Panliketan so Bilay Diad Itakot ed si Jehova

“O takotan yo si Jehova, sikayo mamasimpit to, ta anggapo so ukol ed saray ontakot ed sikato.”​—SALMO 34:9.

1, 2. (a) Anto so nandumaan a paraan a pangipapasen na Kakristianoan ed itakot ed Dios? (b) Antoran tepet so usisaen tayo natan?

 ZDIAD pangibabangat na saray papari tan miministro na Kakristianoan nipaakar ed itakot ed Dios, mabetbet dan ibabaga a magnayon a dudusaen na Dios iray makasalanan diad impiernon-apoy. Sayan doktrina so agmitunosan ed ibabangat na Biblia nipaakar ed si Jehova bilang Dios na aro tan inkahustisya. (Genesis 3:19; Deuteronomio 32:4; Roma 6:23; 1 Juan 4:8) Duma met balet so paraan na arum a ministro na Kakristianoan. Agdan balot sasalambiten so itakot ed Dios. Imbes, ibabangat da a say Dios et aliwan estrikto tan awaten to so anggan siopa a too antokaman so klase na kabibilay to. Agmet itan mitunosan ed ibabangat na Biblia.​—Galacia 5:19-21.

² Diad tua et ipapaseseg na Biblia a takotan tayo so Dios. (Apocalipsis 14:7) Walaray onlesan tepet nipaakar ed satan a katuaan. Akin a labay na maaron Dios a sikatoy takotan tayo? Anton klase na takot so nepeg tayon ipatnag ed sikato? Antoray nagunggona tayo no takotan tayo so Dios? Konsideraen tayo irayan tepet legan tayon itutuloy a singbaten so koma-34 a Salmo.

No Akin a Takotan so Dios

3. (a) Panon yon momoriaen so ganggan a takotan so Dios? (b) Akin a maliket iramay ontatakot ed si Jehova?

³ Bilang Manamalsa tan Soberanon Manuley ed uniberso, si Jehova so manepeg tayon takotan. (1 Pedro 2:17) Balet, satan a takot et aliwan alablabas a pankebbiew ed sakey a maruksan dios. Mapagalang itan a takot lapud si Jehova et aliwan makapakebbiew. Kabaliksan met na satan ya antakot tayo so manggawa na agmakapaliket ed sikato. Say takot ed Dios et matalonggaring tan pankaabigan a klase na takot, aliwan  makapagonigon odino makapagiwgiw. Labay na “maliket a Dios” tayon si Jehova a panliketan na pinalsa ton totoo so bilay. (1 Timoteo 1:11, NW) Balet pian nagawa itan, kaukolan itayon manbilay a mitunosan ed saray kakaukolanen na Dios. Parad dakel a totoo, mankabaliksan itan ya umanen day estilo na kabibilay da. Amin a manggagawa na nakaukolan a pananguman ed bilay da so makaeksperiensya ed katuaan na saray salita nen salmistan David: “O tawayan yo et nanengneng yo a si Jehova maong: mapalar so too a manmatalek ed sikato. O takotan yo si Jehova, sikayo mamasimpit to, ta anggapo so ukol ed saray ontakot ed sikato.” (Salmo 34:8, 9) Amin ya ontatakot ed si Jehova so walaan na bengatlan magnayon a pakagunggonaan da lapud maabig a relasyon da ed Dios.

4. Anton panamaseguro so inter nen David tan si Jesus?

⁴ Imanoen a pinagalangan nen David iray papatumbok to, a tinawag to iran “mamasimpit,” odino masanto, unong ed panguusar da ed satan a termino diad panaon da. Kabiangan ira na masanto a nasyon na Dios. Sikara met so angirisga ed bilay da pian tumboken si David. Anggaman ontatakas ira ed si Arin Saul, matalek si David a lawas itarya nen Jehova iray manunan pankaukolan da. Oniay insulat nen David: “Saray kilaw a leon naukolan ira tan manlikna ra na eras, balet saray mananap ed Jehova ag-ira naukolan naani na anto a maong a bengatla.” (Salmo 34:10) Ontan met so impaseguro nen Jesus ed saray papatumbok to.​—Mateo 6:33.

5. (a) Anton klase na totoo so maslak ya ontutumbok ed si Jesus? (b) Antoy insimbawa nen Jesus nipaakar ed itatakot?

⁵ Karaklan ed saray dinmengel ed si Jesus et duruka tan ordinaryon Judio. Kanian, “inabagey to ra, lapud maermen tan abuybuyak ira, a singa saray karnero ya anggapoy pastol da.” (Mateo 9:36) Kasin makapampakpel irayan totoo ya ontumbok ed si Jesus? Pian nagawaan da itan, kaukolan dan bayuboan so takot ed si Jehova, aliwan diad totoo. Oniay inkuan nen Jesus: “Agkayo antakot ed saray mamatey na laman, et kayari to anggapo la so arum a nayarian da a gawaen. Ingen ipasakbay ko ed sikayo no siopa so takotan yo; takotan yo man, so kayari pamatey to wala so pakayari to a mangipelag ed impierno; on kuan ko ed sikayo, Sikato so takotan yo. Agta nalako so limaran anuyaw ed duara a kuarta? et anggan sakey ed sikara agnalingwanan dia ed arap na Dios. Anggan saray buek na ulo yo, abilang iran amin, Agkayo antakot; mamabli kayo nen saray dakel ya anuyaw.”​—Lucas 12:4-7.

6. (a) Antoray salita nen Jesus a mamapabiskeg ed saray Kristiano? (b) Akin a sankaabigan ya alimbawa si Jesus nipaakar ed itatakot ed Dios?

⁶ Sano saray ontatakot ed si Jehova so desdesen na kakabusol da ya ontundan manlingkor ed Dios, nayarin nonoten da iyan simbawa nen Jesus: “Amin a mangipatua ed siak ed arap na saray totoo, sikato so ipatua met na Anak na too ed arap na saray angheles na Dios: Balet say mangiburi ed siak ed arap na saray totoo niburi naani ed arap na saray angheles na Dios.” (Lucas 12:8, 9) Saratan a salita so mamapabiskeg ed saray Kristiano, nagkalalo la diad saray bansa a sebel so tuan panagdayew. Sikara so maalwar a mantutultuloy ed pangidadayew da ed si Jehova diad Makristiano iran pantitipon tan diad mapublikon ministeryo ra. (Gawa 5:29) Impanengneng nen Jesus so sankaabigan  ya alimbawa ed panangipatnag na “maridios a takot.” (Hebreos 5:7, NW) Oniay impasakbay na mapropetikon Salita nipaakar ed sikato: “Say espiritu nen Jehova manayam naani ed tapew to, say espiritu . . . na takot ed Jehova. Et say liket to wala naani ed takot ed Jehova.” (Isaias 11:2, 3) Kanian, si Jesus so kualipikadon tuloy a mangibangat ed sikatayo nipaakar ed saray gunggona na itakot ed Dios.

7. (a) Panon a saray Kristiano et singa met la kinmiwas ed samay imbitasyon nen David? (b) Panon a naalig na atateng so maabig ya ehemplo nen David?

⁷ Amin a mangaalig ed alimbawa nen Jesus tan manguunor ed saray bangat to et singa met la kinmiwas ed samay imbitasyon nen David, a kuan to: “Gali dia, sikayo anak, talineng kayo ed siak: ibangat ko ed sikayo so itakot ed Jehova.” (Salmo 34:11) Natural labat a tawagen nen David iray papatumbok to bilang ‘ananak’ lapud sikatoy impasen dan lider da. Tinulongan nen David a mismo iray papatumbok to ya ontakot ed Dios ta pian sikaray mankakasakey tan makagamor na pabor na Dios. Agaylan abig ya alimbawa itan parad Kristianon atateng! Inikdan ira nen Jehova na autoridad a mangibangat ed ananak da diad “kadudusa tan panamilin na Katawan.” (Efeso 6:4) Diad inagew-agew a pangitongtong day espiritual iran bengatla ed ananak da tan diad regular a pangiyaral da na Biblia ed sikara, natulongan na atateng iray malangwer nin ananak da a manliket ed bilay da diad itakot ed si Jehova.​—Deuteronomio 6:6, 7.

No Panon Tayon Agamilen so Maridios a Takot

8, 9. (a) Akin a makapasagyat a tuloy so kabibilay a walaay takot ed Dios? (b) Anto so nalalanor ed panalwar ed dila tayo?

⁸ Unong ya asalambit la, say itakot ed si Jehova so agmamaandi na liket tayo. Oniay intepet nen David: “Siopa a too so manpirawat na bilay, tan aroen to so amayamay ya agew, pian makanengneng na maong?” (Salmo 34:12) Malinew a say itakot ed si Jehova so importante pian manbilay itayo na andukey tan maliket, tan nanengneng tayo so maong. Balet, mainomay labat ya ibagan, “Tatakotan ko so Dios.” Ingen ta aliwan mainomay itan a gawaen. Kanian, impaliwawa nen David no panon tayon nipatnag so maridios a takot.

⁹ “Bembenan mo so dilam a yarawi ed mauges, tan saray bibil mo ed pansalita ra na pamalpalingo.” (Salmo 34:13) Si apostol Pedro so apuyanan a mangaon ed sayan kabiangan na Salmo 34 kayari ton sinimbawa iray Kristiano a nepeg iran manaaroan bilang sanaagi. (1 Pedro 3:8-12) Say pamemben tayo ed dila tayo a yarawi ed mauges et mankabaliksan a paliisan tayoy mangikayat na makaderal a tsismis. Tan lawas tayon panggunaetan so magmaliw a makapabiskeg sano mitotongtong itayo ed arum. Niarum ni, panggunaetan tayoy magmaliw a makpel tan mansalita na katuaan.​—Efeso 4:25, 29, 31; Santiago 5:16.

10. (a) Ipaliwawa so kabaliksan na ipaliis ed mauges. (b) Anto so nalalanor ed panggawa na maabig?

¹⁰ “Taynan [yo] so mauges, tan manggawa [kayo] na maong; anap yo so kareenan tan sikato so usilan yo.” (Salmo 34:14) Papaliisan tayo iray bengatlan kokondenaen na Dios, a singa say seksual ya imoralidad, pornograpiya, panagtakew, espiritismo, karawalan, panagbuanges, tan panagdruga. Agtayo labay so panligliwaan a mangipaparungtal na saray bengatlan makapadimla. (Efeso 5:10-12) Imbes et usaren tayo so panaon tayo a manggawa na maabig. Say sankaabigan a nagawaan tayo et say regular a pibiang ed panangipulong ed Panarian tan panaggaway babangatan, a tulongan tayo so arum a makagamor na kilalaban. (Mateo 24:14; 28:19, 20) Kabiangan met ed panggawa na maabig so pamparaan tan iyatendi ed saray aral, pandonasyon parad sankamundoan a kimey, pangasikaso ed Kingdom Hall, tan pagmaliw a mapaga ed saray pankaukolan na saray Kristianon mairap-bilay.

11. (a) Panon a pinaneknekan nen David ed gawa to ya aanapen to so deen? (b) Anto so nayarin gawaen yo pian napansiansia so deen ed loob na kongregasyon?

¹¹ Si David so angipanengneng na maabig ya ehemplo ed panggegemtan na deen. Sikatoy amiduan awalaan na pankanawnawa a mamatey ed si Saul. Anggaman ontan, pinaliisan to so manggawa na karawalan tan diad saginonor et marespeton akitongtong ed ari, a maniilalon napapawil to so kareenan. (1 Samuel 24:8-11; 26:17-20) Anto so nayarin gawaen natan sano walay kipapasen a manisigensigen ed kareenan na kongregasyon? Nepeg tayon ‘anapen so kareenan, tan usilan’ odino gegemtanen itan. Kanian, no wala so  agpantatalosan ed baetan tayo tan say kapananisiaan tayo, tuloken tayo so simbawa nen Jesus: “Mipulangan ka nin unona ed agim.” Insan tayo la ituloy so arum nin paraan na panagdayew tayo.​—Mateo 5:23, 24; Efeso 4:26.

Nagamoran so Daakan a Tumang Diad Itakot ed Dios

12, 13. (a) Antoran bendisyon so nagamoran natan na saramay ontatakot ed Dios? (b) Anton baleg a tumang so magano lan panggayagaan na saray matoor a mandadayew ed si Jehova?

¹² “Saray mata nen Jehova wala ra ed matunong a too, tan saray layag to akalukas ira ed saray akis da.” (Salmo 34:15) Say salaysay nipaakar ed impideneng na Dios ed si David so mamaneknek a tua iratan a salita. Natan et nalilikna tayo so pirmin liket tan inkadeen na nonot lapud amta tayo a si Jehova so manbabantay ed sikatayo. Matalek itayo a sikatoy lawas mangitarya ed saray pankaukolan tayo, anggan sano pinasya lay pakadedetdetan tayo. Amta tayo ya unong a nipasakbay, amin a tuan managdayew so magano lan atakien nen Gog na Magog tan naimatonan da so “makapataktakot ya agew nen Jehova.” (Joel 2:11, 31; Ezequiel 38:14-18, 21-23) Balet antokaman so kipapasen a kidungetan tayo, onaplika ed sikatayo iray salita nen David: “Saray matunong a totoo onakis ira et si Jehova narengel to, tan iliktar to ra ya ipaway ed amin a gongonigon da.”​—Salmo 34:17.

¹³ Agaylan makapaliket a naimatonan so panaon ya itandoro la nen Jehova so baleg a ngaran to! Diad satan et onleppua so kapusoan tayo ed pandinayew tan panamagalang, tan say amin ya onsusumpa ed sikato et managmak na makapabaing a kadederal. “Say lupa nen Jehova onsumpa ed saray manggawa ed mauges, pian ekalen to so pakanodnonotan ed sikara dia ed dalin.” (Salmo 34:16) Agaylan kabaleg a tumang so pakaeksperiensya ed satan a sankaimportantian a kilalaban a mamaarap ed matunong a balon mundo na Dios!

Sipasipan a Makatulong ed Sikatayon Makapansungdo

14. Anto so ontulong ed sikatayo a makapansungdo anggaman ed kairapan?

¹⁴ Kaleganan ni, nakaukolan itayon mansungdo pian makapantultuloy itayon ontulok ed si Jehova diad sayan mauges tan maruksan mundo. Makatulong a maong ed sikatayo so itakot ed Dios pian nabayuboan tayo so pagmaliw a matulok. Lapud manbibilay itayo la ed mapeligron panaon, nasasagmak na arum a lingkor nen Jehova so graben kairapan a pakakagonigonan tan pakakadismayaan da. Balet, sigpot iran makaseguro a no manmatalek ira ed si Jehova, tulongan to ra a makapansungdo. Peteg a makaligliwa iray salita nen David: “Si Jehova asingger ed saray wala ed kipapasen na sakey a nabtagan na puso; tan ilaban to so totoo a wala ed sakey a kamarerwa a masakit ed panagbabawi.” (Salmo 34:18) Makapaseseg ta oniay inkuan ni nen David: “Amayamay so pakapaermenan na matunong: balet si Jehova iliktar to ya ipaway ed saraya ya amin.” (Salmo 34:19) Anggan panon lan karakel so kairapan a sasagmaken  tayo, naspot so pakayari nen Jehova a mangiliktar ed sikatayo.

15, 16. (a) Anton desyang so akabatan nen David kayarin tuloy na impangisulat to ed Salmo 34? (b) Antoy ontulong ed sikatayo pian nasungdoan iray subok?

¹⁵ Kayarin tuloy ya insulat nen David so Salmo 34, abalitaan to so asagmak na saray manaayam ed syudad na Nob, sanen si Saul et impapatey to ra pati say karaklan a saserdote. Maseguro a pirmi so pakakagonigon nen David sano nanonotan to a say inyakar to diman so sengegan na insanok nen Saul! (1 Samuel 22:13, 18-21) Agpankelawan a si David so kinmerew na tulong ed si Jehova, tan seguradon sikatoy aligliwa ed ilalon kioli na “saray matunong” diad arapen.​—Gawa 24:15.

¹⁶ Natan et napapabiskeg itayo met ed ilalon kioli. Amta tayo ya anggapo so nagawaan na kabusol tayo pian permanente itayon naderal. (Mateo 10:28) Imbalikas met nen David so kombiksion to diad oniaran salita: “Sikato yapiger to so amin a pukepukel [na matunong]: pian agnaputer so sakey ed sikara.” (Salmo 34:20) Satan a bersikulo so literal ya asumpal ed si Jesus. Anggaman sikato so maruksan pinatey, anggapo ed saray pukel to so ‘aputer.’ (Juan 19:36) Bilang kaaruman a kiyaplikaan na Salmo 34:20, ipapaseguro na satan ed sikatayo ya antokaman a subok so kidungetan na saray alanaan a Kristiano tan say kakaiba ran “arum a karnero,” sikara so agpermanentin naderal. Saray pukel da so agbalot naputer, diad piguratibon panangibaga.​—Juan 10:16.

17. Anton desyang so manatalaran ed saray agmagbabawin mamubusol ed totoo na Dios?

¹⁷ Duma balet so kipapasen na saray marelmeng. Agmanbayag et anien da so mauges ya intanem da. “Say mauges pateyen to so bagel; tan saray manggula ed matunong a too nadusa ra.” (Salmo 34:21) Amin a mantultuloy ya onsumpa ed totoo na Dios so managmak na sankagrabian a desyang. Sano omparungtal la si Jesu-Kristo, sikara so “mantepel na dusa a salanti andi-anggaan a kabalang da.”​—2 Tesalonica 1:9.

18. Diad anton pantalos ya arondon la so “baleg ya ulop,” tan anto so naeksperiensya ra diad arapen?

¹⁸ Anampot so salmo nen David panamegley na sarayan makaligliwan salita: “Si Jehova dondonen to so kamarerwa na saray ariripen to; tan anggapo a balot ed saray manmatalek ed sikato so nadusa naani.” (Salmo 34:22) Sanen magano lan manampot so 40 taon ya uley na Arin David, oniay inkuan to: “[Say Dios so] anondon na kamarerwak ed amin a kasegsegangan.” (1 Arari 1:29) Singa si David, saray ontatakot ed si Jehova so agmanbayag et mannodnonot labat la ed apalabas tan manliket ira lapud anggapo so antokaman a pakakonsiensiaan da nisengeg ed kasalanan tan ed impakatalona ra ed amin a subok ed sikara. Maslak ya alanaan a Kristiano so akaawat la na mangatatawen a tumang da. Say “baleg ya ulop” a manlalapud amin a nasyon so kaiba la natan na saray nakdaan ya agagi nen Jesus diad panlilingkor ed Dios, kanian walaan la ra na malinis a talindeg ed imaton nen Jehova. On, lapud aagamilen da so pananisia ed makarondon a pakayari na niyibung a dala nen Jesus. Kaleganan na Sanlibon Taon ya Uley nen Kristo, iyaplika ed sikara so amin lan gunggona na dondon bagat tan magmaliw la ran ayadyari a totoo.​—Apocalipsis 7:9, 14, 17; 21:3-5.

19. Anto so determinadon gawaen na saray kabiangan ed “baleg ya ulop”?

¹⁹ Akin ya ipagamor irayan amin a bendisyon ed “baleg ya ulop” a mandadayew ed Dios? Lapud determinado iran mantultuloy ya ontakot ed si Jehova, a sikatoy panlingkoran da tekep na pirmin pandinayew tan mapagalang a katutulok. Talagan maliket so bilay tayo sano tatakotan tayo si Jehova tan ontulong iya ed sikatayo pian ‘nabembenan so peteg a bilay,’ salanti, andi-anggaan a bilay ed balon mundo na Dios.​—1 Timoteo 6:12, 18, 19; Apocalipsis 15:3, 4.

Kasin Natandaan Yo?

• Akin a nepeg tayon takotan so Dios, tan anto so kabaliksan na itakot ed sikato?

• Panon a mangapekta ed kondukta tayo so maridios a takot?

• Antoran gunggona so nagamoran ed pagmaliw a matakot ed Dios?

• Antoran sipan so ontulong ed sikatayo pian makapansungdo?

[Tepetepet Parad Panagaral]

[Litrato ed pahina 26]

Saramay ontatakot ed si Jehova so onkikiwas a maal-alwar sano nidunget ira ed pananebel

[Litrato ed pahina 28]

Say sankaabigan a nagawaan tayo ed kapara tayon too et say panginabang ed sikara na maong a balita nipaakar ed Panarian