Akin a Paliisay Pagmaliw ya Alablabas?

SI Jehova so sankaabigan ya alimbawa na inkasimbang. ‘Ayadyari iray gawa to’ tan agbalot maruksa so inkahustisya to, lapud naynay itan ya atekepan na panangasi. (Deuteronomio 32:4) Say panangaro to so lawas aprinsipyoan lapud sikatoy onkikiwas a mitunosan ed naspot iran ganggan. (Salmo 89:14; 103:13, 14) Saray inmunan atateng tayo so apalsan balanse ed amin a pamaakaran. Anggapoy tendensia ran magmaliw ya alablabas. Balet, lapud impankasalanan da et awalaan ira na ‘pakabalawan’ odino nagmaliw iran ag-ayadyari, kanian naandi ed sikara itan ya inkabalanse.​—Deuteronomio 32:5.

Pian iyilustra: Asalim ta lay linmugan ed sakey a kotsi odino bisikleta a walay linmubo ed dalig to? Seguradon makitog a maong tan mapeligro so biahe. Kaukolan ya apigeren so aderal lan dalig ta no andi et onkepes. Mipadpara, lapud agnaspot so personalidad tayo, walaray depekto tayo. No agtayo remedyoan itan a “linmubo,” magmaliw lan singano makitog tan mapeligro ni ingen so biahe na bilay tayo.

No maminsan et saray maong ya ugali tayo, saray kaksilan tayo, so nayarin onsobra. Singa bilang, anggaman kinaukolan na Mosaikon Ganggan ya ikdan na saray Israelita na palagoygoy so kawes da, saray Fariseo ed panaon nen Jesus et sobsobray ‘impamarukey da ed lagoygoy na saray kawes da’ lapud pankaliktan dan onduma ira ed arum. Say gagala ra et pian sikaray ompaway a mas masanto nen saray kapara ran totoo.​—Mateo 23:5; Numeros 15:38-40.

Walara met so ontan a totoo natan, a gagawaen day amin a polaing pian naimano ira, anggano pakabiglaan la itan na arum. Diad tua et panangipatnag itan a desperado la ra ed atension: “Imano yo ak! Too ak met awa!” Balet saray peteg a pankaukolan na sakey a Kristiano so agnapenek na alablabas a panangawes, awawey, tan kakikiwas.

Inkasimbang ed Panagtrabaho

Siopaman itayo odino inerman so panaayaman tayo, ontulong so makagunggona a trabaho pian magmaliw a makabkabaliksan so bilay tayo. Sikatayo so apalsa pian napenek ed ontan a trabaho. (Genesis 2:15) Kanian talagan kokondenaen na Biblia so inkangiras. Diretsaan ya imbaga nen apostol Pablo a “say agmankimey, agmet komon mangan.” (2 Tesalonica 3:10) On, say inkangiras a mantrabaho so aglabat mangitarok na kairapay bilay tan ag-inkapnek noagta agmet aabobonan na Dios.

Diad biek a dapag, dakel so asobraan lay kuli ed panagtrabaho ra, ya anggapo lay gagawaen da noag say trabaho lan trabaho, nampaaripen la ra ed satan. Nayarin ikakatunongan da a say isisipot dan masakbay tan atrasadon isesempet manlapud trabaho et parad pankaabigan na pamilya ra. Ingen, diad tua et magmamaliw lan biktima iray pamilya ra lapud ontanlan inkigalet ed trabaho. Oniay kuan na sakey ya ina a say asawa to et mabetbet a man-overtime: “Anggapo ed siak, anggano isalat ko so amin a kayarian ed sayan mabmablin abung pian labat nakalimog min saniina so asawak.” Nepeg a nonoten a maong na saramay onsosobra la ed panagtrabaho so aktual a naeksperiensya nen Arin Solomon: “Diad saman ninmengneng ak ed saray amin a gawa a ginawa na saray limak, tan ed kimey a nansagpotan ko a  gawaen; et, nia, amin sikato nensaman so kaapaan, tan panguusil ed dagem.”​—Eclesiastes 2:11.

On, no nipaakar ed trabaho et nepeg a magmaliw itayon balanse. Sarag tayo pa so magmaliw a makulin komikimey balet tandaan tayo a no manpaaripen itayo ed trabaho et naandian itayo laingen na liket tan nayarin mas alodloor ni nen say satan.​—Eclesiastes 4:5, 6.

Paliisan so Pagmaliw ya Alablabas No Nipaakar ed Panliliket

Impasakbay la na Biblia a diad panaon tayo et “saray totoo sikara so . . . maaro ed saray likeliket, a lalo nen say dia ed Dios.” (2 Timoteo 3:2, 4) Say panggegemtan ed likeliket et manuna ed saray sankaepektiboan a tapang nen Satanas pian napaarawi toray totoo ed Dios. Amayamay la iray nigagalet ed likeliket tan panagligliwaan, a singa ed isport a makapageggiam tan mapeligro. Ondarakel iratan a klase na isport ontan met na saramay mibibiang ed saratan. Akin ya unuuso la iratan? Lapud dakel a totoo so agnapepenek ed inagew-agew a bilay da, kanian manaanap ira na mas napanliketan da. Balet, kaukolan a mas baleg met so ipeligro ra ta pian napansiansia itan. Agmibibiang iray matoor a Kristiano ed makarisgo iran isport lapud respeto ra ed regalon bilay tan ed samay Nanlapuan na satan.​—Salmo 36:9.

Sanen pinalsa na Dios so inmunan paris a too, iner ta so angiyanan to ed sikara? Diad tanamanan na Eden, a say kabaliksan na satan diad orihinal a lenguahe et “Panliket,” odino “Panggayaga.” (Genesis 2:8) Mapatnag sirin a kabiangan ed gagala nen Jehova a saray totoo et nawalaan na marakep tan maliket a bilay.

Angitilak si Jesus ed sikatayo na naspot ya alimbawa na inkasimbang no nipaakar ed panliliket. Sikato so sigpot a debotado ed panumpal na linawa nen Jehova, tan lawas ton inyaplika iray ganggan tan prinsipyo na Dios ed bilay to. Anggano naknaksawan la et siansian inasikaso to ni iramay walaay pankaukolan. (Mateo 14:13, 14) On, angawat si Jesus na saray imbitasyon parad saray panangan tan angigana met na panaon pian manpainawa tan narepreskoan. Siempre, amta to a nisengeg ed saratan et sikatoy binalaw na arum ed saray mamubusol ed sikato. Oniay impaneskribe ra ed sikato: “Nia, so sakey a too a masiba, tan mainum na alak.” (Lucas 7:34; 10:38; 11:37) Balet parad si Jesus, say tuan debosyon et agmankabaliksan na bilay ya andian a balot na panliliket.

Malinew a makabat so sigpot ya ipaliis ed pagmaliw ya alabas no nipaakar ed panliliket. Ag-itayon balot nawalaan na peteg a liket no gawaen tayon manunaan ed bilay so panliliket tan panligliwaan. Satan so nayarin pansengegay pakapaulyan tayo ed mas importante iran bengatla, laktip lay relasyon tayo ed Dios. Balet, agtayo met kaukolan a sibletan so inkasikatayo ed amin lan panliliket nisay balawen tayo iramay panggagayagaan day bilay diad asimbang a paraan.​—Eclesiastes 2:24; 3:1-4.

Manliket Diad Pambilay ya Asimbang

Insulat nen babangatan a Santiago: “Dia ed akamayamay a nengneng nagapol itayo ya amin.” (Santiago 3:2) Nayarin nagawa ed sikatayo itan legan tayon pansasagpotan so agmagmaliw ya alablabas. Balet, anto so makatulong pian mansiansia itayo a balanse? Bueno, kaukolan tayon lawas bidbiren iray kaksilan tan kakapuyan tayo. Tua, aliwan mainomay a gawaen itan, ta nayarin agtayo namamamtaan a magmamaliw itayo lan alablabas. Kanian, makabat so pansiansian maasingger ed arum nin Kristiano a matatken ed espiritual tan ontalineng ed asimbang a simbawa ra. (Galacia 6:1) Nayari itayon onkerew na ontan a simbawa ed sakey a kaaro odino eksperiensyadon matatken ed kongregasyon. Nilikud ed saray Kasulatan a mismo, saray nibase’d Biblia a simbawa ra so onkanan “salming” tayo, ta pian naamtaan no kasin sikatayo so balanse ed imaton nen Jehova.​—Santiago 1:22-25.

Makapaliket ta napaliisan tayo so manbilay ed inka-alablabas. Nayarian tayo so magmaliw a balanse tan maliket diad determinadon panggunaet tayo tan pananuporta nen Jehova. Sakey ni, say relasyon tayo ed Dios tan ed saray agagi tayo so onaligwas, tan magmaliw itayo ni ingen a magmaong ya alimbawa ed saramay pupulongan tayo. Manuna’d amin et mas naalig tayo so asimbang tan maaron Dios tayo a si Jehova.​—Efeso 5:1.

[Picture Credit Line ed pahina 28]

©Greg Epperson/age fotostock