jehova so makanakanan panangipasal diad panamegley na Kristianon kongregasyon. Natan, diad 99,770 a kongregasyon ed sankamundoan, natutulongan itayo ed ministeryo diad panamegley na sinimban Teokratikon Eskuelaan Parad Ministeryo tan Pantitipon Parad Panagserbi. Kasin ipapatnag yo so apresasyon yo ed sarayan importantin pantitipon diad regular ya iyaatendi tan pangiyaaplika ed saray nanaaralan yo?—Hebreos 10:24, 25.
14. Panon ya ipapatnag na saray lingkor nen Jehova so apresasyon da ed pribilehyo ran manlingkor ed Dios? (Pakomentoan so tsart a walad pahina 27-30.)
14 Ipapatnag na minilyon a totoo na Dios ed sankamundoan so apresasyon da ed kipapasal da diad panamegley na impasyan panagpulong da. Alimbawa, legan na 2006 a serbisyon taon, 6,741,444 a manangipalapag na Panarian so angusar na 1,333,966,199 ya oras ed amin ya aspekto na panagpulong a kimey, kalaktip lay panangikondukta na 6,286,618 a panangiyaral na Biblia. Kabiangan labat iraya ed pigaran makapaseseg a detalye a walad sankamundoan a report. Ipangasi yon usisaen a maong iyan report tan napaseseg kayo ed satan, a singa ed saray agagi tayo nen inmunan siglo a seguradon apaseseg ed saray report nipaakar ed inlaknab na panagpulong a kimey ed panaon da.—Gawa 1:15; 2:5-11, 41, 47; 4:4; 6:7.
15. Akin ya agnepeg a nadismaya so sakey nipaakar ed interon-kamarerwan panlilingkor to ed si Jehova?
15 Say maksil a pangikekelyaw na panangidayew ed Dios diad kada taon et pakapatnagan na aralem ya apresasyon na saray lingkor nen Jehova ed pribilehyo ran nakabat si Jehova tan ed pakapantasi ra nipaakar ed sikato. (Isaias 43:10) Tua, say bagat na panangidayew na arum ed saray maedad la, masakit, odino agla makakurang ya agagi tayo so nikompara ed samay balon bii ya angipelag na duaran sinsilyo. Balet agtayo lilingwanan ya aapresyaen a maong nen Jehova tan say Anak to so amin ya interon-kamarerwan manlilingkor ed Dios, lapud gagawaen dan amin so anggaay nayarian da.—Lucas 21:1-4; Galacia 6:4.
16. Antoran katulongan ed panagbangat so intarya na Dios ed apalabas iran panaon?
16 Nilikud ed kipapasal tayo ed panagpulong, kikinlongan itayo nen Jehova panamegley na organisasyon to diad pangitatarya to na alay abig iran katulongan ed panagbangat. Diad imbeneg iran dekada et nitarya iray libron Say Katuaan a Mangitonton ed Bilay ya Andi-anggaan, Makapambilay Kayo na Ando lan Ando ed Paraiso Diad Dalin, Pikakabat a Mangitonton ed Andi-anggaan a Bilay, tan, diad kaplesan et say Anto so Peteg ya Ibabangat na Biblia? Saramay mangaapresya ed sarayan probisyon so epektibon manguusar ed saraya diad ministeryo.
Epektibon Usaren so Libron Ibabangat na Biblia
17, 18. (a) Antoran seksion na libron Ibabangat na Biblia so labay yon usaren ed ministeryo yo? (b) Anto so naimano na sakey a manangasikaso na sirkito nipaakar ed libron Ibabangat na Biblia?
17 Say 19 a kapitulo, detalyadon apendise, tan say malinew tan simpli iran salitan nausar ed libron Anto so Peteg ya Ibabangat na Biblia? so apaneknekan a mausa-usar ed ministeryo. Alimbawa, say kapitulo 12 et manisingbat ed teman “Panagbilay a Makapaliket ed Dios.” Isalaysay na sayan kapitulo ed iyaaralan no panon a sikatoy magmaliw a kaaro na Dios, ya iisipen na dakel a totoo ya imposiblin nagawa. (Santiago 2:23) Panon so pangaapresya ed sayan katulongan ed panagaral na Biblia?
18 Inreport na sakey a manangasikaso na sirkito diad Australia a say libron Ibabangat na Biblia so “makapasagyat kanian saray unabung et mainomay a napitongtongan.” Inyarum to ni a say libro et main-inomay ya usaren, a lapud satan et “apabiskeg so kompiyansa na dakel a manangipalapag na Panarian tan lalo iran manggagayaga diad ministeryo. Kanian agpankelawan no akin a sayan libro et tatawagen na arum bilang Balitok!”
19-21. Isalaysay so pigaran eksperiensya a mangipapabitar ed kaimportantian na libron Ibabangat na Biblia.
19 “Nayarin sikayo so imbaki na Dios,” so inkuan na sakey a bii ed Guyana diad sakey a payunir. Sayan bii tan say duaran angkekelag nin anak to so agano nin tinaynan na kaamong to. Imbukay na payunir so libron Ibabangat na Biblia diad kapitulo 1 insan binasa to so parapo 11, diad silong na titulon, “Anto so Nalilikna na Dios ed Saray Ag-inkahustisya a Naeeksperiensya Tayo?” “Sikato so atenyeg a maong ed saray punto,” so inkuan na payunir. “Diad tua, sikato so inmalagey, linma ed beneg na puesto to, insan inyaki-akis to.” Sayan bii so inmabobon a sikatoy regular ya iyaralan na sakey ya agin bii tan sikato so mantutultuloy ya onaaligwas.
20 Si José, a taga-España, et inatey so asawa to lapud aksidente ed luganan. Sikato so nandruga pian natambayo so paneermen to, tan sikato met so kinmonsulta ed saray sikolohista. Balet, agnaebatan na saray sikolohista so tepet a mangogonigon a maong ed si José: “Akin ya inabuloyan na Dios ya ompatey so asawak?” Sakey ya agew et akatongtong nen José so katrabahoan ton si Francesc. Insuheri nen Francesc a pantongtongan da so kapitulo 11 na libron Ibabangat na Biblia, ya apauloan na “Akin ya Aabuloyan na Dios so Kairapan?” Mandinayew a maong si José ed eksplinasyon na Kasulatan tan say ilustrasyon nipaakar ed maestro tan say estudyante. Sikato so seryoson nanaral, inmatendi ed sakey a sirkiton asamblea, tan onaatendi la natan ed saray pantitipon diad Kingdom Hall.
21 Si Roman, a 40 años a negosyante ed Poland, so walaan na respeto ed Salitay Dios. Balet lapud sikato so okupadon maong ed trabaho to, sikato so agtanton inmaligwas ed panaaral to na Biblia. Anggaman kuan, sikato so akaatendi ed sakey a distriton kombension tan akaawat na sakey a kopya na libron Ibabangat na Biblia. Diad saginonor et walay baleg ya angumanan na awawey to. Inkuan ton: “Diad sayan libro et atugyop so amin a manunan bangat na Biblia a singa impantutuop iray piraso na sakey a litrato, singa sakey a puzzle.” Si Roman so regular lan manaaral na Biblia tan maabig so iyaaligwas to.
Itultuloy Yon Pabulaslasen so Apresasyon Yo
22, 23. Panon tayon nitultuloy a nipatnag so apresasyon tayo ed ilalo tayo?
22 Singa ed nipaliwawa ed makapasagyat ya “Asingger la so Kililiktar!” iran Distriton Kombension, pipirawaten na saray tuan Kristiano so ‘maando a pakarondon’ odino pakaliktar ya insipan na Dios tan ginawa to itan a posible diad panamegley na nipaagus a dala nen Jesu-Kristo. Say sankaabigan lan paraan pian nipatnag tayo so impapuson apresasyon tayo ed sayan mablin ilalo et say pansiansia tayon malinis manlapud ‘saray inatey a gawa pian makapanlingkor tayo ed Dios a mabilay.’—Hebreos 9:12, 14.
23 On, talagan sakey a milagro so matoor a pakapansusungdo na masulok ya anemiran milyon a manangiyabawag na Panarian diad panlilingkor da ed Dios anggaman alablabas so pananesdes ya unaen ni so dili. Saya met so paneknek ya aapresyaen a maong na saray lingkor nen Jehova so pribilehyo ran manlingkor ed Dios, ya amta ran ‘say kimey da et aliwa ya anggapo so kabaliksan ed Katawan.’ Komon ta mantultuloy ya ombulaslas so apresasyon tayo!—1 Corinto 15:58; Salmo 110:3.
Panon Yon Ebatan?
• Anto so ibabangat ed sikatayo na salmista nipaakar ed panangapresya ed Dios tan ed saray espiritual a probisyon To?
• Panon a nasusumpal natan iray salita ed Aggeo 2:7?
• Panon a kikinlongan nen Jehova iray lingkor to pian epektibo iran makapanlingkor ed sikato?
• Anto so gawaen yo ta pian nipatnag yo so apresasyon yo ed kaabigan nen Jehova?
[Tepetepet Parad Panagaral]
[Tsart ed pahina 27-30]
2006 SERBISYON TAON A REPORT NA SARAY TASI NEN JEHOVA ED SANKAMUNDOAN
(Nengnengen so tomo)
[Saray litrato ed pahina 25]
Sikatayo so sigpot a kikinlongan nen Jehova a manggawa na linawa to