Kasin Importante no Dinan a Relihyon so Pilien Yo?

LABAY tayo a dakel so napampilian tayo sano mansaliw itayo. Sano walay tindaan a manlalako na nanduruman prutas tan pisipising, nayarian tayon pilien so labalabay tayo tan say makapabunigas ed pamilya tayo. No walay lakoan na mamuran kawes a dakel so napampilian na estilo tan kolor, nayarian tayon pilien so inanga-angay tayo. On, arum ed saray pipilien tayo ed bilay et nayarin pakapatnagan lambengat na personal a panlabayan tayo. Balet, say arum et mangapekta ed bunigas tan liket tayo, a singa say pampili na masustansian kakanen odino maong iran kakaaro. Komusta met so relihyon a pipilien tayo? Kasin say paraan na panagdayew tayo et pakapatnagan lambengat na personal a panlabayan tayo? Odino importante itan lapud apektaen na satan so panagbilay tayo?

Dakerakel a relihyon so napampilian natan. Igagarantiya na dakel iran bansa so kawayangan na relihyon, kanian iisipen na totoo a mas makapampili ira na labay da imbes a tumboken day abangonan da. Naamtaan ed sakey a surbi diad Estados Unidos ya 80 porsiento na saray Amerikano so “manisia ya aliwan saksakey a relihyon so mangitonton ed kilalaban.” Unong ed satan a surbi, “inkuan na sakey ed limaran tinepetan a sikatoy nansalat na relihyon sanen sikatoy wala la’d edad.” Nipabitar met ed sakey a surbi diad Brazil a ngalngali kakapat na populasyon ditan so nansalat na relihyon da.

Nensaman et pandedebatian a maong na totoo iray doktrinan mangibibiig ed sakey a relihyon manlapud sananey. Balet natan, say popular a punto de bista et, ‘Ag-importante no dinan a relihyon so pilien mo.’ Balet talaga kasin ag-importante itan? Kasin mangapekta ed sikayo so relihyon a pilien yo?

No panon a say marunong a managsaliw et mantepet nipaakar ed nanlapuan na saray produkto, makabat met no oniay itepet yo, ‘Panon so inggapo  na sarayan amin a nanduruman relihyon, tan akin?’ Say ebat ed saya so walad Biblia.

Panon a Ginmapo Iray Relihyon?

Diad Israel nensaman, inletneg nen Arin Jeroboam so sakey a balon relihyon, ngalngali sanlibon taon ni antis a linma diad dalin si Jesus. Si Jeroboam so primeron ari na independentin amianen a panarian na Israel. Sikato so nairapan nensaman no panon ton pankasakeyen so totoo pian nadampot to iray panlabayan to. Kanian, ‘say ari so angala na simbawa, tan nanggawa na duaran kilaw a baka a balitok, tan inkuan to ed sikara, Mapalalo ed sikayo so ontatdang ni ed Jerusalem. Nia so Dios mo, O Israel.’ (1 Arari 12:28) Mapatnag ya inusar na ari so relihyon ta pian sagyaten to iray totoo ya agla onlan mandayew diad Jerusalem. Say relihyon ya inggapo nen Jeroboam so binmayag na pigaran siglo tan nanresulta ed impatey na minilyon a totoo sanen inukom na Dios iyan apostatan nasyon na Israel. Say relihyon ya inletneg nen Jeroboam et walaan na mapolitikan gagala. Ontan met so gagala na impangigapo ed arum iran relihyon natan a kontrolado na gobierno, salanti, pian ombiskeg so pakayari ra ed politika.

Imparungtal nen apostol Pablo so sakey nin motibo na totoo no akin a mangileletneg ira na balon relihyon, sanen oniay inkuan to: “Amtak a kayari itaynan ko, onloob naani ed pegley yo so saray masiban lobo, ya agda perdonaen so kasimpukokan. Et dia ed sikayo met lanlamang wala ra so onalagey naani a totoon mansalita na saray bengatlan mabanday, pian tangguyoren da so saray binangatan ya ontumbok ed sikara.” (Gawa 20:29, 30) Saray mapaatagey a lider so mabetbet a mangileletneg na relihyon pian nitandoro ra so inkasikaran dili. Ingen, saratan a relihyon a mankuankuanan a Kristiano so naaapag ed nanduruman grupo.

Siopa so Labay a Paliketen na Saray Relihyon?

Arum so napapakiwas a mangiletneg na balon relihyon lapud labay dan pagustoan so karaklan a totoo. Singa bilang, oniay inreport na magasin ya Economist nipaakar ed ipapasen a mayayaman iran relihyon diad Estados Unidos. Inkuan na artikulo a maaligwas irayan relihyon lapud “say prinsipyo na saraya et mipara ed amin a maasenso iran negosyo: pagustoan so kustomer.” Arum ed sarayan relihyon so walaan na “maliket iran misa a walaray video, drama tan modernon musika.” Ibabaga na arum a lider na sarayan relihyon ya ibabangat da iray membro ra no panon so magmaliw a “mayaman, mabunigas tan andiay problema.” Anggano nababalaw la irayan relihyon lapud nibibilang la ra ed industriya na panagligliwaan odino “negosyo ed no panon a natulongan so dili,” inkuan na sayan magasin a, “papagustoan da iray membro ra.” Oniay impanampot na report: “Say pantekep na negosyo tan relihyon et maal-aligwas.”

Anggaman walaray relihyon ya agtanton napatnagan so estilo ran singa-negosyo, saray relihyon a “papagustoan da iray membro ra” so mangipapanonot ed sikatayo ed walan impasakbay nen Pablo. Oniay insulat to: “Onsabi so panaon ya agda nitepel so maabig a bangat; noag ingen dia ed kiwala na gatel ed laman da mantipon ira ed saray managbangat ed sikara; unong ed saray dili’n kaalakan na laman da. Et itaynan da so saray pandengel da ed tua, tan sikara so pandengel da ed saray labilabir.”​—2 Timoteo 4:3, 4.

Niwala so dakel a relihyon lapud pipilaleken da so pakayari ed politika, inkabantog, tan panlabay na karaklan, imbes a say pamaliket ed Dios. Agla sirin pankelawan no akin a nalalanor so relihyon ed saray kaugsan a singa say panag-abuso ed ugaw, panamalikdo, guerra, odino terorismo. Mabetbet a say relihyon so sakey a panamalikdo. Anto so gawaen yo ta pian agkayo napalikdo?

[Blurb ed pahina 4]

Niwala so dakel a relihyon lapud pipilaleken da so pakayari ed politika, inkabantog, tan panlabay na karaklan, imbes a say pamaliket ed Dios