Tepetepet na Saray Manbabasa

Anto so ‘bakal na Dios a Makapanyarin amin’ diad Armagedon, tan anto so pansumpalan na satan?​—Apocalipsis 16:14, 16.

Diad simplin panangibaga, say Armagedon et sakey a bakal a lanoren toy interon mundo, a diad satan et deralen la na say tinuro nen Jehova ya Arin Jesu-Kristo iray kalaban na Dios. Ipapaliwawa na Biblia a sarayan kalaban, salanti, “saray arari na amin a mundo” so dagdagen na “espiritu na saray demonyo.  . . pian tiponen da ’ra ya iparaan ed bakal na baleg ya agew na Dios, a Makapanyarin-amin . . . ed pasen a dia ed Hebreo [et] manngaran na Armagedon.”​—Apocalipsis 16:14, 16.

Aliwan literal a pasen so pambabakalan da. Say kabaliksan na terminon Armagedon et “Palandey Megiddo.” (Apocalipsis 16:16) Balet, anggapon balot so palandey a say ngaran to et Palandey Megiddo. Sakey ni, “saray arari ed dalin, tan saray ejercitos da” so ag-onsusto ed saksakey a lugar. (Apocalipsis 19:19) Diad tua, say “pasen” et manutukoy ed sakey a situasyon odino kipapasen a kipupugtaan na saray politiko ed dalin tan saray manusuporta ed sikara. Sakey itan a kipapasen ya ikokontra ed si Jehova tan ed “saray ejercitos a wala ed tawen” a say manangimando ra et si Jesu-Kristo, say “Ari na saray arari, tan Katawan na saray kakatawan.”​—Apocalipsis 19:14, 16.

Say terminon Armagedon so matukotukoy a nisisiglaot ed samay syudad nensaman ed Israel a Megiddo. Kontrolado na syudad so kaloloob na saray komersyante tan sundalo lapud bale-bale so inkipasenan na satan diad bukig na Palandey Carmel. Sakey met itan a pasen a bakalan a walan-walay manatalo. Singa bilang, diad “saray danum na Megiddo” et atalo nen Ukom Barak na Israel so mabiskeg a Canaaneon armada ya indaulo nen Heneral Sisera. (Uko-ukom 4:12-24; 5:19, 20) Tan diad kabangibang met na satan et tinaltalo nen Ukom Gideon iray Midianita. (Uko-ukom 7:1-22) Sanen insiglaot na Biblia so Megiddo ed onsasabin bakal, papaseguroan itayo na satan a sigpot a deralen na Dios, panamegley na Anak to, so amin ya onsusumpan puersa.

Anto so pansumpalan na satan? Ekalen na bakal ya Armagedon so amin a kaugsan tan karelmengan diad dalin. Lukasan met na satan so dalan a mamaarap ed sankamagloriaan a panaon ed interon awaran na too. (Apocalipsis 21:1-4) Insan say dalin so magmaliw a paraiso a panayaman ed ando lan ando na saray matunong diad maaron panangasikaso na Panarian na Dios.​—Salmo 37:29.