Pangibagay Katuaan​—Kasin Obligasyon Labat na Arum?

“KABUSOL ko iray tila, tan agko labay a siak so tilatilaan!” Ontan so mapekder ya inkuan na sakey a 16 años a bii. Tan ontan so liknaan met na maslak ed sikatayo. Labay tayon isipen a tua so impormasyon a nipapasabi ed sikatayo​—balanglan insalita odino insulat iratan. Balet no sikatayo so mangipapasabi na impormasyon ed arum, kasin ibabaga tayo so katuaan?

Diad impansurbi ed Alemanya, say ebat na karaklan ed saray tinepetan et “nayari so mantila diad angkelag iran pamaakaran pian naprotektaan so dili odino arum sumpad pakasakitan, a nakaukolan ni ingen itan pian saray totoo et makapantutunosan.” Oniay insulat met na sakey a dyurnalista: “Say naynay a pangibaga na katuaan, a puron katuaan, so maabig balet ta makapasawa.”

Kasin say labay tayo et ibaga ed sikatayo na arum so katuaan ingen ta isipen tayo a makatunongan so sagpaminsan ya agtayo pangibagay katuaan? Importante ni kasi no ibaga tayo so tua odino andi? Antoray epekto na pansalitay aliwan tua?

Say Makapuy a Resulta na Agpangibagay Katuaan

Imanoen pa so makapuy a resulta na agpangibagay katuaan. Saray sanasawa tan mankakapamilyaan so naaandiay panagmatalek ed sakey tan sakey lapud ag-inkamatua. Say andiay-basiyan a talabutob et manderal ed reputasyon na sakey a too. Lapud panagsaol na saray empleyado, ombabaleg so gastos ed panangipakurang na negosyo, kanian mabmabli iray produkto ra. Makasengeg ed palson panangideklara na babayaran a buis, say gobierno so natatakeway rentas a parad pangitarya komon na saray serbisyo ed publiko. Saray ginawa-gawan impormasyon na saray managsukimat so manederal ed saray matalonan propesyon pati say reputasyon na saray respetadon institusyon. Lapud saray agmatuan pakana a biglan-iyaman, saray agmaalwar a managpuonan so nauupotay tipon, odino mas grabe ni nen satan. Agpankelawan sirin ya imbaga ed sikatayo na Biblia a kabiangan ed saray bengatlan kadimla nen Jehova a Dios iray “matila a dila” tan “matila a tasi a manbitla na tilatila”!​—Uliran 6:16-19.

Say inkalapagan a panagtila et makaderal ed saray indibidual tan diad interon sosyedad. Amin lawarin totoo so onabobon ed satan. Akin balet et gagagalaen na totoo so mangibagay aliwan tua? Kasin amin ya aliwan tua et tila? Konsideraen tayo iray ebat ed saraya tan arum niran tepet diad ontumbok ya artikulo.

[Litrato ed pahina 3]

Saray sanasawa so naandiay panagmatalek ed sakey tan sakey lapud ag-inkamatua