Sakey ya Ehemplo na Inkamatua

DIAD agano ni et asubok so katooran nen Nelma, sakey a manag-ayos na buek ed syudad na Cruzeiro do Sul diad Brazil. Sanen adelap so lugar da, angidonasyon ed sikato na pigaran kawes so sakey a kustomer to. Balet nen wawalwalen to la iray kawes, sikatoy akaromog na R$3,000 (masulok a 50,000 pesos) diad saray bulsa na duaran pantalon.

Samay nalmo nen Nelma a kuarta et singa la pitoy bulan a sueldo to! Kakkaukolan to itan lapud say mismon abung to et dineral na delap, sakey ni et naandi so amin a kagawaan na tatay to tan agagi to. Kanian no wala itan a kuarta et napaapiger to so abung to tan say kera et nitulong to ni ed kakanayon to. Balet agto nitepel a kayarianen itan lapud konsiensia ton impasal na Biblia.​—Hebreos 13:18.

Kaimbuasan et anaksakbay si Nelma a nantrabaho pian minengnengan ed negosyanten angidonasyon. Sikatoy akisalamatan nen Nelma ed saray kawes a naawat to insan to intuloy ya inkuan ya agto nitepel a kayarianen imay nalmo to ed saratan. Alay liket to imay bii sanen inyawat ed sikato so kuarta. Ta inggana to itan ya ipasueldo ed saray empleyado to. “Mataltalag lay matuan too natan,” so inkuan na negosyante.

On, nayarin parad arum et aliwa lan makapadinayew so pagmaliw a matua. Balet, say inkamatua et sakey a kalidad a papablien a maong na saramay panggugunaetan day mamaliket ed tuan Dios a Jehova. (Efeso 4:25, 28) “No agko impawil, agko itan pakaugipan,” so inkuan nen Nelma.