Si Jehova et Maapresyan Dios

“Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to.”​—HEBREOS 6:10.

1. Panon so impangapresya nen Jehova ed Moabitan si Rut?

 AAPRESYAEN a maong nen Jehova so pansasagpot na saramay masimoon a manggagawa na linawa to, tan sikara so daakan a tutumangan to. (Hebreos 11:6) Sayan alay abig ya aspekto na personalidad na Dios so amta na matoor a lakin si Boaz, lapud oniay imbaga to ed Moabitan si Rut, a maaron angasikaso ed abalo lan katulangan ton bii: “Si Jehova tumangan to so gawam, tan nasnaspot a gunggona so iter komon ed sika nen Jehova, a Dios na Israel, a dia ed silong na saray payak to linma ka ya onapireng.” (Rut 2:12) Kasin benendisyonan na Dios si Rut? On! Diad tua, nisulat ed Biblia so istorya na bilay to! Niarum ni, sikato so inala nen Boaz bilang asawa tan sikato so nagmaliw ya inmunan ateng nen Arin David tan si Jesu-Kristo. (Rut 4:13, 17; Mateo 1:5, 6, 16) Sayan alimbawa et sakey labat ed dakel a salaysay na Biblia a mangipapabitar ed panangapresya nen Jehova ed saray lingkor to.

2, 3. (a) Anto so makatantanda ed pangipapatnag nen Jehova ed apresasyon to? (b) Akin a nayarian nen Jehova ya ipatnag so tuan apresasyon? Iyilustra.

² Ipasen nen Jehova ya ag-inkatunong ed biang to so agto pangipatnag na apresasyon ed saray lingkor to. Oniay ibabaga na Hebreos 6:10: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to, ed impanulong yo ed saray sasanto ed saray pankaukolan da, tan ed panutulong yo ni natan ed sikara.” Say makatantanda ed sayan balikas et ipapatnag na Dios so apresasyon to ed saray debosyonadon totoo to anggaman makasalanan ira tan makulang ira ed gloria na Dios.​—Roma 3:23.

³ Lapud agtayo inkayadyari, nayarin isipen tayo a saray gawa na maridios a debosyon tayo et andiay-kakanaan tan agmakanepegan na panamendisyon na Dios. Balet, natatalosan a maong nen Jehova iray motibo tan kipapasen tayo, tan talagan papablien to so interon-kamarerwan panaglingkor tayo ed sikato. (Mateo 22:37) Bilang ilustrasyon: Anengneng na sakey ya ina ed lamisaan to so sakey a regalo​—sakey a mamura labat a kulintas. Nayarian to komon a leglemewen so regalo tan ibaliwala itan. Balet, diad kard ya akatekep ed satan et akasulat no siopa so angiter​—say anak ton bii, ya angigastos ed amin ya inyalkansia to ta pian nasaliw to itan. Natan et duma la so pangipasen na ina ed satan a regalo. Nayarin sikatoy makalua, nalakap to so anak to, insan ibalikas to so impapuson apresasyon to.

4, 5. Panon so impangalig nen Jesus ed si Jehova diad panangipatnag na apresasyon?

⁴ Lapud amta to no antoray motibo tan limitasyon tayo, aapresyaen nen Jehova so sankaabigan a nagawaan  tayo parad sikato, melag man itan odino baleg. Nipaakar ed saya, si Jesus so naspot ya angipatnag ed saray kalidad nen Ama to. Nodnonoten pa so salaysay na Biblia nipaakar ed balon bii ya angipelag na duaran sinsilyo. “Nen tinmangway Jesus, anengneng to ray mamayaman a mangipepelag na donasyon dan kuarta diad panagpelagan ed templo. Anengneng to met so mairap-bilay a biin balo a mangipepelag na duaran sinsilyo. Inkuanto, “Kuan ko’d sikayo a dakel ni so inter to‘man a mairap-bilay a balo nen saray amin da ray arum. Ta say inter na arum manlalapud sulok na kayamanan da, balet anggan mairap-bilay iman a balo, inter toy amin a pambilay to.”​—Lucas 21:1-4, Maung a Balita.

⁵ On, lapud amta nen Jesus so kipapasen na bii, a sikato so abalo tan mairap-bilay, atebek to so peteg a kablian na langkap ya inter na balon bii kanian inapresya to itan. Ontan met so panangapresya nen Jehova. (Juan 14:9) Agta makapaseseg a naamtaan ya antokaman so kipapasen yo et nagamoran yo so panangabobon na maapresyan Dios tayo tan say Anak to?

Tinumangan nen Jehova so Etiopen Walaay Takot ed Sikato

6, 7. Akin tan panon ya impatnag nen Jehova so apresasyon to ed si Ebed-melec?

⁶ Aminpigan nipabitar ed Kasulatan so pangipapatnag nen Jehova na apresasyon to ed saramay manggagawa na linawa to. Nodnonoten pa so impideneng to ed say Etiopen walaay takot ed sikato, a si Ebed-melec, sakey a kapanaonan nen Jeremias tan sakey ya aripen ed sankaabungan na agmatoor a si Arin Zedekias na Juda. Naamtaan nen Ebed-melec a saray prinsipe na Juda et palson angakusa ed si propetan Jeremias a sikato kuno so onsusumpa’d uley na ari kanian sikatoy impaipelag da ed sakey a bobon, pian ompatey ditan ed eras. (Jeremias 38:1-7) Lapud amta to so pirmin pamubusol ed si Jeremias makasengeg ed mensahen impulong to, inrisga nen Ebed-melec so mismon bilay to tan inmapela ed ari. Oniay makpel ya imbaga na sayan Etiope: “Katawan ko ya ari, saraya a lalaki a ginawa ra so mauges ed amin a ginawa ra ed Jeremias a propeta, a sikato  so imbantak da ed aralem a pukokan; et sikato so ompatey naanid’man lapu ed eras.” Diad ganggan na ari, angitagar si Ebed-melec na 30 sundalo tan inagwat da so propeta na Dios manlapud bobon.​—Jeremias 38:8-13.

⁷ Anengneng nen Jehova so pananisia nen Ebed-melec, a satan so akatulong pian natalonaan to so antokaman a takot a nayarin alikna to. Kanian, impatnag nen Jehova so apresasyon to tan oniay imbaga to ed si Ebed-melec panamegley nen Jeremias: “Nia, yakar ko naani so saray salitak ed tapew na saya a syudad nipaakar ed kaugsan to, aliwa ed kaabigan . . . Balet ilaban ta ka naani ed satan ya agew . . . et agka naani niyawat ed lima na saray totoo a tatakotan mo. Ta peteg a siak ilaban ta ka naani . . . say bilay mo sikato naani ed sika so pinagkasamsam ed sika; lapu ed nanmatalek ka ed siak.” (Jeremias 39:16-18) On, inliktar nen Jehova si Ebed-melec, pati si Jeremias, manlapud saray mauges a prinsipe na Juda, insan diad saginonor et niliktar lamet ira manlapud saray taga-Babilonia, ya aneral ed Jerusalem. “[Si Jehova] yapiger to so kamarerwa na saray sasantos to; iliktar to ra ed lima na bagel,” kuan na Salmo 97:10.

“Say Amam a Wala ed Amot Tumangan To Ka”

8, 9. Unong ed impatnag nen Jesus, antoran klase na pikakasi so aapresyaen nen Jehova?

⁸ Say sakey nin ebidensya ya aapresyaen tan papablien nen Jehova so maridios a debosyon tayo et naromog ed ibabaga na Biblia nipaakar ed pikakasi. “Say pikakasi na maptek sikato so kalikliket [na Dios],” so inkuan na makabat a laki. (Uliran 15:8) Diad panaon nen Jesus et dakel a lider na relihyon so maparungtal a manpipikasi, aliwan lapud puron debosyon da, noagta labay dan pandinayewen so totoo. “Inawat da lay tumang da,” so imbaga nen Jesus. “Ingen sika, bangno mikasi ka,” so imbangat to ed saray patumbok to, “onloob ka ed silir mo, et no nikapot mo la so pintom, insan ka mikasi ed Amam a wala ed amot, et say Amam a wala ed amot tumangan to ka.”​—Mateo 6:5, 6.

⁹ Siempre, agkokondenaen nen Jesus so pampikasi ed publiko, lapud sikato so aminpigan nampikasi ed arap na totoo. (Lucas 9:16) Aapresyaen a maong nen Jehova so pampipikasi tayo a manlalapud masimoon a puso tayo, ya agtayo nonoten a pandinayewen so arum. Diad tua, saray pikakasi tayo sano bukbukor tayo et maong a pakapatnagan na aralem a panangaro tan panagmatalek tayo ed Dios. Kanian, aliwan makapasurprisa no akin a mabetbet ya oonla si Jesus diad pribado iran lugar ta pian diman manpikasi. Aminsan et ginawa to itan “diad kaimbuasan, ed palbangon.” Diad sananey ya inkagawa et sikato so “tinmatdang ed palandey a nampikasi a bukbukor.” Tan sakbay ton pilien so 12 apostoles to, si Jesus so sanlabin nampikasi.​—Marcos 1:35; Mateo 14:23; Lucas 6:12, 13.

10. Sano napatnagan ed saray pikakasi tayo so masimoon tan aralem a liknaan tayo, anto so naseguro tayo?

¹⁰ Isipen pa no panon so intalineng a maong nen Jehova ed saray masimoon a pikakasi na Anak to! On, walaray panaon a si Jesus et nampikasi “tekep na mabiskeg a tagleey tan saray lua . . . tan sikato so nadngel lapud masanton panaglikas to” odino maridios a takot to. (Hebreos 5:7; Lucas 22:41-44) Sano napatnagan met ed saray pikakasi tayo so masimoon tan aralem a liknaan tayo, makaseguro itayo a dengelen tan apresyaen na Ama tayo ed tawen iray pikakasi tayo. On, “si Jehova asingger ed amin ya . . . ontawag ed sikato ed katuaan.”​—Salmo 145:18.

11. Anto so liknaan nen Jehova ed gagawaen tayo no bukbukor tayo?

¹¹ No aapresyaen nen Jehova so pampipikasi tayo sano bukbukor tayo, lalon aapresyaen to met so panguunor tayo ed sikato anggano anggapoy makakanengneng ed sikatayo! On, amta nen Jehova so gagawaen tayo no bukbukor tayo. (1 Pedro 3:12) Kanian, say pagmaliw tayon matoor tan matulok anggano anggapoy makakanengneng ed sikatayo et maong a pakapatnagan a walaan itayo na “ayadyari a puso” ed si Jehova, sakey a puson walaan na malinis a motibo tan inkapekder ed no anto so maptek. (1 Awaran 28:9) Agaylan makapaliket ed si Jehova so ontan a kondukta! ​—Uliran 27:11; 1 Juan 3:22.

12, 13. Panon tayon naalwaran so nonot tan puso tayo ta pian naalig tayo met so matoor a babangatan a si Natanael?

 ¹² Kanian, saray matoor a Kristiano so manalwar sumpad saray inyamot a kasalanan a maneral ed nonot tan puso, a singa say pambantay na pornograpiya tan marawal a pelikula. Anggaman niyamot ed totoo so arum a kasalanan, amta tayo ya ‘anggapoy niyamot ed Dios, diad pakanengneng to et lukas tan malinew ya amin iray pinalsa, tan sikato so pangebatan tayo ed kabibilay tayo.’ (Hebreos 4:13, MB; Lucas 8:17) No mantultuloy tayon paliisan iray bengatlan makapaermen ed si Jehova, mansiansian malinis so konsiensia tayo tan maliket itayo lapud amta tayon aabobonan itayo na Dios. On, seguradon aapresyaen tan papablien a maong nen Jehova so too a “manakar a mapmaptek, tan manggawa na matunong, tan mansalita na matua ed puso to.”​—Salmo 15:1, 2.

¹³ Balet, panon tayon naalwaran so nonot tan puso tayo diad mundon napno na kaugsan? (Uliran 4:23; Efeso 2:2) Nilikud ed sigpot a panganamot ed amin ya espiritual a probisyon nen Jehova, nepeg tayon pansagpotan ya ipulisay so mauges tan gawaen so maong, ya onkiwas itayon tampol ta pian saray agmanepeg a pilalek et ag-ontubo tan manbunga na kasalanan. (Santiago 1:14, 15) Isipen pa so panliket yo sano ibaga nen Jesus ed sikayo so imbaga to ed si Natanael: “Nia, so sakey a [too] a dia ed sikato anggapo so panamalingo.” (Juan 1:47) Si Natanael, a tinawag met a Bartolome, so apribilehyoan a magmaliw a sakey ed 12 apostoles nen Jesus.​—Marcos 3:16-19.

“Mapangasi tan Matoor ya Atagey a Saserdote”

14. Anto so pandumaan na reaksion nen Jesus tan say reaksion na arum nipaakar ed ginawa nen Maria?

¹⁴ Lapud si Jesus so ‘talintao na Dios ya agnanengneng,’ si Jehova, naspot ton aaligen so Ama to diad pangipapatnag to na apresasyon ed saramay manlilingkor ed Dios a walaan na malinis a puso. (Colosas 1:15) Alimbawa, limaran agew sakbay ton ibagat so bilay to, si Jesus tan arum ed saray babangatan to so pinarawes diad abung nen Simon a taga-Betania. Diad saman a labi et si Maria, ya agi nen Lazaro tan Marta, et “sankaawit toy botilyan alabastro a napnoy mabmablin pabalingit” (a manbili na ngalngalin sakey taon a sueldo), tan impuyok to itan ya amin ed ulo tan sali nen Jesus. (Juan 12:3) “Akin ‘yan panagdarak?” so imbaga na arum. Balet, duma so impangipasen nen Jesus ed ginawa nen Maria. Impasen to itan bilang mabunbunlok a gawa tan makabkabaliksan lapu ed manasingger lan ipatey to tan kiponpon to. Sirin, si Maria so pinagalangan nen Jesus, imbes a balawen to. “Inerman ed sankamundoan so pangipulongan na sayan maong a balita,” so inkuan to, “nasalitay ginawa to ‘yan bii a pakanodnonotan ed sikato.”​—Mateo 26:6-13, MB.

15, 16. Panon itayon nagunggonaan ed impanbilay tan impanlingkor nen Jesus ed Dios bilang sakey a too?

¹⁵ Agaylan abig so pribilehyo tayo lapud walaan itayo na maapresyan Lider, salanti, si Jesus! Diad tua, say impanbilay nen Jesus bilang too so angiparaan ed sikato ed kimey a pagawa nen Jehova, salanti, say panlingkor to bilang Atagey a Saserdote tan Ari, diad kongregasyon na saray alanaan insan diad mundo na katooan.​—Colosas 1:13; Hebreos 7:26; Apocalipsis 11:15.

¹⁶ Sakbay ya onla diad dalin, si Jesus so walaan lay aralem ya interes tan nikaduman panamabli ed katooan. (Uliran 8:31) Diad impanbilay to bilang too et mas atalosan to iray subok a sasagmaken tayo diad panlilingkor tayo ed Dios. “[Si Jesus so] manepeg ed amin a mipara ed saray agagi to,” so insulat nen apostol Pablo, ta “pian sikato komon so mapangasi tan matoor ya atagey a saserdote . . . Ta lapud no sikaton dili et nantepel na pakatukso, nayarian to a tulongan so saray natukso.” Si Jesus so “makayarin mangasi ed saray kakapuyan tayo” lapud sikato “tinukso ed amin a singa sikatayo, ingen anggapo so kasalanan to.”​—Hebreos 2:17, 18; 4:15, 16.

17, 18. (a) Anto so ipaparungtal na saray sulat ed pitoran kongregasyon ed Asia Minor nipaakar ed kaaralem na apresasyon nen Jesus? (b) Nipaparaan iray alanaan a Kristiano parad anton kimey?

¹⁷ Kayari na inkioli nen Jesus et apatnagan so pakatalos ton maong ed saray subok a sasagmaken  na saray patumbok to. Nodnonoten pa iray sulat to ed pitoran kongregasyon ed Asia Minor, ya insulat nen apostol Juan. Oniay imbaga nen Jesus ed kongregasyon na Smyrna: “Amtak so saray irap mo, tan karukaan mo.” Singa ibabaga nen Jesus a, ‘Natatalosan kon maong iray problemam; naliliknak so nasasagmak mo.’ Insan, lapud asagmak ton mismo so ipapatey, oniay imbaga to tekep na panangabagey tan mabiskeg a panamaseguro: “Mansiansia ka angga ed patey, tan siak iter ko ed sika so balanget na bilay.”​—Apocalipsis 2:8-10.

¹⁸ Saray sulat ed pitoran kongregasyon so napno na saray balikas a pakapatnagan na sigpot a pakaamta nen Jesus ed saray subok ed babangatan to tan say peteg ya apresasyon to ed panmamatoor da. (Apocalipsis 2:1–3:22) Nodnonoten met a saramay sinulat nen Jesus et alanaan iran Kristiano a walaay ilalon miuley ed sikato diad tawen. Kanian singa met ed say Katawan da, sikara so nipaparaan la parad mapagalang a betang da ya ontulong a mangiyaplika ed saray gunggona na dondon bagat nen Kristo ed saray maniirap a katooan. Satan so pakapatnagan met na sankaabigan a kalidad na panangabagey.​—Apocalipsis 5:9, 10; 22:1-5.

19, 20. Panon ya ipapatnag na saramay manugyop ed “baleg ya ulop” so apresasyon da ed si Jehova tan ed Anak to?

¹⁹ Siempre, say panangaro nen Jesus ed saray alanaan a patumbok to so ninatnat met ed saray matoor ya “arum a karnero” to, saray minilyon a manugyop natan ed magmaliw a “baleg ya ulop . . . a nanlapu ed balang nasyon,” tan makaliktar ed onsabin “baleg ya irap.” (Juan 10:16; Apocalipsis 7:9, 14) Saraya so ondagsa ed dapag nen Jesus lapud aapresyaen dan maong so dondon bagat to tan say ilalo ran manbilay ya andi-anggaan. Panon dan ipapatnag so apresasyon da? Diad sagradon ‘panlilingkor da ed sikato ed agew tan labi.’​—Apocalipsis 7:15-17.

²⁰ Say sankamundoan a report parad 2006 a serbisyon taon, a walad pahina 27 anggad 30, so mangiter na malinew ya ebidensya a sarayan matoor a ministro et peteg a mangisasaklang na sagradon panaglingkor ed si Jehova diad agew tan labi. Diad tua, legan na satan a taon labat et sikara so kaiba na dagdaiset lan ulop na alanaan a Kristiano ya angusar na 1,333,966,199 ya oras diad panagpulong a kimey​—a misimbangan ed masulok a 150,000 a taon!

Itultuloy Yon Ipatnag so Apresasyon Yo!

21, 22. (a) Nipaakar ed panangipatnag na apresasyon, akin a nagkalalon manalwar iray Kristiano natan? (b) Anto so konsideraen ed ontumbok ya artikulo?

²¹ Makapasagyat a tuloy so pangipapatnag nen Jehova tan say Anak to ed aralem ya apresasyon da, diad paraan na pidedeneng da ed saray ag-ayadyarin totoo. Balet, makapaermen ta dakel a katooan so mangibabaliwala ed Dios, a say nononoten da labat et say dilin kabibilay da. Oniay insulat nen Pablo sanen deneskribe to iray totoon manbibilay ed ‘kaunoran iran agew’: “Saray totoo maaro ra’d kuarta tan maaro ra’d sikaran dili . . . Agda amtay mamidbir na maong a linawa.” (2 Timoteo 3:1-5, MB) Midumaan a tuloy ed sikara iray tuan Kristiano a mangaapresya ed amin a ginawa na Dios parad sikara diad panamegley na impapuson pikakasi ra, mabulos a katutulok da, tan interon-kamarerwan panlilingkor da ed sikato!​—Salmo 62:8; Marcos 12:30; 1 Juan 5:3.

²² Diad ontumbok ya artikulo, repasoen tayo so pigara ed dakel iran espiritual a probisyon a maaron itatarya nen Jehova ed sikatayo. Legan tayon momorekdeken irayan “maong a palangkap,” komon ta lalon ombulaslas so apresasyon tayo.​—Santiago 1:17.

Panon Yon Ebatan?

• Panon ya impatnag nen Jehova a sikatoy maapresyan Dios?

• Sano bukbukor tayo, panon tayon napaliket so puso nen Jehova?

• Diad antoran paraan ya impatnag nen Jesus so apresasyon to?

• Panon ya akatulong ed si Jesus so impanbilay to bilang too pian sikatoy magmaliw a maabagey tan maapresyan mananguley?

[Tepetepet Parad Panagaral]

[Litrato ed pahina 17]

Singa ed panamabli na sakey ya ateng ed simplin regalo na anak to, aapresyaen met nen Jehova so sankaabigan a gagawaen tayo parad sikato