Maliket a Manalagar ed si Jehova

ASALI yo ta lay angan na maeta nin prutas? Seguradon agyo agustoan so taway to. Kaukolan a palabasen so panaon pian naluto so prutas, tan seguradon makagunggona so panalagar ed pakaluto na satan. Walaray arum nin sirkumstansya a makagunggona so panalagar. Ibabaga na Biblia: “Maong a say too manilalo tan mareereen komon a manalagar ed panangilaban nen Jehova.” (Tagleey 3:26; Tito 2:13) Panon so nepeg a panalagar na saray Kristiano ed si Jehova? Panon itayon nagunggonaan ed panalagar ed sikato?

Antoy Nalalanor ed Panalagar ed Dios?

Bilang Kristianos et ‘aalagaren tan pampipilalekan tayo so isabi na agew na Dios?’ Tatalaranan tayo lay pakainawaan sano ‘deralen [to] la iray mangaruksan totoo.’ (2  Pedro 3:7, 12) Pirawrawat met la nen Jehova a mismo a panampoten so amin a kaugsan, balet ta pupugeran to ni inkasikato pian nisalba to iray Kristiano ed paraan a nigloria so ngaran to. Kuan na Biblia: “Say Dios dia ed panlabay to a pangipatnag na sanok to, tan ipaamta toy pakayari to, intepel to a sankamasungdoan so saray baseha na sanok ya inggana ed kadederal. Tan pian gawaen to a sankapatnagan so kayamanan na gloria to, ed saray banga na panangasi, a nen saman inggana to ed gloria.” (Roma 9:22, 23) Singa ed ginawa to ed panaon nen Noe, amta nen Jehova so dugan panaon a pangisalba ed saray lingkor to natan. (1 Pedro 3:20) Kanian, say panalagar ed Dios so mangilalanor ed panalagar ed panaon na ikiwas to.

Legan tayon aalagaren so agew nen Jehova, nayarin no maminsan et nadidismaya itayo lapud naiimano tayo a manabeba iray estandarte na mundo ed moral. No nadidismaya itayo, maabig a nonoten tayo iray salita ya insulat nen Miqueas a propeta na Dios: “Say maomaong a too atawtaw ed dalin, tan anggapo so maptek ed saray totoo.” Insan inyarum to: “Balet no nipaakar ed siak, onnengneng ak naani ed Jehova; alagden ko naani so Dios na kilalaban ko.” (Miqueas 7:2, 7) Akin a nepeg tayon bayuboan so makaalagar ya awawey? Tan lapud kaslakan lan makapaingongot so panalagar, panon itayon magmaliw a maliket legan itayon manaalagar ed Dios?

Maliket Legan a Manaalagar

Makaaral itayo na dugan awawey manlapud si Jehova. Sikatoy lawas “maliket a Dios.” (1 Timoteo 1:11, NW) Sikatoy maliket legan a manaalagar, lapud itutultuloy ton kikimeyan so pakasumpal na gagala to pian niyalangon ed inkayadyari so totoo a mangaaro ed sikato, unong a gagala to parad totoo sanen pinalsa to ira. (Roma 5:12; 6:23) Nanenengneng to iray maabig a resulta na gagawaen to, salanti, minilyon a totoo so natatangguyor ed tuan panagdayew. Inkuan nen Jesus: “Si Amak mankikimey ni angga ed natan, tan siak mankimey ak.” (Juan 5:17) Say panggawa na saray bengatla parad arum et importante ed pagmaliw a maliket. (Gawa 20:35) Ontan met, saray tuan Kristiano so agmantatameeng a manaalagar. Imbes, mantutultuloy iran mankikimey pian tulongan so arum a naamtaan so gagala na Dios parad katooan.

Saray matoor a totoo so naliliketan lawas ed pangidadayew ed Dios legan dan aalagaren so panaon to ya onkiwas. Alaen pan alimbawa so salmistan David. Sikatoy pinasegsegang na ari, intapat na maapit a kaaro to, tan trinaidor na anak to. Diad saratan a sirkumstansya, kasin nagawaan ni nen David so manliket legan ton aalagaren so pakainawaan diad dugan panaon nen Jehova? Onia so ibabaga na Salmo 71, a mapatnag ya  insulat nen David: “Bangbalet manilalo ak a lanang ed sika, tan idayew taka a nagkalalo ni nen nagkalalo. Say sangik ibagabaga to so inkatunong mo, tan say panangilaban mo ed amin ya agew.” (Salmo 71:14, 15) Imbes ya agmakaanos a manalagar, imbalikas nen David so liket to lapud sikatoy okupado ed pangidadayew ed si Jehova tan ed pamapabiskeg ed arum ed tuan panagdayew.​—Salmo 71:23.

Say panalagar ed si Jehova et aliwan makapaingongot a singa ed panalagar na atrasadon bus. Imbes, mipadpara itan ed maliket a panaalagar na atateng ed ibaleg na anak da, a nikinon da. Legan na saratan a taon et okupado iray atateng ed panangipasal, panangibangat, tan panagdisiplina. Amin na saratan et akasentro ed pipilaleken a resulta. Mipadpara, sikatayoran manaalagar ed si Jehova so naliliketan diad panutulong tayo ed arum ya onapit ed Dios. Labay tayo met a nagamoran da so abobon na Dios, tan diad kaunoran et nisalba.

Agnaaandian na Ilalo

Say panalagar ed si Jehova et kabaliksan toy pantultuloy a pangaro tan panlingkor ed sikato ya agnaaandian na ilalo. Mankaukolan iya na sagpot. Dakel a lingkor na Dios natan so manaayam ed saray komunidad a saray totoo ditan so mamabalaw ed siopaman a maniilalo ed saray sipan na Dios. Anggaman ontan, nonoten pa so alimbawa na saray matoor ya Israelita ya agnaandian na ilalo legan na 70-taon ya inka-destiero ra ed Babilonia. Akin ya agawaan da itan? Seguradon apabiskeg ira ed pambabasa ra ed saray salmo, ta onia so ibabaga na sakey a makapaseseg a salmo a nayarin nisulat ed satan a panaon: “Dia ed salita to manilalo ak. Say kamarerwak manaalagar ed Katawan a mapalalo nen say pantalaran na saray bantay ed kabuasan; on, mapalalo nen saray bantay a nipaakar ed kabuasan. O Israel, manilalo ka ed Jehova.”​—Salmo 130:5-7.

Saray Judio ya amasiansian mabiskeg ed ilalo ra panamegley na panagbasa tan pangitotongtong ed satan so atumangan sanen sinakop na saray managlusob so Babilonia. Nilibon matoor a Judio so amaarap a tampol ed Jerusalem. Onia so nisulat nipaakar ed satan a panaon: “Sanen impulang nen Jehova ed Sion so saray ompapawil, . . . say sangi mi napno na pakakalek.” (Salmo 126:1, 2) Imbes a naandian na ilalo iraman a Judio, intultuloy dan pinabiskeg so pananisia ra. Tan ag-iran balot tinmundan nankanta na panangidayew ed si Jehova.

Ontan met, saray tuan Kristiano a manaalagar ed Dios legan na anggaan na sistema na bengabengatla so lawas manggugunaet pian napansiansian mabiskeg so pananisia ra. Aaralen day Salita na Dios, manpapasesegan ira, tan lawas a mangidadayew ed si Jehova diad pangipupulong da ed maong a balita na Panarian to.​—Mateo 24:3, 14.

Manalagar ed Dios Pian Nagunggonaan ed Disiplina

Insulat nen Jeremias a propeta na Dios: “Maong a say too manilalo tan mareereen komon a manalagar ed panangilaban nen Jehova.” (Tagleey 3:26) Say labay ya ibaga nen Jeremias et maabig no agmanreklamo iray lingkor na Dios ed impanisiplina nen Jehova ed sikara sanen inabuloyan ton naderal so Jerusalem. Imbes, nepeg komon a makaaral ira ed  asagmakan da diad pannodnonot ed epektoy insunggay da tan ed pankaukolan dan manguman ed awawey da.​—Tagleey 3:40, 42.

Say pananisiplina nen Jehova a pakagunggonaan tayo so niyaliling ed itatatken na prutas. Nipaakar ed disiplina na Dios, kuan na Biblia: “Saray apetek na saman a dusa anien day kareenan a bungay matunong a panagbilay.” (Hebreos 12:11, Maung a Balita) No panon a say prutas et kaukolan a mamalabas ni na panaon pian naluto, ontan met a kaukolan tayo so panaon pian nauman tayo iray awawey tayo bilang katutulok ed panangipasal na Dios. Alimbawa, no naandi ed sikatayo iray pigaran pribilehyo ed kongregasyon lapud agmanepeg a kondukta tayo, say inkamabulos tayon manalagar ed Dios so mangamper ed sikatayon nadismaya tan onsuko la. Diad saratan a sirkumstansya, makapaseseg iray pinuyanan a salita nen David: “Say sanok [na Dios] maganggano; say panangasi to onkana ed legay bilay: say pannangnangis manbayag a sanlabi, bangbalet say gayaga onsabi ed kaimbuasan.” (Salmo 30:5) No pankimeyan tayoy makaalagar ya awawey tan iyaplika so simbawan naaawat tayo manlapud Salita na Dios tan say organisasyon to, onsabi so panaon na ‘panggayaga’ tayo.

Mankaukolan na Panaon so Itatken

No sakey kan kalangweran odino agano nin abautismoan, nayarin pirawrawat moy nawalaan na pigaran responsabilidad ed Kristianon kongregasyon. Balet mankaukolan na panaon so pamayubo ed inkatatken ed espiritual a nakaukolan parad panakbat ed saray responsabilidad. Kanian, anamot moy inkatobonbalom pian ontatken ed espiritual. Alimbawa, say inkatobonbalo so maabig a panaon pian basaen so interon Biblia, pian pankimeyan iray kalidad na Kristiano, tan aralen so dunong ed panaggaway babangatan. (Eclesiastes 12:1) No mapaabebam ya ipatnag so makaalagar ya awawey, nasabi panaon nen Jehova pian nawalaan ka na kaaruman a responsabilidad.

Say panaggaway babangatan so mankaukolan met na inkaanos. No panon a say tomatanem so nepeg a mantultuloy a mansalog anggad pabalegen na Dios iray bini, ontan met ed panaggaway babangatan. (1 Corinto 3:7; Santiago 5:7) Say arum so mankaukolan na pigay bulan odino taon ni ingen na maanos a panangiyaral na Biblia pian nabayuboan da so impapuson pananisia tan apresasyon ed si Jehova. Say panalagar ed si Jehova et laktipen toy pantultuloy, anggano diad unona et saray iyaaralan so agmangiyaaplika ed nanaaralan da. No walay naiimano met a panamabli ra, nayarin pakapatnagan itan ya onkikiwas ira ed espiritu nen Jehova. Lapud inkaanos et nayarin naliketan kayon makaimano ed pamabulaslas nen Jehova ed iyaaralan yo pian magmaliw a babangatan nen Kristo.​—Mateo 28:20.

Ipatnag so Aro Diad Panalagar

Bilang alimbawa no panon a say panalagar et panangitnag na aro tan talek, nonoten pa so kipapasen na sakey ya akulaw lan Tasi a manaayam ed sakey a desierton rehyon na Andes, ed Abalaten ya Amerika. Diad satan a lugar et sikato tan say sakey nin agin bii labat so Tasi nen Jehova. Kanian, agaylay pantalaran da no ombisita iray kaagian da! Walay aminsan, sanen mamapaarap la so sakey ya ombiabiahen manangasikaso ya ombisita ed sikara, a primero to ni labat so onla diman, sikatoy abalang. Kanian pinawil to lamet so nanlapuan to a sengeg na inkaatrasado to na pigay oras. Ngalngali la manpalbangon sanen aromog ton siansia so baryo a panaayaman da. Lapud anggapoy koryenti ed saman a lugar, sikatoy mankelaw sanen walay anengneng ton silew. Agaylay liket to sanen akasabi ed lolooban na baryo tan naimano to a samay silew et liwawa na akaatagey a lamparaan a sankaegnaan na samay akulaw lan agi! Naseseguro ton onsabi so ombiabiahen manangasikaso, kanian sikatoy manaalagar.

No walaan itayo met na ontan ya inkaanos, maliket itayon manalagar ed si Jehova. Segurado tayon tooren to iray sipan to. Tan singa samay ombiabiahen manangasikaso, aapresyaen tayo met iramay maaron manaalagar ed sikatayo. Kanian, agpankelawan a naliliketan so Dios ed saramay manaalagar ed sikato. Inkuan na Biblia: “Si Jehova naroyroyo . . . ed saray manmatalek [“manaalagar, NW”] ed maaron abig na linawa to.”​—Salmo 147:11.

[Litrato ed pahina 18]

Saray totoon okupado a mangidadayew ed Dios so maliket diad panalagar ed si Jehova