Istorya na Bilay

No Akin a Panliliketan Ko so Panaggaway Babangatan

Unong ed Salaysay nen Pamela Moseley

Kapetapetangan ed saman na guerra ed Inglatera sanen impila ak nen nanay ed kombension na saray Tasi nen Jehova diad syudad na Leicester nen 1941. Nadngel mi so espisyal a paliwawa nen Joseph Rutherford nipaakar ed ugugaw. Sanen abautismoan kami nen nanay diad kombension, naimanok so panlikliket na saramay tinmulong ed sikamin onaligwas ed espiritual. Diad saman ko amoria ya ontan lan kaliket manaya so panaggaway babangatan nen Jesu-Kristo.

GINMAPO so impagmaliw mi a babangatan sakbay na 1940. Nanonotan ko ni iman a makapataktakot ya agew nen Setyembre 1939 sanen tinmerak so Guerra Mundial II. Sankanengneng ko a manag-agus so lua nen nanay ko legan ton itetepet ya, “Akin et anggapo so kareenan ed mundo?” Saray ateng ko et kabiangan na militar legan na Guerra Mundial I, kanian naeksperiensya ra so makapasinagem ya epekto na satan. Intepet nen nanay ko imay tepet to ed pastor na Anglican ed Bristol. Balet onia labat so ebat na pastor: “Talagan walaray guerra, agtayo napaliisan iratan.”

Agnambayag, wala so akulaw lan Tasi nen Jehova a binmisita ed abung mi. Intepet met ed sikato nen nanay imay parehon tepet ya, “Akin et anggapo so kareenan ed mundo?” Impaliwawa na saman a Tasi a saray guerra et kabiangan na saray tanda a manbibilay itayo la ed kaunoran a panaon na sayan magulon sistema na bengabengatla. (Mateo 24:3-14) Agnambayag, sikami so iyaaralan la na anak ton bii. Kaiba iran dua ed saramay malikeliket ya angimaton ed impanpabautismo mi. Akin kasi a malikeliket iraman so mibibiang ed panaggaway babangatan? Naamtaan ko so rason diad saginonor. Abuloyan yo ak pan mangistorya  no antoray naaralan ko ed masulok a 65 taon a pibibiang ko ed panaggaway babangatan.

Aromog Ko so Liket ed Panagbangat

Ginapoan koy manpulong diad Bristol nen mantaon ak na 11. Sakey ya agin laki so angiter ed siak na akarekord a paliwawa a nibase’d Biblia tan sakey a kard ya akaimprintaan na saray mensahe, insan inkuan to: “Laen mo iratan ya amin a kaabungan ed biek na karsada.” Kanian linma ak tan bukbukor ko. Siempre, mannerbiyos ak a maong ed saman. Imparengel ko ed kada unabung so akarekord a paliwawa insan ko impanengneng so kard a mangiimbita ed sikaran mangawat ed literatura na Biblia.

Diad kagapo na dekaday 1950, nipurek ed sikami ya ibasa mi so Biblia legan kamin mankakabkaabungan. Diad gapo et mairap koy mitongtong tan mangipaliwawa na saray teksto ed Biblia ed saray totoon agko kabat lapud mabaing ak. Balet akapanpakpel ak a siansia. Aliknak itan sanen panggagayagaan ko lan maong so ministeryo. Sikami so ipapasen na arum a totoo a managlakoy libro, balet sanen imbasa tan impaliwawa mi ed sikara iray teksto na Biblia, binidbir da a sikami so managbangat na Salita na Dios. Nanliketan kon maong iyan kimey tan labay kon dakel ni so nagawaan ko. Kanian nen Setyembre 1955, siak so ginmapon nanlingkor a sigpot-panaon bilang payunir.

Makapatumang so Panag-anos

Sakey ed saray manunan leksion a naaralan ko et sikatayo so natumangan no man-anos itayo. Aminsan, angitilak ak na sakey a kopya na Panag-Bantayan ed sakey a bii a si Violet Morice. Sanen pinawil ko, nilukasan to so puerta, tan madengedengel legan kon ipapaliwawa ed sikato so Kasulatan. Diad kada ibisitak et ompatnag a sikatoy interesadon maong. Balet, sanen inopresian ko a regular ko lan iyaralan na Biblia, oniay inkuan to: “Agko ni labay. Sano baleg laray ana’ko, insan ak la manaral.” Adismaya ak a maong! Inkuan na Biblia a walay “panaon a pananap, tan pananap a pakabalang.” (Eclesiastes 3:6) Ingen, agak sinmuko.

Diad tinmumbok a bulan, siak so pinmawil tan dakel niran teksto so impaliwawak ed si Violet. Agnambayag et sikato lay sinimban iyaaralan ko na Biblia diad arap na puerta. Diad saginonor et inkuan to: “Mas maabig amo no dia ta la’d loob?” Nagmaliw ya alay abig a kaagian tan maapit a kaaro si Violet! On, ta sikatoy abautismoan la bilang sakey ed saray Tasi nen Jehova.

Sakey ya agew, abigla si Violet sanen akabatan ton inlako na masiken to so abung da ya agto amta, insan sikatoy tinaynan na masiken to. Maong labat ta diad saman a mismon ngarem et walay sakey a Tasi a tinmulong ed sikaton makalmo na sananey ya ayaman. Lapud pisalsalamat to ed si Jehova, denesidi to ya usaren lay interon bilay to ed panagpayunir. Sanen naimanok so pirmin inkaseseg to ed tuan panagdayew, lapud sikato so napnoy espiritu nen Jehova, atalosan ko no akin ya ontan lan makapaliket so panaggaway babangatan. On, saya la so manunaan a kimey ed bilay ko!

Nen 1957, sikami nen Mary Robinson so nibakin manpayunir ed lugar na amayamay a pabrika, diad Rutherglen ed Glasgow, Scotland. Sikami so manpupulong anggaman makelkelpa, maragem, mauran, tan mayelo, balet maabig so resulta. Sakey ya agew et akabat ko si Jessie. Nanliketan ko so pangiyaaral ko ed sikato na Biblia. Balet say masiken ton si Wally et sakey a Komunista, tan agto labay so miarap ed siak diad gapo. Ingen, sanen nanaral na Biblia tan atalosan to a say Panarian na Dios labat so makapangitarya ed totoo na maabig iran kipapasen, sikato so aliketan. Asabi panaon et sikaran dua so nagmaliw met lan managgaway babangatan.

Manamalingo Iray Primeron Reaksion na Totoo

Diad saginonor et akaawat kami na balon asainmin diad Paisley, Scotland. Sakey ya agew legan a manpupulong ak diman, sakey a bii so angipalalbag na puerta ed arapan ko. Balet agnambayag et siak so  inanap to pian onkerew na dispensa. Sanen pinmawil ak diad tinmumbok a simba, oniay inkuan to: “Say pakaliknak et say Dios so pinalalbagan ko na puerta. Kanian inanap ta ka.” Say ngaran to et Pearl. Inkuan to’d siak a sikatoy adismaya ed saray kakaaro tan kakanayon to kanian impikasi to ed Dios a nawalaan komon na tuan kaaro. “Insan tinmoktok ka,” kuan to. “Kanian amoriak a nayarin sika imay tuan kaaro ya ipipikasik.”

Aliwan mainomay so pagmaliw a kaaro nen Pearl. On, ta sikatoy manaayam ed toktok na sakey ya atagey a pukdol, kanian kaukolan kon tatdangen itan pian makasabi ak. Sanen primero toy onatendi ed pantitipon, sikatoy sinamar ko ed abung to balet ta akaruskos ak lawari lapud maksil so dagem tan uran. Aderal so payong ko ed saman kanian imbantak ko la. Anem bulan kayari na samay impangipalalbag to’d siak na puerta, insimbolo nen Pearl so dedikasyon to ed si Jehova panamegley na bautismo ed danum.

Agnambayag et impaiyaralan met la ed Biblia so masiken to, tan kayari na antikey a panaon et sikato lay akila’d siak a nampulong diad kabkaabungan. Singa gendat, onuuran ed saman. Balet inkuan to: “Agka mapaga’d siak ta naanosan koy manpauran anggan pigay oras pian makabantay ak na football, kanian seguradon naanosan ko met so manpauran parad si Jehova.” Siak so lawas mandinayew ed pirmin inkaseseg na saray taga-Scotland.

Sanen pinmawil ak diman kayari na dakel a dekada, panlikliketan kon nanengneng so dakel ed saray inyaralan ko a mansiasiansian mabiskeg ed pananisia! Ontan so liket a nalikna ed panaggaway babangatan. (1 Tesalonica 2:17-20) Nen 1966, kayari na masulok a waloy taon ya impanpayunir ko ed Scotland, siak so naimbitaan ed Watchtower Bible School of Gilead pian ipasal bilang misionaryo.

Balon Teritorya ed Sananey a Bansa

Siak so nibaki ed Bolivia, diad baley na Santa Cruz a walaay ampetang a klima. Saksakey ditan so kongregasyon a walaan na 50 a manangipalapag. Legan a wadman ak, nanononotan ko so magulon kipapasen ed Sagur ya Amerika, a singa saray nababantayan ed pelikula na Hollywood. No nodnonoten koy apalabas, nibagak a sakey ak labat ya ordinaryon misionaryo. Agko nin balot asali so inusilan na buwaya, pinaliberan na maramsak a grupo na totoo, abalang ed desierto, odino linmereg so barkon niluganan ko. Balet, ipapasen ko a mas makapaliket so panaggaway babangatan.

Sakey ed saray primeron inyaralan ko na Biblia ed Santa Cruz et si Antonia. Talagan nairapan ak a mangiyaral na Biblia ed salitan Español. Aminsan et oniay inkuan na melag nin anak to a laki: “Nay, gagagalaen to amo so mansalita na aliwa pian onelek itayo?” Diad kaunoran, nagmaliw a babangatan si Antonia, pati say marikit ton si Yolanda. Wala so kaaro nen Yolanda a manaaral na abogasya a manngaran na Dito. Sikatoy impaiyaralan met na Biblia tan inmatendi la ed Makristianon pantitipon. Diad pikikimey ko ed sikato, walay naaralan ko nipaakar ed panangibangat ed katuaan na Biblia: No maminsan et nakaukolan a tenyegen na daiset iray totoo.

Sanen mataltalag la a paiyaralan si Dito, oniay inkuan ko’d sikato: “Dito, agka papaskaren nen Jehova a suportaan so Panarian to. Sikay kaukolan a manpili.” Sanen inkuan to a labay ton panlingkoran so Dios, oniay inkuan ko: “Naimanok a walaray litrato dia na sakey a lider na rebolusyon. No walay bisitam a makanengneng ed saratan, nibaga to kasi a talagan susuportaan mo so Panarian na Dios?” Ontan so daiset a pananenyeg a nakaukolan to.

Kalabas na duay simba, agawa so rebolusyon, tan manpapaltogan la iray estudyante na unibersidad tan popolis. “Ontaynan itayo la!” so inyeyag nen Dito ed kaaro to. “Andi! Saya la imay agew ya aalagaren tayo,” so inyebat na kaiba to, ya inala to so paltog tan batik ed toktok na eskuelaan. Sikatoy kaiba ed waloran kakaaro nen Dito ya inatey ed saman ya agew. Naisip yo ta so pirmin liket ko ed impakanengneng ed si Dito, ya inatey met komon ed saman no agto pinili so magmaliw a tuan Kristiano?

Nanenengneng Ko so Panangigiya na Espiritu nen Jehova

Aminsan et lalabsanan ko so sakey ya abung lapud inisip ko a nakar mi la itan. Kabebekta et walay  biin anawag ed siak. Say ngaran to et Ignacia. Wala lay amta to nipaakar ed saray Tasi nen Jehova, balet ta ag-inmaligwas ed espiritual lapud sikatoy pirmin sinebelan na asawa to a si Adalberto, sakey a maregregkel a pulis. Agnatatalosan nen Ignacia iray manunan bangat na Biblia, kanian sikatoy ginapoan kon inyaralan. Anggaman pursigido si Adalberto a mamatunda ed panaaral mi, sikatoy abayag kon akatongtong nipaakar ed arum a pamaakaran. Saman la so gapoan na impankaaro mi.

Isipen pa so liket ko sanen nagmaliw a makaaron membro na kongregasyon si Ignacia, a mangaasikaso ed espiritual tan pisikal a pankaabigan na dakel a mankaukolan na ligliwa. Asabi panaon et nagmaliw met lan Tasi so asawa to, pati say taloran ananak to. Diad tua, sanen atalosan nen Adalberto so kabaliksan na maong a balita, sikatoy linma ed istasyon na pulisya tan maligligsan pinulongan to iray popolis kanian naopresian to ira na 200 a suskripsion na The Watchtower tan Awake!.

Si Jehova so Mamapaaligwas

Kayari na anem taon ya impanlingkor ko ed Santa Cruz, siak so niasain ed La Paz, say manunan syudad ed Bolivia, a diman et 25 taon ko a nanlingkor. Diad asasakbay a taon na dekaday 1970, wala labat so 12 a membro ed ayaman a sanga na saray Tasi nen Jehova ed La Paz. Lapud ilalaknab na panagpulong a mankaukolan na babaleg iran pasilidad, sakey a balon bilding so nipaalagey diad maples ya onaaligwas a syudad na Santa Cruz. Nen 1998 et niyalis ditan so sangan opisina tan naimbitaan ak a magmaliw a membro na pamilyan Bethel, a natan et masulok kami lan 50.

Say saksakey a kongregasyon ed Santa Cruz nen 1966 et nagmaliw la natan a masulok a 50 a kongregasyon. Tan say 640 a Tasi ed interon Bolivia diad saman a taon et ngalngali la natan a 18,000!

Makapaliket lapud nagmaliw a mabunga so ministeryok ed Bolivia. Anggaman ontan, siak so lawas a napapaseseg ed katooran na kapara iran Kristiano ed nanduruman pasen. Manliket itayon amin lapud nanenengneng tayo a bebendisyonan nen Jehova so kimey a panangipulong ed Panarian. Talagan makapaliket so pibiang ed kimey a panaggaway babangatan.​—Mateo 28:19, 20.

[Litrato ed pahina 13]

Sanen manpapayunir ak diad Scotland

[Saray litrato ed pahina 15]

Manlilingkor ak diad sangan opisina ed Bolivia; (walad loob a litrato) sanen nangraduar kami bilang koma-42 a klase na Gilead