Tua, Mainomay a Basaen, Balet, Susto Kasi?

NEN Setyembre 2005, maligligsan inyindorso na Church of England so inkipaway na Say 100-Minuto a Biblia. Lapud denesinyo itan a basaen ed loob labat na 100 a minuto, sinegek na balon bersion so Hebreon Kasulatan ed 17 a seksion tan say Griegon Kasulatan ed 33 a seksion, a kada seksion et sansakey-pahina. Kanian, unong ed inkuan na nanrepaso ed satan, amin na saramay “agmakapainteres a kabiangan” so nakal la. Tua, maganggano tan mainomay itan a basaen, balet ta susto kasi?

Nilikud ed impangekal ed madibinon ngaran a Jehova, seguradon wala niray naimano na saray maseet a manaaral na Biblia a pigara niran lingo. (Salmo 83:18) Singa bilang, ibabaga na seksion 1 a “pinalsa [na Dios] so tawen tan say dalin ed loob na anemiran agew.” Balet, say ibabaga labat na Genesis 1:1 et “sanen gapo say Dios pinalsa to so saray tawen tan say dalin.” Insan, tinmumbok a deneskribe na orihinal a salaysay iray panamalsan agawa ed dalin, a nambayag na anemiran “agew,” odino peryodo na panaon. Kayari to et sinumaryo ed Genesis 2:4 so interon peryodo na panamalsa diad impanawag ed satan bilang “agew ya impanggawa nen Jehova a Dios na dalin tan saray katawenan.”

Unong ed Say 100-Minuto a Biblia, say matua a too a si Job so inataki kuno na “sakey ed saray aripen [na Dios], si Satanas, . . . a say responsabilidad to et onkanan manag-akusa ed katooan.” Kasin naiimanom so abalbaleg a lingo dia? Say kabaliksan na salitan “Satanas” et “Sumusumpa.” Diad tua, sikato so aliwan aripen na Dios noagta say manunan kabusol na Dios tan linawa ton dili so impagmaliw ton manag-akusa ed katooan.​—Apocalipsis 12:7-10.

Komusta balet so Kristianon Griegon Kasulatan na Say 100-Minuto a Biblia? Diad samay parabolo nipaakar ed saray karnero tan kanding, ibabaga na balon bersion a papaboran kuno nen Jesus iramay tinmulong ed “siopaman, anggan panon lan kamelag itan,” anta say talagan imbaga to et bendisyonan to iramay manggagawa na maabig ed saray manutumbok ed alimbawa to, salanti, ‘saray agagi’ to. (Mateo 25:40) Say sumaryo na satan ed Apocalipsis so mangibabaga ed saray manbabasa a say “Roma, say baleg a Babilonia, so sigpot a naderal.” Ingen kabisado na saray manaaral na Biblia ya anggapon balot so nabasa ed orihinal a sulsulat a mangibabagan say Roma et sikato lanlamang imay “Babilonia a Baleg.”​—Apocalipsis 17:15–18:24.

Parad saramay gunaet dan amtaen so Manamalsa tayo tan talosan so gagala to, anggapo lay onsalat ed kompleton Biblia. Tua a pian nabasa so Biblia et aliwa labat a 100 minuto so nakaukolan, balet natumangan ka na agnasabsabaan no gawaen mo itan. (Juan 17:3) Awat mo iyan angat, ta anggaman kaukolan so pansagpot tan panaon, segurado balet so tumang.​—2 Timoteo 3:16, 17.