Maniiba Itayon Mangitandoro ed Ngaran nen Jehova

“O yabalbaleg tayo si Jehova, tan bansagan yo ak a mangiabalbaleg ed ngaran to.”​—SALMO 34:3.

1. Anton maabig ya ehemplo so impanengneng nen Jesus legan na ministeryo to diad dalin?

 DIAD samay labi na Nisan 14, 33 C.E., si Jesus tan saray apostol to so nambabansag ya angansion na panangidayew ed si Jehova diad tagey a silir na sakey ya abung ed Jerusalem. (Mateo 26:30) Unor lan pankanawnawa nen Jesus a gawaen itan kaiba iray apostol to. Matukotukoy a sinampotan to ed ontan a paraan so impilimog to ed sikara. Manlapud gapo ya anggad kaunoran na mangaraldalin a ministeryo to, indayew nen Jesus so Ama to tan sikatoy maseseg ya angipakabat ed ngaran To. (Mateo 4:10; 6:9; 22:37, 38; Juan 12:28; 17:6) Diad ontan, singa to inulit ya imbalikas so maaron panamaseseg na salmista: “O yabalbaleg tayo si Jehova, tan bansagan yoak a mangiabalbaleg [odino mangitandoro] ed ngaran to.” (Salmo 34:3) Agaylan abig ya ehemplo a nepeg tayon aligen!

2, 3. (a) Panon tayon amta a walay kabiangan na Salmo 34 a propesiya? (b) Anto so aralen tayo ed sayan artikulo tan diad ontumbok?

² Manga pigaran oras kayari na impangansion da na panangidayew a kaibay Jesus, atasian nen apostol Juan so sakey a midumaan a tuloy ya ebento. Naimatonan to so Katawan to tan say duaran kriminal a pinatey diad panamairapan iran kiew. Pinuter na saray Romanon sundalo iray sali na duaran kriminal pian napapeles so ipatey da. Balet, inkuan nen Juan ya agda pinuter iray sali nen Jesus, lapud sanen inmasingger iray sundalo ed si Jesus, sikato so inatey la. Satan ya agawa et insalaysay nen Juan diad Ebanghelyo to bilang kasumpalan na sananey nin kabiangan na Salmo 34: “Anggapoy pukel ton naputer.”​—Juan 19:32-36; Salmo 34:20, Maung a Balita.

³ Dakdakel ni so punto ed Salmo 34 a makapainteres ed saray Kristiano. Kanian, diad sayan artikulo tan diad ontumbok et repasoen tayo iray sirkumstansya sanen insulat nen David iyan salmo, insan aralen tayo iray makapaseseg a salitan nisulat ditan.

Say Intakas nen David Manlapud si Saul

4. (a) Akin a nilanaan si David a magmaliw ya ari ed Israel? (b) Akin a ‘naaron maong’ nen Saul si David?

⁴ Malangwer ni ed saman si David sanen manaari ed Israel si Saul. Balet, nagmaliw a matunganga si Saul kanian abalang to so pabor nen Jehova. Lapud satan, oniay inkuan ed sikato nen propetan Samuel: “Si Jehova pinila’to so panarian na Israel manlapu ed sika ed sayan agew, tan sikato so initer to ed sakey a kaabay mo, a magmaong nen sika.” (1 Samuel 15:28) Diad saginonor, ingganggan nen Jehova si Samuel a lanaan toy David, say sankayugtanan ya ilalak nen Jesse, pian onsublay a manari ed Israel. Kaleganan na satan, naandi so espiritu na Dios ed si Arin Saul tan sikatoy naermenan a tuloy. Si David, a marundunong a mantogtog, so inawit ed Gabaa pian manserbi ed ari, tan peteg ya atambayo si Saul ed musika nen David kanian ‘sikatoy inaro to a maong.’​—1 Samuel 16:11, 13, 21, 23.

5. Akin ya anguman so awawey nen Saul ed si David, tan si David so apaskar a manggawa na anto?

⁵ Diad inlabas na panaon et tinulongan nen Jehova si David a natalo so higanten Filisteo a si Goliat. Sinuportaan to met si David sanen sikatoy lalon ombabantog ed Israel lapud inkadunong to ed pibabakal. Balet si Saul et nanimonan to so impamendisyon nen Jehova ed si David, tan binusol to. Amiduan impuntirya nen Saul so  gayang to ed si David legan a mantotogtog na arpa ed arapan to. Ingen ta parehon alikiran iratan nen David. Diad mikatlon pankanawnawa a ginetma nen Saul a pateyen iyan onsalat ed sikato ya ari, atebek nen David a kaukolan to lay ontakas. Diad kaunoran, lapud pursigido si Saul a mangerel tan mamatey ed sikato, denesidi nen David so manamot-amot diad paway na teritorya na Israel.​—1 Samuel 18:11; 19:9, 10.

6. Akin ya impapatey nen Saul iray manaayam ed syudad na Nob?

⁶ Sanen asingger la ed ketegan na Israel si David, sikatoy sinmamar diad syudad na Nob, a diman so kawalaan na tabernakulo nen Jehova. Mapatnag a walaray malangwer a lalakin kakaiba nen David diad intakas to, tan nananap si David na naakan da. Akabatan nen Saul a si David tan saray kakaiba to so inikdan na atagey a saserdote na naakan tan inter to ed si David imay kampilan ya asamsam to ed say inatey a Goliat. Lapud sanok nen Saul, impapatey to so amin a manaayam ed satan a syudad, pati say 85 a saserdote.​—1 Samuel 21:1, 2; 22:12, 13, 18, 19; Mateo 12:3, 4.

Aliktar Lamet Manlapud Ipapatey

7. Akin a say Gat et aliwan liktar a panamotan nen David?

⁷ Si David so amaarap ed sagur diad dalin na Filisteo, a manga 40 kilometro kaarawi manlapud Nob, tan nanamot-amot ed Gat a teritorya nen Arin Akis, diad mismon baley nen Goliat. Nayarin inkatunongan nen David ya ag-isipen lagi nen Saul a ditan so panamotan to. Balet agnambayag et si David so abidbir na ariripen na ari na Gat. Sanen nadngelan nen David a sikatoy abidbir da, sikatoy ‘makapasinagem a tinmakot ed si Akis ya ari ed Gat.’​—1 Samuel 21:10-12.

8. (a) Anto so ibabaga ed sikatayo na Salmo 56 nipaakar ed naeksperiensya nen David diad Gat? (b) Panon ya aliktaran nen David so dawdawit a pamatey ed sikato?

⁸ Diad saman et si David so narel na saray Filisteo. Nayarin diad sayan panaon so impangisulat to ed makatenyeg-liknaan a salmo, ya oniay inyey-ey to ed si Jehova: “Iyan mo so saray lualuak ed botelyam.” (Salmo 56:8 tan superskripsion) Imbalikas toy kompiyansa to ya agbalot lingwanan nen Jehova so paneermen to tan Sikatoy maaron mangiyansakit tan manalimbeng ed sikato.  Nannonot met si David na paraan pian napalikdo to so ari na Filisteo, salanti, sikatoy nantapistapisan. Sanen naimano iya nen Arin Akis, pinampasnokan to iray ariripen to lapud impangawit da ed sikato na sakey a toon “makulangkulang.” Malinew a sinuportaan nen Jehova iyan paraan nen David. Sikato so impaway ed syudad, kanian aliktaran to so dawdawit a pamatey ed sikato.​—1 Samuel 21:13-15.

9, 10. Akin ya insulat nen David so Salmo 34, tan siopa iray sankanonot to sanen insulat to itan a salmo?

⁹ Ag-ibabaga na Biblia no kasin saramay sinmuporta ed si David et kaiba ton tinmakas ed Gat odino sikatoy binantayan da labat legan a wala ra’d asingger iran purok na Israel. Antokaman so kipapasen, nayarin makapaliket so impannengneng da lamet sanen imbalita ed sikara nen David no panon a sikatoy inliktar lamet nen Jehova. Satan so agawa a sengegan na impangisulat to ed Salmo 34, unong a nipanengneng diad superskripsion. Diad inmunan pitoran bersikulo na salmo, si David so angidayew ed Dios lapud impangiliktar To ed sikato tan pinaseseg to iray mananuporta to a mibiang ed sikato diad pangitandoro ed si Jehova bilang Matalonggaring a Manangiliktar ed totoo To.​—Salmo 34:3, 4, 7.

¹⁰ Si David tan saray lalakin onsusuporta ed sikato so akaromog na maligen a pasen diad ungib na Adallam diad mapalandey a rehyon ed Israel, manga 15 kilometro ed bukig na Gat. Saray Israelita ya agnaliliketan ed pananguley nen Arin Saul so linma diman tan akiulop ira ed sikara. (1 Samuel 22:1, 2) Nayarin sikaray sankanonot nen David sanen insulat to iray salita ed Salmo 34:8-22. Saray panonot a walad saratan a bersikulo so importante met ed sikatayo natan, tan seguradon nagunggonaan itayo ed detalyadon paningbat ed sayan marakdakep a salmo.

Kasin Mipadpara ed Kinen David so Manunan Pipilaleken Yo?

11, 12. Antoray rason no akin a naynay tayon idayew si Jehova?

¹¹ “Galangen ko si Jehova ed amin a panaon: say kigalang to naynay dia ed sangik.” (Salmo 34:1) Bilang sakey a takas, maseguron dakel so kapagaan nen David nipaakar ed materyal a pankaukolan to, balet unong ed ipapabitar na sarayan salita, say inagew-agew a kapagaan to so ag-angapekta ed determinasyon ton mangidayew ed si Jehova. Agaylan abig iyan alimbawa parad sikatayo sano manasagmak itayo na saray kairapan! Balanglan wala itayo ed eskuelaan, trabaho, kaiba tayo iray kaparan Kristiano, odino walad mapublikon ministeryo, nepeg a say manunaan a pilalek tayo et say pangidayew ed si Jehova. Isipen pa so dakdakel a rason no akin a nepeg tayon idayew a naynay si Jehova! Alimbawa, ag-itayon balot naupotan na bengatlan nadiskobre tan napanggayagaan ed saray makapakelaw a pinalsa nen Jehova. Tan isipen pa so agawaan to la panamegley na mangaraldalin a kabiangan na organisasyon to! Anggaman ag-ira ayadyari, saray matoor a totoo so epektibon uusaren nen Jehova natan. Agbalot nikompara ed sarayan kimey na Dios so gagawaen na saray totoon iidoloen na sayan mundo! Agta onaabobon kayo ed si David, ya oniay insulat to: “Dia ed saray dirios anggapo a balot so mipara ed sika, O [Jehova]; anggapo met so mipara ed saray gawam”?​—Salmo 86:8.

¹² Singa si David, napakiwas itayo met a mangidayew a naynay ed si Jehova lapu ed saray agnaparaan a kimey to. Sakey ni, naliketan itayon makaamta a say Panarian na Dios so uuleyan la na permanentin Mananawir nen David, si Jesu-Kristo. (Apocalipsis 11:15) Kabaliksan na saya ya asingsingger lay panampot na sayan sistema na bengabengatla. Napepeligro so andi-anggaan ya arapen na masulok ya anemiran bilyon a totoo. Kanian, natan lay panaon a kakkaukolan tayon ibaga ed arum so nipaakar ed Panarian na Dios tan no anto so magano lan gawaen na satan parad katooan tan tulongan tayo iran mangidayew ed si Jehova a kaiba tayo. On, kaukolan a manunaan ed bilay tayo so panganamot ed amin a pankanawnawa pian pasesegen so arum a mangawat ed sayan “ebanghelyo” antis a naatrasado.​—Mateo 24:14.

13. (a) Siopa so impasirayew nen David, tan anton klase na totoo so kinmiwas? (b) Akin a nasasagyat ed Kristianon kongregasyon natan iray mauyamon totoo?

¹³ “Say kamarerwak manpasirayew ed Jehova: say mauyamo narengel to et manliket.” (Salmo  34:2) Ag-ipapasirayew dia nen David so antokaman ya agawaan ton dili. Alimbawa, agto inlastog so impakapalikdo to ed ari na Gat. Binidbir to a si Jehova so analimbeng ed sikato sanen wala ed Gat tan sikatoy akaliktar lapud tinulongan nen Jehova. (Uliran 21:1) Kanian, ag-impasirayew nen David so inkasikato, noagta si Jehova. Lapud saya, saray mauyamo so apaapit ed si Jehova. Intandoro met nen Jesus so ngaran nen Jehova, tan lapud saya et apaapit ed Dios iray totoon mapaabeba tan mainomay ya ibangat. Natan, saray mauyamon totoo ed amin a nasyon so nasasagyat ed internasyonal a kongregasyon na alanaan iran Kristiano, a si Jesus so ulo na satan. (Colosas 1:18) Natetenyeg so kapusoan na sarayan mauyamon totoo sano narerengel da ya iglogloria na saray mapaabeban lingkor na Dios so ngaran to tan sano narerengel da so mensahe na Biblia, a sikaray tutulongan na masanton espiritu na Dios pian natalosan da itan.​—Juan 6:44; Gawa 16:14.

Saray Pantitipon so Mamapabiskeg na Pananisia Tayo

14. (a) Kasin kontento si David a sikaton bukor labat so mangidayew ed si Jehova? (b) Anton alimbawa so impatnag nen Jesus nipaakar ed pantitipon parad panagdayew?

¹⁴ “O yabalbaleg tayo si Jehova, tan bansagan yo ak a mangiabalbaleg ed ngaran to.” (Salmo 34:3) Agkontento si David a sikaton bukor labat so mangidayew ed si Jehova. Sikatoy maaron amaseseg ed kakaiba to a mikasakey ed sikato a mangitandoro ed ngaran na Dios. Mipadpara, nanliketan met nen Jesu-Kristo, say Babaleg a David, so pangidayew ed si Jehova diad publiko, salanti, diad lokal a sinagoga, legan na saray piesta diad templo na Dios ed Jerusalem, tan sanen kalimog to iray papatumbok to. (Lucas 2:49; 4:16-19; 10:21; Juan 18:20) Agaylan abig a pribilehyo so pangalig ed ehemplo nen Jesus diad pangidayew ed si Jehova kaiba iray kapananisiaan tayo kapiganman a posible, nagkalalo la natan ta ‘nanenengneng tayo ya asingsingger la so agew’!​—Hebreos 10:24, 25.

15. (a) Anto so agunggona na saray papatumbok nen David ed naeksperiensya to? (b) Panon itayon nagugunggonaan diad iyatendi ed saray pantitipon tayo?

¹⁵ “Inanap ko si Jehova, et sikato inebatan to ak, tan inliktar to ak ed amin a pagpagak.” (Salmo 34:4) Sayan impakaliktar nen David et ipapasen ton importante. Kanian, oniay inkuan to ni: “Saya a too a duka inmakis, et sikato so dinengel nen Jehova, tan inlaban to ya impaway ed saray amin a gongonigon to.” (Salmo 34:6) Sano kalimog tayo iray kapananisiaan tayo, dakel so pankanawnawa tayon manginabang na  makapabiskeg iran eksperiensya no panon itayon tutulongan nen Jehova a nasungdoan iray kairapan. Saya so mamabiskeg na pananisia na saray kapananisiaan tayo, no panon a saray imbalikas nen David so amabiskeg ed pananisia na saray papatumbok to. Diad kipapasen nen David, saray kakaiba to so ‘ninmengneng ed si Jehova, tan apasnag ira: tan saray lupa ra so ag-apabaingan.’ (Salmo 34:5) Anggaman ontatakas ira ed si Arin Saul, agda alikna so kababaingan. Matalek ira a tutulongan na Dios si David, kanian maligliga so kalupaan da. Ontan met natan, saray balo nin interesado tan anggan saray abayag la ran tuan Kristiano so maniilalo ed pananulong nen Jehova. Lapud personal dan naeeksperiensya so tulong na Dios, ipapatnag na maligan kalupaan da so determinasyon da a mansiansian matoor.

Misalamat ed Tulong na Saray Anghel

16. Panon ya uusaren nen Jehova iray anghel to pian iliktar itayo?

¹⁶ “Say anghel nen Jehova mankampamento ed liberliber na saray ontakot ed sikato, tan iliktar to ra.” (Salmo 34:7) Ag-inisip nen David a sikato labat so makaeksperiensya na panangiliktar nen Jehova. Tua a nilanaan nen Jehova si David a magmaliw ya ari ed Israel; balet amta to ya uusaren nen Jehova iray anghel To pian bantayan so amin a matoor a mandadayew ed sikato, prominente man ira odino ordinaryo labat. Diad modernon panaon tayo, naeksperiensya met la na saray tuan managdayew so pananalimbeng nen Jehova. Diad Nazi Alemanya, ontan met ed Angola, Malawi, Mozambique, tan ed dakel nin daldalin, nanggunaetan na saray autoridad a palaniten iray Tasi nen Jehova. Balet anggapo so agawaan da. Imbes, saray totoo nen Jehova ed saratan a daldalin so mantutultuloy ya onaaligwas legan a maniiba iran mangitatandoro ed ngaran na Dios. Akin? Lapud uusaren nen Jehova iray masanton anghel to a manalimbeng tan mangigiya ed totoo to.​—Hebreos 1:14.

17. Diad antoran paraan a tutulongan itayo na saray anghel na Dios?

¹⁷ Niarum ni, nayarian na saray anghel nen Jehova ya imaneobra iray pamaakaran ta pian naekal ed limog na totoo nen Jehova so siopaman a pakakagapolan da. (Mateo 13:41; 18:6, 10) Tan eekalen na saray anghel so antokaman a makasbel ed panlilingkor tayo ed Dios, tan proprotektaan da itayo ed saray bengatlan makaderal na relasyon tayo ed si Jehova, anggaman nayarin agtayo namomoria itan natan. Sankaimportantian ed amin, igigiya da itayo diad kimey a panangiyabawag na “andi-angga a maabig a balita” diad amin a totoo, anggan diad saray lugar a mapeligro so pampupulong. (Apocalipsis 14:6) Say paneknek ya ontutulong iray anghel so mabetbet a nisasalaysay ed saray literatura na Biblia ya ipapalapag na saray Tasi nen Jehova. * Ontan lan karakel iratan ya eksperiensya, ya agtayo nayarin ipasen a nibanbana labat iratan.

18. (a) Anto so kaukolan tayon gawaen pian nagunggonaan itayo ed pananulong na saray anghel? (b) Anto so konsideraen diad ontumbok ya artikulo?

¹⁸ Pian mantultuloy itayon nagunggonaan ed panangiwanwan tan pananalimbeng na saray anghel, nepeg tayon itandoro a naynay so ngaran nen Jehova anggaman walaray onsusumpa. Tandaan a say anghel nen Jehova et mankampamento lambengat ‘ed liberliber na saray ontatakot ed Sikato.’ Anto so kabaliksan na satan? Antoy kabaliksan na itakot ed Dios, tan panon tayon nabayuboan itan? Akin a labay na maaron Dios a sikatoy takotan tayo? Sarayan tepet so konsideraen diad ontumbok ya artikulo.

[Paimano ed Leksab]

Panon Yon Ebatan?

• Antoran subok so sinungdoan nen David sanen sikatoy malangwer ni?

• Singa si David, anto so nepeg a manunan pilaleken tayo?

• Panon so nepeg a pangipasen tayo ed saray Makristianon pantitipon?

• Panon ya uusaren nen Jehova iray anghel to pian ontulong ed sikatayo?

[Tepetepet Parad Panagaral]

[Mapa ed pahina 21]

(Parad aktual a format, nengnengen so publikasyon)

Rama

Gat

Ziklag

Gabaa

Nob

Jerusalem

Betlehem

Adallam

Keila

Hebron

Zip

Hores

Carmelo

Maon

En-gadi

Dayat na Asin

[Credit Line]

Mapa: Imbase ed saray mapa a walad kanepegan na Pictorial Archive (Near Eastern History) Est. and Survey of Israel

[Litrato ed pahina 21]

Anggaman sakey a takas si David, intandoro to so ngaran nen Jehova

[Litrato ed pahina 23]

Napabiskeg so pananisia tayo diad italineng ed makapabiskeg iran eksperiensya a nisasalaysay diad saray Makristianon pantitipon tayo