No Panon a Nibiig so Tuan Relihiyon

IBABAGA na maslak a relihyon a say ibabangat da et nanlapud Dios. Kanian, nakaukolan tayon talinengen iray salita ya insulat nen Juan, ya apostol nen Jesus: “Inararo, agyo nepeg a sisiaen iray amin a mangibabagan walad sikaray espiritu, noag ingen subok yo ni ra no kasin say espiritun walad sikara et nanlapud Dios. Ta amayamay a tila-tilan propeta so linmetaw la’d interon mundo.” (1 Juan 4:1, MB) Panon tayon nasubok so sakey a bengatla no kasin nanlapu itan ed Dios?

Amin a nanlapud Dios et pakapatnagan na personalidad to, nagkalalo la ed manunaan a kalidad to, say aro. Alimbawa, say pakaangob tayo, a makakatulong pian panliketan so ambalbalingit iran tanaman, rosas, odino say kapkapanluton tinapay, so pakapatnagan na panangaro na Dios. Say pakanengneng tayo ed iseselek na agew, sakey a kompapey, odino say imis na sakey a melag nin ugaw so pakapatnagan na panangaro na Dios ed sikatayo. Ontan met ed say pakarengel tayo ed balibalin musika, uni na manok, odino boses na sakey a papablien tayo. Anggaman ag-itayo ayadyari, say inkagawa tayo et pakapatnagan na panangaro na Dios. Satan so rason no akin a mabetbet tayon naeksperiensya so katuaan na saray salita nen Jesus: “Lalo a mapalar so mangiter nen say mangawat.” (Gawa 20:35) Panliliketan tayon ipatnag so aro lapud apalsa itayo ‘unong ed indengan na Dios.’ (Genesis 1:27) Anggaman dakel niray kalidad nen Jehova, say aro so sankatalonggaringan ya aspekto na personalidad to.

Saray sulat a nanlapud Dios so nepeg a pakapatnagan na panangaro to. Saray relihyon ed mundo so walaan na dakel iran daan a sulsulat, balet kasin ipapabitar na saratan a sulsulat so panangaro na Dios?

Diad tua, maslak ed saray daan a relihyoson sulsulat so agtanton mangisasalaysay no panon so pangaaro na Dios ed sikatayo odino no panon tayon naaro so Dios. Kanian, agnaromog na minilyon a totoo so ebat ed tepet da ya, “Akin ya anggaman nanenengneng tayo ed saray pinalsa na Dios so ebidensya na panangaro to et wala nin siansia so kairapan tan kaugsan?” Balet, say Biblia lambengat so alenleneg a daan a relihyoson sulat a sigpot a mangisasalaysay ed panangaro na Dios. Ibabangat met na satan no panon tayon ipatnag so aro.

Say Libro Nipaakar ed Aro

Say Salitay Dios, say Biblia, so mangipaparungtal ed si Jehova bilang “say Dios na aro.” (2 Corinto 13:11) Dedeskribien na Biblia no panon a say aro so amakiwas ed si Jehova sanen inter to ed inmunan totoo so bilay ya anggapoy sakit tan ipapatey. Balet say impanrebelde ra ed pakauley na Dios so sengegan na impanirap na katooan. (Deuteronomio 32:4, 5; Roma 5:12) Kinmiwas si Jehova pian ipawil to lamet so abalang. Oniay inkuan na Salitay Dios: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed  sikato agnatawtaw, noag ingen wala so bilay ton andi-anggaan.” (Juan 3:16) Ipaparungtal ni na Masanton Kasulatan so panangaro na Dios sanen deneskribe na satan so impangitarya to ed ayadyarin gobierno ya uleyan nen Jesus pian nipawil so kareenan ed matulok a katooan.​—Daniel 7:13, 14; 2 Pedro 3:13.

Sinegek na Biblia so obligasyon na too ed onia iran salita: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo. Sikato’ya so baleg tan unonan ganggan. Tan say komadua a mipadpara ed sikato saya, Aroen mo so kaparam a too unong ed sikan dili. Dia ed sarayan duaran ganggan so pansaksabitan na amin a katunongan tan say salita na saray propetas.” (Mateo 22:37-40) Napaneknekan a mismo na Biblia a nanlapu iya ed Dios. Lapud malinew ya ipapatnag na satan so personalidad to, makaseguro itayo a nanlapu itan ed “Dios na aro.”​—2 Timoteo 3:16.

No say aro na Dios so gawaen tayon basiyan, nibiig tayo no dinan iran daan a sulsulat so talagan nanlapud Dios. Say aro so pakabidbiran met ed saray tuan managdayew, lapud aaligen da so Dios ed panangipatnag na aro.

No Panon a Nabidbir so Totoo a Mangaaro ed Dios

Nikadkaduma iramay peteg a mangaaro ed Dios, nagkalautla ed sayan panaon a pambibilayan tayo, a tinawag na Biblia a “saray kaunoran ya agew.” Saray totoo so lalon “mangaro ed saray lamalaman da, maaro ra na pilak, . . . maaro ed saray likeliket, a lalo nen say dia ed Dios.”​—2 Timoteo 3:1-4.

Panon yon nibiig so totoo a mangaaro ed Dios? Oniay ibabaga na Biblia: “Saya so aro na Dios, a sumpalen tayo so saray ganggan to.” (1 Juan 5:3) Say aro ed Dios so mamapakiwas ed totoo a manrespeto ed saray estandarte na Biblia nipaakar ed moral. Singa bilang, nabasa ed Salitay Dios iray ganggan nipaakar ed sekso tan panangasawa. Saray seksual a relasyon so naabuloyan lambengat ed baetan na sanasawa, tan say panamaley et nepeg a permanente. (Mateo 19:9; Hebreos 13:4) Diad España, walay sakey a biin akapanaral na teolohiya ya inmatendi ed pantitipon na saray Tasi nen Jehova, a ditan so magunaet a panaaralan da na saray ganggan na Biblia nipaakar moral, tan oniay inkuan to: “Kayari na pantitipon et siak so apabiskeg, aliwa labat ed saray makaibangat a paliwawa a nibase ed Biblia noagta ontan met ed pankakasakey ed limog na sarayan totoo, say atagey iran estandarte ra ed moral, tan say maabig a kakikiwas da.”

Niarum ni ed panangaro ra ed Dios, saray tuan Kristiano so mainomay a nibiig lapud panangaro ra ed kapara ran totoo. Say sankaimportantian a kimey da et say pangitongtong ed arum nipaakar ed alenleneg ya ilalo na katooan, say Panarian na Dios. (Mateo 24:14) Anggapo lay arum a pakagamoran na kapara ran totoo na magnayon iran gunggona noag say panulong ed sikara a nawalaan na pikakabat ed Dios. (Juan 17:3) Ipapatnag met na saray tuan Kristiano so panangaro ra diad arum a paraan. Itatarya ra so praktikal a tulong ed saramay maniirap. Alimbawa, sanen agawa so makadesyang a yegyeg diad Italya, inreport na sakey a peryodiko ditan a saray Tasi nen Jehova so “kinmiwas ed praktikal a paraan tan tinulongan da iramay pirmin naapektoan, antokaman so relihyon na saratan.”

Nilikud ed panangaro ra ed Dios tan ed kapara ran too, saray tuan Kristiano so manaaroan ed balang sakey. Oniay imbaga nen Jesus: “Sakey a balon ganggan so iter ko ed sikayo, a manaaroan so sakey tan sakey ed sikayo; salanti unong na impangarok ed sikayo, pian manaaroan met so sakey tan sakey ed sikayo. Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.”​—Juan 13:34, 35.

Kasin nikadkaduma so aro ya ipapatnag na saray tuan Kristiano ed balang sakey? Ontan so naimano na sakey a katulong a manngaray Ema. Sikato so mantratrabaho diad La Paz, Bolivia, a mabetbet ya akabiig ditan iray mayayaman ed saray mairap-bilay lapud pandurumaan na rasa. Oniay imbaga to: “Diad primeron inyatendik ed aral na saray Tasi nen Jehova, naimanok so sakey ya akadesentin laki ya akayurong tan mitotongtong ed sakey a bii ya Indian. Anggapo nin balot so anengneng kon ontan. Diad saman a bekta et amoriak a sikara so peteg a totoo na Dios. Onia met so inkuan na sakey a biin taga-Brazil a manngaray  Miriam: “Agko amta no panon so magmaliw a maliket, anggano kaibak ni so pamilyak. Say primeron impakanengnengan ko ed aro a peteg a nipapatnag et diad limog na saray Tasi nen Jehova.” Diad Estados Unidos, onia so insulat na news director na sakey ya istasyon na telebisyon: “No dakel nin totoo so manbilay unong ed paraan na relihyon yo, aliwan onia komon so kipapasen na bansa tayo. Bilang sakey a managbalita, nibagak a say organisasyon yo et niletneg ed aro tan mabiskeg a pananisia ed Manamalsa.”

Anapen so Tuan Relihyon

Say aro so manunan pakapatnagan na tuan panagdayew. Inyaliling nen Jesus so pananap ed tuan panagdayew diad pakaromog ed dugan dalan tan diad pankurang ditan. Satan lambengat so dalan a mamaarap ed bilay ya andi-anggaan. Oniay imbaga nen Jesus: “Onloob kayo ed mainget a pinto; ta maawang so pinto, tan malapar so dalan, a mamaarap ed kaderalan, et dakel so saray onloob diman. Ta mainget so pinto, tan makisir so dalan, a mamaarap ed bilay, et daiset so saray makaromog ed sikato.” (Mateo 7:13, 14) Saksakey a grupo na saray tuan Kristiano so nankakasakey a mankukurang a kaiba so Dios diad dalan na tuan panagdayew. Kanian, importante no dinan a relihyon so pilien yo. No naromog yo itan a dalan tan desidien yo so mankurang ditan, aromog yo la so sankaabigan a dalan na panagbilay lapud satan so dalan na aro.​—Efeso 4:1-4.

Isipen pa so liket a nalikna yo no mankurang kayo ed dalan na tuan panagdayew! Singa itan panaakar a kaiba so Dios. Naaralan yo manlapud Dios so kakabatan tan aro ta pian napanggayagaan yo so maong a relasyon ed arum. Naaralan yo manlapud sikato so gagala na bilay, tan natalosan yo iray sipan to kanian nawalaan kayo na ilalo ed arapen. Agyon balot pagbabawian so pakaromog ed tuan panagdayew.

[Litrato ed pahina 5]

Diad saray relihyoson sulsulat nensaman, say Biblia lambengat so mangipaparungtal ed panangaro na Dios

[Saray litrato ed pahina 7]

Sankabidbir iray tuan Kristiano lapud ipapatnag da so aro